“Towatshanyake!”

“NAKA Ɔmɛnyi wa Jehowa ɔmɔtshi, koyanga Ɛmɛnyi ehende wambɔkɔkɔla lo soko diayɛ, towatshanyake!,” ɔsɔku mbakafunde jurunalɛ yelɛwɔ Corriere della Sera. Jurunalɛ shɔ yakataka dikambo dimɔtshi diakasalema lo ngelo ka Treviso, l’Italie wa lo ngɛl’a nkushi, lo ngelo kakɔ omundji ɔmɔtshi w’okanda wa pami aki kwɛ la shisha falanga yande olekanyi dɔlara 600 y’Ase Amɛrika nɛ dia nde akatshanya Ɛmɛnyi ehende wakatshu dia towênda.

Lo ndjela jurunalɛ shɔ, Ɛmɛnyi ɛsɔ ehende wakakome la ntondo ka pami kɛsɔ ko vɔ mbotɛ ɛtɛkɛta ɛnɛ vate: “Ɛlɔ ekɔ lushi l’ɔlɔlɔ le yɛ. Sho tekɔ Ɛmɛnyi wa Jehowa, ndo tekɔ l’ɛngɔ kɛmɔtshi k’oshinga wolo efula kalangaso kosha.” Kam’akandoke ngasɔ, pami kɛsɔ k’otema ɛngɛnɔ kombamanya ɔtɛkɛta ko nde ndjiha lokuke.

Otondoyala pami kɛsɔ akahokamɛ, tshike nde oteya ɔnɛ Ɛmɛnyi ɛsɔ wakaye lakande dia ndjowosha tshapatapa yande yakawatɔngɔna l’okala watodjasɛka anto lo parkɛ. Ɔnkɔnɛ, Ɛmɛnyi ɛsɔ ndoko kakawahombe sala ele paka mbɔsa tshapatapa yakɔ la diangɔ tshɛ diaki lɔkɔ ko tokimɔ laka apulushi waki suke suke l’etenyi kɛsɔ ka ngelo. La wedi a pindju, apulushi wakɔshi tshapatapa yakɔ ko ndjikaloya le kangayɔ.

Jurunalɛ yelɛwɔ Il Gazzettino di Treviso yakafunde ɔnɛ: “Otondoyala onto ɔmɔtshi mbakahomɔ lokolo la kɔlɔ ngasɔ oko [Ɛmɛnyi] ɛsɔ ehende, tshike ondo nde . . . otokakatɛ lokema la falanga yaki lo tshapatapa shɔ. Koko Ɛmɛnyi wa Jehowa, anto wahomba monga la losembwe la tshɛ, hawokoke sala dui dia ngasɔ.”

Kakɔna katshutshuya Ɛmɛnyi wa Jehowa dia monga la “losembwe la tshɛ” na? Ele ngandji kokawɔ Nzambi la anyawɔ anto, lo ndjela wetshelo wa Yeso Kristo. (Mateu 22:​37-39) Diɔ diakɔ nto diatshɔ Ɛmɛnyi wa Jehowa lo luudu la luudu lo tasambishaka lokumu l’ɔlɔlɔ la ‘nkɛtɛ k’oyoyo’ ka dimɛna efula kakalake Jehowa Nzambi. Losango la ngasɔ l’elongamelo ndeka ɛngɔ tshɛ ka l’emunyi nɛmɔ la fwa!​—⁠2 Petero 3:⁠13.

[Caption on page 32]

[Box on page 32]

Onde Wɛ Nangaka Onto Ndja dia Ndjokenda Oka?

Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ di’endana l’anto. Naka wɛ nangaka mbeya awui akina kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.