Kânga osombe w’onto koka mbeka
KSENIYA akotɔ l’ɔnɔnyi 1897. Nde aki l’ana wa wamato 3, ɔna pami ɔtɔi, ekana 15, ndo tokanula 25. Lo lɔsɛnɔ lande l’otondo, nde akasale kɛnɛ kakawetsha ambutshi ande dia sala. Kânga mbakandalawɔ otsha la Moscou l’ɔtɛ wa ta diakalɔmaka lo wodja welɛwɔ république d’Abkhazie (Géorgie) wele lam’asa Ndjale k’Odima la ɛtshi ka nkɛtɛ kelɛwɔ Caucase, nde akangɛnangɛnaka lɔsɛnɔ laki lande, djekoleko l’ɔtɛ wa kɛnɛ kakandelɛka ate sango dia mbetawɔ, mbut’ate ɔtɛmwɛlɔ wakotshikɛ ambutshi ande.
L’ɔnɔnyi wa 1993, ɔnaki Kseniya la womoto lelɛwɔ Meri akakome Ɔmɛnyi wa Jehowa. Meri akatatɛ sawola la Kseniya awui wendana la Jehowa Nzambi ndo la Bible, koko nde konangaka mbohokamɛ. Kseniya akatetemalaka mbutɛ ɔnande la womoto ɔsɔ ate: “Handjokoka mbeka dui dimɔtshi di’oyoyo l’ɛnɔnyi waya lami ɛnɛ.”
Koko, Meri k’ɔnande; Londa ka wadi aki okana ande; ndo tokanula tande tohende Nana nde la Zaza, wele vɔ tshɛ wakayokoma Ɛmɛnyi wa Jehowa wakatetemalaka sawola la nde awui wa lo Bible. La dikɔlɔ dimɔtshi dia l’ɔnɔnyi wa 1999, vɔ wakadiɛ Kseniya divɛsa dimɔtshi diakananda otema ande. Diɔ diaki l’ɛtɛkɛta waki Yeso wananda otema wakandatɛ apɔstɔlɔ ande wa kɔlamelo lam’akandahɔhɔla Dambo dia Dikɔlɔ dia Nkumadiɔndjɔ. (Luka 22:19, 20) La dikɔlɔ sɔ, lâsɔ ko nde aya l’ɛnɔnyi 102, Kseniya akɔshi yɛdikɔ ya tatɛ mbeka Bible.
Kseniya ate: “L’ɔkɔngɔ wa dimi sɛna ɛnɔnyi 102, dimi lamboyokoma lo shihodia oyango wa lɔsɛnɔ. Lambɛna kakiye dia ndoko koleki dimɛna oko kambɛ Jehowa, Nzambi kaso ka diambo ndo ka ngandji. Dimi lakayaoke ndo leke la wolo wa demba. Dimi lakakoke mbadia aha la ndɔta akalashi ndo monga kamɛ la nkumbo kami.”
Lo Ngɔndɔ ka Dikumi l’Ɔtɔi 5, 2000, Kseniya akabatizama. Nde ate: “Kakianɛ, lambokimɔ lɔsɛnɔ lami le Jehowa dia dimi mbokambɛ la ngandji. Dimi mbishaka anto periodikɛ ndo wa traktɛ etena kodjashimi lo dihole diemala wa bisi diele suke la lakami. Mbala efula ewotɔ ami ndjaka ndjotenda, ɔnkɔnɛ dimi ngɛnangɛnaka mbaewoya akambo wa mɛtɛ wendana la Jehowa.”
Kseniya ekɔ lo kongɛ lushi lele ‘demba diande diayoyala ashashi ato oko demba dia dikɛnda, ndo layondonga la wolo wakinde lawɔ lo nshi yande y’osekaseka.’ (Jobo 33:25) Naka onto laya l’ɛnɔnyi lokama la ndjahe hate ate dimi laya opalanga efula dia mbeka kitshimudi ya lɔsɛnɔ oma lo Bible, kayotota dikambo diayɛ na?