Tetawɔ dia Ɔtɛkɛta wa Nzambi nɔmbɔla wanya aso
“Diui diaye dieko tala l’ekulu ami, ndu usasi lu mbuka kami.”—OSAMBU 119:105.
1, 2. Lande na kambohekɔ anto efula dia tana mboka k’otsha lo wɔladi ndo ɔngɛnɔngɛnɔ wa mɛtɛ?
ONDE wɛ kokaka mbohɔ lushi lɔmɔtshi lakayalɔmbɛ onto ɔmɔtshi dia nde kɛnya mboka ka wɛ ndjela? Ondo wɛ aki suke la koma lɛnɛ akayatatshɔka, koko wɛ hayeya mboka dimɛna. Kana ondo wɛ akanganɛ mɛtɛ longanɛ ndo akahombama di’onto ɔmɔtshi kɛnya mboka k’ɔlɔlɔ. Lo awui akɔ ahende, shi aki ohomba ndjela mboka kakakɛnya onto lakeyaka dihole diakɔ dimɛna? Onto ɔsɔ akakoke kokimanyiya dia wɛ koma lɛnɛ akayatatshɔka.
2 Aya ɛnɔnyi nunu wayanga anto dia nɔmbɔla nsɛnɔ yawɔ aha la nyanga ekimanyielo kaki Nzambi. Aha la ekimanyielo ka Nzambi, anto wele kema kokele hawokoke monga la elongamelo. Vɔ hawokoke tana mboka k’otsha lo wɔladi ndo ɔngɛnɔngɛnɔ wa mɛtɛ. Lande na kambowohekɔ dia tana mboka kɛsɔ na? Ambeta ɛnɔnyi ndekana 2500, ɔprɔfɛta Jeremiya akate ate: “Lam’at[ɔkɛndakɛndaka onto], ndi ndame heyi nombola ekulu andi.” (Jeremiya 10:23) Onto tshɛ lalɔmbɔla wanya ande aha la mbetawɔ ekimanyielo k’onto lele l’akoka wahombama ayohomana paka la ekakatanu. Lo mɛtɛ, anto wekɔ l’ohomba wa ɛlɔmbwɛlɔ!
3. Lande na kele Jehowa Nzambi oto mbele l’akoka woleki wa mbisha anto ɛlɔmbwɛlɔ ndo kakɔna kalakande?
3 Jehowa Nzambi oto mbele l’akoka woleki wa mbisha anto ɛlɔmbwɛlɔ ka ngasɔ. Lande na? Nɛ dia nde mboleki mbeya woho wakatongama anto. Ndo nde mbeyaka dimɛna woho wahakɔhɛ anto takɔ mboka ndo minganɛ. Nde mbeyaka nto kɛnɛ kele ohomba le wɔ dia vɔ kawola lo mboka k’ɔlɔlɔ. Ndo nto, oko wende Otungi, Jehowa mbeyaka mbala tshɛ kɛnɛ koleki ɔlɔlɔ le so. (Isaya 48:17) Ɔnkɔnɛ, sho kokaka ndjaɛkɛ tshɛ lo daka diande diofundami lo Osambu 32:8 diata ɔnɛ: “Dimi layuketshaka ndu layukenyaka mbuka ka we kendakenda, dimi layukulakaka, layukendaka.” Sho kokaka ndjashikikɛ mɛtɛ dia Jehowa mbasha anto ɛlɔmbwɛlɔ koleki dimɛna. Ko ngande watɔlɔmbɔlande na?
4, 5. Ngande wakoka ɛtɛkɛta wa Nzambi tɔlɔmbɔla?
4 Omembi ɔmɔtshi w’esambo akate lo dɔmbɛlɔ diande le Jehowa ate: “Diui diaye dieko tala l’ekulu ami, ndu usasi lu mbuka kami.” (Osambu 119:105) Ɛtɛkɛta ndo waohwelo waki Nzambi wekɔ lo Bible ndo vɔ kokaka tokimanyiya dia sho minya wekamu tshɛ wakoka pomana laso lo nsɛnɔ yaso. Lo mɛtɛ, etena kadiaso Bible ndo katshikaso dia tɔ tɔlɔmbɔla, sho mɛnaka ekotshamelo ka kɛnɛ kotami lo Isaya 30:21 ɔnɛ: “Atui anyu wayuka diui uma l’okongo ati: mbuka keku, nyokendekende loko!”
5 Tolembete dia Osambu 119:105 mɛnyaka elimu ehende wafɔna wakamba Ɔtɛkɛta wa Nzambi. Ntondotondo, vɔ wekɔ oko tala l’ekolo aso. Etena kahomanaso la ekakatanu wa lushi la lushi, atɔndɔ watanaso lo Bible mbahomba nɔmbɔla wanya aso dia sho mbɔsa tɛdikɔ ta lomba ndo mbewɔ tolonga t’andja ɔnɛ. Dui dia hende, waohwelo waki Nzambi ngamulaka mboka kaso, lo tokimanyiya dia sho sala ɛsɔnwɛlɔ wɔtɔnɛ la elongamelo kaso ka nsɛna pondjo pondjo lo Paradiso kakatolake Nzambi. Naka osase wekɔ lo ngamula mboka kaso lo yoho yahombama, kete tayonga l’akoka wa sɛdingola etombelo w’ɛlɔlɔ kana wa kɔlɔ wakoka monga la lɔkɛwɔ lɔmɔtshi. (Romo 14:21; 1 Timote 6:9; Enyelo 22:12) Tɔsɛdingole dimɛna dimɛna woho wakoka ɛtɛkɛta wa Nzambi wele lo Bible monga tala l’ekolo aso ndo osase lo mboka kaso l’akambo efula.
“Tala l’ekulu ami”
6. Lo akambo akɔna wakoka ɛtɛkɛta wa Nzambi monga tala l’ekolo aso?
6 Lushi tshɛ, sho mbɔsaka tɛdikɔ. Tɛdikɔ tɔmɔtshi mbeyaka mɛnama dia tekɔ totshitshɛ, koko tena dimɔtshi sho koka tanema la ntondo k’akambo wadja losembwe, lomangemange ndo lɔkɛwɔ laso lendana la awui wa dieyanelo l’ohemba. Dia tondoya ehemba ɛsɔ dimɛna, sho pombaka mbekiya ‘akoka aso w’ekanelo ka yimba dia mbeya tshikitanya ɔlɔlɔ la kɔlɔ.’ (Heberu 5:14) Lo kondja ewo k’oshika k’Ɔtɛkɛta wa Nzambi ndo lo shihodia atɔndɔ wa lɔkɔ, sho mbekiyaka nkum’otema kaso dia sho monga l’akoka wa mbɔsa tɛdikɔ tangɛnyangɛnya Jehowa.—Tukedi 3:21.
7. Sha ɛnyɛlɔ ka dui dimɔtshi diakoka konya Okristo dia monga la kanyi ya mbekesanɛ l’asekande wa l’olimu wele bu ambetawudi.
7 Tɔshi ɛnyɛlɔ kɛmɔtshi. Onde wɛ ekɔ opalanga wayanga dia ngɛnyangɛnya otema wa Jehowa? (Tukedi 27:11) Naka eelo, kete wɛ mɛtɛ koka mandɔma. Ko ohokanyiya yema dia asekayɛ amɔtshi wa l’olimu wambokosombɛ tikɛ dia wɛ ntshɔ la wɔ dia tenda tɔkɛnyɔ tɔmɔtshi. Vɔ ngɛnangɛnaka woho wakambayɛ la wɔ kâmɛ ndo kombolaka mbetsha yema ya wenya kâmɛ la yɛ lo wenya waha w’olimu. Wɛ mbeyaka tatɛ mbuta ɔnɛ anto anɛ bu anto wa kɔlɔ. Mɛnamaka dia vɔ wekɔ lo ndjela atɔndɔ amɔtshi w’ɔlɔlɔ wendana la lɔkɛwɔ. Ko lâsɔ, ayoyosala na? Onde mbetawɔ leeta lɔsɔ koka monga la wâle ɔmɔtshi? Ngande wakoka Ɔtɛkɛta wa Nzambi kokimanyiya dia mbɔsa yɛdikɔ y’ɔlɔlɔ lo dikambo sɔ?
8. Atɔndɔ akɔna wa lo Afundelo watokimanyiya dia kana yimba lo dikambo dia angɛnyi?
8 Tɔsɛdingole atɔndɔ amɔtshi wa l’Afundelo. Tɔndɔ dia ntondo diakoka toyɛ lo yimba ele nɛ dia lo 1 Koreto 15:33, diata ɔnɛ: ‘Lɔngɛnyi la kɔlɔ latolanyaka mbekelo y’ohomba.’ Onde kitanyiya tɔndɔ nɛ nembetshiyaka mbewɔ tshɛ lo tshɛ anto wele kema ambetawudi? Afundelo kadimolaka ɔnɛ aha ɔsɔku. Ɔpɔstɔlɔ Paulo ndamɛ akɛnya ngandji kakandokaka “wehu w’antu tshe,” mbidja ndo anto waki komonga ambetawudi. (1 Koreto 9:22) Lokristo la mɛtɛ tɔlɔmbaka dia sho ndjasha le anto akina, mbidja ndo wanɛ wele kema laso mbetawɔ ɔtɔi. (Romo 10:13-15) Ngande wayotokoka ndjela dako diata ɔnɛ “tutshelaki antu tshe ololo” naka sho ndjakakitola l’anto wakoka monga l’ohomba wa ekimanyielo kaso?—Ngalatiya 6:10.
9. Dako diakɔna dia lo Bible diatokimanyiya dia monga la wɛdimo lo diɔtɔnganelo diasaso la asekaso wa l’olimu?
9 Koko, otshikitanu wekɔ efula lam’asa mbokana la osekaso la l’olimu la monga ɔngɛnyi ande wa mamba. Ndo lanɛ nto, ekɔ tɔndɔ dikina diendana la dikambo sɔ. Ɔpɔstɔlɔ Paulo mbishaka Akristo ɔhɛmwɛlɔ ɔnɛ ate: “Tanyosohanake kame la wane wahetawo.” (2 Koreto 6:14) Kakɔna kalembetshiya etelo k’ɔnɛ “tanyosohanake kame la wane wahetawo” na? Dikadimwelo dimɔtshi dia Bible kadimolaka ɛtɛkɛta ɛsɔ ɔnɛ “tanyokambake kâmɛ,” “tanyokambake kâmɛ oko anto wele woho akɔ wâmɛ,” kana “tanyongake la diɔtɔnganelo dia kɔlɔ.” Etena kakɔna kakoma diɔtɔnganelo diele lam’asa onto l’osekande la l’olimu kɔlɔ na? Etena kakɔna katamba diɔtɔnganelo sɔ olelo ndo kakomadiɔ ɔsɔhanelo wa kɔlɔ na? Ɔtɛkɛta wa Nzambi, Bible, kokaka nɔmbɔla wanya ayɛ lo dikambo sɔ.
10. a) Yeso waa na wakandasɔnɛ oko angɛnyi? b) Ambola akɔna wakoka kimanyiya onto dia mbɔsa tɛdikɔ t’ɔlɔlɔ lo kɛnɛ kendana la anto wa mbekesanɛ la wɔ?
10 Tɔsɛdingole ɛnyɛlɔ kaki Yeso, lele oma k’etongelo k’anto nde akawaokaka ngandji. (Tukedi 8:31) Etena kakinde la nkɛtɛ, Yeso aki la dimama dia wolo lam’asande la ambeki ande. (Joani 13:1) Nde ‘aki ndo la ngandji’ otsha le pami kɛmɔtshi kaki la kanyi ya kɔlɔ lo awui w’ɔtɛmwɛlɔ. (Mako 10:17-22) Koko Yeso akayadjɛ nto elelo lo kɛnɛ kendana la ɔsɔnwɛlɔ w’angɛnyi w’eshika. Nde komonga la dimama dia wolo lam’asande la anto waki kondjashaka la otema ɔtɔi dia sala lolango la She. Lo diaaso dimɔtshi, Yeso akate ate: “Naka nyu nyambutsha uku anyutelami, keti engenyi ami mbenyu.” (Joani 15:14) Lo mɛtɛ, wɛ koka mbekesanɛ l’osekayɛ ɔmɔtshi la lânde la l’olimu. Koko yambola wate: ‘Onde onto ɔnɛ mbetawɔka sala kɛnɛ kakadjanga Yeso? Onde nde nangaka mbeka awui wendana la Jehowa, ɔnɛ lakatodjangɛ Yeso dia tɛmɔla? Onde nde ndjelaka ɛlɛmbɛ wendana la lɔkɛwɔ wayelami oko wemi Okristo?’ (Mateu 4:10) Etena kasawolayɛ l’asekayɛ wa l’olimu ndo katɛtɛyɛ dia vɔ kitanyiya atɔndɔ wa lo Bible, wɛ ayeya esadi eto kɛnɛ kele l’etema awɔ.
11. Shila akambo amɔtshi wahomba ɛtɛkɛta wa Nzambi nɔmbɔla wanya aso.
11 Ekɔ akambo akina efula wakoka ɛtɛkɛta wa Nzambi monga oko tala l’ekolo aso. Ɛnyɛlɔ, Okristo ɔmɔtshi wele bu la olimu mbeyaka tana olimu ɔmɔtshi wa dimɛna efula. Koko olimu akɔ wayowɔsɛka wenya ande tshɛ ndo wayowɔlɛndjaka efula. Ndo naka nde mbetawɔ olimu akɔ, kete nde ayetshaka nsanganya efula y’Akristo ndo hatonga l’akoka wa ndjashaka lo elimu ekina wendana la ɔtɛmwɛlɔ wa pudipudi. (Osambu 37:25) Okristo okina mbeyaka pembama wolo dia menda tɔkɛnyɔ tahɔtɔnɛ la atɔndɔ wa lo Bible. (Efeso 4:17-19) Okina mbeyaka monga ko momalaka esadi eto etena kɛnande wandja w’asekande ambetawudi. (Kolosai 3:13) Lo akambo asɔ tshɛ, sho pombaka tshika dia Ɔtɛkɛta wa Nzambi monga tala l’ekolo aso. Lo mɛtɛ, naka sho kitanyiya atɔndɔ wa lo Bible, kete sho kokaka tondoya okakatanu tshɛ wa lo lɔsɛnɔ. Ɔtɛkɛta wa Nzambi wekɔ “ololo mbetsha antu, la mbalaka, la mbaewula, la mbaekiya lu akambu w’ololo.”—2 Timote 3:16.
“Usasi lu mbuka kami”
12. Ngande wele ɛtɛkɛta wa Nzambi osase lo mboka kaso?
12 Osambu 119:105 mbutaka nto dia ɛtɛkɛta wa Nzambi kokaka tongamulɛ mboka kaso, lo tɛnya mboka ka ndjela. Sho mbeyaka kɛnɛ katokongɛ lo nshi yayaye nɛ dia Bible mbishaka kitshimudi y’asui wa lo andja ɔnɛ ndo etombelo wayonga l’asui akɔ. Eelo, sho mbeyaka dia tekɔ lo nsɛna lo “nshi y’ekumelu” ya dikongɛ nɛ dia kɔlɔ di’akambo. (2 Timote 3:1-5) Mbeya kɛnɛ katokongɛ la ntondo ekɔ la shɛngiya ya wolo lo yoho ya lɔsɛnɔ yasɛnaso ɛlɔ kɛnɛ. Ɔpɔstɔlɔ Petero akafunde ate: ‘Lam’ele diangɔ sɔ tshɛ diayɔlɛlɔ, weho akɔna w’anto wahombanyu monga lo kɛnɛ kendana la etsha wa lɔkɛwɔ l’ekila ndo lo ditshelo di’anto wamamema Nzambi, etena kakonganyu ndo katetemalanyu nama lushi la Jehowa lo yimba?’—2 Petero 3:11, 12.
13. Woho wahomba awui salema la shamanya ɛlɔ kɛnɛ pombaka monga la shɛngiya yakɔna lo tokanyi ndo lo yoho yaso ya lɔsɛnɔ?
13 Tokanyi taso ndo yoho yaso ya lɔsɛnɔ pombaka mɛnya dietawɔ dia wolo diele laso di’ɔnɛ ‘andja ɔnɛ la nsaki yawɔ wekɔ lo teete.’ (1 Joani 2:17) Kamba la atɔndɔ wa lo Bible ayotokimanyiya dia mbɔsa tɛdikɔ ta lomba lo kɛnɛ kendana la eyango aso wa lo nshi yayaye. Ɛnyɛlɔ, Yeso akate ate: “Keli ntundu nyutayangi diulelu la ololo wa [Nzambi], ku diango so tshe diayuyala dianyu.” (Mateu 6:33) Ekɔ dikambo di’ɔngɛnɔngɛnɔ efula dia mɛna woho wɛnya ɛlɔngɔlɔngɔ la esekaseka efula mbetawɔ kawɔ lo ɛtɛkɛta ɛsɔ waki Yeso lo kamba olimu wa lo tena tshɛ! Anto akina ndo nkumbo mɔtshi waketawɔ dia ntshɔ lo wedja wele l’ohomba efula w’apandjudi wa Diolelo.
14. Ngande wakahamia nkumbo kɛmɔtshi k’Akristo olimu awɔ w’esambishelo?
14 Tɔ̂shi ɛnyɛlɔ ka nkumbo kɛmɔtshi k’Akristo kele l’anto anɛi kakamɔ oma lo wodja w’États-Unis dia ntshɔ lo République dominicaine dia tokamba kâmɛ la etshumanelo ka l’osomba ɔmɔtshi wele la anto 50 000. Etshumanelo kɛsɔ kaki la apandjudi wa Diolelo oko 130. Koko lo Ngɔndɔ ka nɛi 12, 2006, suke la anto 1 300 wakɔtɔ lo losanganya la Eohwelo ka nyɔi ka Kristo! Dikambɔ dia lo wodja ɔsɔ “diambela dia muna” woho ɔnɛ wele l’ɔkɔngɔ wa ngɔndɔ tshanu tsho, papa la mama kɛsɔ kâmɛ la ɔnawɔ la pami ndo la womoto wakikɔ lo mbeka Bible la anto 30. (Joani 4:35) Papa kɛsɔ mbutaka ate: “Etshumanelo kɛsɔ kaki la anangɛso ndo la akadiyɛso 30 w’oma l’ahole akina wakaye dia ndjokikimanyiya. Yɛdikɔ y’anto 20 l’atei awɔ wakaye oma lo wodja w’États-Unis ndo akina wakaye oma la Bahamas, Canada, Italie, Nouvelle-Zélande ndo oma l’Espagne. Vɔ wakaye la nsaki k’efula ka ndjosambisha ndo oyelo awɔ waki la shɛngiya ya mamba lo wangasanu w’anangɛwɔ la akadiyɛwɔ wakawatane.”
15. Ɛtshɔkɔ akɔna wamboyokondja lo mbetsha wahɔ wa Diolelo lo dihole dia ntondo lo lɔsɛnɔ layɛ?
15 Lo mɛtɛ, anto efula bu l’akoka wa monɔ otsha lo wodja okina dia tokamba lɛnɛ ele ohomba w’efula. Koko wanɛ wakoka, kana wakoka sala etshikitanu lo nsɛnɔ yawɔ dia monga l’akoka wa sala dikambo sɔ wayokondja ɛtshɔkɔ efula lo ndjasha lo yoho y’olimu shɔ. Ndo oyadi lende akambayɛ, tohandjake ɔngɛnɔngɛnɔ wakokayɛ monga lawɔ lo kambɛ Jehowa la wolo ayɛ tshɛ. Jehowa ndakaka dia ‘kotshulwɛ ɛtshɔkɔ edja ndo wɛ aya bu la wɔ nto ohomba’ naka wɛ mbetsha wahɔ wa Diolelo lo dihole dia ntondo lo lɔsɛnɔ layɛ.—Malaki 3:10.
Tokondja wahɔ oma lo ɛlɔmbwɛlɔ ka Jehowa
16. Ngande wayotokondja wahɔ lo tshika dia ɛtɛkɛta wa Nzambi tɔlɔmbɔla?
16 Oko wakatadiɛnyi, ɛtɛkɛta wa Jehowa tɔlɔmbɔlaka lo toho tohende tafɔna. Vɔ wekɔ tala l’ekolo aso. Vɔ tokimanyiyaka dia ntshɔ otsha la ntondo lo mboka k’ɔlɔlɔ ndo vɔ tɔlɔmbɔlaka etena kalangaso mbɔsa tɛdikɔ. Ndo Ɔtɛkɛta wa Nzambi tongamulɛka mboka kaso, lo tosha akoka wa mɛna hwe kɛnɛ katokongɛ la ntondo. Dui sɔ tokimanyiyaka dia kitanyiya dako diaki Petero diata ɔnɛ: “Nyolongosole tumba tanyu, nyuyali ki. Nyushikike elungamelu kanyu lu ngandji ka mamba kayuwunyusha l’enelo ka Jesu Kristu.”—1 Petero 1:13.
17. Ngande wayotokimanyiya wekelo wa Bible dia ndjela ɛlɔmbwɛlɔ ka Nzambi?
17 Jehowa tɔlɔmbɔlaka mɛtɛ. Dimbola diambɔma diɔ nɛ: Onde wɛ ayoyela ɛlɔmbwɛlɔ kakɔ? Dia shihodia ɛlɔmbwɛlɔ katosha Jehowa, sho pombaka mbɔsa yɛdikɔ ya mbadiaka etenyi kɛmɔtshi ka Bible lushi tshɛ. Tokanake yimba lo kɛnɛ kadiaso, tosale la wolo dia shihodia lolango laki Jehowa lo dikambo tshɛ ndo tɔsɛdingole toho totshikitanyi takokaso kamba l’akambo akɔ lo lɔsɛnɔ laso. (1 Timote 4:15) Oma lâsɔ, ‘tokambe la akoka aso w’ekanelo ka yimba’ etena kɔsaso tɛdikɔ.—Romo 12:1.
18. Ɛtshɔkɔ akɔna wakondjaso etena katshikaso dia Ɔtɛkɛta wa Nzambi tɔlɔmbɔla?
18 Atɔndɔ wa l’Ɔtɛkɛta wa Nzambi wayotongamulɛ osase ndo tosha ɛlɔmbwɛlɔ keso l’ohomba etena kɔsaso tɛdikɔ lo kɛnɛ kendana la yoho ya lɔsɛnɔ y’ɔlɔlɔ ya ndjela. Sho kokaka monga l’eshikikelo dia ɛtɛkɛta wa Jehowa wakafundama “watushaka enginya yimba.” (Osambu 19:7) Naka sho tshika dia Bible tɔlɔmbɔla, kete tayonga la nkum’otema ka pudipudi ndo la ɔngɛnɔngɛnɔ waya lo ngɛnyangɛnya Jehowa. (1 Timote 1:18, 19) Naka sho mbetawɔ di’ɛtɛkɛta wa Nzambi nɔmbɔlaka wanya aso lushi tshɛ, kete Jehowa ayotosha ɔtshɔkɔ woleki tshɛ, mbuta ate lɔsɛnɔ la pondjo.—Joani 17:3.
Onde wɛ âkohɔ?
• Lande na ekɔ ohomba tshika dia Jehowa Nzambi nɔmbɔla wanya aso?
• Ngande wakoka ɛtɛkɛta wa Nzambi monga tala l’ekolo aso?
• Ngande wakoka ɛtɛkɛta wa Nzambi monga osase lo mboka kaso?
• Ngande wayokoka wekelo wa Bible tokimanyiya dia ndjela ɛlɔmbwɛlɔ kaki Nzambi?
[Osato wa lo lɛkɛ 19]
Etena kakɔna kele kema dui dia lomba mbɔtɔnɛ la onto laha ombetawudi?
[Osato wa lo lɛkɛ 20]
Angɛnyi w’eshika wa Yeso waki anto wakasalaka lolango la Jehowa
[Esato wa lo lɛkɛ 21]
Onde yoho yaso ya lɔsɛnɔ mɛnyaka dia sho mbidjaka wahɔ wa Diolelo lo dihole dia ntondo?