ƆKƆNDƆ 10
Shaka ya mvula k’elola
L’ANDJA a wâto a luudu, anto wakatetemala la woho akɔ wâmɛ wa lɔsɛnɔ laki lawɔ ntondo. Wakatetemala la mbidja tamu ɔnɛ ndoko Mvula k’Elola kayɔlɔ. Wakahombe nyomɔla efula nto ɔtɛkɔya. Koko, tɔ̂la tawɔ takakomɛ lo shashimuya.
La shashimuya, mvula kakatatɛ ndɔ. Ashi wakatatɛ la pongɔ lohongɔ oma l’olongo wate kana oko woho watowohongolaka ashi oma lo kati. Nɔa kombuta kashi! Koko, anto akina tshɛ komonga la diaaso nto dia mbɔtɔ lo wâto a luudu. Jehowa akashile la diha lokuke la wolo.
Yema tshitshɛ tsho, oseka dianda tshɛ dia la kɛtɛ kana okidi wakalole l’ashi. Ashi wakakome oko ɛkɛdi a weke. Wakatatɛ la nyukola esongo ndo mingitola ave a weke, ndo mbidja lohelo la mamba. Anto waki la wɔma w’efula. Wakatatɛ la mbudɛ l’akona woleki etale. Yee, ande woho akawakombolaka ɔnɛ wotohomba mbokɛ Nɔa ndo mbɔtɔ lo wâto a luudu etena kakawâtshikɛwɔ hwe lee! Koko kakianɛ hayeyama nto.
Ashi waki lo tadɛ paka mbudɛ tsho. L’edja ka nshi 40 l’etsho 40, ashi waki paka lo pongɔ tsho oma l’olongo. Ashi wakakome l’ɛtɛ w’akona, ndo aha tshimbatshimba akona w’etale tshɛ wakadinde l’ashi. Omalɔkɔ, oko akate Nzambi, anto tshɛ, la wa nyama yaki l’andja a wâto a luudu yakavu. Koko onto tshɛ laki l’etei akake.
Nɔa l’anande wakakambe olimu wa dimɛna efula, ɔsɛlɛlɔ a wâto wa luudu. Ashi waki lo tadiya wâto akɔ, ndo wakatatehaka loteha l’ɔlɔlɔ tshɛ lâdiko di’ashi. Ko lushi lɔmɔtshi, lam’akahembo mvula, yanyi yakatatɛ mbalɛ. Nde ɛnamelo kakonge lee! Aki paka ashi a wake ato ahole tshɛ. Ndo ɛngɔ ɔtɔi kakɛnamaka aki paka wâto a luudu wakatehaka lâdiko awɔ.
Ahangamende tshɛ wakashishɔ. Takawakoke pɛnyahɛnya anto kânga yema nto. Vɔ tshɛ wakashile la mvɔ kâmɛ l’anyangɛwɔ ndo l’anto wa kɔlɔ tshɛ. Ko kakɔna kakakomɛ washɛwɔ na?
Ahangamende waki la washɛwɔ wakatshikitana l’anto wele oko sho. Vɔ waki andjelo wakaye la kɛtɛ dia ndjodjasɛ oko anto. Omalɔkɔ, lam’akalɔ Mvula k’Elola, vɔ komvɔ kâmɛ l’anto akina tshɛ. Vɔ wakatshike alemba awɔ w’anto wakawayasalɛ ko wakakalola l’olongo oko andjelo. Koko vɔ kombetawɔma nto dia mbɔtɔ l’atei a nkumbo k’andjelo waki Nzambi. Omalɔkɔ, vɔ wakakome andjelo waki Satana. Lo Bible vɔ mbelamɛka ɔnɛ: ɛdiɛngɛ.
Nzambi akatome lɔpɛpɛ la kɛtɛ ko ashi wa Mvula k’Elola wakatatɛ la moma. L’ɔkɔngɔ wa ngɔndɔ tshanu, wâto a luudu akatahemaka l’ɔtɛ wa dikona dimɔtshi. Nshi efula yakete, ko wanɛ waki lo wâto a luudu wakalengɛ l’andja ndo wakɛnyi ɛtɛ w’akona. Ashi wakatomaka paka moma tsho.
L’ɔkɔngɔ, Nɔa akayotondja fudu mɔtshi y’odima yelɛwo dingwangwa oma lo wâto a luudu. Yɔ yakafumbɔ kanda ya wenya y’ɔlɔlɔ ko yakakalola nɛ dia yɔ kotana dihole di’ɔlɔlɔ la kɛtɛ dia mbahema. Yɔ yakakɛlakɛlaka ko ndjahemaka lâdiko dia wâto a luudu.
Nɔa akalange mbeya dia kana ashi wamboma la kɛtɛ, diɔ diakɔ diakandayotondjaka kudumba oma lo wâto a luudu dia mboyitoma. Koko ndo kudumba yakakalola nɛ dia yɔ kokondja dihole dia mbahema. Nɔa akayitome mbala ka hende nto ko yɔ yakatoyaka la dikatshi di’ɔlivɛ l’ɔlɔmɔ ayɔ. Omalɔkɔ, Nɔa akeye ɔnɛ ashi wamboma. Nɔa akatome kudumba osangɔ wa sato ko yɔ yakatokondjaka dihole dia wûmu dia mbidjasɛ.
Etena kakɔ Nzambi akatɛkɛta la Nɔa. Nde akawotɛ ate: ‘Tomba oma lo wâto a luudu. Ɔsa nkumbo kayɛ k’otondo ndo wa nyama yele lanyu.’ Vɔ waki lo wâto a luudu oleki yɛdikɔ y’ɔnɔnyi w’otondo. Omalɔkɔ, sho kokaka kanyiya ɔngɛnɔngɛnɔ waki lawɔ wa tomba l’andja nto ndo wa monga la lɔsɛnɔ!
Etatelu 7:10-24; 8:1-17; 1 Petero 3:19, 20.