Mbɔtwɛlɔ

Avɛsa wendana la lɔsɛnɔ l’Okristo ekɔ dibuku diayokokimanyiya lo yoho ya wɔdu dia ntana avɛsa ndo bɛnyɛlɔ diakoka kokimanyiya dia ndɔshana l’ekakatanu wahomana la yɛ. Diɔ diayokokimanyiya nto dia ntana avɛsa wa lo Bible wahombama dia nkeketsha anto akina ndo mbakimanyiya dia vɔ mbɔsa tɛdikɔ t’amɛna tangɛnyangɛnya Jehowa. Sɔna ɔtɛ a dui weyɛ l’ohomba. Ɔtɛ a dui tshɛ ekɔ la ambola w’ohomba ndo l’avɛsa wele la bɛnyɛlɔ dia tomondo dia lo Bible. (Enda kiombo “Woho wa nkamba la dibuku nɛ.”) Wɛ ayotanaka esadi eto avɛsa wayokokimanyiya l’alako, ɛlɔmbwɛlɔ ndo ekeketshelo k’oma l’Ɔtɛkɛta wa Nzambi. Wɛ ayotana nto akambo w’ohomba wa nkahana l’anto akina, mbuta ate avɛsa wa lo Bible wakoka nkeketsha timba tawɔ, mbakimanyiya dia ndɔshana l’ekakatanu wele la wɔ, mbasha alako ndo ekeketshelo.

Woho wa nkamba la dibuku nɛ

Dia ntana ɔtɛ a dui, wɛ koka nkamba la dihole diadjawɔ tshɛkɛta mɔtshi dia nsala eyangelo kana nyanga lo tenyi. Avɛsa wendana la lɔsɛnɔ l’Okristo kahanyema lo tenyi esambele: Ekakatanu, Lɔkɛwɔ, Etshumanelo, Lɔsɛnɔ la lushi la lushi, Nkumbo, Lonyuma ndo Waonga. Ɛtɛ w’awui efula wayotanemaka l’etenyi kɛmɔtshi l’atei wa tenyi nɛ. Sɔna etenyi kɛmɔtshi kele layɛ ohomba ndo holɔ l’ɛse dia ntana ɔtɛ a dui watayayange. Koko, naka wɛ heye l’etenyi kele ɔtɛ a dui watayayange, wɛ koka klikɛ lo nsɔna diangɔ tshɛ ko wɛ polɔ l’ɛse lo listɛ l’ɛtɛ w’awui polo etena kayoyotana ɔtɛ a dui weyɛ l’ohomba. L’ɛse k’ɔtɛ a dui tshɛ, wɛ ayotana tɔtɛ t’awui tahɔnyi efula tatɔtɔmiya ɛtɛ w’awui. Tɔtɛ t’awui tɔmɔtshi tekɔ ditelo ndo tokina ambola. Etena kayoyotadiaka avɛsa woshilami wele l’ɛse k’ɔtɛ a dui, kana yimba lo woho wasukɛ avɛsa akɔ etelo kana woho wakadimolawɔ ambola. Mbala mɔtshi, ɔtɛ a dui ɔmɔtshi wayokahanyema lo totenyi efula dia kokimanyiya dia wɛ ntana kɛnɛ katayayange esadi. Lo ahole amɔtshi, avɛsa akina wakakotshama lo etenyi kata ɔnɛ “Enda ndo lo”. Avɛsa akɔ mbishaka tokanyi tendana l’ɔtɛ a dui. Mbala efula, wɛ ayotana nto “Bɛnyɛlɔ dia lo Bible diakoka kokimanyiya”. Etelo kɛmɔtshi mbɔtshiyaka dui di’ohomba kana wetshelo ɔmɔtshi watanema lo divɛsa dioshilami. Etena kayoyotadiaka divɛsa dimɔtshi, kamba la ditelo sɔ dia nkana yimba etena katayadia avɛsa.

Dibuku nɛ hashile avɛsa tshɛ wendana l’ɔtɛ a dui. Koko diɔ diekɔ ehomɔ k’ohomba efula kayokokimanyiya dia wɛ ntatɛ nsala eyangelo. (Tok 2:1-6) Dia nyomotshimola, kamba la ɔnɔngɔ wa l’atei wa dikatshi tshɛ ndo la nɔtɛ ya wekelo ya lo Bible—Ekadimwelo k’andja w’oyoyo. Kamba la Dibuku di’eyangelo di’Ɛmɛnyi wa Jehowa kana Index des publications de Témoins de Jéhovah dia mbeka awui akina efula wendana la divɛsa dimɔtshi ndo woho wa nkamba la diɔ. Yanga dia mbeya awui weke oma la ntomba dia wɛ ndjashikikɛ dia wɛ ekɔ la eokelo k’ekomelo kendana l’akambo wa mɛtɛ w’oma l’Afundelo.

Tekɔ l’eshikikelo dia Avɛsa wendana la lɔsɛnɔ l’Okristo wayokokimanyiya dia wɛ monga la lomba, ewo ndo la eokelo katanema l’Afundelo w’Ekila. Etena kayoyokambaka la dibuku nɛ, wɛ ayoleka monga l’eshikikelo dia “ɔtɛkɛta wa Nzambi wekɔ la lɔsɛnɔ ndo la wolo.”—Hɛb 4:12.