Wembola W’oma Le Ambadi
Mbala mɔtshi, sho tokaka anangɛso wata kana walɔmba ɔnɛ Diolelo diaki Nzambi diaye lanɛ la nkɛtɛ. Onde tshɛkɛta shɔ sunganaka?
Lo mbuta mɛtɛ, Afundelo hɛnya ɔnɛ ngasɔ mbayoya diolelo. Diolelo diaki Nzambi diekɔ diolelo dia l’olongo. Diɔ diakɔ diakakoke ɔpɔstɔlɔ Paulo funda ate: “Khumadiondjo ayuntshungula uma lu elimu [wa] kolo tshe, ayunshimbela edja ndu lu diulelu diandi dia l’ulungu. Lutumbu layali le ndi pundju pundju! Ayali osoku!”—2 Timote 4:18; Mateu 13:44; 1 Koreto 15:50.
Diolelo diakatatɛ mbolɛ l’olongo lo 1914, ndo diɔ hadiomɔki pondjo oma lɛkɔ ko ndjoya oya lo Paradiso ka lanɛ la nkɛtɛ kana lo dihole dikina. Yeso Kristo mbele Nkumekanga ka Diolelo. Oko wende Nkumekanga, Yeso ekɔ la lowandji lâdiko di’andjelo. Ɔnkɔnɛ, dihole diande diasungana dia lowandji diekɔ lo lonya l’omi la Nzambi l’olongo. Akristo w’akitami ntshɔka l’olongo dia tôlɛ kâmɛ la nde oko nkumi ya dikanga ndo oko ɛlɔmbɛdi.—Efeso 1:19-21; Enyelo 5:9, 10; 20:6.
Lâsɔ kɛdikɛdi hatoyokoka nɔmbaka Nzambi kɛnɛ kofundami l’etenyi kɛmɔtshi ka Dɔmbɛlɔ dia Shɛso kata ɔnɛ: “Diulelu diaye diayi. Lulangu laye latshami la kete uku atshamalo l’ulungu”? (Mateu 6:10) Kema, dɔmbɛlɔ sɔ bu kɔlɔ ndo diɔ diekɔ la tokitshimudi efula.
Lo nshi yayaye, Diolelo diaki Nzambi diayotsha akambo wa mamba lanɛ la nkɛtɛ, ndo dui sɔ mbatoyalaka lo timba taso wonya walɔmbaso ndo watɛkɛtaso ɛtɛkɛta wafɔna la wɛnɛ wofundami lo Dɔmbɛlɔ dia Shɛso. Oko ɛnyɛlɔ, Danyele 2:44 mbutaka ɔnɛ Diolelo sɔ ‘diayoya’ dia ndjolanya wedja tshɛ, ko diɔ diayolɛ nkɛtɛ kɛnɛ k’otondo. Enyelo 21:2 tɛkɛtaka dikambo dia Jerusalɛma y’Oyoyo yayaholɔ oma l’olongo. Jerusalɛma y’Oyoyo kengama l’Akristo w’akitami 144 000, wanɛ wayoyala otshukami wa Kristo. Vɔ wekɔ nto ekitɔ kâmɛ la Kristo lo Diolelo sɔ. Ɔnkɔnɛ, Enyelo 21:2 ekɔ lo kɔndɔla woho wayowokotola yambalo yawɔ oya lo nkɛtɛ dia mbisha akanga wa kɔlamelo ɛtshɔkɔ wa mamba.—Enyelo 21:3, 4.
Edja ndo lam’ayokotshama pɔlɔfɛsi shɔ la kina y’amɛna efula, ayonga ɔlɔlɔ nshi tshɛ sho nɔmbaka Jehowa Nzambi lo ndjela ɛtɛkɛta wa Yeso w’ɔnɛ: “Diulelu diaye diayi.” Koko, sho pombaka mbohɔka ɔnɛ Diolelo sɔ hadiotoya oya l’okama wa Nkɛtɛ lo yoho ya mɛtɛ mɛtɛ. Ewandji wa lo Diolelo sɔ mbidjasɛ l’olongo, koko aha lanɛ la nkɛtɛ.