Oyangelo wa wɔladi wa l’etei k’otema

ALBERT aki la diwala dia ɔngɛnɔngɛnɔ ndo l’ana ahende w’elangala. Koko nde akayaokaka di’oko nde komonga la ɛngɔ kɛmɔtshi lo lɔsɛnɔ lande. Lo etena kɛmɔtshi kakandasale la wolo dia kondja olimu, nde akayoyatambiyaka lo awui wa pɔlitikɛ ndo akayetawɔka yoho ya ɛlɔmbwɛlɔ ya waa socialistes. Nde akakome ɔtɔi ɔmɔtshi wa lo olui wa waa Kɔministɛ wa lo ngelo kawɔ.

Koko kombeta edja, Albert akayoshishaka wɛkamu tshɛ le waa Kɔministɛ. Nde akayotshikaka awui wa pɔlitikɛ ndo akayoyakimɔka tshɛ lo awui wendana la nkumbo kande. Oyango ande wakayongaka wa sala tshɛ dia nkumbo kande monga la ɔngɛnɔngɛnɔ. Kânga mbakandasalaka awui asɔ tshɛ, Albert akatetemala ndjaoka di’oko nde komonga la ɛngɔ kɛmɔtshi lo lɔsɛnɔ, mbuta ate wɔladi wa l’etei k’otema.

Kɛnɛ kakakomɛ Albert kɛsɔ komɛka anto efula. Dia monga la lɔsɛnɔ lele la oyango w’oshika, miliyɔ y’anto wamboyasha lo tokanyi totshikitanyi, lo awui wa filɔzɔfi ndo w’ɛtɛmwɛlɔ. Lo wedja wa lo lɛkɛ la Owɛstɛ, tshunda dimɔtshi diakawelɛka ɔnɛ hippie diakasalema lo ɛnɔnyi 1960 diakendanaka la woho wakatone anto ndjela mbekelo yendana la lɔkɛwɔ ndo la ɛlɛmbɛ wakadjama lo tshunda di’anto. Lo yoho ya lânde, ɛlɔngɔlɔngɔ la esekaseka wakayangaka dia monga la lɔsɛnɔ la ɔngɛnɔngɛnɔ ndo lele la oyango lo ndjakimɔ lo dinɔnɔ dia wolo ndo lo awui wa filɔzɔfi wetshama oma le anto welɛwɔ ɛnɔmbɔdi ndo embetsha wa l’ɛtɛmwɛlɔ ndo ɛlɔmbɛdi a lâdiko. Koko, tshunda sɔ kokoka mbisha anto awɔ ɔngɛnɔngɛnɔ wa mɛtɛ. Ɔnkɔnɛ, ɔtɔmbɔkwɛlɔ ɔsɔ wakayokonyaka ɛlɔngɔlɔngɔ la esekaseka fumbe ya dinɔnɔ dia wolo, y’awui wa kɔlɔ ndo diaha anto nɛnya nto ɛlɛmbɛ wendana la lɔkɛwɔ.

Aya ntambe efula yele anto wakayange dia monga la ɔngɛnɔngɛnɔ lo monga la ɔngɔnyi, lowandji ndo mbɔtɔ kalasa y’efula. Awui asɔ tshɛ konyaka mbala efula paka lo ekiyanu. Yeso akate ate: “Ne dia lumu la untu haluyala ne dia efula ka diango dieli la ndi.” (Luka 12:15) Diakɔ diele, tetemala nyanga ɔngɔnyi mbala efula hela ɔngɛnɔngɛnɔ. Bible mbutaka ɔnɛ: “Wane wakomiya ndjala engonyi, wayoko lu uhimba la lu djunga ndu lu saki ya dinginya yatutshelaka antu kolo, yayuditsha antu lu elanyelu la eshishwelu. Ne dia saki ka ukundji eko udiu a wehu tshe w’akambu wa kolo. Amotshi wakadiyangi, . . . wakayatshatsha la nyangu ya wulu efula.”​—1 Timote 6:9, 10.

Lâsɔ, ngande wakoka onto kondja wɔladi wa l’etei k’otema ndo monga la lɔsɛnɔ lele la oyango? Onde paka lo tahembahembaka wate kana oko onto latamamba lo wodjima mbakoka onto monga la wɔladi wa l’etei k’otema ndo la lɔsɛnɔ lele la oyango? Kema. Oko wayotɛna lo sawo diayela, dia kondja wɔladi wa l’etei k’otema paka kotsha ohomba ɔmɔtshi wa lânde ndo w’ohomba efula wele la onto.

[Osato wa lo lɛkɛ 3]

Onde oyangelo wa ɔngɔnyi, lowandji kana mbɔtɔ kalasa y’efula ambokokimanyiya dia wɛ kondja wɔladi wa l’etei k’otema?