ƆKƆNDƆ 20
Dina ambohomɔ mpokoso
ONDE wɛ ekɔ lo mɛna anto ango watatshu Dina a tênda? Nde ekɔ lo tatshu a tênda ana wa amato amɔtshi w’Ase Kanana. Onde she le Jakɔbɔ kokaka ngɛnangɛna dikambo dia nganɛ oka? Oko ekimanyielo dia sho kadimola lo dimbola sɔ, tohembe mbohɔ kɛnɛ kakakanaka Abarahama nde la Isaka lo dikambo dia amato w’Ase Kanana.
Onde Abarahama akalange di’ɔnande, Isaka, tshuka ɔna omoto l’Ose Kanana? Kema, nde konanga. Onde Isaka nde la Rɛbɛka wakalange di’ɔnawɔ, le Jakɔbɔ tshuka omoto l’Ose Kanana? Kema, vɔ konanga. Wɛ mbeyaka dikambo kona?
Dikambo di’Ase Kanana wakatɛmɔlaka tozambizambi ta kashi. Vɔ kondjala anto w’ɔlɔlɔ wa tshukana lawɔ kânga mbɔtɔ lawɔ ɔngɛnyi. Lâsɔ sho kokaka ndjashikikɛ dia Jakɔba kokoka ngɛnangɛna dia ɔnande mbɔtɔ l’ana amato w’Ase Kanana ɔngɛnyi.
Mɛtɛ, Dina akahomɔ mpokoso. Onde wɛ ekɔ lo mɛna dia pami k’Ose Kanana kele l’osato kengo ekɔ lo menda Dina? Lokombo lande Shɛkɛmɛ. Lushi lɔmɔtshi lam’akaye Dina dia ndjenda asekande, Shɛkɛmɛ akawonde ko akeyana lande la wolo. Ɔsɔ aki dikambo dia kɔlɔ efula, nɛ dia paka atshukani ato mbahomba mbeyana. Dikambo dia kɔlɔ nɛ diakasalɛ Shɛkɛmɛ Dina, diakatondja mpokoso k’efula.
Lam’akoke anango Dina w’apami kɛnɛ kakôkomɛ, vɔ wakomala efula. Ahende a l’atei awɔ, Simɛyɔna nde la Lɛwi, wakomala hakoke, wakɔsɛ tokuwa tawɔ ndo wakatombe l’osomba ko vɔ tonda apami la shashimuya. Vɔ l’anangɛwɔ, wakadiake Shɛkɛmɛ ndo apami akina tshɛ. Jakɔbɔ akomala nɛ dia anande wakasale dikambo dia kɔlɔ sɔ.
Woho akɔna wakatatɛ ekambokambo kɛnɛ na? Nɛ dia Dina akasange ɔngɛnyi l’anto wahalɛmiya ɛlɛmbɛ wa Nzambi. Sho hatolange nyanga weoho w’angɛnyi wa ngasɔ, shi mɛtɛ?