Totetemale kambɛ Jehowa l’otema wambokeketala
“Utema ami ambukikitala, [Nzambi] li, utema ami ambukikitala!”—OSAMBU 57:7.
1. Bonde kakokaso monga la woho w’eshikikelo kaki la Davidi?
OKO weso ekambi wamboyakimɔka le nde, Jehowa koka tokimanyiya dia sho keketala lo mbetawɔ k’Okristo woho wa sho mbeya kukutɛ Lokristo la mɛtɛ. (Romo 14:4) Ɔnkɔnɛ, sho koka monga la woho w’eshikikelo kaki la Davidi omembi w’esambo lakatshutshuyama dia memba ɔnɛ: “[Nzambi] li, utema ami ambukikitala!” (Osambu 108:1) Naka otema aso keketala, kete tayotshutshuyama dia sɛna lo ndjela ndjakimɔ kaso le Nzambi. Oko weso akanga wa kɔlamelo, naka sho mendɛ le nde dia kondja ɛlɔmbwɛlɔ ndo wolo, kete tayokoka mɛnya dia tekɔ nge ndo tamboyashikikɛ lo yɛdikɔ ndo lo dietawɔ diaso, ‘tele nshi tshɛ la lotumu efula la sala l’olimu wa Nkumadiɔndjɔ.’—1 Koreto 15:58.
2, 3. Kakɔna kalembetshiya dako dia Paulo diele lo 1 Koreto 16:13?
2 Lo alako wakandasha ambeki wa Yeso wa lo Kɔrɛtɔ k’edjedja ndo wendana l’Akristo wa nshi nyɛ, ɔpɔstɔlɔ Paulo akate ate: ‘Nyɔsɛnake, nyongake nge lo mbetawɔ, nyotshake oko apami, ndo nyongake la wolo.’ (1 Koreto 16:13) Lo Grɛkɛ didjango la didjango dia lo divɛsa nɛ kambema la vɛrbɛ yɛnya dia dikambo diekɔ lo salema wonyakɔ, ndo nɔmbaka otshelo watatetemala. Kakɔna kalembetshiya dako sɔ na?
3 Sho koka ‘sɛnaka’ lo nyuma lo sɛmanɛka la Diabolo ndo lo ndjasukanya le Nzambi. (Jakoba 4:7, 8) Ndjaɛkɛ le Jehowa tokimanyiyaka dia sho tetemala la monga kamɛ ndo ‘tshikala nge lo mbetawɔ k’Okristo.’ Sho l’efula ka wamato wele l’atei aso ‘salaka oko apami’ lo kambɛ Nzambi la dihonga tshɛ oko apandjudi wa Diolelo. (Osambu 68:11) Sho ‘mongaka la wolo’ lo tetemala la mendɛ le Shɛso lele l’olongo dia nde tosha wolo wa sala lolango lande.—Filipi 4:13.
4. Wanya akɔna wakatokonya lo batizama oko Akristo na?
4 Sho mɛnyaka dia tambonga la mbetawɔ ka mɛtɛ lam’ayakimɔso tshɛ le Jehowa ndo wɛnyaso ndjakimɔ kakɔ lo dindjama la tshondo l’ashi. Ko kakɔna katokonya lo batismu? Ntondotondo, sho kondjaka ewo k’oshika k’Ɔtɛkɛta wa Nzambi. (Joani 17:3) Dikambo sɔ tokonyaka dia sho monga la mbetawɔ ndo totshutshuyaka dia sho ndjatshumoya, lo ndjakiyanya l’otema ɔtɔi l’ɔtɛ w’akambo wa kɔlɔ wakatatshaka lo nshi yakete. (Etsha 3:19; Heberu 11:6) Oma lâsɔ ko okadimwelo aso w’otema, nɛ dia takoke ditshelo dia kɔlɔ ɔkɔngɔ l’oyango wa ndjala la lɔsɛnɔ lɔtɔnɛ la lolango laki Nzambi. (Romo 12:2; Efeso 4:23, 24) Dikambo sɔ diakayelana la ndjakimɔ ka l’otema ɔtɔi le Jehowa lo dɔmbɛlɔ. (Mateu 16:24; 1 Petero 2:21) Takalɔmbɛ Nzambi dia nde tosha nkum’otema k’ɔlɔlɔ ndo takabatizama oko djembetelo ya ndjakimɔ kaso le nde. (1 Petero 3:21) Naka sho kana yimba lo wanya asɔ wakatatakula, kete dikambo sɔ diayotokimanyiya dia sho tetemala la ndjasha tshɛ paka lo mbidjaka wolo dia sɛnaka lo ndjela ndjakimɔ kaso ndo dia kambɛka Jehowa l’otema wambokeketala.
Tetemala nyanga ewo ka mɛtɛ
5. Bonde kahombaso tetemala la kondja ewo ka l’Afundelo?
5 Dia sho nsɛna lo ndjela ndjakimɔ kaso le Nzambi, sho pombaka tetemala la kondja mbetawɔ koki etshina l’ewo k’oma l’Afundelo. Taki l’ɔngɛnɔngɛnɔ efula dia kondja mbo ya ndɛ ya lo nyuma lam’akateye akambo wa mɛtɛ waki Nzambi mbala ka ntondo! (Mateu 24:45-47) ‘Mbo ya ndɛ’ shɔ yaki mbo y’eshika, ndo yakatokimanyiya efula lo nyuma. Kakianɛ, ekɔ ohomba sho tetemala la ndɛ mbo y’ɔlɔlɔ ya lo nyuma woho wa sho tetemala la monga ekambi wamboyakimɔ le Jehowa wele l’etema wambokeketala.
6. Ngande wakayayokoma lo ngɛnangɛna akambo wa mɛtɛ wa lo Bible l’otema ɔtɔi na?
6 Ekɔ ohomba sala la wolo dia fudia ewo k’Afundelo. Ekɔ oko onto layanga diangɔ di’oshinga wolo dioshami dialɔmba dia diyanga la wolo tshɛ. Sho kondjaka ɛlɔlɔ efula mɛtɛ etena kakondjaso ‘ewo k’oshika kaki Nzambi’! (Tukedi 2:1-6) Mbala ka ntondo kakeke opandjudi wa Diolelo Bible nde layɛ, ondo nde akakambe la dibuku Ewo Katɔla Otsha lo Lɔsɛnɔ la Pondjo. Ondo nyakɔsaka etena ka wonya k’ɔlɔlɔ dia shidiya tshapita tshɛ. Mbala mɔtshi nyakekaka tshapita ɔtɔi mbala efula. Wɛ akakondja wahɔ lam’akadiemaka ndo wakalembetshiyamaka avɛsa woshilami. Naka dikambo dimɔtshi diaki wolo efula dia dishihodia, kete wakadilembetshiyaka. Opandjudi wakekaka la yɛ Bible akayalɔngɔsɔlaka dimɛna, akalɔmbaka nyuma ka Nzambi, ndo akakokimanyiya dia wɛ ngɛnangɛna akambo wa mɛtɛ l’otema ɔtɔi.
7. Kakɔna kasha onto akoka wa mbetsha anto akina akambo wa mɛtɛ waki Nzambi?
7 Welo wakayadje ɛsɔ wakasunganaka, nɛ dia Paulo akafunde ate: “One letshama diui, akimanyia one la wetsha lu akambu w’ololo tshe.” (Ngalatiya 6:6) Lanɛ, tɔtɛkɛta ta lo Grɛkɛ takawakambe latɔ mɛnyaka dia wetshelo w’Ɔtɛkɛta wa Nzambi wakakɔkɔmiyamaka lo yimba ndo l’otema w’“one letshama diui.” Woho wakayetshama yoho shɔ koshaka akoka wa monga ndo ombetsha w’anto akina. (Etsha 18:25) Dia wɛ monga la kɔlamelo lo ndjakimɔ kayɛ, wɛ la dia kokɛ lonyuma layɛ ndo tshikala nge lo tetemala la mbeka Ɔtɛkɛta wa Nzambi.—1 Timote 4:13; Tito 1:13; 2:2.
Ohɔ ndjatshumoya ndo okadimwelo ayɛ w’otema
8. Ngande wakoka onto nama lɔkɛwɔ l’ɔlɔlɔ?
8 Onde wɛ mbohɔka lotshungɔ lakayoke dia wɛ aya lalɔ lam’akayeke akambo wa mɛtɛ, wakayatshumoya, ndo wakayoke dia Nzambi ambokodimanyiyɛ munga yayɛ oma lo mbetawɔ kayɛ l’olambo wa tshungo waki Yeso? (Osambu 32:1-5; Romo 5:8; 1 Petero 3:18) Lo mɛtɛ wɛ hakombola kawola nto lo yoho ya lɔsɛnɔ ya kɔlɔ yaki layɛ ntondo. (2 Petero 2:20-22) Ndo nto, naka wɛ ayɔlɔmbaka Jehowa mbala la mbala, kete wɛ ayonga l’akoka wa tetemala monga la lɔkɛwɔ l’ɔlɔlɔ, wa nsɛna lo ndjela ndjakimɔ kayɛ, ndo wa kambɛka Jehowa la kɔlamelo tshɛ.—2 Petero 3:11, 12.
9. L’ɔkɔngɔ wa sho mboka ditshelo dia kɔlɔ ɔkɔngɔ, mboka kakɔna kahombaso ndjela?
9 Naka wɛ ambokadimola otema lo mboka ditshelo dia kɔlɔ ɔkɔngɔ, kete tetemala la nyanga ekimanyielo ka Nzambi dia wɛ monga l’otema wambokeketala. Wɛ aki oko onto lambonganɛ ko vɔ ndjowongola ko mbɛnya mboka k’ɔlɔlɔ. Totakɔke mboka kayɛ ka kakianɛ. Tetemala ndjaɛkɛ l’ɛlɔmbwɛlɔ kaki Nzambi, ndo yashikikɛ dia tshikala lo mboka ka lɔsɛnɔ.—Isaya 30:20, 21; Mateu 7:13, 14.
Tohɛke pondjo ndjakimɔ ndo batismu kayɛ
10. Naa awui wahombaso kimɛ l’ɔtɛ lo kɛnɛ kendana la ndjakimɔ kaso le Nzambi?
10 Ɔhɔ dia wɛ akayakimɔ le Jehowa lo dɔmbɛlɔ la kanyi ya mbokambɛ olimu la kɔlamelo pondjo pondjo. (Jude 20, 21) Ndjakimɔ kɛdikɛdi ndjakitsha lânde, ndjanganya dikambo di’oyango ɔmɔtshi w’ekila. (Akambu w’Asi Lewi 15:31; 22:2) Ndjakimɔ kayɛ komonga dikambo dia lo tshanda mɔtshi tsho kana dia ndjakimɔ le anto amɔtshi. Ɔsɔ aki ndjakimɔ ka pondjo le Nkum’Olongo, ndo dia nsɛna lo ndjela ndjakimɔ kɛsɔ nɔmbaka dia sho tshikala la kɔlamelo le Nzambi lɔsɛnɔ laso l’otondo. Eelo, ‘oyadi lɔsɛnɔ kana nyɔi, anto wa Jehowa mbeso.’ (Romo 14:7, 8) Ɔngɛnɔngɛnɔ aso nemanɛka la woho wakitanyiyaso lolango lande ndo watetemalaso la mbokambɛ l’otema wambokeketala.
11. Bonde kahombayɛ mbohɔ batismu kayɛ ndo kitshimudi yatɔ?
11 Ohɔka nshi tshɛ dia batismu kayɛ ekɔ djembetelo ya ndjakimɔ kayɛ ka l’otema ɔtɔi le Nzambi. Ndoko onto lakakotshutshuya la wolo, nɛ dia wɛmɛ mbakɔshi yɛdikɔ. Onde wɛ amboyashikikɛ kakianɛ dia mbɔtɔnganyiya lolango layɛ la laki Nzambi lo lɔsɛnɔ layɛ l’otondo? Wɛ akalɔmbɛ Nzambi dia nde kosha nkum’otema k’ɔlɔlɔ ndo akabatizama oko djembetelo ya ndjakimɔ kayɛ le nde. Lama nkum’otema k’ɔlɔlɔ kɛsɔ ndo sɛna lo ndjela ndjakimɔ kayɛ, ko wɛ ayokondja ɛtshɔkɔ efula oma le Jehowa.—Tukedi 10:22.
Lolango Layɛ Lekɔ l’Ɔkɛndɛ Ɔmɔtshi
12, 13. Ngande wendana lolango laso la ndjakimɔ ndo la batismu?
12 Ndjakimɔ ndo batismu akela miliyɔ y’anto ya lo nkɛtɛ k’otondo ɛtshɔkɔ efula. Lam’ayakimɔso le Nzambi lo batizama l’ashi, lɔkɛwɔ laso l’edjedja mbavɔ koko aha lolango laso hita. Oko weso ambetawudi waketshama dimɛna, sho takakambe mɛtɛ la lolango laso lam’akatayakimɔ le Nzambi lo dɔmbɛlɔ ndo wakatabatizama. Kimɔ lɔsɛnɔ laso le Nzambi ndo batizama nɔmbaka dia sho shihodia ele lolango la Nzambi ko oma lâsɔ sho sɔna dia lisalaka aha l’onto totshutshuya. (Efeso 5:17) Ɔnkɔnɛ, sho mbokoyaka Yeso, lakakambe la lolango lande hita lam’akandatshike olimu ande w’otshudi w’abaya, ko batizama, ndo ndjakimɔ la tshondo yande tshɛ dia sala lolango la She lele l’olongo.—Osambu 40:7, 8; Joani 6:38-40.
13 Jehowa Nzambi akalange di’Ɔnande koma ‘kokele oma l’asui.’ Ɔnkɔnɛ Yeso akakambe la lolango lande dia mbikikɛ asui asɔ la kɔlamelo tshɛ. Diakɔ diele, nde “akasengasengaka [ndo akalɔmbaka] . . . wulu la asoi lu ashu, ku ndi akawukela ne dia woma wakandukaka Nzambi.” (Heberu 2:10, 18; 5:7, 8) Naka sho monga la wɔma wa ngasɔ otsha le Nzambi, kete sho lawɔ tayoyashikikɛ dia nde ‘ayotokela,’ ndo ɔnɛ Jehowa ayotokeketsha oko weso Ɛmɛnyi wamboyakimɔka le nde.—Isaya 43:10.
Wɛ koka tetemala monga l’otema wambokeketala
14. Bonde kahombaso mbadiaka Bible lushi la lushi?
14 Kakɔna kayokokimanyiya dia tetemala monga l’otema wambokeketala ndo nsɛna lo ndjela ndjakimɔ kayɛ le Nzambi na? Adiaka Bible lushi la lushi l’oyango wa kondja ewo k’efula k’Ɔtɛkɛta wa Nzambi. Ɔsɔ ekɔ dikambo dimɔtshi diatokeketsha ‘ɔhɔmbɔ wa kɔlamelo ndo wa kɛsɔ’ mbala la mbala dia disala. Vɔ toshaka dako sɔ nɛ dia sho nsɛna lo ndjela ndjakimɔ kaso nɔmbaka dia sho tetemala kɛndakɛnda lo mboka k’akambo wa mɛtɛ waki Nzambi. Otondongaka ɔlɔngɔswamelo wa Jehowa mbetawɔka wetshelo wa kashi, tshike totowolaka Ɛmɛnyi wa Jehowa ndo wanɛ wasambishawɔ dia vɔ mbadiaka Bible.
15. (a) Kakɔna kahombaso sɛdingola lam’ɔsaso tɛdikɔ? (b) Bonde kakoka mbutama dia le Okristo, olimu wa l’emunyi hawɔshi dihole dia ntondo?
15 Lam’ɔsayɛ tɛdikɔ tɔmɔtshi, endaka mbala tshɛ nganɛ wakokatɔ kokimanyiya dia wɛ nsɛna lo ndjela ndjakimɔ kayɛ le Jehowa. Dikambo sɔ mbeyaka mendana l’olimu ayɛ wa l’emunyi. Onde wɛ salaka la wolo dia vɔ kokimanyiya dia tɔla ɔtɛmwɛlɔ wa mɛtɛ otsha la ntondo? Kânga mbele ewandji w’olimu lo tshɛ kawɔ mɛnaka di’Akristo wekɔ anto wa losembwe ndo wakamba olimu dimɛna, vɔ mɛnaka nto di’Ɛmɛnyi wa Jehowa hawoyange ahole wa la ntondo wa l’andja ɔnɛ ndo hawɔsɛmanɛ l’anto akina dia monga l’ahole wa lokumu. Kɛsɔ tshɛ ndja oma lo woho ɔnɛ wele, oyango w’Ɛmɛnyi wa Jehowa kema wa monga ɛngɔnyi, kondja lokumu, kana nyanga lɔnɛnɛ. Le wanɛ wasɛna lo ndjela ndjakimɔ kawɔ le Nzambi, dui dioleki ohomba ele sala lolango laki Nzambi. Vɔ hawodje olimu wâkimanyiya dia kotsha ehomba awɔ wa lo lɔsɛnɔ lo dihole dia ntondo, koko olimu ɔsɔ mongaka lo dihole dia hende. L’ɛnyɛlɔ k’ɔpɔstɔlɔ Paulo, nsaki kawɔ, kana olimu awɔ woleki ele olimu w’Okristo. (Etsha 18:3, 4; 2 Tesalonika 3:7, 8; 1 Timote 5:8) Onde wɛ mbetshaka wahɔ wa Diolelo lo dihole dia ntondo lo lɔsɛnɔ layɛ?—Mateu 6:25-33.
16. Kakɔna kakokaso sala naka ekiyanu wa tshambandeko hawoyotosha diaaso dia sho nsɛna lo ndjela ndjakimɔ kaso le Nzambi na?
16 Ondo amɔtshi wakayatshatsha la weho wa nyangu efula la ntondo ka vɔ ndjeka akambo wa mɛtɛ. Koko etema awɔ wakalole mɛtɛ l’ɔngɛnɔngɛnɔ, la lowando, ndo la ngandji otsha le Nzambi lam’akawayokukutɛka elongamelo ka Diolelo! Naka vɔ kanyiya ɛtshɔkɔ wakawakondja tatɛ oma l’etena kɛsɔ, kete dikambo sɔ mbeyaka mbakimanyiya dimɛna dia vɔ nsɛna lo ndjela ndjakimɔ kawɔ le Jehowa. Lo wedi okina, ayoyotsha naka ekiyanu wa tshambandeko woye oma l’ekakatanu wa lo lɔsɛnɔ la l’andja ɔnɛ wambona dia shimba ‘ɔtɛkɛta wa Nzambi,’ watekana oko atɛndɛ washimba lɔtɔngɔ dia lɔ mbola polo ndo lɔ tɔ elowa na? (Luka 8:7, 11, 14; Mateu 13:22; Mako 4:18, 19) Naka wɛ ambɛna dia dikambo sɔ diambotatɛ kokomɛ kana komɛ nkumbo kayɛ, kete kitsha ekiyanu ayɛ l’anya wa Jehowa ndo lɔmbande dia nde kokimanyiya woho wa wɛ mbola lo ngandji ndo monga la lowando l’efula. Naka wɛ kitsha wetsho ayɛ le nde, kete nde ayokosukɛ ndo ayokosha wolo wa wɛ tetemala mbokambɛ l’ɔngɛnɔngɛnɔ ndo l’otema wambokeketala.—Osambu 55:22; Filipi 4:6, 7; Enyelo 2:4.
17. Ngande wakokaso ndɔshana l’ehemba wa wolo?
17 Lɔmbaka Jehowa Nzambi mbala la mbala, oko wakayɔlɔmbɛ lam’akayakimɔ le nde. (Osambu 65:2) Naka wɛ ambohembama dia sala kɔlɔ kana ambohomana l’ohemba wa wolo, kete yanga ɛlɔmbwɛlɔ ka Nzambi ndo ekimanyielo kande woho wa wɛ ndjela ɛlɔmbwɛlɔ kakɔ. Tohɛke dia wɛ ekɔ l’ohomba wa mbetawɔ, nɛ dia ombeki Jakɔba akafunde ate: “Naka omotshi ambuhumba [lomba], ndi alombe [Nzambi], katushaka antu tshe diango la lukahu, hâhangwela, ku ndi ayuwushayo. Keli ndi alombe la mbetawo, aha la tamu, ne dia untu ladja tamu, eko uku sukhu di’ashi a wuki, diasukuyama la diasutshasutshama la loheledi. Untu uku takanaki ati: Layulungula engo uma le Khumadiondjo; untu uku eko la etema ehendi, atahahoka lu akambu andi tshe.” (Jakoba 1:5-8) Naka ohemba ɔmɔtshi wamboleka tɛnya pâ, kete sho koka ndjashikikɛ dia: “Nduku uhimba waya le nyu, waheyi antu memba. Keli [Nzambi] eko la kolamelu; ndi hetawo dia nyu mpimbama uleki wulu anyu. Keli lam’ayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.”—1 Koreto 10:13.
18. Ahombaso sala naka pɛkato kɛmɔtshi ka woke kakatashɛ kekɔ lo tɛwɔla yɛdikɔ yakatɔshi dia nsɛna lo ndjela ndjakimɔ kaso le Jehowa?
18 Ko ayoyotsha naka pɛkato kɛmɔtshi ka woke kakayashɛ kekɔ lo ndɔsha nkum’otema kayɛ ndo kekɔ lo tɛwɔla yɛdikɔ yakayɔshi ya nsɛna lo ndjela ndjakimɔ kayɛ le Nzambi na? Naka wɛ ekɔ la ndjatshumoya, kete wɛ koka keketshama lo mbeya ɔnɛ Jehowa “hatuni sulu diambate kana utema wa djakitshakitsha.” (Osambu 51:17) Yanga ekimanyielo ka dikumanyi di’Akristo dioludi la ngandji, lo mbeya ɔnɛ, oko wewɔ lo mbokoya Jehowa, vɔ hawotɔnyɔla nsaki kele layɛ ka ndowanya diɔtɔnganelo diasayɛ la Shɔ lele l’olongo. (Osambu 103:10-14; Jakoba 5:13-15) Lâsɔ, naka wɛ kondja wolo w’oyoyo wa lo nyuma ndo monga l’otema wambokeketala, kete wɛ ayokoka mbetɛ mboka kayɛ tɔɔ dikambo di’ekolo ayɛ ndo mɛna dia wɛ kokaka nsɛna lo ndjela ndjakimɔ kayɛ le Nzambi.—Heberu 12:12, 13.
Totetemale kambɛ Jehowa l’otema wambokeketala
19, 20. Lande na kele ekɔ ohomba efula sho tetemala la nsɛna lo ndjela ndjakimɔ kaso?
19 Lo tena nɛ dia pâ, sho pombaka sala la wolo dia nsɛna lo ndjela ndjakimɔ kaso ndo tetemala la kambɛ Nzambi l’otema wambokeketala. Yeso akate ate: “Keli one latetemala edja ndu l’ekumelu, ayushimbamela.” (Mateu 24:13) Lam’ele tekɔ lo sɛna lo ‘nshi y’ekomelo,’ ekomelo koka ndja l’etena tshɛ. (2 Timote 3:1) Ndo nto, ndoko onto l’atei aso lakoka ndjashikikɛ dia nde ayonga la lɔsɛnɔ loyi. (Jakoba 4:13, 14) Ɔnkɔnɛ, ekɔ ohomba sho tetemala la nsɛna lo ndjela ndjakimɔ kaso ɛlɔ kɛnɛ!
20 Ɔpɔstɔlɔ Petero akake epole ɔsɛkɛ lo dikambo sɔ lo mukanda ande wa hende. Nde akɛnya dia oko wakavu anto wa kɔlɔ la Mvula k’Elola, mbele nkɛtɛ ka didjidji, mbut’ate tshunda dia kɔlɔ di’anto nɛ, diayolanyema lo ‘lushi la Jehowa.’ Ɔnkɔnɛ, Petero akate ate: “Wuhu akona w’antu wayunyuyala lu akambu w’ololo tshe la w’ekila”! Nde akakeketsha nto ate: “Keli nyu, elangimi, ne dia nyu nyambeyaka akambu ane ntundu, nyewo, nyutukunganela lu wetshelu w’antu wa kolo, nyu nyatukoko lu eshikikalu kanyu.” (2 Petero 3:5-17) Ayonga mɛtɛ kandji efula naka onto lambobatizamaka ayotakɔ mboka ndo koma l’ekomelo ka lɔsɛnɔ lande oko onto laki kotetemala la monga l’otema wambokeketala!
21, 22. Ngande wakakotshama ɛtɛkɛta wa l’Osambu 57:7 le Davidi ndo le Akristo wa mɛtɛ?
21 Eshikikelo kayɛ ka nsɛna lo ndjela ndjakimɔ kayɛ le Nzambi koka keketshama dimɛna naka wɛ mbohɔ lushi l’ɔngɛnɔngɛnɔ lakayabatizama ndo lakayayange ekimanyielo ka Nzambi woho w’ɛtɛkɛta ndo ditshelo diayɛ ngɛnyangɛnya otema ande. (Tukedi 27:11) Jehowa hasha ekambi ande sɔnyi pondjo, ndo sho pombaka mɛtɛ monga la kɔlamelo otsha le nde. (Osambu 94:14) Nde akɛnya kɛtshi kande lo kitsha atunyi waki Davidi tatala ndo lo mbotshungola oma l’anya awɔ. Lowando laki lande lo dikambo sɔ akatshutshuya Davidi dia monga la ngandji ka wolo ndo ka shikaa otsha le Otshungudi ande. L’ɔngɛnɔngɛnɔ w’efula, nde akembe ate: “Utema ami ambukikitala, [Nzambi] li, utema ami ambukikitala! Dimi layimbaka esambu, ee, layimbaka esambu wa diandu.”—Osambu 57:7.
22 L’ɛnyɛlɔ ka Davidi, Akristo wa mɛtɛ tshikalaka nge lo ndjakimɔ kawɔ le Nzambi. L’etema wambokeketala, vɔ mɛnyaka dia Jehowa ɔnɛ lembɛwɔ esambo wa lotombo l’ɔngɛnɔngɛnɔ tshɛ mbele otshungodi ndo okokedi awɔ. Naka otema ayɛ wambokeketala, kete vɔ wayoyaɛkɛ le Nzambi, ndo l’ekimanyielo kande, wɛ ayonga l’akoka wa nsɛna lo ndjela ndjakimɔ kayɛ. Eelo, wɛ koka monga oko “untu ololo” lakembe omembi w’esambo dikambo diande ate: “Ndi ha[t]uka kumu ya kolo woma. Utema andi ambukikitala, atekamaka le [Jehowa].” (Osambu 112:6, 7) Lo monga la mbetawɔ le Nzambi ndo lo ndjaɛkɛ le nde, wɛ koka nsɛna lo ndjela ndjakimɔ kayɛ ndo tetemala kambɛ Jehowa l’otema wambokeketala.
Onde wɛ akohɔ?
• Bonde kahombaso tetemala kondja ewo k’oshika k’oma lo Bible?
• Bonde kahombaso mbohɔka ndjatshumoya ndo okadimwelo aso w’otema?
• Ngande wakondjaso wahɔ lo mbohɔ ndjakimɔ ndo batismu kaso?
• Kakɔna kayotokimanyiya dia sho tetemala la kambɛ Jehowa l’otema wambokeketala?
[Esato wa lo lɛkɛ 28]
Onde wɛ namaka lonyuma layɛ lo mbadiaka Ɔtɛkɛta wa Nzambi lushi la lushi?
[Osato wa lo lɛkɛ 28]
Naka sho mbetsha olimu aso w’Okristo la ntondo, kete tayokoka tetemala la kambɛ Jehowa l’otema wambokeketala