Ɛkɔndɔ w’oma le Apandjudi wa Diolelo

“Kamɛ kele l’atei w’anto wa weho la weho” lo wodja wa Indiya

“KAMƐ kele l’atei w’anto wa weho la weho” mbele ɛtɛkɛta wakamba l’anto dia tɛkɛta dikambo dia weho w’anto wotshikitanyi wasɛna kamɛ lo wodja wa Indiya. Kema dikambo dia tshitshɛ dia kamɛ monga lo wodja wa woke ɔsɔ watanema anto wele la weho wa mbekelo ya lɔsɛnɔ efula, ɛtɛkɛta, ɛtɛmwɛlɔ, waoho, ɛlɔtɔ, ndo elelo wotshikitanyi. Koko kamɛ ka woho ɔsɔ mɛnamaka lo Bɛtɛlɛ k’Ɛmɛnyi wa Jehowa ka la Indiya, kânga mbele wanɛ wakayakimɔ la lolango lawɔ wadjasɛ ndo wakamba lɔkɔ ndja oma l’esomba wotshikitanyi ndo oma lo bɛtshi dia nkɛtɛ dia la Indiya diotshikitanyi ndo kânga mbatɛkɛtawɔ ɛtɛkɛta efula wotshikitanyi.

• Nyɛsɔ tɔtɛkɛtɛ dikambo diaki Rajrani, osekaseka ɔmɔtshi w’oma la Punjab, tshuku dimɔtshi dia lo nɔrdɛ-owɛstɛ ka Indiya. Nshi yakɔtɔka Rajrani kalasa, onyande ɔmɔtshi akatatɛ mbeka Bible l’Ɛmɛnyi wa Jehowa. Osekaseka ɔsɔ akahembe dia kotola yambalo yaki Rajrani oya l’awui wa lo Bible. Lam’ele osekaseka akɔ kombeyaka Angɛlɛ dimɛna ndo Tshoto y’Etangelo kotanemaka l’ɔtɛkɛta wa Punjabi l’etena kɛsɔ, nde akalɔmbɛ Rajrani dia mbokimanyiya la mbokadimolɛ ɛtɛ w’awui wa lo periodikɛ kɛsɔ. Kɛnɛ kakadia Rajrani lo Tshoto y’Etangelo akamɛ monga la shɛngiya y’efula le nde, woho ɔnɛ wele kânga mbakatone ambutshi ande dia nde mbeka Bible, Rajrani akahame edja ndo nde ndjolambola lɔsɛnɔ lande le Jehowa Nzambi. Ɛlɔ kɛnɛ kondokamba lo Bɛtɛlɛ ka la Indiya, dikambo diamɛ diakodiholɛ washo oya l’akambo wa mɛtɛ mondosala. Nde okadimola ekanda w’Akristo otsha l’ɔtɛkɛta wa Punjabi!

• Tɔshi nto ɛnyɛlɔ kaki Bijoe, loye oma l’ɛtshi kekina ka nkɛtɛ ka Indiya, mbut’ate oma la sidɛ-owɛstɛ ka Kerala. Wakatshanya Bijoe oma lo kalasa ka sekɔndɛrɛ l’ɔtɛ wakinde konanga ndjatambiya lo sɛlɛmɔnyi yakɛnɛmɔla ngandji k’otamanya kele l’anto otsha le wodja awɔ. L’ɔkɔngɔ wa nde tondja dikambo sɔ lo tominadi ta weke, tele ɔtɛmwɛlɔ wa pudipudi mbakayɔsɔ̂ka, Bijoe akakawola nto lo kalasa.a Nde akayele ndo kalasa ka lâdiko. Koko, awui wa mindo wakasalemaka efula la kalasa yakandɔtɔka akafukutanya nkum’otema kande, ko nde akamɔ oma lo kalasa l’etenyi ka ntondo. Kakianɛ, l’ɔkɔngɔ wa nde kamba ɛnɔnyi dikumi lo Bɛtɛlɛ, nde ambɛna dia nde ambokondja wahɔ efula lo monga ɔtɔi ɔmɔtshi wa lo nkumbo ka Bɛtɛlɛ kele la weho w’anto wotshikitanyi wasɛna kamɛ, oleki wahɔ wotondokondja otondotetemala ndjela kalasa ya lâdiko.

• Norma nde la Lily wekɔ vɔ akɔ ahende l’ɛnɔnyi ndekana 70 ndo aya ɛnɔnyi efula wambowovusha waomɛwɔ. Aya ɛnɔnyi ndekana 40 wayawɔ vɔ akɔ ahende l’olimu wa lo tena tshɛ. Lily ambokamba oko ɛnɔnyi 20 lo Bɛtɛlɛ lo kadimola ekanda l’ɔtɛkɛta wa Tamil. Norma akaye lo Bɛtɛlɛ ɛnɔnyi 13 l’ɔkɔngɔ wa nde mvusha omɛnde. Lâdiko wa vɔ monga bɛnyɛlɔ di’eshika di’anto wakamba l’etete ndo l’otema ɔtɔi, vɔ wekɔ nto la shɛngiya y’ɔlɔlɔ lo kɛnɛ kendana la kamɛ ka nkumbo k’otondo ka Bɛtɛlɛ. Vɔ nongolaka angɛndangɛnda la ngandji tshɛ, ndo vɔ ngɛnangɛnaka lɔngɛnyi lele lam’asawɔ l’ɛlɔngɔlɔngɔ ndo l’esekaseka wa lo nkumbo ka Bɛtɛlɛ, lo mbakɔndɔlɛ ɔngɛnɔngɛnɔ wambowokondja l’ɛnɔnyi wambowɔsɛna oko Akristo. Ndo ɛlɔngɔlɔngɔ l’esekaseka vɔ lawɔ mɛnyaka woho wangɛnangɛnawɔ lɔngɛnyi lɔsɔ lo mbaelɛka lawakawɔ ndo lo mbakimanyiyaka etena kewɔ l’ohomba w’ekimanyielo. Ɔsɔ ekɔ mɛtɛ bɛnyɛlɔ di’amɛna!

Lo tondoya etshikitanu wakonya anto l’ata kana lo diatɔnelo ndo watondja ewanu l’ahole efula, anto asɔ wakayakimɔ la lolango wekɔ lo kamba kamɛ l’ɔngɛnɔngɛnɔ dia kimanyiya anto akina lo kamba oko atɔi amɔtshi wa lo nkumbo ka Bɛtɛlɛ kele kamɛ ka lo wodja wa Indiya.​—Osambu 133:1.

[Nɔtɛ ka l’ɛse ka dikatshi]

[Efundelo wɛnya kanga osato wa lo lɛkɛ 18]

Dihole: Mountain High Maps® Copyright © 1997 Digital Wisdom, Inc.