Sango diakokayɛ mbɛkɛ otema lɔkɔ
“NAKA wɛ ambolongola losango lɔmɔtshi lo mukanda oma le onto ɔmɔtshi lata dia sango dimɔtshi diekɔ lo kokongɛ, kete onga la yewo. Wɛ kokaka kesama oma le okeshi ɔmɔtshi wele la mayɛlɛ.”
Ɔhɛmwɛlɔ ɔsɔ mbakasha tshunda dimɔtshi dia lo wodja w’États-Unis dielɛwɔ ɔnɛ Postal Inspection Service l’adrɛsɛ awɔ w’Ɛtɛrnɛtɛ. Lande na? Nɛ dia nunu di’anto wakalongola losango lo Ɛtɛrnɛtɛ lata ɔnɛ: ‘Owotɔ ayɛ ɔmɔtshi akavu ko akakotshikɛ sango dimɔtshi.’ L’ɔtɛ w’okanda wa kashi waki okeshi ɔsɔ, anto efula wakotomɛka falanga lo ndjela oshinga wawadjɛnde dia mbeya lɛnɛ ele sango sɔ ndo woho wa mbodikondja. Lonyangu ko, vɔ wakakesama. Wanɛ tshɛ wakakadimola lo losango lɔsɔ wakakondja alapɔlɔ akɔ wâmɛ ndo ndoko onto lakakondja sango.
Anto kesamaka l’akambo wa ngasɔ l’ɔtɛ wa nsaki kawɔ ka lôtɔ ka kondja sango dimɔtshi. Koko, Bible tɛkɛtaka dimɛna dia wanɛ watshikɛ akina sango etena katatɔ ɔnɛ: “Untu ololo atutshikelaka ekana andi ukito.” (Tukedi 13:22) Oko wediɔ ɔsɔku, paka Yeso Kristo ndamɛ mbakate ɛtɛkɛta weyama dimɛna ndo walangema efula lo Dako diande dia l’Okongo ɔnɛ: “Wane weli la memakana, weko la otshoko, ne dia vo wayukita kete.”—Mateu 5:5.
Ɛtɛkɛta waki Yeso ɛsɔ toholaka kɛnɛ kakasokoyama Nkumekanga Davidi ka l’Isariyɛlɛ dia funda ntambe efula la ntondo ɔnɛ: “Keli akanga a memakana wayukita kete, ndu wayongenangena la etshoko efula wa ki.”—Osambu 37:11.
Etelo k’ɔnɛ: “Wayukita kete,” mbishaka mɛtɛ elongamelo kasalanganya asolo! Ko, onde sho kokaka monga l’eshikikelo ɔnɛ ɔsɔ kema yoho kina ya lokeso yele l’oyango wa pombia anto ɛngɔ kɛmɔtshi? Eelo, sho kokaka monga l’eshikikelo. Lam’ele nkɛtɛ ekɔ etenyi kɛmɔtshi k’etongelo ka diambo ka Jehowa, oko wende Otungi ndo Kanga yɔ nde ekɔ la lotshungɔ la ndjisha oko sango le ɔnɛ tshɛ layondɔsɔna. Oma lo tshimbo ya Nkumekanga Davidi, Jehowa akasha daka nɛ dia prɔfɛsiya le Ɔnande lalangande, Yeso Kristo ate: “Onombe, ku dimi layukusha wedja ukito, kuma ya kete yayuyala yaye.” (Osambu 2:8) L’ɔkɔkɔ ɔsɔ, ɔpɔstɔlɔ Paulo akatɛkɛta lo dikambo dia Yeso ɔnɛ ‘nde mbakasɔnama oma le Nzambi oko okitɔ wa diangɔ tshɛ.’ (Heberu 1:2) Ɔnkɔnɛ, sho kokaka monga l’eshikikelo dia etena kakate Yeso ate akanga wa memakana “wayukita kete,” nde akate dikambo sɔ la mbetawɔ ka shikaa, ndo nde ekɔ la wolo wa kotsha daka diande sɔ.—Mateu 28:18.
Ɔnkɔnɛ, wombola w’ohomba ele: Ngande wayokotshama daka sɔ na? Dihole tshɛ dieso ɛlɔ kɛnɛ, akanga wa ngala ndo akanga w’etako wambolola tɔ ndo wekɔ lo mbɔsa kɛnɛ tshɛ kalangawɔ. Ko kakɔna kayotshikala dia akanga a memakana ndjokita? Lâdiko dia lâsɔ, nkɛtɛ yambolola tɔɔ l’ekakatanu efula waya oma lo woho ɔnɛ wamboyolanyema, ndo wekɔ lo kamba la diangɔ dia lɔkɔ la lokaki aha la mbidja yimba l’etombelo wakoka monga la dikambo sɔ. Onde nkɛtɛ ya dimɛna yayonga di’anto kita? Tambokɔlɔmba dia wɛ mbadia sawo diayela dia kondja okadimwelo lo wembola ɛsɔ ndo l’ekina w’ohomba.
[Osato wa lo lɛkɛ 3]
Onde wɛ ayolongola sango di’oshika?