Nyɔlɛmiya wanɛ wakawasha lowandji lâdiko dianyu
‘Nyɔlɛmiya weho w’anto tshɛ, nyoke tshunda di’otondo di’anangɛso ngandji, nyoke Nzambi wɔma, nyɔlɛmiya nkumekanga.’—1 PETERO 2:17.
1, 2. Ngande wɔsa anto lowandji ɛlɔ kɛnɛ na? Ndo lande na?
MAMA kɛmɔtshi ekɔ lo kiyana ate: “Ana waya la lotshungɔ tshɛ la ntsha kɛnɛ kalangawɔ. Ambutshi hawoyɔlɛmiyama kânga yema.” Lo dibaya dimɔtshi, vɔ funda ɔnɛ: “Lowandji Lamboshila nɛmɔ.” Ɔsɔ ekɔ akambo ahende wambofulanɛ nshi nyɛ, oko wahombayɛ mbeya. L’andja w’otondo, dilɛmiyɛlɔ diaya bu le ambutshi, le embetsha, le ewandji w’olimu, ndo le ɛnɛnɛ wa lɛɛta.
2 Amɔtshi mbeyaka tsho nyɔnya ahɛka ko mbuta ɔnɛ: ‘Yaa mɛ, dimi hakoke nɛnya ewandji.’ Mbala efula, ekɔ yema wolo di’onto manguna ɛtɛkɛta ɛsɔ. Sho mbokaka nsango efula yendana l’ɛnɛnɛ wa lɛɛta wa kɔlɔ, l’ewandji w’olimu wa lokaki, l’embetsha wele bu l’akoka wahombama, ndo nsango yendana l’ambutshi wa kɔlɔ. Diɛsɛ ko, tɔtɔi t’Akristo toto mbele la dionga dia ngasɔ otsha le wanɛ wele la lowandji l’atei w’etshumanelo.—Mateu 24:45-47.
3, 4. Bonde kahomba Akristo nɛmiya ewandji?
3 Oko weso Akristo, tekɔ ‘l’ɔkɔkɔ w’oshika’ wa nɛmiya ewandji wa l’andja ɔnɛ. Ɔpɔstɔlɔ Paulo kɔkɔmiyaka Akristo dia ‘ndjakitshakitsha l’ɛse k’emboledi wa lâdiko, nɛ dia ndoko lowandji lahaye oma le Nzambi, kele mandji tshɛ yakakitshama l’ahole awɔ oma le Nzambi.’ (Romo 13:1, 2, 5; 1 Petero 2:13-15) Paulo akɛnya nto ɔkɔkɔ w’oshika wa monga l’okitanyiya le ewandji wa lo nkumbo lo mbuta ate: ‘Nyu wadi, nyoyakitshakitsha l’ɛse ka waomɛnyu, oko walanga Nkumadiɔndjɔ. Nyu ana, nyokitanyiya awui w’ambutshi anyu l’akambo tshɛ, nɛ dia dikambo sɔ diekɔ ɔlɔlɔ le Nkumadiɔndjɔ.’ (Kolosai 3:18, 20) Dikumanyi dia l’etshumanelo kokaka nɛmiyama oma le so nɛ dia ‘nyuma k’ekila mbakâsɔnɛ oko emendji, dia nama etshumanelo ka Nzambi.’ (Etsha 20:28) Dilɛmiyɛlɔ diele laso otsha le Jehowa mbatotshutshuya dia nɛmiya mandji y’anto. Koko lo mɛtɛ, lowandji la Jehowa mbahombaso nɛmiyaka ntondo nshi tshɛ lo nsɛnɔ yaso.—Etsha 5:29.
4 Aha la mbohɛ ɔnɛ Jehowa mbele la lowandji laheme tshɛ, nyɛsɔ tɔsɛdingole bɛnyɛlɔ di’anto amɔtshi waki kɔnɛnya wanɛ wakasɔnama oko ewandji ndo bɛnyɛlɔ dia wanɛ wakalɛnya anto wakasɔnama oko ewandji.
Diɔnyɔ konyaka l’elanyelo
5. Naa dionga dia diɔnyɔ diaki la Mikalɛ otsha le Davidi, ndo kakɔna kakayôkomɛka?
5 L’ekimanyielo k’ɔkɔndɔ wa Nkumekanga Davidi, sho kokaka mɛna nganɛ wɔ̂sa Jehowa wanɛ wɔnyɔla anto wakalongola lowandji oma le Nzambi. Lam’akela Davidi ɔshɛtɛ wa sheke oya la Jerusalɛma, Mikalɛ ka wadiɛnde ‘akɛnyi Nkumekanga Davidi ayalembɔlembɔ ndo ayanɔ la ntondo ka Jehowa, ko nde akatatɛ mbɔ̂nyɔla l’otema ande.’ Mikalɛ akahombe mbɔsa Davidi aha paka oko owandji wa nkumbo oto, koko ndo oko nkumekanga ka wodja. Lo dihole dia mbɔ̂sa oko owandji wa nkumbo ndo oko nkumenga ka wodja, nde akatatɛ mbɔ̂sɔka ata ate: “Ndi nemo diakayadi la khum’ekanga ka Isariyele dia nkulula ahondo lu ashu a wadi w’ekambi andi, uku atukululaka fumbo sonyi li!” L’ɔtɛ wa dikambo sɔ, Mikalɛ akatshikala ekomba.—2 Samuele 6:14-23.
6. Ngande wakɔshi Jehowa dionga dia diɔnyɔ diaki la Kɔra otsha le akitami Ande na?
6 Kɔra aki ɛnyɛlɔ ka kɔlɔ efula k’onto laki kɔnɛmiya ewandji wa teokrasi wakasɔnɛ Nzambi. Oko wakinde ose dioho dia Kohata, nde aki la diɛsɛ dia kambɛ Jehowa lo tabɛrnakɛlɛ. Koko, nde akɔnyɔla Mɔsɛ nde l’Arɔna, anto wakasɔnama oma le Nzambi dia nɔmbɔla ase Isariyɛlɛ. Kɔra nde l’ewandji ekina wa nkumbo wa l’Isariyɛlɛ wakatɛ Mɔsɛ nde l’Arɔna la kɛlɛ tshɛ ɔnɛ: “Ambukuka! ne dia ului tshe w’antu waya ekila. Ndu [Jehowa] eko l’atei awo. Okoko wana wayabiyanyu ladiku di’ului wa [Jehowa]?” Jehowa ngande wakandɔshi dionga diaki Kɔra nde la wanɛ wakosukɛka na? Nzambi akɔshi tshelo yawɔ shɔ oko tshondo yande ndamɛ mbɔ̂nyɔlawɔ. L’ɔkɔngɔ wa vɔ mɛna woho wakamɛnama wanɛ tshɛ wakete la wɔ wedi lo nkɛtɛ, Kɔra nde l’ewandji wa nkumbo 250 wakayodiakemaka la dja y’oma le Jehowa.—Walelu 16:1-3, 28-35.
7. Onde “apostolo wuleki” wakikɔ l’ɔkɔkɔ ɔmɔtshi wa mɔnyɔla lowandji la Paulo?
7 L’etshumanelo k’Akristo ka lo ntambe ka ntondo, anto amɔtshi wakɔnyɔlaka lowandji la teokrasi. “Atumami wuleki waki” wa l’etshumanelo ka Kɔrɛtɔ waki la dionga dia diɔnyɔ otsha le ɔpɔstɔlɔ Paulo. Vɔ wakɔnyɔla yoho yande ya tɛkɛta lo mbuta ɔnɛ: “Eyelu kandi l’utundu, eko wodu; la diui diandi dieko anyanya.” (2 Koreto 10:10; 11:5) Oyadi Paulo akatɛkɛtaka dimɛna kana bu, nde akasunganaka nɛmiyama oko wakinde ɔpɔstɔlɔ. Ko onde lo mɛtɛ kaki ɛtɛkɛta waki Paulo anyanya? Asawo ande wa lo sɛkɛ wofundami lo Bible mɛnyaka dia nde aki ɔtɛkɛtshi w’oshika wakeyaka mbetawoya anto. Diakɔ diele, lo yema ya sawo ya tshitshɛ yakandasawola nde la Herɔdɛ Agripa II, ‘manyi mɔtshi ya l’akambo tshɛ . . . ndo lo tamu taki lam’asa ase Juda,’ Paulo akayokonyaka nkumekanga kɛsɔ dia mbuta ate: ‘L’etena ka tshitshɛ, wɛ nangaka mbetawoyami dia koma Okristo’! (Etsha 13:15-43; 17:22-34; 26:1-28) Koko, apɔstɔlɔ wa la Kɔrɛtɔ wakayɔsaka dia vɔ mboleki wakataka ɔnɛ ɛtɛkɛta ande wekɔ anyanya! Ngande wakɔshi Jehowa dionga diawɔ sɔ na? Lo losango lɔmɔtshi lakandatomɛ emendji wa l’etshumanelo ka l’Ɛfɛsɔ, Yeso Kristo, kɔtɛkɛta kɔlɔ lo lokombo l’anto wakatone kotwama oma le ‘wanɛ wakayataka ɔnɛ apɔstɔlɔ mbewɔ ko tete le kashi.’—Enyelo 2:2.
Tâlɛmiya kânga mbewɔ kema kokele
8. Ngande wakɛnya Davidi dia nde akalɛmiyaka lowandji lakasha Jehowa Saulo?
8 L’atei wa Bible, tekɔ la bɛnyɛlɔ efula di’anto wakalɛmiya wanɛ waki la lowandji, kânga mbakiwɔ la wandja kana kokamba dimɛna la mandji yawɔ. Davidi aki ɛnyɛlɔ kɛmɔtshi k’ɔlɔlɔ. Nkumekanga Saulo, akayokaka Davidi di’okambi ande kandjema oma l’akambo wa weke wakandatshe ndo akayange dia mbodiaka. (1 Samuele 18:8-12; 19:9-11; 23:26) Koko, kânga mbakakondjaka Davidi waaso wa ndjaka Saulo, nde akate ate: “[Jehowa] anshimbi diaha dimi ntshela khumemi lakandakiti iso dikambo dia wuhu one, ne dia nde eli ukitami w’iso wa [Jehowa].” (1 Samuele 24:3-6; 26:7-13) Davidi akeyaka ɔnɛ Saulo aki lo mboka ka kɔlɔ, koko nde akatshikɛ Jehowa dihole dia ndamɛ mbôlombosha. (1 Samuele 24:12, 15; 26:22-24) Nde kɔtɛkɛta kɔlɔ otsha le Saulo kana lo lokombo lande.
9. (a) Ngande wakayaoke Davidi lam’akɔhɛnyahɛnyaka Saulo? (b) Ngande wakokaso mbuta ɔnɛ Davidi aki la dilɛmiyɛlɔ di’oshika otsha le Saulo?
9 Onde Davidi akakɔmɔ otema lam’akandahɛnyahɛnyama? Davidi akalelɛ Jehowa ate: ‘Akanga wa ngala wekɔ lo nyanga anima ami.’ (Osambu 54:3) Nde akakɛnɛmwɛ Jehowa otema ate: “Utshunguli uma le atunyi ami, we [Nzambi k]ami. . . . Akanga a wulu watusanganaka dia ntshelami kolo. Keli aha ne dia uhedia ami, kuyanga kolo kami, we [Jehowa]. Aha ne dia munga kami mbatuyalongosolaka dia ntshelami kolo. Emo, uyi dia ndjukimanyia, uyendi!” (Osambu 59:1-4) Onde ndoko lushi lakayaoke ngasɔ, mbut’ate, wɛ hasale owandji ayɛ ndoko dikambo dia kɔlɔ, koko nde ekɔ lo takoyangɛ paka ekakatanu? Davidi kopekɔ nɛmiya Saulo. Lam’akavu Saulo, lo dihole dia nde ngɛnangɛna, Davidi akembe osambo wa delo ate: “Saulu la Jonatana, ambukami ngandji la anangemi! Lu nshi ya lumu . . . Vɔ wakalawoka esadi uleki pungu, Vo waki la wulu ndeka tambwe. Ana amantu wa Isariyele, nyuleli Saulu.” (2 Samuele 1:23, 24) Davidi akasha mɛtɛ ɛnyɛlɔ ka dimɛna k’onto laki la dilɛmiyɛlɔ di’oshika otsha le okitami w’esɔ waki Jehowa, kânga mbakandahɛnyahɛnyama oma le Saulo!
10. Naa ɛnyɛlɔ k’ɔlɔlɔ kakasha Paulo lo nɛmiya lowandji lakasha Nzambi olui walɔmbɔla, ndo etombelo akɔna wakonge la dikambo sɔ?
10 Lo nshi y’Akristo, sho tanaka nto bɛnyɛlɔ di’amɛna efula di’anto wakalɛmiyaka ewandji wakasɔnama oma le Nzambi. Tɔshi ɛnyɛlɔ ka Paulo. Nde akɛnya dilɛmiyɛlɔ diande lo yɛdikɔ yakɔshi olui walɔmbɔla w’etshumanelo k’Akristo ka lo ntambe ka ntondo. Lam’akatshu Paulo mbala k’ekomelo otsha la Jerusalɛma, olui walɔmbɔla akɔlɔmbɛ dia ndjaɛdia lo ndjela mbekelo mɔtshi dia mɛnya anto akina ɔnɛ nde kema kânga la yema ya lohetsho tshitshɛ otsha l’Ɛlɛmbɛ wa Mɔsɛ. Paulo akakoke kanyiya ate: ‘Mbala ka ntondo, analengo anɛ wakanɔmbɛ dia dimi mimɔ oma la Jerusalɛma lam’aki lɔsɛnɔ lami lo wâle. Koko kakianɛ vɔ wolanga dia dimi mɛnya la ntondo k’anto tshɛ ɔnɛ dimi nɛmiyaka Ɛlɛmbɛ wa Mɔsɛ. Dimi lambotashilaka fundɛ ase Ngalatiya mukanda ɔmɔtshi wa mbâlaka di’aha vɔ tetemalaka la sɛdingola Ɛlɛmbɛ ɛsɔ. Ko naka dimi ntshɔ lo tɛmpɛlɔ, anto akina mbeyaka ndjokanɛ kɔlɔ lo fɔnya ɔnɛ dimi lambôkana l’olui w’ambahemi w’ohekele.’ Koko, lo mɛtɛ Paulo kokanyiya yoho shɔ. Lam’ele ndoko awui w’Akristo wakahombe mɔnyɔma, nde akalɛnya ndo akakitanyiya kɛnɛ kakawotɛ olui walɔmbɔla wa lo ntambe ka ntondo. Dikambo sɔ diakahandja Paulo oma l’anya wa lemba la woke l’ase Juda, koko l’ɔkɔngɔ diko nde akayetshaka ɛnɔnyi ehende lo lokanu. L’ekomelo, lolango laki Nzambi mbakasalema. Paulo akayatɛkɛtɛ la ntondo k’ewandji wa la Kayisariya ndo akayɔtɔlama nto la Rɔma dia nde toyatɛkɛtɛ la ntondo ka Kayisa ndamɛ.—Etsha 9:26-30; 21:20-26; 23:11; 24:27; Ngalatiya 2:12; 4:9, 10.
Onde wɛ ekɔ la dilɛmiyɛlɔ?
11. Ngande wakokaso mɛnya dilɛmiyɛlɔ otsha le mandji ya l’andja ɔnɛ?
11 Onde wɛ mbishaka wanɛ wele la lowandji dilɛmiyɛlɔ diahombawɔ nongola? Akristo nɔmbamaka dia “[mbi]sha antu tshe diango diahumbawo nungula: . . . kenemo le one lahumba nemiama.” Lo mɛtɛ, okitanyiya aso le ‘emboledi wa lâdiko’ hatɔlɔmbɛ tsho dia futa elambo, koko ndo dia nɛnya emboledi oma lo lɔkɛwɔ laso ndo oma l’ɛtɛkɛta aso. (Romo 13:1-7) Ngande watototshaka lam’atanemaso la ntondo k’ewandji wa lɛɛta wa ngala na? L’osomba ɔmɔtshi wa la Mexique welɛwɔ l’État de Chiapas, ewandji wa lo tshunda dimɔtshi wakahɔtɔla nkumbo 57 y’Ɛmɛnyi wa Jehowa tosamba tawɔ ta dikambɔ nɛ dia Akristo asɔ kondjatambiya lo fɛtɛ mɔtshi y’ɛtɛmwɛlɔ. Lo nsanganya yakawɔtɔ dia kandola dikambo sɔ, Ɛmɛnyi wa Jehowa wakayalɔtshiya dimɛna ndo waki pudipudi, wakatɛkɛtaka wonya tshɛ la kɛnɛmɔ ndo la dilɛmiyɛlɔ. L’ɔkɔngɔ w’ɔnɔnyi ɔtɔi, vɔ wakayasambwɛ onongo ɔsɔ lo yoho y’ɔlɔlɔ, mbut’ate, wakayɔsɔ. Dionga diawɔ diakayokonya anto amɔtshi wakasɛdingolaka dui sɔ lo mbalɛnya ndo mɛnya ɔnɛ vɔ lawɔ nangaka koma Ɛmɛnyi wa Jehowa!
12. Lande na ekɔ ohomba dia womoto lele l’omi laha ombetawudi monga la ‘dilɛmiyɛlɔ di’efula’ otsha le nde?
12 Ngande wakokayɛ nɛmiya lowandji l’oma le Nzambi l’atei wa nkumbo na? L’ɔkɔngɔ wa nde tɛkɛta dikambo di’ɛnyɛlɔ ka Yeso ɔnɛ lakakikɛ akambo wa kɔlɔ, Petero akate ate: “Okone nyu amantu, nyetawo aui a waumenyu, ne dia naka amotshi hawukitanyia diui dia [Nzambi], ndu waha la diui dia [Nzambi], wayudietawo ne dia ditshelu dia wadiewo lam’ayuwena ditshelu dianyu di’ololo diosohanyi la woma.” (1 Petero 3:1, 2; Efeso 5:22-24) Lanɛ Petero ekɔ lo mbika epole ɔsɛkɛ l’ohomba wa womoto ndjakitshakitsha l’ɛse k’omɛnde la ‘dilɛmiyɛlɔ di’efula,’ kânga mbele waomi amɔtshi hawosungana nɛmiyama yoho shɔ. Womoto mbeyaka ndjokondja otema womɛnde lele bu ombetawudi, naka nde monga la dilɛmiyɛlɔ.
13. Ngande wakoka wadi nɛmiya waomɛwɔ?
13 Lo ndjela kanyi yele l’etenyi k’afundelo kɛnɛ, Petero kotolaka yambalo yaso oya l’ɛnyɛlɔ ka Sara, ɔnɛ lele Abarahama w’omɛnde aki ɛnyɛlɔ ka dimɛna efula k’onto lele la mbetawɔ. (Romo 4:16, 17; Ngalatiya 3:6-9; 1 Petero 3:6) Onde dilɛmiyɛlɔ diele la wadi otsha le waomɛwɔ wele ambetawudi pombaka monga l’ɛse ka nɛ diele la wadi wele waomɛwɔ bu ambetawudi? Kayoyosala naka wɛ hokana l’omɛyɛ l’akambo amɔtshi na? Yeso akasha dako dimɔtshi diakoka onto tshɛ kamba ladiɔ lo dikambo nɛ: “Naka untu ambukokendjakendja kilometere otoi la wulu, kutshu la ndi kilometere hyendi.” (Mateu 5:41) Onde wɛ nɛmiyaka omɛyɛ lo nɛnya nango yande, mbut’ate, ntsha kɛnɛ kalangande? Naka dikambo sɔ mɛnamaka wolo le yɛ, kete okiyande kɛnɛ kakanyiyɛ lo dikambo diakɔ. Totake wate ka nde mbeyaka kɛnɛ kakanyiyami. Lam’awotɛyɛ kɛnɛ kalangayɛ, tɛnde la dilɛmiyɛlɔ tshɛ. Bible tolakaka ɔnɛ: “Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.”—Kolosai 4:6.
14. Nɛmiya ambutshi kɛdikɛdi na?
14 Ko kayotota dikambo dianyu nyu ana? Ɔtɛkɛta waki Nzambi mbutaka ɔnɛ: “Ana, nyukitanyia ambutshi anyu le Khumadiondjo, osoku mbeli ololo. Olemia sho la nyo (oso keli olembe a ntundu weli la daka loko).” (Efeso 6:1-3) Nyeye dia monga l’okitanyiya le ambutshi anyu kɛdikɛdi ‘nɛmiya shɔ la nyɔ.’ Tshɛkɛta ya lo Grɛkɛ yokadimwami ɔnɛ “nɛmiya” yekɔ la kitshimudi ya “mbisha kɛnɛmɔ k’efula” kana “mbahɛ kɛnɛmɔ lâdiko dia kɛnɛmɔ.” Ɔnkɔnɛ, monga l’okitanyiya nɔmbaka akambo efula koko halembetshiya ndjela ɛlɛmbɛ w’ambutshi l’etema ehende kana mbɔsa di’ɛlɛmbɛ akɔ kema dimɛna le nyu. Nzambi nyɔlɔmbaka dia mbɔsa ambutshi anyu la nɛmɔ di’efula kâmɛ ndo ɛlɔmbwɛlɔ kanyoshawɔ.—Tukedi 15:5.
15. Ngande wakoka ana tetemala la nɛmiya ambutshi awɔ, kânga lam’afɔnyawɔ ɔnɛ ambutshi awɔ wambotsha kɔlɔ?
15 Ahombayɛ ntsha naka ambutshi ayɛ wambosala dui dimɔtshi diakoka kitshakitsha nɛmɔ diawashayɛ na? Hemba monga la wɔ kanyi ɔtɔi lo dikambo diakɔ. Shi vɔ ‘mbakakote’ ndo mbakotsha ehomba ayɛ? (Tukedi 23:22) Onde vɔ kema la ngandji oya le yɛ? (Heberu 12:7-11) Tɛkɛta la dilɛmiyɛlɔ efula otsha le ambutshi ayɛ, lo mbalembetshiya la yimba ya lotutsha kɛnɛ kele l’otema ayɛ. Oyadi kânga vɔ wayokokadimola lo yoho mɔtshi yahayangɛnangɛna, paka wɛ ndjalama di’aha tɛkɛta la diɔnyɔ otsha le wɔ. (Tukedi 24:29) Ohɔ nganɛ wakalame Davidi dilɛmiyɛlɔ diaki lande otsha le Saulo kânga l’etena kaki nkumekanga kondjelaka dako diaki Nzambi. Lɔmba Jehowa dia nde kokimanyiya dia wɛ ndɔshana la nsaki kana tokanyi tayɛ. Davidi akate ate: “Nyokenene etema anyu la ntundu kandi. [Nzambi] keli eshamelu kasu.”—Osambu 62:8; Delu dia Jeremiya 3:25-27.
Tɔlɛmiya wanɛ walɔmbɔla
16. Kakɔna kakokaso mbeka oma lo bɛnyɛlɔ di’embetsha wa kashi ndo di’andjelo?
16 Dikumanyi dia l’etshumanelo sɔnamaka oma le nyuma k’ekila, kânga mbewɔ kema kokele ndo mbatshawɔ munga. (Osambu 130:3; Undaki 7:20; Etsha 20:28; Jakoba 3:2) Diɔ diakɔ diakoka anto amɔtshi wa l’etshumanelo nyangɛ dikumanyi. Ngande wayototsha etena kafɔnyaso dia dikambo dimɔtshi diotombi l’etshumanelo hadiokandɔmi la wonya, kana diamboyokandɔma paka l’ɔkɔngɔ na? Enda otshikitanu wele lam’asa embetsha wa kashi wa lo ntambe ka ntondo la andjelo: “Vo [embetsha wa kashi] weko la etema wa wulu, weko la lunyu, hawudidima lam’atengawo akambu wa lutumbu. Keli andjelo mbaleka waki la wulu, hawâsongwela la diui dia lotengo la ntundu ka [Jehowa].” (2 Petero 2:10-13) Etena kɛnɛ kakatɛkɛtaka embetsha wa kashi kɔlɔ lo dikambo di’‘akanga a lotombo,’ mbut’ate, dikumanyi wanɛ wakalongola lowandji l’atei w’etshumanelo k’Akristo ka lo ntambe ka ntondo—andjelo kɔtɛkɛta kɔlɔ lo lokombo l’embetsha wa kashi wanɛ wakadjaka diatɔnelo l’atei w’anangɛso l’akadiyɛso. Andjelo, oko wewɔ lo dihole dia lâdiko ndo wewɔ la dionga dia losembwe oleki anto, vɔ wakeyaka kɛnɛ kaki lo mbeta l’etshumanelo. Koko kânga mbakiwɔ l’akoka asɔ, vɔ wakatshike elombwelo l’anya wa Nzambi ‘l’ɔtɛ wa dilɛmiyɛlɔ diele lawɔ otsha le Jehowa.’—Heberu 2:6, 7; Jude 9.
17. Ngande wakokɛ mɛnya mbetawɔ kayɛ lam’eyɛ la ntondo k’akambo wɛnayɛ wate dikumanyi wekɔ la munga?
17 Onde hatohombe monga la mbetawɔ le Yeso Kristo ɔnɛ lele Owandji wasɛna w’etshumanelo k’Akristo oyadi kânga dikambo dimɔtshi hadiokandɔmi lo yoho yahombama? Onde nde heye kɛnɛ keta l’etshumanelo kande ka l’andja w’otondo? Onde hatohombe nɛmiya yoho yakandolande akambo ndo dikoka diele lande dia nɔmbɔla akambo tshɛ? Lo mɛtɛ, ‘eeso dia nombosha asekaso na?’ (Jakobo 4:12; 1 Koreto 11:3; Kolosai 1:18) Lande na kahayatɛ Jehowa ekiyanu ayɛ lo alɔmbɛlɔ ayɛ na?
18, 19. Kakɔna kakokayɛ sala naka wɛ fɔnyaka dia ekumanyi kɛmɔtshi ambotsha kɔlɔ?
18 Lam’ele anto kema kokele, ekakatanu kokaka tomba. Tena dimɔtshi kânga dikumanyi kokaka ntsha kɔlɔ, ndo nyangiya anto amɔtshi. Sala akambo l’esasesase lam’atomba ekakatanu wa ngasɔ hotshikitanya ndoko dikambo. Ndo nto, dionga dia ngasɔ mbeyaka tsho ndjoleka konya dikambo diakɔ wolo. Wanɛ wele la shɛnɔdi ya lo nyuma wayokonga edja ndo lam’ayodja Jehowa akambo l’ɔnɔngɔ ndo mbisha wongwelo tshɛ wahombama l’etena kɛnande ohomba ndo lo yoho yalangande.—2 Timote 3:16; Heberu 12:7-11.
19 Ko kayotota naka akambo amɔtshi wambokonyangiya efula na? Lo dihole dia wɛ mbutɛ ase etshumanelo akina dikambo sɔ, bonde kahayalɔmbɛ dikumanyi ekimanyielo la dilɛmiyɛlɔ tshɛ na? Aha la monga la dionga dia diɔnyɔ, lembetshiyawɔ nganɛ wambokonanda akambo asɔ. Mbala tshɛ ‘ɔsakawɔ oko ananyɔ’ ndo onga la dilɛmiyɛlɔ lam’ayaɛkɛ le wɔ. (1 Petero 3:8) Totondjake ɛtɛkɛta wa kɔlɔ, koko onga la mbetawɔ dia vɔ lawɔ wekɔ Akristo wambotshunda. Ngɛnangɛna ekeketshelo tshɛ kakokawɔ kosha oma l’Afundelo la ngandji tshɛ. Ndo naka mɛnamaka dia êke akambo akina wahombama nɔngɔswama, onga l’eshikikelo wate Jehowa ayɔlɔmbɔla dikumanyi dia vɔ ntsha kɛnɛ kele ɔlɔlɔ ndo kosembwe.—Ngalatiya 6:10; 2 Tesalonika 3:13.
20. Kakɔna kayotɛna lo sawo diayela?
20 Koko, ekɔ dikambo dikina diahombaso sɛdingola lo kɛnɛ kendana la yoho yahombaso nɛmbɛka ndo nɛmiyaka wanɛ wele la lowandji. Ko onde wanɛ wele l’ahole wa lowandji hawohombe nɛnya wanɛ wele l’ɛse kawɔ? Kɛsɔ mbayotɔsɛdingola lo sawo diaso diayela.
Ngande wayoyokadimola?
• Naa ɛkɔkɔ w’eshika wele laso watotshutshuya dia nɛmiya ewandji?
• Jehowa la Yeso ngande wɔsawɔ wanɛ wahalɛnya anto wakalongola lowandji oma le Nzambi?
• Naa bɛnyɛlɔ di’amɛna diele laso dia wanɛ wakalɛnyaka anto wakawasha lowandji?
• Akokaso ntsha naka mɛnamaka dia onto ɔmɔtshi lele la lowandji lâdiko diaso ekɔ la munga?
[Osato wa lo lɛkɛ 8]
Sara akalɛmiyaka lowandji l’Abarahama efula ndo nde aki l’ɔngɛnɔngɛnɔ
[Osato wa lo lɛkɛ 9]
Mikalɛ kɔnɛmiyaka lowandji laki Davidi oko wakinde owandji wa nkumbo ndo nkumekanga
[Osato wa lo lɛkɛ 11]
‘Dimi hakokaki, . . . sembola lonya lami otsha le okitami w’esɔ wa Jehowa!’
[Osato wa lo lɛkɛ 12]
Lande na kahayakitsha ekiyanu aye la ntondo ka Jehowa lo alɔmbɛlɔ ayɛ na?