“Umuntu l’ololo keye”

Osekaseka ɔmɔtshi w’ose Mɔaba mbakawatɛ ɛtɛkɛta ɛsɔ wa diando. Lokombo lande Ruta, nde aki wadi aki odo, okilande la Naɔmi, womoto ose Isariyɛlɛ. Ruta, ɔnɛ lakasɛnaka l’Isariyɛlɛ, lo nshi yakolɛka embadi, ambeta oko ɛnɔnyi 3000 akandɔma heyama. (Ruta 3:11) Ngande wakandayokomaka la lokumu l’ɔlɔlɔ la ngasɔ na? Akɔna akoka kondja wahɔ oma l’ɛnyɛlɔ kande?

Ruta kɔndɛkaka ‘ma dia nɛndɛ,’ koko nde akakambaka la wolo dia tatɔngɔnaka washa wakatakɔka l’ekambɔ ndo etete kande akayokondjɛka lowando. Kânga lam’akawalangaka mbowamuya wotsho, nde akatetemalaka kamba la wolo, lo sala ndo kɛnɛ kakiwɔ konongamɛka oma le nde. Lo yoho ya diambo, nde kokaka mɛtɛ mbɛdikama la womoto l’akoka ndo l’ɔlɔlɔ landolawɔ lo Bible.​—Tukedi 31:10-31; Ruta 2:7, 15-17.

Waonga wa lo nyuma waki Ruta, ndjakitshakitsha kande, dionga diande dia ndjahombia ndo ngandji kande ka kɔlamelo mbakaleke mbôkimanyiya dia monga la lokumu l’ɔlɔlɔ la ntondo k’anto. Nde akatshike ambutshi ande ndo wodja ande wa lotɔ aha la monga l’elongamelo k’efula ka kondja ekokelo katoyakaka oma lo diwala nɛ dia nde konanga tshika Naɔmi. L’etena kakɔ kamɛ, Ruta akɛnya nsaki kande ka kambɛ Jehowa, Nzambi kakatɛmɔlaka okilande. Dia mbika epole ɔsɛkɛ lo lɔkɛwɔ l’ɔlɔlɔ laki lande, Afundelo mbutaka dia nde aki ‘ɔlɔlɔ le [Naɔmi] oleki ana w’apami esambele.’​—Ruta 1:16, 17; 2:11, 12; 4:15.

Lo menda lɔkɛwɔ l’ɔlɔlɔ laki la Ruta l’atei wa wanɛ wakasɛnaka la nde, Nzambi akandola waonga ande ndo akawosha diɛsɛ dia nde koma ɔmɔtshi l’atei wa lɔtshɛtshɛ laki Yeso Kristo. (Mateu 1:5; 1 Petero 3:4) Ruta ekɔ ɛnyɛlɔ ka dimɛna efula, aha tsho le wamato w’Akristo koko ndo le anto tshɛ wata dia Jehowa mbatɛmɔlawɔ!