Tɔtɛmɔlɛ Nzambi lo Mɛtɛ
Dia Nzambi mbetawɔ ɔtɛmwɛlɔ aso, vɔ pombaka mbika etshina l’akambo wa mɛtɛ. (Joani 4:23) Bible mɛnyaka dia atɛmɔdi wa mɛtɛ wekɔ l’‘etshumanelo ka Nzambi kasɛna, ekundji ndo osukɔ w’akambo wa mɛtɛ.’ (1 Timote 3:15) Wanɛ wakenga etshumanelo kaki Nzambi mbetawɔka akambo wa mɛtɛ wele lo Dui dia Nzambi, mbɔtɔnganyiyaka nsɛnɔ yawɔ l’akambo akɔ, mamɛka akambo akɔ ndo mbaewoyaka le anto wa lo nkɛtɛ k’otondo.—Mateu 24:14; Romo 10:9-15.
ƐMƐNYI WA JEHOWA mbeyamaka dimɛna oma l’olimu awɔ wa mbetsha anto Bible wasalema kakianɛ lo wedja ndekana 200. Vɔ mbekaka Bible ndo kietshaka anto oko akambo wa mɛtɛ aha la kisowola la waa filozofi y’anto. Onde wɛ mbeyaka wetshelo awɔ wotumbi oma lo Bible dimɛna? Anto efula mengengaka dia mpokamɛ Ɛmɛnyi wa Jehowa nɛ di’awui wa kɔlɔ wata anto lo lokombo lawɔ. Koko, tambɔlɔmba anto w’etema ɛlɔlɔ dia mbɔsa yɛdikɔ vamɛ dia menda kana akambo wetsha Ɛmɛnyi wa Jehowa wekɔ mɛtɛ kana kashi. Onto lɔsa yɛdikɔ shɔ y’ohomba hahombe mpokamɛ ditakataka di’anto. Anto efula wanɛ wakatshe eyangelo awɔ vamɛ wendana la wetshelo w’Ɛmɛnyi wa Jehowa wakakondja wahɔ hakoke oma lɔkɔ.
Ewo k’Akambo wa Mɛtɛ Shidiyaka Wɔma
Tênde ɛnyɛlɔ kaki Eugenia. Nde akodiama lo nkumbo k’aseka Mupɛ. She aki ɔmɔtshi a l’atei w’anto wakalɔngɔsɔlaka oyelo wa papa l’ɔrɔma la Mexico lo 1979. Lam’akandatembolaka angɛnyi ande, Eugenia akatohomanaka l’Ɛmɛnyi wa Jehowa. L’ekimanyielo kawɔ, nde akamɛ sɛdingola kɛnɛ kata Bible la yambalo tshɛ. Nde ate: “Laki la wɔma wa mamba l’etatelo. Lakashola akambo wa mɛtɛ! Koko, dikambo sɔ diakɛnyaka di’awui efula wakametawɔka ntondo waki kashi. Akambo waketawɔka nkumbo kami, angɛnyi ami, l’anto wakamalangaka efula waki tshɛ kashi. Dimi lakatshimbe yimba. Lakayambolaka dimɛmɛ ngande wayotsha nkumbo kami lo kɛnɛ kendana l’akambo w’eyoyo wakamashola. Lam’akatetaka nshi ndo l’ekimanyielo ka Jehowa, lakamɛ tondoya ohemba ɔsɔ. Lushi lɔmɔtshi, lakɔshi yɛdikɔ ya sawola l’ɔngɛnyi ami ɔmɔtshi wa lo nkumbo, nde aki ombetsha wa teoloji. Dimi lakawotɛ dia lekɔ la mposa k’efula ka mbishola akambo wa mɛtɛ. Nde akambutɛ ate: ‘Naka wɛ nangaka mbeya akambo wa mɛtɛ, kete wɛ la dia mɛnana l’Ɛmɛnyi wa Jehowa.’ ”
Dikambo diakokaka Eugenia wɔma mbakayôkomɛka, wakawotshanya oma la ngelo. Koko, Ɛmɛnyi wa Jehowa wakatetemala mbôkimanyiya lo nyuma. Nde ate: “Lakakeketshama efula dia mbeta l’akambo wa mɛtɛ wedi. Dimi lakɛnyi dia tena dimɔtshi lakahombaka ndɔ ta l’ɔkɔkɔ w’akambo wa mɛtɛ. Lakangɛnangɛna efula woho wakanongola Ɛmɛnyi wa Jehowa. Lakokaka dia lekɔ lo nangema l’atei w’etshumanelo k’Akristo. Mamema ɔlɔngɔswamelo waki Nzambi akakimanyiya dia dimi tondoya wɔma waki lami wa mbeta l’akambo wa mɛtɛ wedi kânga mbakasɛkɛ nkumbo kami.”
Tênde ɛnyɛlɔ kekina. Sabrina aki la mbekelo ka kɛtshanyaka la nkumbo kande awui wa lo Bible. Omalɔkɔ, wakayongaka la yoho mɔtshi y’‘ɔtɛmwɛlɔ wa nkumbo.’ Nde aki la mbekelo ka pomanaka l’ase ɛtɛmwɛlɔ ekina dia mbaɛnya munga yawɔ. Lam’akɔ̂sɛngola Ɔmɛnyi ɔmɔtshi wa Jehowa dia mbeka la nde Bible, nde aketawɔ mbala kakɔ ɔtɔi la kanyi ya ndjowɛnya ɔnɛ akambo wetawɔnde wekɔ kashi. Dimi mbohɔka dia: “L’ɔkɔngɔ wa dimi mbeka yɛdikɔ ya ndekana ɔnɔnyi, lakayokaka wɔma wa shisha ‘mɛtɛ kami.’ Dimi kotshimbatshimbaka dia mbetawoya kana nɛndja ase ɛtɛmwɛlɔ efula wakahomanaka la mi, koko Ɛmɛnyi wa Jehowa wamboyokonya ewo.”
Sabrina akayôkaka wɔma ko nde ndjotshika mbeka Bible l’Ɛmɛnyi wa Jehowa. Koko, l’ɔkɔngɔ diko, nde akayokaka dia nde hayeya ndoko ema lo nyuma. Nde akayɔsaka yɛdikɔ ya nyomotetemala nto la wekelo ande wa Bible ndo akayetawɔka akambo wa mɛtɛ asɔ wakandayoshola. Sabrina akahame polo ndo lo nde ndjônga la mposa ka mbewoya anto akina awui wakandekaka. Nde akalɔmbɛ ndo dia tshindɛ Ɛmɛnyi wa Jehowa l’olimu awɔ wa lo luudu la luudu. Sabrina ate: “La ntondo ka vɔ ndjetawɔ dia dimi sambisha kâmɛ l’Ɛmɛnyi wa Jehowa, wakamimbola ɔnɛ: ‘Onde mɛtɛ wɛ nangaka koma Ɔmɛnyi wa Jehowa?’ Lakakadimola nte ‘ndoko.’ Lakoke wɔma w’efula nto.” L’ekomelo, l’ɔkɔngɔ wa nde tetemala ntshɔ lo nsanganya tshɛ ndo sɛdingola ekambi waki Nzambi la woho wakawakitanyiyaka awui wa lo Bible, Sabrina akayotaka ate aki mɛtɛ akambo wa mɛtɛ. Nde akabatizama ndo ekɔ kakianɛ osambisha wa lo tena tshɛ.
Lande na Otshikitanu wa Ngasɔ Na?
Onto mbeyaka ndjambola ate, ‘bonde katshikitana wetshelo w’Ɛmɛnyi wa Jehowa la w’ɛtɛmwɛlɔ ekina na?’ Naka wɛ sɛdingola yema akambo wetawɔ Ɛmɛnyi wa Jehowa, kete wɛ ayɛna dia vɔ wekɔ Akristo w’eshika, ndo ambeki wa Bible la lokombo. Tambokɔlɔmba dia wɛ nyanga lo Bible kayɛ avɛsa anɛ wɛnya lo tshena pe awui w’ohomba efula wêtawɔwɔ oko wɛnyishawɔ lanɛ la diko.
Lo sɛdingola la yambalo tshɛ akambo wetawɔ Ɛmɛnyi wa Jehowa ndo woho wakitanyiyawɔ kɛnɛ ketsha Bible, wɛ kokaka la kondja diɛsɛ di’akambo wa mɛtɛ kotshungola. (Joani 17:17) Hatokoke mboka akambo wa mɛtɛ wɔma. Ohɔ daka nɛ diaki Yeso: “Nyayeya akambu wa mete, ku akambo wa mete wayunyutshungula.”—Joani 8:32.
◯ Jehowa ekɔ Nzambi kanga nkudu tshɛ. Lokombo lande tanemaka ndekana mbala 7000 l’efundelo wa ntondo wa Bible.—Osambu 83:18.
◯ Yeso Kristo ekɔ Ɔnaki Nzambi lakaye la nkɛtɛ dia ndjokimɔ lɔsɛnɔ lande lo dikambo di’anto. (Joani 3:16, 17) Ɛmɛnyi wa Jehowa ndjelaka wetshelo waki Yeso Kristo oko watanemawɔ lo waa Evanjiliɔ.
◯ Oma l’Isaya 43:10, mbotumbi lokombo l’Ɛmɛnyi wa Jehowa, divɛsa sɔ mbutaka ɔnɛ: “Emenyi ami mbenyu, mbata [Jehowa].”
◯ Diolelo nɛ dialɔmba anto lo dɔmbɛlɔ dia ‘Shɛso’ ekɔ lowandji l’oma l’olongo layanga minya kakianɛ asui la pâ tshɛ ya l’andja ndo konya nkɛtɛ Paradiso oko walaka Bible.—Isaya 9:6, 7; Danyele 2:44; Mateu 6:9, 10; Enyelo 21:3, 4.
◯ Onto tshɛ latsha lolango la Nzambi ekɔ la diaaso dia kondja ɛtshɔkɔ wa pondjo wayela Diolelo.—Joani 17:3; 1 Joani 2:17.
◯ Akristo pombaka mbɔtɔnganyiya lɔkɛwɔ lawɔ la kɛnɛ kata Bible. Vɔ la dia ntsha la wolo dia monga anto wa losembwe, monga la lɔsɛnɔ la pudipudi, lɔkɛwɔ l’ɔlɔlɔ ndo mboka anyawɔ anto ngandji.—Mateu 22:39; Joani 13:35; 1 Koreto 6:9, 10.
[Caption]
[Caption]
Ɛmɛnyi wa Jehowa wekɔ lo mbewoya anto akambo wa mɛtɛ wa lo Bible lo wedja ndekana 200
[Caption]
[Box]
AWUI AMƆTSHI W’OHOMBA EFULA WÊTAWƆ ƐMƐNYI WA JEHOWA