Wembola w’oma le ambadi

Lo 2 Koreto 6:14, dikambo dia waa na diatɛkɛta Paulo lo kamba l’etelo k’ɔnɛ “wane wahetawo”?

Lo 2 Koreto 6:14, sho mbadiaka ɔnɛ: “Tanyosohanake kame la wane wahetawo.” Naka sho menda kɛnɛ kofundami l’etenyi kɛsɔ, kete tayɛna hwe dia Paulo ekɔ lo tɛkɛta dikambo di’anto wele kema l’etshumanelo k’Akristo. Eokelo kɛsɔ sukamɛ oma lo avɛsa akina wa lo Bible wɛnya woho wakakambe Paulo la ditelo nɛ “one lahetawo” kana “wane wahetawo.”

Ɛnyɛlɔ, Paulo akânya Akristo wakafundanaka “la ntundu ka wane wahetawo.” (1 Koreto 6:6) Lanɛ, wanɛ wahetawɔ ekɔ wa toshushi takalomboshaka dombo la Kɔrɛtɔ. Lo mukanda ande wa hende, Paulo mbutaka dia Satana “ambete wane wahetawo uku tutshungu lu tukanyi tawo.” Washo wa wanɛ wahetawɔ asɔ ‘wambodihama’ oma lo lokumu l’ɔlɔlɔ. Wane wahetawɔ asɔ wekɔ wanɛ wahɛnyi ohomba kambɛ Jehowa, lam’ele l’etatelo Paulo akalembetshiya ate: “Keli lam’ambukadimo untu le Khumadiondjo, [“ekombɔ kakɔ katonyɛmaka,” NW].”​—2 Koreto 3:16; 4:4.

Anto amɔtshi wele bu ambetawudi mɔnyɔlaka ɛlɛmbɛ ndo ndjashaka l’ɔtɛmwɛlɔ wa dikishi. (2 Koreto 6:15, 16) Koko, aha anto tshɛ wele bu ambetawudi mbalɔshana l’ekambi waki Jehowa. Amɔtshi mɛnyaka wahɔ awɔ lo akambo wa mɛtɛ. Efula wekɔ l’elonganyi wele Akristo ndo vɔ ngɛnangɛnaka tshikala la wɔ lo diwala. (1 Koreto 7:12-14; 10:27; 14:22-25; 1 Petero 3:1, 2) Koko, mbala efula Paulo akakambe la tshɛkɛta “wane wahetawo” dikambo di’anto wele, oko wakataditɛkɛtshi la diko, vɔ kema l’etshumanelo k’Akristo, kokengami la wanɛ wele “embetawudi le Khumadiondjo.”​—Etsha 2:41; 5:14; 8:12, 13.

Tɔndɔ diatanaso lo 2 Koreto 6:14 diekɔ ɛlɔmbwɛlɔ ka dimɛna le Akristo l’awui tshɛ wa lo lɔsɛnɔ ndo vɔ kambaka ladiɔ mbala efula dia mbisha alako wa lomba le Akristo wayanga elonganyi. (Mateu 19:​4-6) Okristo wambobatizama wele la lomba hayange olonganyi l’atei w’anto wele kema ambetawudi, nɛ dia ɛlɛmbɛ wendana la lɔkɛwɔ, eyango, ndo mbetawɔ ka wanɛ wele bu ambetawudi tshikitana efula la kɛnɛ kele l’Akristo wa mɛtɛ.

Ko kayotota dikambo di’anto weka Bible ndo waya l’etshumanelo k’Akristo? Anto wele apandjudi wahatabatizama? Onde vɔ kema ambetawudi? Ndooko. Anto wambetawɔ akambo wa mɛtɛ wendana la lokumu l’ɔlɔlɔ ndo watatetemala pama dia batizama hawokoke mbelamɛ wanɛ waha ambetawudi. (Romo 10:10; 2 Koreto 4:13) La ntondo ka nde batizama, Kɔnɛliyo akelamɛ ɔnɛ “untu ololo, akukaka [Nzambi] woma.”​—Etsha 10:2.

Onde ekɔ dikambo dia lomba dia Okristo wamboyakimɔ membɔna ndo tshukama l’onto lambetawɔma oko opandjudi wahatabatizama, lam’ele lo mbuta mɛtɛ dako diaki Paulo diofundami lo 2 Koreto 6:14 hadiokoke mendana la dikambo sɔ? Ndooko. Lande na kataso ngasɔ? Tekɔ lo mbuta ngasɔ l’ɔtɛ wa dako diokɛma hwe diakasha Paulo lo dikambo dia Akristo wa wadi waki edo. Paulo akafunde ate: ‘Nde mbeyaka ntshukama le ɔnɛ lalangande. Koko paka lo Nkumadiɔndjɔ.’ (1 Koreto 7:39) Lo ndjela dako sɔ, Akristo wamboyakimɔ keketshamaka dia nyanga elonganyi paka l’atei wa wanɛ wele ‘lo nkumadiɔndjɔ.’

Tshɛkɛta ‘lo Nkumadiɔndjɔ’ ndo tshɛkɛta yɔfɔnyi layɔ yata ɔnɛ “lu Kristu” alangayɔ nembetshiya? Paulo akatɛkɛta dikambo dia wanɛ waki “lu Kristu” kana ‘lo Nkumadiɔndjɔ’ lo Romo 16:8-10 ndo lo Kolosai 4:7. Naka wɛ mbala avɛsa anɛ, kete wɛ ayɛna dia anto asɔ wekɔ ‘anyaso ekambi,’ ‘anto wetawɔma,’ ‘anangɛso wa ngandji,’ ‘ekambi wa kɔlamelo,’ ndo ‘anyaso ɛhɔmbɔ.’

Etena kakɔna kakoma onto ‘ɔhɔmbɔ wa Nkumadiɔndjɔ’? Onto komaka ‘ɔhɔmbɔ wa Nkumadiɔndjɔ’ etena kasalande la lolango lande kɛnɛ kahomba sala ɔhɔmbɔ ndo etena kayasɛkande ndamɛ. Yeso akalembetshiya ate: “Naka untu alanga ndjelami, ndi embe utamba andi [“w’asui,” NW] andjeli.” (Mateu 16:24) Onto tatɛka ndjela Kristo ndo kitanyiyaka ndamɛ lolango la Nzambi etena kayakimɔnde ndamɛ le Nzambi. L’ɔkɔngɔ diko, nde ndjoyakimɔka dia batizama ndo koma okambi wambolowɔma ndo wambetawɔma la ntondo ka Jehowa Nzambi.a Ɔnkɔnɛ, ‘tshukana lo Nkumadiɔndjɔ’ nembetshiyaka tshukana l’onto ɔmɔtshi lamboyatondja sɛkɛ dia nde ekɔ mɛtɛ ombetawudi, lamboyakimɔ oko ‘ɔhɔmbɔ wa Nzambi la wa Nkumadiɔndjɔ Yeso Kristo.’​—Jakoba 1:1.

Onto leka l’Ɛmɛnyi wa Jehowa Bible ndo latahame dimɛna lo nyuma pombaka mandɔma. Koko, nde atayakimɔ nde ndamɛ le Jehowa ndo atakimɔ lɔsɛnɔ lande l’olimu ɔmɔtshi kana lilambola yoho mɔtshi. Nde akâhombe sala etshikitanu ekina w’ohomba. Nde pombaka sala etshikitanu wa weke wahombama wendana la koma Okristo wamboyakimɔ ndo wambotizama, la ntondo ka nde ndjosangoya dia sala otshikitanu okina wa woke lo lɔsɛnɔ, ɛnyɛlɔ oko tshuka kana tshukama.

Onde ayonga dui dia lomba dia Okristo membɔna l’onto ɔmɔtshi lɛnama dia nde ekɔ lo tahame lo wekelo ande wa Bible la kanyi ya ndjotshukana la nde mbala mɔtshi lo mbuta dia hawototshukana la ntondo ka nde batizama? Ndooko. Eyango wele l’ombeki wa Bible mbeyaka ndjofukutana naka nde ambeya di’Okristo ɔmɔtshi wamboyakimɔ nangaka tshukana la nde koko paka l’ɔkɔngɔ wa nde batizama ko vɔ ndjotshukana.

Mbala efula, onto mongaka opandjudi wele atabatizama paka lo tshanda mɔtshi tsho, edja ndo nde ambohama polo ndo lo batizama. Ɔnkɔnɛ, dako dia la diko ndo diata dia tshukana paka lo Nkumadiɔndjɔ ekɔ dako dia dimɛna efula. Kakɔna kayotota dikambo di’onto ɔmɔtshi laya l’ɛnɔnyi wa tshuka kana wa tshukama lakodiama lo nkumbo kɛmɔtshi k’Akristo, lele aya edja efula kamondekesanɛ l’etshumanelo ndo lele opandjudi wahatabatizama? Ko naka ekɔ ngasɔ, toyambole ɔnɛ kakɔna kakôshimbe edja kɛsɔ tshɛ dia nambola lɔsɛnɔ lande le Jehowa? Bonde kakandengenga? Onde nde eke la tâmu? Kânga mbende kema onto lahetawɔ, hatokoke mbuta dia nde ekɔ ‘lo Nkumadiɔndjɔ.’

Dako diakasha Paulo lo kɛnɛ kendana la diwala diekɔ lo wahɔ aso. (Isaya 48:17) Etena kayalambola wanɛ wasangoya ndjotshukana le Jehowa, dimama diawɔ dia lo diwala ndjongaka wolo ndo l’etshina ka lo nyuma ka shikaa. Vɔ ndjelaka ɛlɛmbɛ wâmɛ wendana la lɔkɛwɔ ndo mongaka l’eyango wâmɛ. Dui sɔ kimanyiyaka efula di’anto ndjonga la diwala di’ɔngɛnɔngɛnɔ. Ndo nto, lo ‘tshukana lo Nkumadiɔndjɔ,’ onto mɛnyaka kɔlamelo yande otsha le Jehowa ndo dikambo sɔ mbelaka ɛtshɔkɔ wa pondjo, nɛ dia ‘le onto lele la kɔlamelo, Jehowa ayonga la kɔlamelo otsha le nde.’​—Osambu 18:25.

[Nɔtɛ ka l’ɛse ka dikatshi]