“Lambotana kɛnɛ tshɛ kâkimi l’ohomba”

LO NDJELA alapɔlɔ ɔmɔtshi wakatondja Organisation mondiale de la santé, yɛdikɔ yele oko anto ndekana miliyɔ 120 wekɔ lo diɛnɛ l’ɔkɔmwɛlɔ w’otema l’andja w’otondo. Ɔnɔnyi tshɛ, miliyɔ ɔtɔi k’anto wekɔ lo ndjadiaka ndo lofulo la lam’asa miliyɔ 10 la 20 y’anto nyangaka dia kumiya nsɛnɔ yawɔ. Naa ekimanyielo kakoka nongola wanɛ wambɔkɔmɔ otema na? Esakelo k’oma l’enganga mbeyaka kitshakitsha pâ kɛsɔ ndo anto asɔ wekɔ nto l’ohomba w’ekeketshelo ka lo yimba. Ndo nto, anto amɔtshi wele la pâ ka woho ɔsɔ kondjaka ekimanyielo kekina oma l’ekanda walembetshiya Bible watondja Ɛmɛnyi wa Jehowa, oko wadiɛnya mukanda ɔnɛ woye oma la France.

“Atete edja, lakɛnyi dia ndoko ohomba wa dimi tetemala la ndjala la lɔsɛnɔ. Lakalɔmbɛ Jehowa diande tshikami mvu. Laki oko onto lamboshila la mvɔ. Lakatamanya nɔmba Jehowa dia nde nɔmbɔlami. Lakɔshi nto yɛdikɔ ya mbadia Annuaire de Témoins de Jéhovah 2002 ndo lakashidiya wadielo awɔ lo nshi shato. Wadielo ɔsɔ wakakimanyiya efula ndo wakakeketsha mbetawɔ kami.

“Lakasale eyangelo ɛmɔtshi lo Tshoto y’Etangelo ndo Réveillez-vous ! ndo kɛnɛ kakamatane lɔkɔ kakamambiya efula! Ambolekana ɛnɔnyi 15 wemi lo mbadia periodikɛ yakɔ mbala la mbala, koko ndoko lushi lakamɛnyi di’asawo wa lɔkɔ mbishaka ekeketshelo ka nganɛ. Yɔ ndola l’awui wa ngandji, dionga diele anto efula waya bu ladiɔ nshi nyɛ. Lambotana kɛnɛ tshɛ kâkimi l’ohomba.

Bible mbutaka ate: “[Jehowa], eko lasuki la wane weli la etema wambate. Ndi atushimbelaka wa[nɛ] weli la [“timba tambofukutana,” NW].” (Osambu 34:18) Aha la tâmu, anto tshɛ wele l’“etema wambate” kana “timba tambofukutana” kokaka kondja ekeketshelo ndo elongamelo lo Bible lo kɛnɛ kendana la nshi yayaye. Ɛmɛnyi wa Jehowa wekɔ lo kahɛ anto ekanda walembetshiya Bible dia kimanyiya wanɛ wele lo dihombo dia kondja ekimanyielo oma le Nzambi lele kiɔkɔ y’esambelo.