Dambo Di’ekomelo dia Dikɔlɔ ediɔ na?

KAKƆNA kakoyɛ lo yimba etena kokayɛ watɛkɛta dikambo dia “dambo di’ekomelo dia dikɔlɔ”? Anto efula wayokanyiya dikambo dia dambo dia woke diakasalema l’osomba wa Milan, lo wodja w’Italie oma le osangi w’asango ɔmɔtshi wakawelɛka Léonard de Vinci (1452-1519). Dikambo diele lanɛ ele Dambo di’Ekomelo dia Dikɔlɔ aki dikambo dieyama le asangi w’asango, afundji ndo le amembi wa nkembo lo ntambe tshɛ.

Ko, elɛwɔ Dambo di’Ekomelo dia Dikɔlɔ ndo na kitshimudi yele la dambo sɔ le anto wasɛna lo ntambe kɛnɛ ka 21? Encyclopedie ndo adiksiɔnɛrɛ wayokɛnya dia Dambo di’Ekomelo dia Dikɔlɔ dielamɛ nto ɔnɛ Dambo dia Dikɔlɔ dia Nkumadiɔndjɔ ekɔ dambo diakale Yeso Kristo nde l’apɔstɔlɔ ande la dikɔlɔ dia la ntondo ka nyɔi kande k’olambo. Lam’ele ɔsɔ mbaki Dambo di’ekomelo diakale Yeso nde l’ambeki ande wa kɔlamelo, diɔ diakɔ dielamɛdɔ ɔnɛ Dambo di’Ekomelo dia Dikɔlɔ. Ndo lam’ele dambo sɔ diakasalema ntondo oma le Nkumadiɔndjɔ Yeso Kristo ndamɛ, sunganaka diɔ mbelamɛ ɔnɛ Dambo dia Dikɔlɔ dia Nkumadiɔndjɔ.

Lo nkama y’ɛnɔnyi wambeta, anto efula wakalambola nsɛnɔ yawɔ l’ɔtɛ w’eyango ɛmɔtshi wakawɛnaka dia ekɔ ɔlɔlɔ. Nyɔi yaki amɔtshi wa l’atei awɔ yakela anto amɔtshi ɛlɔlɔ lo tshanda mɔtshi. Koko ɛlɔlɔ w’oma lo nyɔi shɔ hawokoke mbɛdikama kânga yema l’ɛlɔlɔ w’oma lo nyɔi ka Yeso Kristo. Lâdiko dia lâsɔ, l’andja ɔnɛ wambolola l’ekakatanu ndo l’ewanu, ndoko nyɔi k’onto ɔtɔi kakoka monga la shɛngiya le anto wa l’andja w’otondo lo kiɛdika la nyɔi ka Yeso. Lande na?

Dia kadimola wombola ɔsɔ ndo dia kokimanyiya dia wɛ mbeya kitshimudi yele la Dambo dia Dikɔlɔ dia Nkumadiɔndjɔ le yɛ, tambokɔlɔmba dia wɛ mbadia wekelo wayela.