Oyangelo wa ɔngɛnɔngɛnɔ
AMBETA ɛnɔnyi engana, wakawambola anto wa lo wodja wa Allemagne, États-Unis, France ndo anto wa Grande-Bretagne ɔnɛ: “Kakɔna kalɔmbama dia nyu monga l’ɔngɛnɔngɛnɔ?” L’atei wa wanɛ wakawakɔnya, pursa 89 wakate dia yônge ya demba ya dimɛna mbele dui dioleki ohomba di’onto monga l’ɔngɛnɔngɛnɔ; pursa 79 wakate ɔnɛ monga la diwala kana l’olonganyi wa dimɛna; pursa 62 wakate dia ɛlɔlɔ waya oma lo mbota ana; pursa 51 wakafɔnya dia monga l’olimu wa dimɛna mbele ohomba di’onto monga l’ɔngɛnɔngɛnɔ. Kânga mbele anto efula wambetshama dia falanga hasha ɔngɛnɔngɛnɔ, pursa 47 l’atei w’anto wakawakɔnya waki l’eshikikelo dia falanga mbishaka ɔngɛnɔngɛnɔ. Akambo asɔ ɛnyawɔ?
Ntondotondo, tende diɔtɔnganelo diata anto diele lam’asa falanga la ɔngɛnɔngɛnɔ. Ɛkɔnya wakawakɔnya anto lokama woleki ɛngɔnyi lo wodja w’États-Unis wakɛnya di’anto asɔ kondeka anto akina ɔngɛnɔngɛnɔ. Lâdiko dia lâsɔ, kânga mbele anto efula wa l’États-Unis wakayofudia lomombo lawɔ suke la l’ahende l’ɛnɔnyi akumi asato wetshi ɛnɛ, koko vɔ kema l’ɔngɛnɔngɛnɔ efula oko waki lawɔ ntondo lo ndjela waa nomb’ewo mɔtshi yendana la hemɔ ya l’ɔtɛ. Diɔ diakɔ diata alapɔlɔ ɔmɔtshi ɔnɛ: “L’etena kakɔ kâmɛ kɛsɔ, anto wamboleka monga l’ɔkɔmwɛlɔ w’otema. Lofulo l’ana w’akɛnda wayadiaka lambodɛ l’asato. Lofulo l’awala wavɔ lakadɛ l’ahende.” Lo wedja oko 50 wotshikitanyi, anyangiyangi wakeke diɔtɔnganelo diele lam’asa falanga la ɔngɛnɔngɛnɔ wamboyokoma lo mbuta dia falanga hakoke somba ɔngɛnɔngɛnɔ.
Oma lâsɔ, ohomba akɔna wele l’akambo anɛ oko yônge ya demba ya dimɛna, diwala di’ɔlɔlɔ ndo olimu wa dimɛna dia monga l’ɔngɛnɔngɛnɔ na? Lo mɛtɛ, naka paka awui asɔ mbalɔmbama di’onto monga l’ɔngɛnɔngɛnɔ, kayotota dia miliyɔ y’anto yele kema la yônge ya demba ya dimɛna ndo yele kema l’awala w’amɛna? Kayotota dia nkumbo yele bu l’ana ndo dia apami la wamato wele bu l’olimu wa dimɛna? Onde anto asɔ tshɛ wakotɔ dia ndjonga la lɔsɛnɔ laha l’ɔngɛnɔngɛnɔ? Ɛlɔ kɛnɛ, naka awui wa lo lɔsɛnɔ wambotshikitana onde ɔngɛnɔngɛnɔ wafɔnyawɔ wele la wanɛ wele la yônge ya demba ya dimɛna ndo la awala w’amɛna wayotetemala monga?
Onde tekɔ lo nyanga ɔngɛnɔngɛnɔ lo tɔkɔkɔ t’eshika?
Onto tshɛ nangaka monga l’ɔngɛnɔngɛnɔ. Ɔsɔ bu dikambo dia diambo, nɛ dia Otungi w’onto ekɔ “Nzambi k’ɔngɛnɔngɛnɔ,” ndo onto akatongama lo ɛfanelo ka Nzambi. (1 Timote 1:11, NW; Etatelu 1:26, 27) Omalɔkɔ, bu kɔlɔ di’anto nyanga ɔngɛnɔngɛnɔ. Koko, anto efula mɛnaka dia nama ɔngɛnɔngɛnɔ wele lawɔ ekɔ oko onto lokukute lɔkɔngɔ kana lɔsɛnga, ndo nde ndo lɔ wayɔsɛlɔ esadi eto.
Ko, onde koka monga ko amɔtshi wekɔ lo nyanga dia tana ɔngɛnɔngɛnɔ lo yoho yambotamba olelo? Kɛsɔ mbakafɔnya Eric Hoffer filozofɛ kɛmɔtshi kendana la nsɛnɔ y’anto. Nde akate ate: “Oyangelo w’ɔngɛnɔngɛnɔ ekɔ kiɔkɔ mɔtshi yoleki yasala di’aha anto monga l’ɔngɛnɔngɛnɔ.” Dikambo sɔ diekɔ mɛtɛ naka hatoyangi ɔngɛnɔngɛnɔ lo tɔkɔkɔ t’eshika. Okiyanu ndo lonyangu mbayonga laso naka hatoyangi ɔngɛnɔngɛnɔ lo tɔkɔkɔ t’eshika. Nyanga dia monga ɔngɔnyi; sala la wolo dia monga onto la woke kana leyama efula; mbesa eyango wa pɔlitikɛ, eyango wa monga onto la woke lo tshunda ndo monga la falanga efula; kana ndjakiyanya paka di’akambo asɔ hita, akambo asɔ tshɛ hawosha ɔngɛnɔngɛnɔ. Aha la tâmu, anto amɔtshi waya la kanyi yɔtɔnɛ la nyɛ yakɛnya ofundji ɔmɔtshi, lakate ɔnɛ: “Naka sho tshika dia sala la wolo dia nyanga ɔngɛnɔngɛnɔ kete sho kokaka monga l’ɔngɛnɔngɛnɔ lo yɛdikɔ mɔtshi”!
Diakɔ diele, ɛkɔnya wakasalema wakatɛkɛtami l’etatelo ka sawo nɛ mɛnyaka nto dia pursa 40 y’anto wakate dia ɔngɛnɔngɛnɔ kondjamaka lo sala kɛnɛ kele ɔlɔlɔ ndo lo kimanyiya anto akina. Ndo pursa 25 wakate dia mbetawɔ ndo dietawɔ diendana l’awui w’ɔtɛmwɛlɔ kimanyiyaka onto efula dia monga l’ɔngɛnɔngɛnɔ. Lo mɛtɛ, tekɔ l’ohomba wa sɛdingola dimɛna kakɔna kalɔmbama di’onto monga l’ɔngɛnɔngɛnɔ wa mɛtɛ. Sawo diayela diayotokimanyiya dia sala dikambo sɔ.
[Esato wa lo lɛkɛ 3]
Anto efula fɔnyaka dia falanga, lɔsɛnɔ la nkumbo l’ɔlɔlɔ kana olimu wa dimɛna mbasha ɔngɛnɔngɛnɔ. Onde wɛ mbetawɔka dui sɔ?