WESA NSAKI KƐNYISHA ONTO
WEKELO 7
Onga l’etete
Tɔndɔ: “Vɔ wakatetemalaka mbetsha ndo mbewoya lokumu l’ɔlɔlɔ lendana la Kristo Yeso aha la mpekɔ.”—Etsha 5:42.
Kɛnɛ kakasale Pɔɔlɔ
1. Enda VIDƐO, kana adia Etsha 19:8-10. Oma laasɔ, kana yimba lo ambola wayela anɛ:
Lo dihole dia ntshika nsambisha etena kakandalɔshamaka, ngande wakatetemala Pɔɔlɔ nkimanyiya wanɛ wakɛnyaka nsaki?
Mbala ngana yakakalola Pɔɔlɔ tetsha wanɛ wakɛnya nsaki ndo l’edja ka ngande kakandasale dui sɔ?
Wetshelo akɔna wakondjaso oma le Pɔɔlɔ?
2. Sho pombaka mbidja welo ndo mbɔsa wenya dia nsala wendelo w’eyoyo ndo ntatɛ mbeka l’anto Bible.
Okoya Pɔɔlɔ
3. Kokalole ndjenda onto lo wonya woleki dimɛna le nde. Yambola wate: ‘Lende ndo wonya akɔna wayoleka dimɛna dimi ndjowenda? Wonya akɔna wayondonga l’etena ka sho nsawola?’ Onga suke dia ndjowenda oyadi wonya woshande bu dimɛna le yɛ.
4. Mbolande lushi lakokayɛ ndjowenda. L’ekomelo ka sawo tshɛ, nyokane lushi lakokayɛ ndjowenda nto. Lɛnya lushi lokoshande.
5. Onga l’elongamelo. Tosasɛke dia mbuta di’onto lahaleke tanema la ngelo kana lele la akambo efula bu la nsaki. (1 Kɔr. 13:4, 7) Koko, onga la wɛdimo, tetemala mbidja welo dia ndjowenda, koko yashikikɛ diaha mbetsha wenya wetshetsha.—1 Kɔr. 9:26.