Tekɔ l’ohomba w’Ɔlɔngɔswamelo wa Jehowa
ONDE wɛ atokaka onto ata ate: “Dimi lekɔ la mbetawɔ le Nzambi koko aha l’ɔtɛmwɛlɔ”? Kanyi shɔ mbele l’anto wakatshɔka l’ohetoheto tshɛ lo mvudu y’ɛtɛmwɛlɔ, koko wakayɔkɔmɔ etema nɛ dia ɛtɛmwɛlɔ awɔ hakotsha ehomba awɔ wa lo nyuma. Kânga mbahakotsha ɛtɛmwɛlɔ awɔ ehomba awɔ wa lo nyuma, efula shikikɛka ɔnɛ vɔ wêke l’ohomba wa tɛmɔla Nzambi. Vɔ fɔnyaka ɔnɛ ndeka dimɛna tɛmɔlaka Nzambi lo yoho yawɔ vamɛ lo dihole dia tshɔ l’ɔtɛmwɛlɔ ɔmɔtshi kana l’ɔlɔngɔswamelo okina.
Ko Bible atatɔ na? Onde Nzambi nangaka di’Akristo monga lo ɔlɔngɔswamelo ɔmɔtshi?
Akristo wa ntondo wakakondja ɛlɔlɔ lo monga lo ɔlɔngɔswamelo
Lo Pɛntɛkɔsta ka l’ɔnɔnyi 33 T.D., Jehowa akatshola nyuma kande k’ekila le olui w’apami la wamato wakatshumana ‘lo dihole diamɛ,’ lo luudu lɔmɔtshi la ladiko l’osomba wa Jerusalɛma, koko aha le djui mɔtshi ya tshitshɛ y’ambetawudi yakayâtola. (Etsha 2:1) L’etena kɛsɔ mbakakengama etshumanelo k’Akristo kamboyokoma ɔlɔngɔswamelo wa l’andja w’otondo. Ɔsɔ aki mɛtɛ tshondo y’ɔtshɔkɔ le ambeki asɔ wa ntondo. Lande na na? Dikambo dia ntondo ele: vɔ wakalongola ɔkɛndɛ w’ohomba efula wa sambisha lokumu l’ɔlɔlɔ la Diolelo diaki Nzambi lo ‘nkɛtɛ k’otondo.’ (Mateu 24:14) L’atei w’etshumanelo, eyoyo wakakokaka mbeka woho wa kamba olimu w’esambishelo oma le anyawɔ ambetawodi wambohokɔ olimu akɔ.
Kombeta edja, losango la Diolelo lakakokɔnɛ polo ndo l’andja wa pele dia Jerusalɛma. L’asa ɔnɔnyi wa 62 la wa 64 T.D., ɔpɔstɔlɔ Petero akafundɛ Akristo ‘wakahandjɔnɛ la Poto, la Ngalatiya, la Kapadokiya, l’Asiya ndo la Bituniya,’ esomba watanema lo wodja wowelɛ nshi nyɛ ɔnɛ Turquie mukanda wakinde wa ntondo. (1 Petero 1:1) Ambetawodi wakikɔ nto la Palɛstinɛ, la Lɛbanɔna, la Suriya, la Kupiro, la Ngirika, la Kɛrɛtɛ, ndo l’Italiya. Oko wakafundɛ Paulo ase Kɔlɔsɛ l’ɔnɔnyi wa 60 polo 61 T.D., lokumu l’ɔlɔlɔ ‘lakasambishama le ditongami tshɛ dia l’ɛse olongo.’—Kolosai 1:23.
Wahɔ wa hende wakawakondja lo monga l’atei w’ɔlɔngɔswamelo ɔmɔtshi aki: ekeketshelo kakakokaka Akristo mbishana lam’asawɔ. Lo monga l’atei w’etshumanelo, Akristo wakakokaka mpokamɛ asawo, mbeka Afundelo w’Ekila kâmɛ, mbewoyana awui wakakokaka keketsha mbetawɔ kawɔ, ndo nɔmba kâmɛ la anyawɔ ambetawodi. (1 Koreto, tshapita 14) Ndo apami wambotshunda wakakokaka ‘nama ɛkɔkɔ waki Nzambi.’—1 Petero 5:2.
Oko wakiwɔ ase etshumanelo, Akristo wakeyanaka ndo wakokanaka ngandji lam’asawɔ. Le Akristo wa ntondo, sangana kâmɛ l’etshumanelo komonga dikambo dia wotsho, nɛ dia lɛkɔ mbakawodiamaka ndo mbakawakeketshamaka.—Etsha 2:42; 14:27; 1 Koreto 14:26; Kolosai 4:15, 16.
Ɔkɔkɔ okina wele etshumanelo, kana ɔlɔngɔswamelo wa l’andja w’otondo wele bu la diatɔnelo waki ohomba aki dia mbidja kâmɛ. Akristo wakeke dia ‘tɛkɛta lolimi ɔtɔi.’ (1 Koreto 1:10) Dikambo sɔ diaki ohomba efula. Anto wa l’etshumanelo waki la diewo dia mukanda diotshikitanyi ndo weho wa sɛnɔ yotshikitanyi. Vɔ wakatɛkɛtaka ɛtɛkɛta wotshikitanyi, ndo waki la lonto lotshikitanyi. (Etsha 2:1-11) Tena dimɔtshi ekakatanu wakatombaka lam’asawɔ. Koko, Akristo wakakimanyiyamaka dia kandolaka weho w’ekakatanu ɛsɔ l’atei w’etshumanelo.—Etsha 15:1, 2; Filipi 4:2, 3.
Lam’akatombaka ekakatanu wa wolo wele dikumanyi dia l’etshumanelo kokokaka kandola, wakalɔmbaka ekimanyielo k’emendji weteta, ɛnyɛlɔ, oko Paulo. Ekakatanu wakendanaka la wetshelo wakatɔlamaka la ntondo k’olui walɔmbɔla waki la Jerusalɛma. Olui ɔsɔ walɔmbɔla akakengema ntondo l’apɔstɔlɔ waki Yeso Kristo ato, koko l’ɔkɔngɔ diko dikumanyi dia l’etshumanelo dia la Jerusalɛma wakayɔtɔka l’atei awɔ. Etshumanelo tshɛ aketawɔka lowandji lakasha Nzambi olui ɔsɔ walɔmbɔla kâmɛ l’anto wakawasɔnaka dia nɔmbɔla olimu, sɔna anto wakoka monga la waɛsɛ, ndo mbɔsa tɛdikɔ lo kɛnɛ kendana l’akambo wa wetshelo. Lam’akakandolaka olui walɔmbɔla dikambo dimɔtshi kana okakatanu ɔmɔtshi, tshumanelo waketawɔka yɛdikɔ yakɔ ndo ‘wakangɛnangɛnaka efula.’—Etsha 15:1, 2, 28, 30, 31.
Eelo mɛtɛ, Jehowa akakambe l’ɔlɔngɔswamelo ɔmɔtshi lo ntambe ka ntondo. Ko kayotota ɛlɔ kɛnɛ na?
Tekɔ l’ohomba w’ɔlɔngɔswamelo ɛlɔ kɛnɛ
Oko anyawɔ wa lo ntambe ka ntondo, ɛlɔ kɛnɛ, Ɛmɛnyi wa Jehowa mbɔsaka ɔkɛndɛ wa sambisha lokomu l’ɔlɔlɔ la Diolelo la nɛmɔ di’efula. Yoho mɔtshi yakambawɔ olimu ɔsɔ ele lo kahanya Bible la ekanda wakimanyiya anto dia mbeka Bible. Lâsɔ, di’olimu ɔsɔ kambema pombaka ɔlɔngɔswamelo monga.
Ekanda w’Akristo pombaka nɔngɔswama dimɛna, monga l’awui w’eshika, fundama ndo kahanyema lo tshumanelo. Lo wedi okina, Akristo ndjakimɔka la lolango dia kahanya ekanda ɛsɔ le anto walanga mbawadia. Lo yoho shɔ mamonandema miliyɔ y’anto la losango la Diolelo. Apandjudi wa lokumu l’ɔlɔlɔ ntshaka tshɛ dia tetemala l’olimu awɔ w’esambishelo lo yoho yɔlɔngɔswami dimɛna, lo ndjashikikɛ ɔnɛ ndoko yɛtshi ya nkɛtɛ yohewɔ. Akambo asɔ tshɛ nɔmbaka di’ɔlɔngɔswamelo monga.
Lam’ele ‘Nzambi kema shɔnɔdi,’ Bible la ekanda ɛnɛ walembetshiya Bible pombaka kadimɔma l’ɛtɛkɛta ekina. (Etsha 10:34) Nshi nyɛ, periodikɛ kokimimeyɛ kɛnɛ tanemaka l’ɛtɛkɛta 132, ndo Réveillez-vous ! w’osekatɔ tombaka l’ɛtɛkɛta 83. Di’olimu akɔ kambema pombaka elui w’akadimudi wɔlɔngɔswami dimɛna monga l’andja w’otondo.
Ase etshumanelo keketshamaka lam’ɔtɔwɔ lo nsanganya y’Akristo ya totshitshɛ ndo ya weke. Lɛkɔ vɔ mpokamɛka asawo w’oma lo Bible wâkeketsha, mbekaka Afundelo kâmɛ, mbewoyanaka akambo wahomana la wɔ l’esambishelo kana lo lɔsɛnɔ wâkeketsha, ndo nɔmbaka kâmɛ l’anyawɔ ambetawudi. Ndo oko anangɛwɔ wa lo ntambe ka ntondo, vɔ ngɛnangɛnaka waembwelo w’emendji weteta wakeketsha mbetawɔ kawɔ. Ɔnkɔnɛ, ɛlɔ kɛnɛ Akristo wekɔ “ului otoi, ndu ulami otoi.”—Joani 10:16.
Lo mɛtɛ, Ɛmɛnyi wa Jehowa kema kokele, oko waki komonga anyawɔ wa ntondo. Koko, vɔ kambaka kâmɛ l’osanga. Omalɔkɔ, olimu w’esambishelo ka Diolelo wekɔ lo kambema lo nkɛtɛ k’otondo.—Etsha 15:36-40; Efeso 4:13.
[Osato wa lo lɛkɛ 31]
Nshi nyɛ, Akristo wekɔ “ului otoi ndo ulami otoi.”