Anto enanɛi wakashimbamɛ lo Mvula k’elola

Nɔa la nkumbo kande ndo waa nyama wakɔtɔ lo waato wa luudu. Jehowa akadihe lokuke ndo mvula kakatatɛ ndɔ. Mvula kakalɔ efula polo ndo waato ntatɛ teha. L’ekomelo, nkɛtɛ k’otondo kakalole l’ashi. Anto wa kɔlɔ tshɛ waki l’andja wa waato wa luudu wakavu. Koko, Nɔa la nkumbo kande wakashimbamɛ l’etei. Onde wɛ kokaka nkanyiya ɔngɛnɔngɛnɔ waki la wɔ lo woho wakawakitanyiya Jehowa?

Mvula kakalɔ nshi 40 la etsho 40 ndo oma laasɔ tɔ kakahembɔ. Ashi wakayakitakitaka yema yema. L’ekomelo, waato wa luudu wakatemala l’akona. Koko, ashi waki paka efula l’ahole tshɛ, diakɔ diele Nɔa la nkumbo kande takawakoke ntomba oma lo waato wa luudu mbala kakɔ ɔtɔi.

Ashi wakayomaka yema yema. Nɔa la nkumbo kande wakatshikala l’etei ka waato wa luudu ndekana ɔnɔnyi ɔtɔi. Oma laasɔ, Jehowa akawatɛ dia vɔ kokaka ntomba oma lo waato wa luudu oya lo kɛnɛ kakɛnamaka oko andja w’oyoyo. Vɔ waki la lowando l’efula le Jehowa lo woho wakandashimbɛ ndo wakɛnya dui sɔ lo nambola Jehowa olambo.

Jehowa akangɛnangɛna olambo ɔsɔ. Nde akalake dia nde halanyaki nto diangɔ tshɛ dia la nkɛtɛ l’elola pondjo. Oko djembetelo ya daka sɔ, nde akasale ngolo ka ntondo kakɛnama l’olongo. Onde wɛ atɛnaka ngolo?

Oma laasɔ, Jehowa akatɛ Nɔa la nkumbo kande dia vɔ mbota ana ndo ndodia nkɛtɛ.