Wembola w’oma le ambadi

• Onde somba luudu l’olui ɔmɔtshi w’ɔtɛmwɛlɔ ko likonya Mbalasa ka Diolelo mbeyaka monga yoho mɔtshi y’ɔtɛmwɛlɔ w’osanga?

Mbala tshɛ, Ɛmɛnyi wa Jehowa mbewɔka osombanelo wa diangɔ wa ngasɔ wa l’ɛtɛmwɛlɔ ekina. Koko, somba luudu l’olui ɔmɔtshi w’ɔtɛmwɛlɔ hɛnya dia weho akɔ tshɛ ekɔ tshelo yɛnya ɔtɛmwɛlɔ w’osanga (Œcuménisme). Dikambo sɔ mbeyaka tsho mbɔsama oko onto l’osombi ɛngɔ. Ɛmɛnyi wa Jehowa hawokana l’olui okina w’ɔtɛmwɛlɔ dia mbikisha dihole di’ɔtɛmwɛlɔ di’elui akɔ ehende mengɔnyaka kâmɛ.

Kakɔna kokoki mbɔsama oko tshelo y’ɔtɛmwɛlɔ w’osanga lo washo waki Jehowa na? Tɔsɛdingole kɛnɛ kakate ɔpɔstɔlɔ Paulo lo dikambo di’ɛlɔmbwɛlɔ ɔnɛ: “Tanyocɔɔke tɔsɔhana la anɛ wele keema la dyeetawɔ: vɔ keema anɛ wasungana mbɔtɔnɛɛ lanyu. Dikambo dyɔɔtɔnɛɛlɔ dyakɔna dyokoki njaala laasa nkanga losembwee la nkanga kɔɔlɔ? Lende akanyatɛɛna osase akuwana la ojima? Kristo ngaande wokokinde mbɔtɔnɛɛ la dyaabolo? Kaanga ntoo, ɔnɛ leetawɔ kakɔna kokokinde nsanga kaamɛɛ la ɔnɛ laheetawɔ? Loodu l’ɔtɛmwɛɛlɔ la [Nzambi] ngaande wokokilɔ mbɔtɔnɛ la dikishi dy’ase weja? . . . Oma lɔkɔ kata [Jehowa] ate: ‘Nyotombe oma l’atei waakiwɔ nyokakitɔne lawɔ. Tanyonandake ndooko ema ɔtɔi ka mindo, kele dimi kanyolongole.’” (2 Kɔrɛntɛ 6:14-17, Dyookaneelo Dy’oyoyo) Paulo akandalange mbuta lo kɛnɛ kendana la “dyɔɔtɔnɛɛlɔ” ndo ‘okuwanelo’?

Diɔtɔnɛlɔ diata Paulo lanɛ mendanaka l’ɔtɛmwɛlɔ ndo l’akambo wa lo nyuma kâmɛ l’atɛmɔdi wa dikishi ndo l’anto wele kema ambetawudi. Nde akewola Akristo wa la Kɔrɛtɔ ‘di’aha vɔ ndɛ lo mɛsa ɔtɔi vɔ l’ɛdiɛngɛ.’ (1 Koreto 10:20, 21) Ɔnkɔnɛ, sala ɔtɛmwɛlɔ w’osanga kɛdikɛdi tɛmɔla kâmɛ kana monga la diɔtɔnganelo dia lo nyuma l’atshunda akina w’ɛtɛmwɛlɔ. (Etumbelu 20:5; 23:13; 34:12) Naka luudu lɔmɔtshi lakatshumanaka ɔtɛmwɛlɔ okina lambosombama, kete dikambo sɔ ekɔ tsho dia kondja dihole diele ohomba dia mbikisha Mbalasa ka Diolelo. La ntondo ka kamba la luudu lɔsɔ oko Mbalasa ka Diolelo, pombaka minya oseka ɛngɔ tshɛ katanema lɔkɔ kendana l’ɔtɛmwɛlɔ wa kashi. L’ɔkɔngɔ wa sala dikambo sɔ, luudu lakɔ nambɔmaka le Jehowa l’oyango wa mbɔtɛmɔlaka ndamɛ. Lâsɔ, ndoko diɔtɔnɛlɔ kana okuwanyelo wele lam’asa ɔtɛmwɛlɔ wa mɛtɛ la wa kashi.

Etena kakɛtshanyanyu oshinga wa dihole dia ngasɔ, aha nyu ndeka mbɔtɔnɛ l’anto wakanga luudu l’ɔtɛmwɛlɔ lɔsɔ efula ndo paka nyu komɛ l’awui w’osombelo wa luudu lɔsɔ. Ase etshumanelo k’Akristo pombaka mbohɔka kɛnɛ kakawaewola Paulo ɔnɛ “tanyosohanaki kame la wane wahetawo.” Kânga mbeso hatoyaɛnya dia sho ndeka anto akina wele la mbetawɔ kina, sho mbewɔka dia sangana kâmɛ la wɔ kana ndjadja l’awui w’ɔtɛmwɛlɔ awɔ.a

Onde etshumanelo koka futɛka luudu laki tshunda dimɔtshi di’ɛtɛmwɛlɔ? Mbala efula ofutelo wa luudu nɔmbaka dia monga la diɔtɔnganelo dia mbala la mbala l’ase ɔtɛmwɛlɔ okina, dikambo diele sho pombaka mbewɔ. La ntondo ka ndowɛ luudu la sala dikambo diakɔna tshɛ, olui wa dikumanyi pombaka ndjambola ɔnɛ: Onde ndoko dikishi diakawakitsha lɔkɔ ndo ndoko asango amɔtshi wakawasange l’etei kana l’andja wa luudu lakɔ? Asukanyi ayowota naka sho futɛ luudu lɔnɛ? Onde okambelo wa la luudu lɔnɛ mbeyaka takanya ose etshumanelo ɔmɔtshi? (Mateu 18:6; 1 Koreto 8:7-13) Dikumanyi pombaka sɛdingola akambo asɔ la ntondo ka ndjɔsa yɛdikɔ yakoka. Pombaka nto vɔ ndjela nkum’otema kawɔ ndo k’etshumanelo k’otondo la ntondo ka mbɔsa yɛdikɔ kana tona dia somba luudu laki olui ɔmɔtshi w’ɔtɛmwɛlɔ ko likonya Mbalasa ka Diolelo.

[Nɔtɛ ka l’ɛse ka dikatshi]

[Osato wa lo lɛkɛ 30]

Luudu lɔnɛ laki shinangɔnga lakasombama ndo kadimɔma Mbalasa ka Diolelo