Tewɔ lokeso

‘Nyewɔ, ondo onto ɔmɔtshi mbeyaka ndjonyonganyiya . . . oma lo lokeso.’​—KOLOSAI 2:8.

1-3. (a) Bɛnyɛlɔ diakɔna diɛnya dia lokeso lambokokanɛ l’akambo suke la tshɛ wa lɔsɛnɔ la lushi la lushi? (b) Lande na kahatahombe mamba lo kɛnɛ kendana la lokeso la l’andja ɔnɛ?

AMBETA ɛnɔnyi ɛmɔtshi, prɔfɛsɛrɛ kɛmɔtshi k’ombewi w’ɛlɛmbɛ wa lɛɛta akalɔmbɔla oyangelo ɔmɔtshi lo tambolaka wombola ɔnɛ: “Anto angana l’atei anyu wahatahomanaka l’onto ɔmɔtshi layondosambɛ lo kilombo lawotɛ kashi?” Okadimwelo akɔna wakandakondja na? Nde mbutaka ate: “L’atei wa waa avɔka nkama ya nunu, paka ɔtɔi oto mbaki atahomanaka l’onto lasambɛnde kilombo laki kombotɛ kashi.” Lande na? “Waa avɔka wakatatɛka la swɛlɛ onto la ntondo ka ndo onto akɔ mbokiya dikambo dimɛna dimɛna.” Dikambo sɔ kɛnɛmɔlaka dui dimɔtshi dia kɔlɔ efula, mbut’ate wotelo wa kashi ndo lokeso ekɔ akambo wasalema efula l’andja ɔnɛ.

² Lokeso salemaka lo toho efula ndo lɔ lambokokanɛ l’akambo suke la tshɛ wa lo lɔsɛnɔ la nshi nyɛ. Tita sango ndola la bɛnyɛlɔ dia kashi di’ase pɔlitikɛ lo kɛnɛ kendana l’akambo wasalawɔ, waa kɔtabɛlɛ ndo waa avɔka mbidjaka oshimu esɔ lo wahɔ wakondja wa kɔmpanyi, ndo anto hawote mɛtɛ etena kasombawɔ waa asiransɛ dikambo dia mituka kana dia mitutu awɔ. Ɔsɔ ekɔ paka bɛnyɛlɔ dingana to dia lokeso mboshidiso. Ekɔ nto lokeso la l’ɔtɛmwɛlɔ. Ewandji w’ɛtɛmwɛlɔ wekɔ lo kesa lokema l’anto oma lo wetshelo wa kashi, w’ɔnɛ anima havu, ifɛrnɔ, ndo Losato l’Osanto.​—2 Timote 4:3, 4.

³ Onde sho pombaka mamba lam’ɛnaso lokeso lɔsɔ tshɛ? Ndooko. Lo kɛnɛ kendana la “nshi y’ekumelu,” Bible akewola ɔnɛ: “Antu wa kolo la akanga a lukesu wayuhama lu akambu awo wa kolo; vo wayukesana, ku wayukesama.” (2 Timote 3:1, 13) Oko weso Akristo, sho pombaka nsɛna wolo lo kɛnɛ kendana la tokanyi takoka totakoya mboka k’akambo wa mɛtɛ. Wembola ɛnɛ ehende monyiyamaka: Lande na kambokokanɛ lokeso ɛlɔ kɛnɛ, ndo ngande wakokaso mbewɔ diaha kesama?

Lande na kaya lokeso efula ɛlɔ kɛnɛ?

4. Ngande walembetshiya Bible ɔkɔkɔ wambokokanɛ lokeso l’andja?

⁴ Bible mɛnyaka hwe ɔkɔkɔ wambokokanɛ lokeso l’andja ɔnɛ. Ɔpɔstɔlɔ Joani akafunde ate “wa la kete tshe weko lu wulu wa kanga kolo.” (1 Joani 5:19) “Kanga kolo” ɔsɔ ko Satana Diabolo. Yeso akate lo dikambo diande ate: “Ndi hatemalaka lu mete, ne dia mete kema l’utema andi. Lam’atandi kashi, ndi atutaka akambu weli l’utema andi ndame. Ne dia kanga kashi kendi, ndu shi kashi.” Onde lâsɔ ekɔ dikambo dia diambo di’andja ɔnɛ kɛnɛmɔla yimba, ɛlɛmbɛ, ndo waonga w’omboledi awɔ?​—Joani 8:44; 14:30; Efeso 2:1-3.

5. Ngande waleka Satana sala la wolo dia kesa anto lo nshi nyɛ y’ekomelo, ndo wana walekande sɔma?

⁵ L’etena kɛnɛ k’ekomelo mamboleka Satana mbidja welo. Nde akakashema lanɛ la nkɛtɛ. Nde mbeyaka dia nshi yambotshikalɛ yaya bu efula, ndo nde ekɔ la “kele ka wuki.” Oko wakandɔshi yɛdikɔ ya kɔsha anto efula, nde ekɔ “ukeshi a wa la kete tshe.” (Enyelo 12:9, 12) Satana kema okeshi wa lo tena dimɔtshi to. Koko nde hakalola ɛkɔngɔkɔngɔ lo welo wasalande dia minganyiya anto.a Nde kambaka la toho ta lokeso tshɛ, mbut’ate awui wa kashi ndo lokeso dia mbetɛ anto wahetawɔ totshungu lo timba tawɔ ndo dia manganya anto akɔ la Nzambi. (2 Koreto 4:4) Owandji wa lokeso ɔsɔ ekɔ lo sala tshɛ dia nanya wanɛ watɛmɔla Nzambi “lu nyuma la lu mete.” (Joani 4:24; 1 Petero 5:8) Hatohombe pondjo mbohɛ dia Satana akafune dia ‘nde koka minganyiya anto tshɛ diaha vɔ tɛmɔla Nzambi.’ (Jobo 1:9-12) Nyɛsɔ tɔsɛdingole ‘totshelo ta lokeso’ tɔmɔtshi taki Satana ndo woho wahombaso ndjalama oma lɔkɔ.​—Efeso 6:11.

Tewɔ lokeso laki waa apɔsta

6, 7. (a) Akambo akɔna wakoka waa apɔsta sɛma? (b) Ngande wɛnya Bible dimɛna dimɛna kɛnɛ kayanga waa apɔsta?

⁶ Aya edja efula kakamba Satana la waa apɔsta lo welo wasalande dia minganyiya ekambi waki Nzambi. (Mateu 13:36-39) Waa apɔsta sɛmaka ɔnɛ vɔ wekɔ lo tɛmɔla Jehowa ndo wekɔ lo mbetawɔ Bible, koko vɔ tonaka etenyi k’ɛnama k’ɔlɔngɔswamelo ande. Amɔtshi kalolaka nto ndo lo wetshelo wɔnyɔla Nzambi wa lo “Babilona ka Wuki,” mbut’ate tshunda di’ɛtɛmwɛlɔ wa kashi wa l’andja w’otondo. (Enyelo 17:5; 2 Petero 2:19-22) Oma l’ekimanyielo ka nyuma ka Nzambi, afundji wa Bible wakakambe l’ɛtɛkɛta wa wolo dia kɛnɛmɔla eyango ndo totshelo takamba la waa apɔsta.

⁷ Oyango akɔna wele la waa apɔsta na? Efula ka l’atei awɔ hawɔngɛnangɛna dia mimɔ oma l’ɔtɛmwɛlɔ wele ondo wakawɔsaka dia wekɔ mɛtɛ. Mbala efula vɔ nangaka di’anto akina mbayela. Lo dihole dia vɔ mimɔ ko toyanga ambeki awɔ hita ahole akina, waa apɔsta efula nyangaka dia “nkutula ambeki [mbut’ate ambeki waki Kristo] l’okongo awo.” (Etsha 20:29, 30) Lo kɛnɛ kendana l’embetsha wa kashi, ɔpɔstɔlɔ Paulo akasha dako di’ohomba efula ate: “Nyewo, untu tanyunganyiaki.” (Kolosai 2:8) Shi kɛsɔ mɛnyaka mɛtɛ kɛnɛ kayanga waa apɔsta efula dia sala? Oko ɔpɔtwanyi latoyangaka dia munda onto ɔmɔtshi lele bu la kɛsɔ ko ntshɔ la nde etale mangana la nkumbo kande, waa apɔsta nyangaka munda ase etshumanelo watotatɛka monga la mbetawɔ lo wetshelo awɔ dia mbânya oma l’olui.

8. Naa toho takamba la waa apɔsta dia kotsha oyango awɔ?

⁸ Toho takɔna tasala waa apɔsta dia kotsha oyango awɔ na? Mbala efula vɔ mengesolaka akambo, mbetshaka akambo wele bu tshɛ mɛtɛ, ndo akambo wa kashi. Yeso akeyaka di’ambeki ande wayoyɔhɛnyahɛnyama oma le wanɛ “wayota weho w’akambo tshɛ wa kɔlɔ lo dikambo diawɔ.” (Mateo 5:11, Today’s English Version) Atunyi wa kɔlɔ asɔ wayota akambo wele bu mɛtɛ l’oyango wa kesa anto akina. Ɔpɔstɔlɔ Petero akahɛmɔla lo kɛnɛ kendana la waa apɔsta wakoka kamba la ‘ɛtɛkɛta wa lokolonganya,’ dianganya ‘wetshelo wa lokeso,’ ndo ‘mengesola Afundelo’ dia kotsha eyango awɔ. (2 Petero 2:​3, 13; 3:16) Lonyangu ko, waa apɔsta “wambunyukula mbetawo k’antu amotshi.”​—2 Timote 2:18.

9, 10. (a) Ngande wakokaso ndjalama diaha kesama oma le waa apɔsta? (b) Lande na kahatahombe ndjakiyanya naka eokelo kaso k’asangwelo waki Nzambi kambotshikitanyema?

⁹ Ngande wakokaso sala dia ndjalama diaha kesama oma le waa apɔsta na? Sho koka sala dikambo sɔ lo kitanyiya dako diele l’Ɔtɛkɛta wa Nzambi diata ɔnɛ: “Nyewo waku watutungaka diatanelu la etakanya wutshikitanyi la akambu wakanyetsha amvutshi. Nyangani uma le wo.” (Romo 16:17) Sho ‘manganaka la wɔ’ lo tona tokanyi tawɔ oyadi t’oma l’enyɔ awɔ, tɔnɛ tofundami l’abuku, kana lo tshimbo y’Ɛtɛrnɛtɛ. Lande na kɔsaso yɛdikɔ shɔ? Ntondotondo, ele nɛ dia Ɔtɛkɛta wa Nzambi totshutshuyaka dia sho sala dikambo sɔ, ndo tekɔ l’eshikikelo dia Jehowa ndjakiyanyaka nshi tshɛ dia kɛnɛ koleki ɔlɔlɔ leso.​—Isaya 48:17, 18.

¹⁰ Dikambo dia hende, ele sho nangaka ɔlɔngɔswamelo watetsha akambo wa mɛtɛ w’ohomba efula watanganya tshɛ lo tshɛ la Babilɔna ka Woke. Koko l’etena kakɔ kâmɛ, sho mbeyaka di’ewo kaso k’asangwelo waki Nzambi bu kokele; etshikitanu ɛmɔtshi wendana la eokelo kaso wekɔ lo tasalema ɛnɔnyi l’ɛnɔnyi. Akristo wa kɔlamelo ngɛnangɛnaka dia kongɛka le Jehowa lo etshikitanu ɛsɔ tshɛ. (Tukedi 4:18) Koko etena kakongɛso, hatotomɔ oma l’ɔlɔngɔswamelo wangɛnangɛna Nzambi kamba lawɔ, nɛ dia sho mɛnaka hwe dia Nzambi mbetawɔka ɔlɔngɔswamelo akɔ.​—Etsha 6:7; 1 Koreto 3:6.

Tewɔ di’aha ndjakesa

11. Lande na kele anto wele bu kokele wekɔ la mbekelo ka ndjakesaka?

¹¹ Anto wele bu kokele wekɔ la mbekelo kɛmɔtshi kakoka Satana kamba latɔ esadi eto, mbekelo kakɔ ko ndjakesa. Jeremiya 17:9 mbutaka ɔnɛ: “Utema ndeka diango tshe lukesu, vo weko kolo efula.” Ndo Jakoba akafunde ate: “Untu l’untu atuhimbamaka lam’akutwamandi ndu lam’ahimbamandi la saki kandi ndame.” (Jakoba 1:14) Naka otema aso ambohembama, kete vɔ mbeyaka tokotola lo pɛkato, lo mɛnya dia pɛkato ekɔ dikambo dia dimɛna ndo ndoko wâle wele lɔkɔ. Kanyi ya ngasɔ yekɔ lokeso, nɛ dia ndjasha lo pɛkato ndjokonyaka onto paka lo kɔlɔ.​—Romo 8:6.

12. Lo toho takɔna takokaso tala lo djonga ya ndjakesa?

¹² Sho mbeyaka tala esadi eto lo djonga ya ndjakesa. Otema wa lokeso mbeyaka tana tɛkɛ nɛndɛ tɔmɔtshi etena kakɛnɛmɔlaso dionga dimɔtshi dia kɔlɔ efula kana kasalaso pɛkato kɛmɔtshi ka woke. (1 Samuele 15:13-15, 20, 21) Otema aso wa lokeso mbeyaka nto nyanga towoka dia mbisha tɛkɛ nɛndɛ etena kôngaso la lɔkɛwɔ lɔmɔtshi la kɔlɔ. Tɔshi ɛnyɛlɔ ka tɔkɛnyɔ. Tɔkɛnyɔ tɔmɔtshi tekɔ amɛna ndo ɔlɔ. Koko efula ka tɔkɛnyɔ ta l’andja ɔnɛ tɛnaso oyadi lo waa teyatrɛ kana lo filmɛ kâmɛ ndo l’ɛtɛrnɛtɛ tekɔ tɔkɛnyɔ ta kɔlɔ ndo ta mindo. Sho mbeyaka ndjakesa esadi eto lo mbuta ɔnɛ sho koka menda tɔkɛnyɔ ta kɔlɔ tɔsɔ aha la wâle ɔmɔtshi tokomɛ. Amɔtshi ndjokomaka ndo lo mbuta ɔnɛ, “naa kɔlɔ kele lɔkɔ lam’ele nkum’otema kami hatone tɔkɛnyɔ takɔ?” Koko anto asɔ wekɔ lo ‘ndjakesa vɔamɛ la tokanyi ta kɔlɔ.’​—Jakoba 1:22.

13, 14. (a) Ɛnyɛlɔ kakɔna ka l’Afundelo kɛnya dia nkum’otema kaso hatongaka nshi tshɛ ɔnɔmbɔdi wa dimɛna? (b) Ngande wakokaso ndjalama di’aha ndjakesa?

¹³ Ngande wakokaso ndjalama di’aha ndjakesa? Ntondotondo, sho pombaka mbohɔ dia hatokoke mbɛkɛka otema nshi tshɛ lo nkum’otema. Tɔshi ɛnyɛlɔ kaki ɔpɔstɔlɔ Paulo. Nde akahɛnyahɛnya ambeki waki Kristo la ntondo ka nde koma Okristo. (Etsha 9:1, 2) Ondo nkum’otema kande kombânyaka etena kɛsɔ. Koko lo mɛtɛ, nkum’otema kande takitɔ lo mboka ka dimɛna. Paulo akate ate: ‘Dimi kombeya ndoko dikambo ndo lakatshaka akambo nɛ dia dimi komonga la mbetawɔ.’ (1 Timote 1:13) Ɔnkɔnɛ, aha naka nkum’otema kakiso hatânya lo kɛnɛ kendana la tɔkɛnyɔ tɔmɔtshi, kete lâsɔ lo weho akɔ tshɛ tekɔ lo sala kɛnɛ kele dimɛna. Paka nkum’otema k’oshika ketshama dimɛna oma l’Ɔtɛkɛta wa Nzambi mbakoka monga ɔnɔmbɔdi wa dimɛna.

¹⁴ Naka sho nangaka mbewɔ dia ndjakesa, kete ekɔ alako amɔtshi w’amɛna wahombaso mbohɔka wonya tshɛ. Yasɛdingola lo dɔmbɛlɔ. (Osambu 26:2; 2 Koreto 13:5) Ndjasɛdingola ka dimɛna mbeyaka kɛnya ohomba wa sala etshikitanu ɛmɔtshi lo kanyi yayɛ kana lo woho wɔsayɛ akambo. Hokamɛ anto akina. (Jakoba 1:19) Lam’ele ekɔ wolo di’onto ndjasɛdingola ko ndjanda la dikɔmɔ ndamɛ, ekɔ dikambo dia lomba pokamɛ ɔsɛdingwelo w’oma le asekaso Akristo wambotshunda. Naka wɛ ekɔ lo mbɔsa tɛdikɔ kana ekɔ lo sala akambo lo yoho yele bu dimɛna lo washo w’asekayɛ ambetawudi wele la wɛdimo ndo wahokɔ akambo, kete wɛ pombaka ndjambola ɔnɛ: ‘Onde mbeyaka monga ko nkum’otema kami hetshami dimɛna kana ɔnɛ otema ami wekɔ lo kesami?’ Yaleshaka mbala la mbala oma lo Bible ndo ekanda wakilembetshiya. (Osambu 1:2) Osalelo wa dikambo sɔ, ayokokimanyiya dia wɛ mbɔtɔnganyiya tokanyi, ekanelo kayɛ ka yimba, ndo etsha ayɛ l’atɔndɔ waki Nzambi.

Tewɔ kashi yaki Satana

15, 16. (a) Kashi yakɔna yakamba la Satana lo welo wasalande dia tokesa? (b) Ngande wakokaso mbewɔ di’aha kesama oma lo kashi shɔ?

¹⁵ Satana kambaka la kashi yotshikitanyi lo welo wasalande dia tokesa. Nde nyangaka tetawoya di’ɔnɛ lomombo la l’emunyi mbelaka ɔngɛnɔngɛnɔ ndo ɔlɔ, koko mbala efula aha ngasɔ mbɛnamadiɔ. (Undaki 5:10-12) Nde nangaka tetawoya di’ɔnɛ andja wa kɔlɔ ɔnɛ wayotshikalaka pondjo pondjo, kânga mbɛnamadiɔ hwe dia tekɔ lo nsɛna “lu nshi y’ekumelu.” (2 Timote 3:1-5) Satana keketshaka kanyi y’ɔnɛ ndoko wâle wakokaso kondja lo nsɛna yoho ya lɔsɛnɔ la mindo, kânga mbele anangi w’ɛngɛnɔngɛnɔ wekɔ lo diɛnɛ l’etombelo wa kɔlɔ. (Ngalatiya 6:7) Ngande wakokaso ndjalama di’aha kesama oma lo kashi shɔ na?

¹⁶ Kondja wahɔ oma lo bɛnyɛlɔ diele lo Bible. Bible ekɔ la bɛnyɛlɔ diatɔhɛmɔla di’anto wakakesama oma lo kashi yaki Satana. Vɔ wakalange lomombo la l’emunyi, vɔ kombidja yimba lo kɛnɛ kendana la tena diakawasɛnaka, kana wakayasha l’akambo wa mindo ndo vɔ tshɛ wakakondja etombelo wa kɔlɔ. (Mateu 19:16-22; 24:36-42; Luka 16:14; 1 Koreto 10:8-11) Kondja wetshelo oma lo bɛnyɛlɔ dia nshi nyɛ. Lonyangu ko, Akristo amɔtshi ndjohɛka mbala mɔtshi di’ekomelo k’aya suke ndo ndjokomaka lo fɔnya ɔnɛ vɔ wekɔ lo pandja ɛngɔ kɛmɔtshi k’ohomba l’ɔtɛ wakambɛwɔ Jehowa. Vɔ mbeyaka ndjotshika akambo wa mɛtɛ l’oyango wa nyanga kɛnɛ katawɔ ɔnɛ ɛngɛnɔngɛnɔ. Koko, anto asɔ wekɔ lo ‘kiɔka shɛlɔ,’ nɛ dia edja l’edja vɔ wayoyodiɛnɛ l’etombelo wa kɔlɔ w’oma lo lɔkɛwɔ lawɔ la kɔlɔ lotowokoka mbewɔ la wonya. (Osambu 73:18, 19) Ekɔ dikambo dia lomba dia sho kondja wetshelo oma lo munga y’anto akina.​—Tukedi 22:3.

17. Lande na kakeketsha Satana kashi k’ɔnɛ Jehowa hatolange kana hatɔshi la nɛmɔ?

¹⁷ Ekɔ nto kashi kekina kakamba Satana latɔ mbala ko mbala, kashi k’ɔnɛ Jehowa hatolange kana hatɔshi la nɛmɔ. Aya nkama y’ɛnɔnyi yeka Satana anto wele bu kokele. Nde mbeyaka dimɛna di’ɔkɔmwɛlɔ w’otema mbeyaka nɛndja lonyuma laso. (Tukedi 24:10) Ɔnkɔnɛ, nde keketshaka kashi k’ɔnɛ sho bu la nɛmɔ lo washo wa Nzambi. Naka “tambumbama la kete” ko tambɛna dia Jehowa hayakiyanya dikambo diaso, kete kɛsɔ mbeyaka ndjotokonya lo sho mpekɔ. (2 Koreto 4:9) Kɛsɔ mɛtɛ mbalanga Okeshi wa woke! Lâsɔ, ngande wakokaso mbewɔ di’aha kesama oma lo kashi kɛsɔ kaki Satana na?

18. Ngande watoshikikɛ Bible dia Jehowa tokaka ngandji?

¹⁸ Kana yimba lo kɛnɛ kata Bible lo dikambo dia ngandji katoka Nzambi. Ɔtɛkɛta wa Nzambi kambaka la bɛnyɛlɔ dimɔtshi di’amɛna efula di’ɛnya dia Jehowa todjaka yimba ndo tolangaka l’ɔmɔmɔ. Etelo k’ɔnɛ Nde mbidjaka ‘asɔi ayɛ l’ɔlɔndɔ,’ mɛnyaka dia nde mɛnaka ndo mbohɔka asɔi wakɛdiayɛ lo welo wasalayɛ dia tshikala la kɔlamelo. (Osambu 56:8) Nde mbeyaka etena ‘katɛyɛ otema’ ndo nde ekɔ suke layɛ lo tena dia ngasɔ. (Osambu 34:18) Nde mbeyaka akambo tshɛ wendana layɛ, mbidja ndo lofulo la ‘divo diele l’ɔtɛ ayɛ.’ (Mateu 10:29-31) Dikambo dioleki tshɛ diambo ele Nzambi akakimɔ “On’andi etoi lakanduti” dikambo diayɛ. (Joani 3:16; Ngalatiya 2:20) Tena dimɔtshi, wɛ mbeyaka monga l’okakatanu dia mbetawɔ ɔnɛ avɛsa asɔ mendanaka layɛ. Koko, sho pombaka mbetawɔ Ɔtɛkɛta wa Jehowa. Nde nangaka dia sho mbetawɔ ɔnɛ nde tolangaka aha tsho lo tshɛ kaso koko ndo l’onto ndo l’onto.

19, 20. (a) Lande na kele ekɔ ohomba mbeya ndo tona kashi kaki Satana k’ɔnɛ Jehowa hatolange? (b) Ngande wakimanyiya omendji weteta ɔmɔtshi wanɛ wambɔkɔmɔ otema?

¹⁹ Eya ndo tona kashi. Naka wɛ mbeyaka di’onto ɔmɔtshi mbutaka kashi, kete wɛ ayokoka mbɔsa tɛdikɔ di’aha kesama oma lende. Woho akɔ wâmɛ, woho weyayɛ dia Satana nangaka dia wɛ mbetawɔ ɔnɛ Jehowa hakolange ekɔ ekimanyielo ka wolo efula. L’ɔkɔngɔ wa mboka kɛnɛ kaki lo sawo dimɔtshi dia Tshoto y’Etangelo diakatɔhɛmɔla lo dikambo dia totshelo taki Satana, Okristo ɔmɔtshi wa womoto akate ate: “Dimi kombeyaka kânga yema dia Satana monaka dia kamba la tokanyi tami dia kɔmɔlami otema. Ewo ka dikambo sɔ keketshakami dia ndɔsha la wolo woho wa tondoya tokanyi ta kɔlɔ tɔsɔ.”

²⁰ Tɔshi ɛnyɛlɔ ka kɛnɛ kakasale omendji weteta wa lo wodja ɔmɔtshi wa lo Amɛrikɛ wa lo Nɔrdɛ. Etena katshɔnde dia tembola wanyande ambetawudi wambɔkɔmɔ otema, nde mbambolaka mbala tshɛ ɔnɛ: ‘Onde wɛ mbetawɔka wetshelo wa Losato l’Osanto?’ Mbala tshɛ, onto lambɔkɔmɔ otema kadimolaka ate ‘kema,’ nɛ dia nde mbeyaka ɔnɛ ɔsɔ ekɔ kashi kɛmɔtshi kaki Satana. Oma lâsɔ k’ekumanyi k’omendji weteta kɛsɔ mombola nto ate: ‘Onde wɛ mbetawɔka wetshelo w’ifɛrnɔ?’ Paka k’okadimwelo akɔ wâmɛ mbaya nto ɔnɛ ‘kema!’ Oma lâsɔ, ekumanyi k’omendji weteta kɛsɔ ndjowɛnya dia ekɔ kashi kɛmɔtshi kaki Satana kele anto hawoleke kieya. Nde kotolaka yambalo y’onto lasawola lande lo lɛkɛ 249, odingɔ 21, la dibuku Approchez-vous de Jéhovah,b lɛnɛ ɛnyama dia mbuta ɔnɛ Jehowa hatolange l’ɔmɔmɔ ekɔ dikambo dia kashi. Omendji weteta ɔsɔ kondjaka etombelo w’amɛna lo yoho shɔ yasalande dia kimanyiya onto lambɔkɔmɔ dia nde mbeya ndo tona kashi kaki Satana kɛsɔ.

Yakokɛ oma lo lokeso

21, 22. Lande na kele sho mbeyaka totshelo ta lokeso taki Satana, ndo yɛdikɔ yakɔna yahombaso mbɔsa?

²¹ L’etena kɛnɛ kaya nshi y’ekomelo lo kondoko, sho la dia nongamɛ dia Satana ayotetemala la mbuta lokema la kashi la lokeso. Diɛsɛ ko, Jehowa hatotshike lo wodjima lo kɛnɛ kendana la totshelo ta lokeso taki Satana. Bible ndo ekanda walembetshiya Bible watondja ‘ɔhɔmbɔ wa kɔlamelo ndo wa kɛsɔ’ mɛnyaka hwe woho wele totshelo ta kɔlɔ taki Diabolo. (Mateu 24:45) Mbeya dikambo dimɔtshi la ntondo, kimanyiyaka efula dia ndjalɔngɔsɔla dia ditondoya dimɛna.​—2 Koreto 2:11.

²² Ɔnkɔnɛ, totetemale la mbewɔ tokanyi taki waa apɔsta. Toyashikikɛ dia mbewɔ djonga ya mayɛlɛ ya ndjakesa. Teye ndo totone kashi tshɛ yaki Satana. Lo sala ngasɔ tayolama diɔtɔnganelo diasaso la ‘Nzambi ka mɛtɛ,’ katona lokeso.​—Osambu 31:5; Tukedi 3:32.

[Nɔtɛ ya l’ɛse ka dikatshi]

Onde wɛ akohɔ?

• Lande na kele lokeso laya efula l’andja ɛlɔ kɛnɛ?

• Ngande wakokaso ndjalama di’aha kesama oma le waa apɔsta?

• Ngande wakokaso mbewɔ oseka kanyi tshɛ ya ndjakesa?

• Ngande wakokaso mbewɔ dia kesama lo totshelo ta kashi taki Satana?

[Osato wa lo lɛkɛ 17]

Toyakesake lo kɛnɛ kendana la tɔkɛnyɔ

[Esato wa lo lɛkɛ 18]

Dia wɛ ndjalama di’aha ndjakesa, yasɛdingola lo dɔmbɛlɔ, hokamɛ anto akina, ndo adiaka Ɔtɛkɛta wa Nzambi mbala la mbala