Dui dimɔtshi dia lânde—Onde wɛ ayonga lâwɔ?

LO LUSHI lɔmɔtshi lahohamɛki, ambeta ɛnɔnyi ndekana 3 500, Jehowa Nzambi akatɛ ase Isariyɛlɛ tshɛ wanɛ waki lo fumbe l’Edjibito dia ndjaka ɔn’ɔkɔkɔ kana mbudi ko mɔnga dikila diawɔ lo eshingito wa nkuke ndo w’adidishi wa mvudu yawɔ. Lushi lɔsɔ l’atei a deke, ondjelo waki Nzambi akete lâdiko dia mvudu yaki la djembetelo ndo akayake ana wa nondo tshɛ wa lo mvudu y’ase Edjibito. Lâsɔ mbakatshungɔ ase Isariyɛlɛ. Dia mbohɔka dikambo sɔ, ase Juda wakasalaka Pasaka.

Kam’akashidiya Yeso Kristo sala Pasaka kande k’ekomelo kâmɛ l’ambeki ande, nde akalɔngɔsɔla olelo ɔmɔtshi wakahombe ndjoyala eohwelo ka nyɔi kande k’olambo. Nde akasha apɔstɔlɔ ande mapa waha la wodoya ndo akate ate: ‘Nyɔsɛ, nyole. Ɔnɛ ko demba diami.’ L’ɔkɔngɔ diko nde akawasha dikɔhɔ dia wanu ndo akate ate: ‘Nyodinɔ nyu tshɛ, ɔnɛ ko dikila diami dia sheke, nɛ diambutshulwama dia nyimanyiɛ anto efula pɛkato.’ Yeso akate nto ate: “Kanyutshaki okone, dia mbuhomi.” (Mateu 26:26-28; Luka 22:19, 20) Yeso akadjangɛ ambeki ande dia vɔ tetemala la mbohɔka nyɔi kande.

Ɔnɔnyi ɔnɛ, eohwelo ka nyɔi ka Yeso kayosalema Lushi la Sato, Ngɔndɔ ka Nɛi 19, l’ɔkɔngɔ wa ɛɔtwɛlɔ ka wonya. Ɛmɛnyi wa Jehowa wa l’andja w’otondo wayotshumana dikɔlɔ sɔ dia lânde dia sala Eohwelo kɛsɔ lo yoho yakalɔmbɛ Yeso dia salaka. Tambokelɛ l’ɔngɛnɔngɛnɔ tshɛ dia wɛ monga lâwɔ. Tambokɔlɔmba dia wɛ mumbola Ɛmɛnyi wa Jehowa wa lo ngelo kodjashiyɛ dia vɔ kotɛ dihole la wonya shikaa wayosalema losanganya lɔsɔ.