Dimɛna dia l’etei k’otema hadioshile nɛmɔ pondjo

OSOMBE ƆMƆTSHI W’OKRISTO WA KƆLAMELO AKATE ATE: “ƆLƆNGƆ A PAMI TƐDINYAKA DIMƐNA LA DIONGA DIA PUDIPUDI.”

Eelo, onto okongaka nshi tshɛ la mbekelo ka ndeka ndjasha lo dimɛna dia demba ndo mbala efula mɔnyɔlaka dimɛna dia l’etei k’otema. Koko, le Otungi aso nde mendaka kɛnɛ kele l’ɛse k’otema aso, koko aha ɛnamelo ka l’andja wa demba. Lo yoho shɔ, nde toshaka ɛnyɛlɔ koleki dimɛna k’onto lele l’ekanelo kambotshunda. Lo ndjela Bible, Nzambi ndamɛ akate ate: “Untu atendaka kene kenandi lu ashu, keli [Jehowa] atendaka utema.”​—1 Samuele 16:7.

Nzambi mbele Kiɔkɔ ya dimɛna dia mɛtɛ diele l’onto, ndo Ɔtɛkɛta ande mbutaka dia lam’ɛdikande kɛnɛmɔ ka mɛtɛ kasungana monga l’onto, nde ndeka mbidja yimba lo waonga wa lo nyuma. Bible mbutaka ɔnɛ: “Ololo lu ashu utu eko lukesu, la dimena dia dimba tu eko anyanya. Keli umuntu latukaka [Jehowa] woma, ayutumbwama.” (Tukedi 31:30) Lo mɛtɛ, dimɛna dia lo washo, mbeyaka komba kɔlɔ kele l’etei k’otema. (Esta 1:10-12; Tukedi 11:22) Dimɛna dia lo demba mbeyaka shila l’edjedja ka wonya, koko dimɛna dia l’etei k’otema, mbut’ate waonga w’otema pamaka ndo tshikalaka pondjo.

Omalɔkɔ, ekɔ dui dia tshundju monga la waonga anɛ: ngandji, ɔngɛnɔngɛnɔ, wɔladi, lotutsha, ɔlɔlɔ w’otema, lɔsɛngɔ, mbetawɔ, memakana, la ndjakimɛ! (Ngalatiya 5:22, 23) Ɔsɔku mbakokaso monga la dimɛna dia l’etei k’otema diahashile nɛmɔ pondjo.​—1 Petero 3:3, 4.