Esambelo le wanɛ wasowa

ETENA kakasowaka apami la wamato wa kɔlamelo wa lo nshi y’edjedja, vɔ wakalɔmbaka Nzambi l’otema ɔtɔi dia kondja ɛlɔmbwɛlɔ. Koko, vɔ wakɔsaka nto tɛdikɔ dia kitshakitsha asui, oko lo kamba la yewo dia mbewɔ atunyi. Ɛnyɛlɔ, wɛkamu waki lande le Jehowa kâmɛ ndo welo wakandadje mbakakimanyiya Davidi dia mbikikɛ ɔlɔshamelo waki lande. Kakɔna kayotota lo dikambo diaso ɛlɔ kɛnɛ?

Lam’atoyongaka l’asui, ondo wɛ tɔsaka yɛdikɔ ya kandola okakatanu wele layɛ. Ɛnyɛlɔ, naka wɛ aya bu l’olimu, kema wɛ tosalaka la wolo dia tana olimu w’oshika wayokosukɛ wɛ la nkumbo kayɛ? (1 Timote 5:8) Kana naka wɛ ekɔ la hemɔ kɛmɔtshi lo demba, kema wɛ toyangaka ekimanyielo ka dimɛna k’enganga? Ekɔ dimɛna efula lo woho wele Yeso, laki la nkudu k’oma le Nzambi ka kɔnɔla weho tshɛ wa hemɔ, aketawɔ dia ‘wanɛ wele la hemɔ wekɔ l’ohomba wa dɔkɔtɛlɛ.’ (Mateu 9:12) Koko, mbeyaka monga ko asui ayɛ hawotoshila lo pondjo; wɛ la dia tetemala mbakikɛ lo yɛdikɔ mɔtshi.

Bonde kahayewoya Jehowa Nzambi dui sɔ lo dɔmbɛlɔ? Ɛnyɛlɔ, lam’ayangaso olimu, wɛkamu aso le Nzambi kâmɛ ndo dɔmbɛlɔ ayotokimanyiya dia shika tanga la ntondo k’ohemba tshɛ wakoka totshutshuya dia mbetawɔ olimu wahɔtɔnɛ l’atɔndɔ wa lo Bible. Tayewɔ nto di’aha ‘tshika mboka ka mbetawɔ’ l’ɔtɛ wa lokaki kana wa ngandji ka falanga. (1 Timote 6:10) Lo mɛtɛ, lam’ɔsaso tɛdikɔ t’ohomba tendana l’olimu, nkumbo, kana ekiyanu wa lo demba, sho kokaka ndjela dako diaki Davidi diata ɔnɛ: “Ukitsha wutshu aye le [Jehowa], ku ndi ayukembelawo. Ndi hetawo untu ololo nsutshasutshama.”​—Osambu 55:22.

Dɔmbɛlɔ di’oma k’ɛse otema ayotokimanyiya nto dia monga la wɛdimo lo yimba di’aha asui aso ndeka totshindja yimba. Oko wakinde Okristo w’oshika, ɔpɔstɔlɔ Paulo akafunde ate: “Lu akambu tshe, nyuti ehumba anyu le [Nzambi] lu dombelo la osengosengo kame la eukelu ka lusaka.” Lo yoho yakɔna yakoka dɔmbɛlɔ di’oma k’ɛse otema tosamba na? “Ki ka [Nzambi], kuleki yimba tshe, ayulama etema anyu la tukanyi tanyu le Kristu Jesu.” (Filipi 4:6, 7) Ki ka Nzambi ‘ndeka yimba tshɛ.’ Ɔnkɔnɛ, tɔ kokaka toshikimadia lam’eso l’ekiyanu. Tɔ kayolama ‘etema aso ndo tokanyi taso,’ ɔnkɔnɛ tɔ kayotokimanyiya dia tona sala akambo esadi esadi aha la kana yimba, ko dui sɔ ndjofudia asui aso.

Dɔmbɛlɔ koka tshikitanya woho wahomba dui dimɔtshi mbeta. Lam’aki ɔpɔstɔlɔ Paulo lo lokanu la Rɔma, nde akalɔmbɛ asekande Akristo l’okitshakitsha tshɛ dia vɔ nɔmba dikambo diande. Bonde kakalɔmbɛ Paulo dikambo sɔ? Nde akâfundɛ ate: “Dimi lambutamanya nyokokomiya dia nyu ntsha wuhu oso, dia dimi nkalula le nyu esadi.” (Heberu 13:19) L’ɛtɛkɛta ekina, Paulo akeyaka dia naka Jehowa mboka alɔmbɛlɔ wa l’etete wakasalaka asekande ambetawudi, kete kɛsɔ akakoke tshikitanya etena kakandakoke tshungɔ.​—Filemona 22.

Onde dɔmbɛlɔ kokaka tshikitanya etombelo w’asui aso? Eelo. Koko, paka sho mbeya dia ondo Jehowa Nzambi hokadimola alɔmbɛlɔ aso lo yoho yalangaso. Paulo akalɔmbɛ mbala efula dikambo dia ‘tɛndɛ diaki lo demba diande,’ ondo dia hemɔ kɛmɔtshi. Koko, l’ɔtɛ wa nde minya sui sɔ, Nzambi akatɛ Paulo ate: “Ngandji kami ka mamba nkukaka le ye: ne dia wulu ami atukukiamaka lu wodu.”​—2 Koreto 12:7-9.

Ɔnkɔnɛ, mbeyaka monga ko asui aso hawotoshila mbala kakɔ ɔtɔi. Koko, tayokondja diaaso dia ndjaɛkɛ le Shɛso lele l’olongo. (Jakoba 1:2-4) Yashikikɛ dia kânga Jehowa Nzambi hanyisha sui diakɔ, nde koka “[nɔngɔsɔla] mbuka ka [sho] panda dia [sho] ndjala la wulu wa shikikala.” (1 Koreto 10:13) Diakɔ diakoka Jehowa mbelamɛ mɛtɛ ɔnɛ: ‘Nzambi k’esambelo tshɛ; latotosambaka lo asui aso tshɛ.’ (2 Koreto 1:3, 4) Nzambi kokaka tosha kɛnɛ kele laso ohomba dia mbikikɛ, ndo sho tekɔ l’elongamelo ka lɔsɛnɔ la pondjo.

Bible, Ɔtɛkɛta wa Nzambi, akalake dia Jehowa “ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji.” (Enyelo 21:3, 4) Onde mbetawɔ ɔnɛ andja wahatoyala l’asui wayonga, ekɔ dikambo dia wolo? Mbeyaka monga wolo naka wɛ ambekɛka nsɛna l’atei w’ekakatanu. Koko, Nzambi tolakaka dia totshungola oma lo wɔma nd’oma lo mpokoso ndo sangwelo diande diayokotshama ndoko onyake.​—Isaya 55:10, 11.

[Esato wa lo lɛkɛ 9]

Oma l’ɔkɔmwɛlɔ otsha l’etshungwelo