Wembola oma le Ambadi
Onde ayonga ɔlɔlɔ di’Okristo wa mɛtɛ mbɔtɔ lo sɛlɛmɔnyi ka diwala kasalema l’ɔtɛmwɛlɔ ɔmɔtshi kana monga lam’afukɛwɔ odo misa?
Ndjatambiya lo dikambo tshɛ diendana l’ɔtɛmwɛlɔ wa kashi hangɛnyangɛnya Jehowa ndo sho pombaka mbewɔ dikambo sɔ. (2 Koreto 6:14-17; Enyelo 18:4) Fukɛ odo misa ekɔ dikambo dimɔtshi diasalema l’ɔtɛmwɛlɔ dia keketsha tokanyi tahatanema l’Afundelo, ɛnyɛlɔ kanyi y’ɔnɛ anima havu ndo y’ɔnɛ anto tshɛ w’ɔlɔlɔ mbudɛka otsha l’olongo. Totshelo tɔmɔtshi koka salema lɛkɔ, ɛnyɛlɔ oko nsanga kurusɛ ndo ndjela dɔmbɛlɔ diayosalema oma le ondjashi Nzambi ɔmɔtshi. Alɔmbɛlɔ ndo weho ekina w’awui wahɔtɔnɛ la wetshelo wa lo Bible kokaka nto salema lo sɛlɛmɔnyi ya diwala diasalema l’ɔtɛmwɛlɔ ɔmɔtshi. Naka Okristo monga l’atei w’olui ɔmɔtshi wele anto tshɛ wa lɔkɔ wekɔ lo sala dui dimɔtshi diendana l’ɔtɛmwɛlɔ wa kashi, kete hatonga wolo dia nde lawɔ ndjokoma lo sala dikambo sɔ. Ekɔ mɛtɛ dui di’enginya di’onto ndjadja ndamɛ lo tɔsɛngiya ta ngasɔ!
Ko kayotota naka wambofundɛ Okristo ɔmɔtshi la wolo dia nde monga lam’afukɛwɔ odo misa kana dia nde mbɔtɔ lo sɛlɛmɔnyi ka diwala diasalema l’ɔtɛmwɛlɔ ɔmɔtshi na? Ɛnyɛlɔ, pami kɛmɔtshi kele kema ombetawudi mbeyaka tshutshuya wadɛnde lele Okristo dia tshɔ la nde lo diaaso sɔ. Onde Okristo wa womoto ɔsɔ koka tshɔ la nde oko onto layotendaka akambo la washo tsho oka? Dia kotsha lolango l’omɛnde, nde mbeyaka ntshɔ la nde, lo mbɔsa yɛdikɔ di’aha ndjatambiya lo sɛlɛmɔnyi tshɛ yendana l’ɔtɛmwɛlɔ. Lo wedi okina, nde mbeyaka mbɔsa yɛdikɔ y’aha tshɔ, lo mɛna dia tɔsɛngiya tayotohomana la nde lɛkɔ koka monga wolo efula le nde, ndo koka mbala mɔtshi mbokonya lo sekola atɔndɔ waki Nzambi. Ndamɛ mbahomba mbɔsa yɛdikɔ. Nde pombaka kandola dikambo sɔ mbala kakɔ ɔtɔi l’otema ande, lo monga la nkum’otema ka pudipudi.—1 Timote 1:19.
Lo weho akɔ tshɛ, ayoleka ɔlɔlɔ nde mbutɛ omɛnde dia lo ndjela nkum’otema kande, nde hatoyatambiya kânga lo sɛlɛmɔnyi ɔtɔi kendana l’ɔtɛmwɛlɔ kana memba la wɔ kamɛ kana kɔlɛ ɔtɛ wonya wasalema dɔmbɛlɔ. Lo ndjela kɛnɛ kowotende, omi mbeyaka mɛna dia naka wadɛnde tshɔ kete dikambo dimɔtshi diahatowɔngɛnyangɛnya mbeyaka totomba. Nde mbeyaka mbɔsa yɛdikɔ ya ntshɔ ndamɛ lo menda ngandji kokande wadɛnde, woho walɛmiyande mbetawɔ kande, kana nsaki ka mbewɔ woho w’ofukutanu tshɛ. Koko naka nde ambohika ate paka vɔ ahende kotshwe, kete lâsɔ nde kokaka tshɔ paka oko onto layendaka tsho woho weta akambo.
Sho pombaka kanyiya etombelo wakoka wɔtwɛlɔ aso lo sɛlɛmɔnyi mɔtshi yendana l’ɔtɛmwɛlɔ monga lawɔ le asekaso ambetawudi. Onde kɛsɔ mbeyaka fukutanya nkum’etema k’anto amɔtshi? Onde diɔ mbeyaka ndjɔtɛtɔla yɛdikɔ yakawɔshi yaha tɛmɔla dikishi? Ɔpɔstɔlɔ Paulo tokeketshaka dia: “Mbedika akambu w’ololo, la dia [sho] ndjala la etema wa pudipudi, aha la akambu wa ntakanya antu, edja ndu lushi la Kristu.”—Filipi 1:10.
Naka owotɔ aso mambɔlɔngɔsɔla sɛlɛmɔnyi kɛsɔ, kete tɔsɛngiya tokina mbeyaka ndja ndo oma le ase nkumbo. Lo dikambo tshɛ, Okristo pombaka mbɛdikola la yambalo tshɛ awui wendana la dikambo diakɔ. Lo mbɛdikola akambo amɔtshi wadi kana omi mbeyaka mɛna ɔnɛ ndoko okakatanu wayotomba lo mbɔtɔ lo misa kafukɛwɔ odo kana lo sɛlɛmɔnyi ka diwala kasalema l’ɔtɛmwɛlɔ ɔmɔtshi lo monga tsho lo sɛlɛmɔnyi shɔ oko wanɛ wenda paka la washo ato. Koko lo sɛdingola akambo akina, omi kana wadi mbeyaka mɛna dia naka nde monga lo sɛlɛmɔnyi shɔ, kete dikambo sɔ mbeyaka fukutanya nkum’otema kande kana k’anto akina. Oyadi l’atei wa dikambo diakɔna tshɛ, Okristo pombaka shikikɛ dia yɛdikɔ yamondɔsa hayotowoshimba dia nde monga la nkum’otema k’ɔlɔlɔ la ntondo ka Nzambi ndo k’anto.