Ɛlɔngɔlɔngɔ l’esekaseka le, Jehowa hohɛ olimu anyu!
“[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.”—HEBERU 6:10.
1. Ngande wɛnya mukanda wa Heberu ndo wa Malaki dia Jehowa mbɔsaka olimu ayɛ la nɛmɔ?
ONDE wɛ atasalɛka ɔngɛnyi ayɛ ɔmɔtshi dikambo di’ɔlɔlɔ, aha la nde kosha losaka? Mbeyaka monga pâ efula l’asolo etena kɛnayɛ di’onto losaleyɛ ɔlɔlɔ hɔshi dikambo diakɔ la nɛmɔ efula ndo pâ ndekaka etena kohɛnde ɔlɔlɔ wosaleyɛ. Koko, aha ngasɔ mbediɔ lo kɛnɛ kendana l’olimu wakambɛso Jehowa l’otema ɔtɔi! Bible mbutaka ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi, uku akanyakimanyia ekilami, ndu uku atshanyu edja ndu elo.” (Heberu 6:10) Ohokanyiya ohomba wa dikambo sɔ. Jehowa ayɔsa dikambo sɔ oko dikambo dia kɔlɔ, mbut’ate oko pɛkato kambondosala naka nde mbohɛ kɛnɛ kamboyosala ndo katetemalayɛ la sala l’olimu ande. Nde mɛtɛ ekɔ Nzambi kele la lowando!—Malaki 3:10.
2. Kakɔna ketɛ mɛtɛ kambɛ Jehowa diɛsɛ dia lânde?
2 Wɛ ekɔ la diaaso dia lânde dia tɛmɔla ndo dia kambɛ Nzambi k’ɔlɔlɔ kɛsɔ. Lam’ele ekɔ paka anto oko miliyɔ shamalo tsho y’asekayɛ ambetawudi, naka mbɛdika la miliyara shamalo y’anto wa l’andja w’otondo, kete wɛ ekɔ mɛtɛ la diɛsɛ dia lânde. Ndo nto, woho wahokamɛyɛ ndo wetawɔyɛ losango la lokumu l’ɔlɔlɔ mɛnyaka dia Jehowa ndjashaka lo yoho ya lânde lo dikambo diayɛ. Yeso akate ate: “Nduku untu leya ndja le mi, tshikima Papa lakantumi kûkutudi.” (Joani 6:44) Eelo, Jehowa kimanyiyaka anto l’ɔmɔmɔ dia vɔ kondja wahɔ l’olambo wa tshungo waki Kristo.
Andola Diɛsɛ dia Lânde Diele Layɛ
3. Ngande wakɛnya ana waki Kɔra lowando lo diɛsɛ diaki lawɔ dia kambɛka Jehowa?
3 Oko wakadiɛnyama lo sawo dia mbala ketshi, wɛ ekɔ la diaaso dia lânde dia ngɛnyangɛnya otema wa Jehowa. (Tukedi 27:11) Wɛ hahombe pondjo mbɔsa diaaso sɔ oko ɛngɔ k’anyanya. L’osambo ɔmɔtshi wakafundama lo wolo wa nyuma ka Nzambi, ana waki Kɔra wakɛnya lowando lawɔ lo diɛsɛ diaki lawɔ dia kambɛ Jehowa. Sho mbadiaka l’osambu akɔ ɔnɛ: “Ndjala l’etemwelo kaye lushi otoi, ambuleka ndjala nshi kinunu am’akina ololo. Dimi lambuleka nanga ndjala ulami wa suku dia luudu la [Nzambi k]ami, uleki mbidjase lu mvudu y’antu wa kolo, akanga w’engonyi.”—Osambu 84:10.
4. (a) Kakɔna kakoka mɛnya esangɔ ɛmɔtshi dia tɛmɔla Jehowa ekɔ oko onto lasusa lotshungɔ? (b) Lo yoho yakɔna yalanga Nzambi menda ndo futa ekambi ande?
4 Onde ngasɔ mbayaokayɛ lo kɛnɛ kendana la diɛsɛ diayɛ dia kambɛ Shɔ lele l’olongo? Ekɔ mɛtɛ dia lo tena dimɔtshi ayɛnama oko tɛmɔla Jehowa susaka lotshungɔ lakiyɛ. Mɛtɛ, nsɛna lo yoho yɔtɔnɛ l’atɔndɔ wa lo Bible nɔmbaka ndjahombia lo yɛdikɔ mɔtshi. Koko l’ekomelo, kɛnɛ tshɛ kakɔlɔmba Jehowa ekɔ dia wahɔ ayɛ hita. (Osambu 1:1-3) Ndo nto, Jehowa mɛnaka welo wadjayɛ ndo nde ngɛnangɛnaka kɔlamelo yayɛ. Paulo akafunde dia Jehowa ‘ekɔ ofutshi a wanɛ watoyangaka.’ (Heberu 11:6) Jehowa nyangaka waaso wa sala dikambo sɔ. Omvutshi ɔmɔtshi wa kɔlamelo wa l’Isariyɛlɛ w’edjedja akate ate: “[Jehowa] atukaka ashu andi lu kete tshe, dia nsukela waku weli la etema tshe le ndi.”—2 Ekondo 16:9.
5. (a) Naa yoho mɔtshi yoleki dimɛna yakokayɛ mɛnya di’otema ayɛ wekɔ tshɛ le Jehowa? (b) Bonde kakoka monga wolo tɛkɛta l’anto akina dikambo dia mbetawɔ kayɛ?
5 Yoho yoleki dimɛna yakokayɛ mɛnya di’otema ayɛ tshɛ wekɔ le Jehowa ele lo mbewoya anto akina akambo wendana lande. Onde wɛ ambokondjaka diaaso dia tɛkɛta l’asekayɛ amɔtshi wa la kalasa akambo wendana la mbetawɔ kayɛ? Ntondotondo, wɛ mbeyaka mboka sɔnyi dia sala dikambo sɔ ndo diɔ mbeyaka kokiya wɔma. Wɛ mbeyaka ndjambola ɔnɛ: ‘Ayomosala naka vɔ wamɔmbɔla? Ayomosala naka vɔ fɔnya ɔnɛ ɔtɛmwɛlɔ ami wekɔ oyoyo?’ Yeso akeyaka dia aha onto tshɛ mbayetawɔ losango la Diolelo. (Joani 15:20) Koko kɛsɔ halembetshiya dia wɛ ayɔsɛnaka yoho ya lɔsɛnɔ yahomba anto kɔ̂laka mbala tshɛ kana tona kɛnɛ kalangayɛ mbatɛ. Koko, Ɛmɛnyi wa Jehowa efula w’ɛlɔngɔlɔngɔ l’esekaseka tanaka onto ɔmɔtshi letawɔ mbahokamɛ ndo asekawɔ mbalɛnyaka efula l’ɔtɛ wakɛndakɛndawɔ lo yoho yɔtɔnɛ la dietawɔ diawɔ.
“Jehowa Ayokokimanyiya”
6, 7 (a) Ngande wakakondja osekaseka ɔmɔtshi w’ɛnɔnyi 17 dihonga dia sambisha asekande wa la kalasa? (b) Wetshelo akɔna wamboyokondja oma lo kɛnɛ kakakomɛ Jennifer?
6 Ko ngande wakokayɛ monga la dihonga dia tɛkɛta akambo wendana la mbetawɔ kayɛ? Lande na kahayɔshi yɛdikɔ ya monga la losembwe ko sembola awui etena kakombola onto ɔmɔtshi akambo wendana l’ɔtɛmwɛlɔ ayɛ? Tende kɛnɛ kakakomɛ osekaseka ɔmɔtshi w’ɛnɔnyi 17 welɛwɔ Jennifer. Nde mbutaka ate: “Wonya wa diomuyelo watotɔlɛka yangɔ ya midi la kalasa, esekaseka ekina wakalɛka lami mɛsa ɔtɔi wakatatɛ tɛkɛta dikambo di’ɛtɛmwɛlɔ, ko ɔmɔtshi l’atei awɔ akamumbola dia mbeya ɔtɛmwɛlɔ wemi.” Onde Jennifer aki la wɔma dia kadimola? Nde mbetawɔka ate: “Eelo, nɛ dia dimi kombeyaka shikaa kɛnɛ kotosala asekami.” Lâsɔ kakɔna kakasale Jennifer na? Nde tetemalaka mbuta ate: “Lakewoya esekaseka ɛsɔ dia dimi lekɔ Ɔmɛnyi wa Jehowa. L’etatelo akɛnama dia vɔ wakakashimɔ. Akɛnama dia vɔ wakafɔnyaka di’Ɛmɛnyi wa Jehowa wekɔ anto wotshikitanyi l’anto akina. Kɛsɔ akâtshutshuya dia vɔ mimbolami wembola efula, ndo lakâlembetshiya akambo efula lo kɛnɛ kendana la tokanyi ta kɔlɔ taki lawɔ lo dikambo di’Ɛmɛnyi wa Jehowa. Kânga l’ɔkɔngɔ wa lushi lɔsɔ, esekaseka ɛmɔtshi wakamimbolaka wembola mbala la mbala.”
7 Onde Jennifer akanyange lo woho wakandakondja diaaso dia tɛkɛta dikambo dia dietawɔ diande? Ndooko yema! Nde mbutaka ate: “Lakoke ɔlɔ wa mamba lo dikambo sɔ l’ekomelo ka wonya wa diomuyelo. Kakianɛ, esekaseka ɛsɔ waya la kanyi ya dimɛna lo kɛnɛ kendana l’Ɛmɛnyi wa Jehowa.” Dako diasha Jennifer kakianɛ bu wolo, nde mbutaka ate: “Naka wɛ mɛnaka wolo dia sambisha asekayɛ wa lo kalasa kana embetsha ayɛ, kete sala ntondo dɔmbɛlɔ di’esadi esadi. Jehowa ayokokimanyiya. Wɛ ayɔngɛnangɛna lo woho wayoyokamba dimɛna la diaaso diele layɛ dia sambisha.”—1 Petero 3:15.
8. (a) Ngande wakakimanyiya dɔmbɛlɔ Nehemiya etena kakandakondja diaaso dia shashimoya? (b) Naa akambo amɔtshi watomba lo kalasa wahombayɛ sala dɔmbɛlɔ dia mondo l’etei k’otema?
8 Tolembete dia Jennifer ndakaka dia ‘nɔmba Jehowa esadi’ etena kakondjayɛ diaaso dia sambisha akambo wendana la mbetawɔ kayɛ. Kɛsɔ mbakasale Nehemiya, ɔnɛ lakadjɛka Nkumekanga Aratashasha ka la Pɛrɛsiya wanu etena kakandakondja diaaso. Akɛnama hwe dia Nehemiya aki la lonyangu nɛ dia wakawotɛ di’ase Juda waki lo pomana l’ekakatanu wa wolo ndo ɔnɛ mpele ndo kuke ya Jerusalɛma yakanyukɔ. Nkumekanga akɛnyi dia Nehemiya aki la lonyangu, ɔnkɔnɛ nde akawombola dia mbeya kɛnɛ kakatombe. La ntondo ka nde kadimola, Nehemiya akalɔmbɛ dia nyanga ɛlɔmbwɛlɔ kaki Nzambi. Oma lâsɔ, nde akalɔmbɛ dikimɔ la dihonga tshɛ dia nde kalola otsha la Jerusalɛma dia nyomotohika osomba wakahandjɔ. Aratashasha aketawɔ kɛnɛ kakɔ̂lɔmbɛ Nehemiya. (Nehemiya 2:1-8) Wetshelo akɔna wakokayɛ kondja lo dikambo sɔ na? Naka wɛ amboka wɔma etena kakondjayɛ diaaso dia sambisha akambo wendana la mbetawɔ kayɛ, kete tohɛke dia sala dɔmbɛlɔ l’otema. Petero akafunde ate: “Nyukitsha ukananu anyu tshe le ndi, ne dia ndi atunyukanelaka.”—1 Petero 5:7; Osambu 55:22.
‘Ongaka Suke dia Kaloya Dui’
9. Ngande wakonge osekaseka w’ɛnɔnyi 13 le Leah l’akoka wa mbisha asekande kɔpi 23 ya dibuku Les jeunes s’interrogent?
9 Tende ɛnyɛlɔ kekina. Osekaseka w’ɛnɔnyi 13 le Leah akadiaka dibuku Les jeunes s’interrogent — Réponses pratiquesa wonya wa diomuyelo la kalasa. Nde akate ate: “Ambeki akina wakamendaka, ndo kombeta edja, olui w’ambeki wakaninge ndo wakendaka dibuku diakamadiaka. Vɔ wakatatɛ mimbola kakɔna katɛkɛtama lo dibuku diakɔ.” L’ekomelo ka lushi lɔsɔ, esekaseka ɛnɛi wakalɔmbɛ Leah dia vɔ kondja dibuku Les jeunes s’interrogent. L’ɔkɔngɔ w’esekaseka ɛsɔ kɛtshanya l’asekawɔ akina akambo wele lo dibuku, vɔ lawɔ wakayange dia dikondja. Mingu ngana yakayele, Leah akasha asekande wa la kalasa ndo angɛnyi ande abuku 23. Onde aki dikambo dia wɔdu le Leah dia nde kadimola etena kakawombola asekande akambo wendana la dibuku diakandadiaka? Ndooko! Nde mbetawɔka ate: “L’etatelo, laki la wɔma. Koko lakasale dɔmbɛlɔ ndo lakeyaka dia Jehowa ekɔ kâmɛ la mi.”
10, 11 Ngande wakakimanyiya osekaseka ɔmɔtshi w’ose Isariyɛlɛ owandji w’alembe w’ose Suriya dia nde mbeya Jehowa, ndo etshikitanu akɔna wakandasale oma lâsɔ na?
10 Kɛnɛ kakakomɛ Leah mbeyaka kohola dikambo dia woho akɔ wâmɛ diakakomɛ osekaseka ɔmɔtshi w’ose Isariyɛlɛ waki lo fumbe la Suriya. Owandji w’alembe w’ose Suriya le Namana aki la hemɔ ka sudi. Ondo wadɛnde mbakahɔhɔla sawo diakayoshaka yana ya yimato shɔ diaaso dia nde tɛkɛta dikambo dia mbetawɔ kande. Nde akate ate: “Utunduyala khumemi ayali lasuki la umvutshi weli la Samariya, tshiki ndi ûtokonoya sudi kandi!”—2 Khumi ya Dikanga 5:1-3.
11 Oma lo dihonga diaki la kiɛndakɛnda ya yimato shɔ, Namana akayeyaka dia ‘ndoko dihole dikina dia lanɛ la nkɛtɛ diele Nzambi onyake l’Isariyɛlɛ.’ Ndo nde akɔshi yɛdikɔ ‘yaha nambola olambo wa lotshumba kana olambo le tonzambizambi tokina onyake le Jehowa.’ (2 Khumi ya Dikanga 5:15, 17) Jehowa akatshɔkɔla mɛtɛ dihonga diaki dikɛnda dia womoto sɔ. Nde kokaka ndo ayosala woho akɔ wâmɛ l’ɛlɔngɔlɔngɔ ndo l’esekaseka ɛlɔ kɛnɛ. Leah akɛnyi mɛtɛ ka dikambo sɔ. L’ɔkɔngɔ wa nshi efula, asekande wa la kalasa wakawotɛ dia dibuku Les jeunes s’interrogent diekɔ lo mbakimanyiya efula lo lɔkɛwɔ lawɔ. Leah akate ate: “Lekɔ l’ɔngɛnɔngɛnɔ efula dia kimanyiya anto akina dia vɔ mbeya akambo efula wendana la Jehowa ndo dia vɔ tshikitanya nsɛnɔ yawɔ.”
12. Ngande wakokayɛ monga la dihonga dia mamema mbetawɔ kayɛ?
12 Wɛ kokaka sala akambo wele oko wanɛ wakasale Jennifer nde la Leah. Kitanyiya dako diaki Petero lakafunde ate oko weyɛ Okristo, wɛ pombaka ‘ndjalɔngɔsɔla dia mbeya kaloya dui le onto tshɛ lakoka dimbola lo kɛnɛ kendana l’elongamelo kayɛ. Kele sala dikambo sɔ la memakana ndo la dilɛmiɛlɔ di’efula.’ (1 Petero 3:15) Ngande wakokayɛ sala dikambo sɔ na? Yela ɛnyɛlɔ k’Akristo wa lo ntambe ka ntondo wakalɔmbɛ Jehowa dia nde mbakimanyiya dia vɔ sambisha “la dihunga tshe.” (Etsha 4:29) Ndo onga la dihonga etena kewoyayɛ anto akina akambo wendana la mbetawɔ kayɛ. Wɛ mbeyaka mamba etombelo wayoyokondja. Ndo nto, wɛ ayɔngɛnyangɛnya otema wa Jehowa.
Vidɛo ndo Waaso Akina wa Lânde
13. Waaso akɔna wakondja ɛlɔngɔlɔngɔ kana esekaseka ɛmɔtshi dia sambisha? (Enda lo kiombo ya lo lɛkɛ 14 ndo 15.)
13 Ɛlɔngɔlɔngɔ l’esekaseka efula wakalembetshiya asekawɔ wa la kalasa kana embetsha akambo wendana la mbetawɔ kawɔ lo kamba la waa bandɛ vidɛo. Tena dimɔtshi, adɛvɔara wa la kalasa wakawashaka nto waaso wa tombola Jehowa. Ɛnyɛlɔ, wakalɔmbɛ ɛlɔngɔlɔngɔ ehende w’Ɛmɛnyi wa Jehowa waki l’ɛnɔnyi 15 lo wekelo awɔ w’ɛkɔndɔ wa l’andja dia vɔ funda alapɔlɔ wendana l’ɔtɛmwɛlɔ ɔmɔtshi wa l’andja. Ɛlɔngɔlɔngɔ ehende ɛsɔ wakasangana kâmɛ dia funda alapɔlɔ awɔ l’akambo wendana l’Ɛmɛnyi wa Jehowa, ndo wakakambe la dibuku Les Témoins de Jéhovah: Prédicateurs du Royaume de Dieu.b Vɔ wakahombe nto mbisha sawo dia minitɛ tshanu diendana l’alapɔlɔ awɔ. Lam’akawashidiya, ombetsha ndo ambeki akina waki la wembola efula ko akɛnda ahende asɔ wakatshikala lo lɔyɛnga la lo kalasa minitɛ kina 20. Mingu yakayele oma lâsɔ, asekawɔ wa la kalasa wakatetemala la mimbola wembola efula lo dikambo di’Ɛmɛnyi wa Jehowa!
14, 15 (a) Lande na kele wɔma w’onto ekɔ djonga? (b) Bonde kahombayɛ ngɛnangɛna dia mbewoya anto akina awui wendana la mbetawɔ kayɛ?
14 Oko wadiɛnya awui wɔtɛkɛtami la diko ango, ɛtshɔkɔ efula koka kondjama lo mbewoya anto akina akambo wendana la dietawɔ diayɛ di’Ɔmɛnyi wa Jehowa. Tetawɔke dia wɔma w’onto kohondja diɛsɛ ndo ɔngɛnɔngɛnɔ wa kimanyiya anto akina dia vɔ mbeya Jehowa. Bible mbutaka ɔnɛ: “Woma w’untu watuwambaka djunga. Keli one latekamaka [Jehowa], ayushimbamela.”—Tukedi 29:25.
15 Tohɛke di’oko weyɛ Okristo w’ɔlɔngɔlɔngɔ kana w’osekaseka, wɛ ekɔ l’ɛngɔ kɛmɔtshi kele asekayɛ wekɔ l’ohomba atɔ heyama, ɛngɔ kakɔ ko yoho ya lɔsɛnɔ loleki dimɛna lele layɛ kakianɛ ndo elongamelo ka lɔsɛnɔ la pondjo lo nshi yayaye. (1 Timote 4:8) Dikambo dia diambo ko, lo wodja w’États–Unis lɛnɛ akokayɛ fɔnya di’anto wa lɛkɔ wekɔ la wendjudi kana ndekaka mbidja yimba paka l’elimu awɔ wa l’emunyi, ɛkɔnya wakasalema lɛkɔ akɛnya dia kahende ɔtɔi k’ɛlɔngɔlɔngɔ l’esekaseka mbɔsaka ɔtɛmwɛlɔ la nɛmɔ efula, ndo kasato ɔtɔi wakate dia mbetawɔ kele lawɔ lo kɛnɛ kendana l’awui w’ɔtɛmwɛlɔ kekɔ la “shɛngiya yoleki wolo” lo lɔsɛnɔ lawɔ. Ondo ngasɔ mbediɔ ndo l’ahole akina efula wa l’andja. Lâsɔ, ondo mɛtɛ asekayɛ wa la kalasa wayɔngɛnangɛna dia mboka akambo wa lo Bible walangayɛ mbatɛ.
Oko weyɛ ɔlɔngɔlɔngɔ kana osekaseka, yasukanya le Jehowa
16. Kakɔna kahombama nto dia ngɛnyangɛnya otema wa Jehowa lâdiko dia mbewoya anto akina akambo wendana la nde na?
16 Eelo, dia ngɛnyangɛnya otema wa Jehowa nɔmbaka awui efula koko aha tsho mbewoya anto akina akambo wendana la nde. Wɛ pombaka nto mbɔtɔnganyiya dionga diayɛ l’ɛlɛmbɛ ande. Ɔpɔstɔlɔ Joani akafunde ate: “Ngandji ka [Nzambi], kene, dia shu nama elembe andi: ku elembe andi hawuleki wutshu.” (1 Joani 5:3) Wɛ ayɛna mɛtɛ ka dikambo sɔ naka wɛ ndjasukanya le Jehowa. Ngande wakokayɛ sala dikambo sɔ?
17. Ngande wakokayɛ sukana le Jehowa?
17 Yatshungwɛ etena ka mbadiaka Bible ndo ekanda wakilembetshiya. Lo yɛdikɔ yayoleka mbeya Jehowa, mbayoleka mɛna wɔdu dia kitanyiya Jehowa ndo mbewoya anto akina akambo wendana la nde. Yeso akate ate: “Untu ololo atutundjaka kene keli ololo uma lu eumbelu k’ololo kuma l’utema andi. . . . Ne dia unyo andi atoteketaka akambu wa l’utema.” (Luka 6:45) Lâsɔ, lodia otema ayɛ l’akambo w’ɔlɔlɔ. Lande na kahayayadjɛ eyango lo dikambo sɔ na? Ondo wɛ koka ndjadjɛ oyango wa nyomoleka pama l’ɔlɔngɔswɛlɔ ayɛ wa nsanganya ya l’etshumanelo ya lomingu layaye. Oyango ayɛ wayela mbeyaka monga wa mbishaka kɔmatɛrɛ ya tomondo ndo y’amɛna. Ekɔ mɛtɛ dia wɛ pombaka kamba l’akambo wekayɛ lo lɔsɛnɔ layɛ.—Filipi 4:9.
18. Eshikikelo kakɔna kakoka monga layɛ oyadi wɛ ekɔ lo pomana l’ɔlɔshamelo?
18 Ɛtshɔkɔ waya oma lo kambɛ Jehowa wekɔ wa pondjo pondjo. Eelo, mbala la mbala wɛ mbeyaka pomana la yema ya wekamu ndo anto mbeyaka kɔ̂nyɔla kana kɔ̂la lo woho weyɛ Ɔmɛnyi wa Jehowa. Koko, kanyiya dikambo diaki Mɔsɛ. Bible mbutaka dia “ndi akalungamelaka difutu diayayi.” (Tukedi 11:24-26) Ndo wɛ lawɔ kokaka monga l’eshikikelo dia Jehowa ayokofuta lo welo wasalɛ dia mbeka akambo wendana la nde ndo dia mbewoya anto akina akambo akɔ. Eelo, nde ‘hatohɛ pondjo olimu ayɛ ndo ngandji kakayɛnya lo lokombo lande.’—Heberu 6:10.
[Nɔte ya l’ɛse ka dikatshi]
a Diakatondjama oma le Ɛmɛnyi wa Jehowa.
b Diakatondjama oma le Ɛmɛnyi wa Jehowa.
Onde wɛ akohɔ?
• Lande na kahombayɛ monga l’eshikikelo dia Jehowa mbɔsaka olimu ayɛ la nɛmɔ?
• Naa toho tɔmɔtshi t’esambishelo ta la kalasa takɛnyi anto amɔtshi dia tɔ mbishaka etombelo w’amɛna?
• Ngande wakokayɛ monga la dihonga dia sambisha asekayɛ wa la kalasa?
• Ngande wakokayɛ ndjasukanya otsha le Jehowa?
[Kiombo/Esato wa lo lɛkɛ 14]
Kânga tɔkɛndakɛnda t’efula tombolaka Jehowa!
Kânga ana wahatakotsha ɛnɔnyi 13 wakonge l’akoka wa sambisha la kalasa. Tɔsɛdingole bɛnyɛlɔ diayela nɛ.
Ombetsha wa lo kalasa ka tanu waki Amber, yana ya yimato y’ɛnɔnyi dikumi akadiaka dibuku dimɔtshi diendana la woho wakalɔshama ase Juda oma le aseka Nazi lo Ta dia Hende di’Andja w’Otondo. Amber akɔshi yɛdikɔ ya mbela ombetsha ande bandɛ vidɛo ka Les triangles violets. Ombetsha ɔsɔ akambe heyama dia mbeya di’Ɛmɛnyi wa Jehowa wakahɛnyahɛnyama vɔ lawɔ lo ɛlɔmbwɛlɔ k’aseka Nazi. Ombetsha akɛnya kalasa k’otondo bandɛ vidɛo kɛsɔ.
Lam’akinde l’ɛnɔnyi enanɛi, Alexa akafundɛ ase kalasa kande mukanda dia mbalembetshiya bonde kakinde kokoka sala fɛtɛ ka Nɔɛlɛ kâmɛ la wɔ. Ombetsha ande akambe heyama, ko nde akalɔmbɛ Alexa dia mbadia mukanda ɔsɔ la dui dia wolo la ntondo k’ase kalasa kande ndo la ntondo ka kalasa kina hiende! Otsha l’ekomelo ka mukanda ande, nde akate ate: “Dimi laketshama woho wa nɛmiya anto akina wele dietawɔ diawɔ tshikitana la diami ndo dimi nyokawoyaka losaka lo woho wakanyalɛnya yɛdikɔ yami yaha sala fɛtɛ ka Nɔɛlɛ.”
Yema tshitshɛ l’ɔkɔngɔ wa nde tatɛ mbɔtɔ lo kahende, Eric akatshu l’okanda wa Dibuku di’Ɛkɔndɔ wa lo Bible otsha la kalasa ndo nde akalɔmbɛ dikimɔ dia diɛnya asekande wa la kalasa. Ombetsha ande akawotɛ ate: “Dimi lekɔ la kanyi ya dimɛna efula ya kosha. Lande na kahayadiɛ kalasa k’otondo ɔkɔndɔ ɔmɔtshi?” Eric akasale ngasɔ. Oma lâsɔ, nde akalɔmbɛ wanɛ waki l’ohomba wa dibuku sɔ dia vɔ memɛ mpita. Anto dikumi l’enanɛi mbidja ndo ombetsha wakemɛ mpita! Eric ambɛna kakianɛ dia nde aya la mbilo kande hita ka sambishaka.
Whitney, yana mɔtshi y’ɛnɔnyi divwa ekɔ la lowando efula lo kɛnɛ kendana la biukubuku Les Témoins de Jéhovah et l’instruction.c Nde mbutaka ate: “Mama akashaka embetsha ami biukubuku nyɛ ɔnɔnyi tshɛ, koko ɔnɔnyi ɔnɛ dimɛ lakasale dikambo sɔ. Diɛsɛ oma lo biukubuku nyɛ, ombetsha ami akambisha woshasha ɔmɔtshi l’ɔtɛ wa lɔkɛwɔ lami l’ɔlɔlɔ.”
[Nɔte ya l’ɛse ka dikatshi]
c Abuku tshɛ woshidiso la diko ango wakatondjama oma l’Ɛmɛnyi wa Jehowa.
[Kiombo/Esato wa lo lɛkɛ 15]
Waaso wakakambe l’amɔtshi dia tɛkɛta dikambo dia mbetawɔ kawɔ
Lam’akawalɔmbɛ dia sala alapɔlɔ kana dikambo dimɔtshi diendana l’ekɔlɛ awɔ, ɛlɔngɔlɔngɔ l’esekaseka ɛmɔtshi wakasɔnɛ dikambo dimɔtshi diakayowashaka diaaso dia sambisha
Ɛlɔngɔlɔngɔ l’esekaseka efula wakasha embetsha awɔ bandɛ vidɛo kana okanda ɔmɔtshi wendana la dikambo diakawakɛtshanya lo kalasa
Lam’akadiaka ɛlɔngɔlɔngɔ l’esekaseka ɛmɔtshi Bible kana okanda ɔmɔtshi walembetshiya awui wa lo Bible lo wonya wa diomuyelo, asekawɔ akina wakaye oya le wɔ ko wakawaoke wembola
[Osato wa lo lɛkɛ 12]
Anto wambotshunda mbeyaka kimanyiya akɛnda dia vɔ mbeya kambɛ Jehowa