Onde ta dialɔso la wola ekɔ ta diahatakokaki mbidja otshumba?

AMƐNGƆDI watshɔ dia tendaka tshunda dia Nations unies diele l’osomba wa New York, mbetaka oma lo Luudu l’Ewandji walɔmbɔla akambo wendana l’ekondjelo ndo la lɔsɛnɔ l’ase wodja (Chambre de Conseil économique et social), lele ahole w’eteta anto wekɔ la lokala (plafond) lele l’ɛlɔnda ndo l’eshinga wa kura efula. Ɔnɛ letshetsha anto dia tendaka luudu lɔsɔ ekɔ lo mbuta ate: “Lokala lɔnɛ ‘lakiwɔ koshidiya’ mbɔsamaka oko djembetelo yatohola ɔnɛ olimu waki Nations unies wendana l’akambo w’ekondjelo ndo wa nsɛnɔ y’anto hashilaki pondjo; nshi tshɛ tayongaka l’ohomba wa sala dikambo dimɔtshi dia nɔngɔsɔla nsɛnɔ y’anto wa l’andja w’otondo.”

Kânga mbadja Ɛnɔmbɔdi wa tshunda sɔ wolo dia nɔngɔsɔla nsɛnɔ y’anto tshɛ, mɛnamaka di’ekɔ wolo vɔ tondoya dikambo sɔ. Teye dia nshi yakandakambaka olimu ande lanɛ laa nkɛtɛ lo ntambe ka ntondo T.D., Yeso Kristo akate ate: “Nyuma ka [Jehowa] kambumbahema, ne dia ndi akankidia dia dimi nsambisha akanga a weula lukumu l’ololo.” (Luka 4:18) Ko naa “lukumu l’ololo” lakandasambishaka na? Ɔsɔ aki losango lendana la Diolelo nɛ diele Jehowa Nzambi, ɔnɛ lele “eshamelu k’usi wula, . . . lu pa kandi,” ambetɛ Yeso Kristo Nkumekanga. Ko akambo akɔna wayosala Diolelo sɔ na? Isaya akate ate: “[Jehowa] Kanga lulimbilimbi ayolongoswela antu tshe dambu di’ololo, dambu dia wanu w’ololo, dambu dieli la uhiho, dambu dia wanu wambolongoswama ololo. Khumadiondjo, [Jehowa] a[yu]nya nyoi pundju. Ndi ayukitula asoi tshe uma lu ashu awo.”​—Isaya 25:4-6, 8.

Onde wɛ nangaka mbeya kɛnɛ kayosala Diolelo diaki Nzambi dia ‘nɔngɔsɔla nsɛnɔ y’anto wa l’andja w’otondo,’ woho ɔnɛ wele ndoko onto layonga l’ohomba w’ɛngɔ kɛmɔtshi nto? Enda lo kiombo yele lanɛ l’ɛse dia wɛ mbeya woho wokokiyɛ kondja onto lakoka ndjoketsha kɛnɛ kata Bible lo dikambo sɔ.