“Totombole Nzambi l’Ɔngɛnɔngɛnɔ”

Onde Wɛ Ayɔtɔ lo Losanganya la Woke Lɔsɔ?

ƆNGƐNƆNGƐNƆ! Onde wɛ atôkaka tshɛkɛta shɔ l’etena kɛnɛ k’ofukutanu? Mɛtɛ, tita sango hatosha ekɔkɔ efula wa sho ngɛnangɛna. Ata wa l’asa dibila, ndjala kambodiangana l’ahole tshɛ, ohombelo w’olimu, olanyelo wa kɛtɛ, ashi la hiɛlɛlɛ, osukusuku w’akambo wa pɔlitikɛ, akambo wa kɔlɔ​—⁠awui asɔ tshɛ kema akambo wakoka ngɛnyangɛnya otema efula, shi mɛtɛ?

Ɛlɔ kɛnɛ, anto efula ndjashaka l’ɛngɛnɔngɛnɔ wakokawɔ kondja lo lɔsɛnɔ. Ko ɔngɛnɔngɛnɔ kɛdikɛdi na? Ɔngɛnɔngɛnɔ nembetshiyamaka oko “eokelo k’ɔlɔ; ɔngɛnɛngɛnɛlɔ.” Aha anto efula mbakondja ɔngɛnɔngɛnɔ wa mɛtɛ, ndo etena kôkondjawɔ, vɔ towokaka paka lo tshanda tsho.

Koko, Bible akatatshi lo dikambo di’etena kaso kɛnɛ ɔnɛ: “Diako mbata Khumadiondjo, [Jehowa] ati: Ekambi ami wayongenangena. Ekambi ami wayimba esambu la etema w’ongenongeno.” (Isaya 65:​13, 14) Woho akɔna wakoka dikambo sɔ salema?

Dia wɛ kondja okadimwelo, tambokelɛ dia ndjɔ̂tɔ lo losanganya lɔmɔtshi la distrikɛ l’Ɛmɛnyi wa Jehowa layosalema l’ɔnɔnyi 1995. Losanganya lakɔ lekɔ l’ɔtɛ a dui w’ɔnɛ: “Totombole Nzambi l’Ɔngɛnɔngɛnɔ,” ndo hawɔlɔmbɛ ndoko dikuta di’onto mbɔtɔ lɔkɔ. Ekongelo ka nshi shato ya losanganya ayoyala l’alako w’oma lo Bible, diɛnyɛlɔ, ɛkɛtshanyelo, ndo akambo akina efula. Lam’ayosalemaka asawo wotshikitanyi wa l’ekongelo kakɔ, wayoka epole ɔsɛkɛ lo ɔtɛ a dui: ɔngɛnɔngɛnɔ.

Losanganya la woke lɔsɔ layotatɛ lo wodja wa États-Unis, lo Mam’ɛkɔngɔ la Tange ndo layotetemala l’esomba ekina wa l’andja w’otondo polo ndo l’etatelo k’ɔnɔnyi 1996. Ondo losanganya lɔmɔtshi layosalema lo dihole diosukanyi layɛ. Lande na kahayambola Ɛmɛnyi wa Jehowa wadjasɛ lo lɛtshi lanyu la kɛtɛ? Tambokelɛ l’ɔngɛnɔngɛnɔ tshɛ dia wɛ mbɔtɔ lɔkɔ.