Onde wɛ kambaka la waaso wakondjayɛ dia mbewoya anto akina dietawɔ diayɛ?
LO WODJA wa Pologne, wakasha ana wa lo kalasa ya lâdiko devɔara dia mɔmbɔla ɔtɛ a dui wata ɔnɛ: “Onde mɛtɛ kele tshɛ mɛtɛ keto kekɔ?” Ɛlɛmbɛ wendana la devɔara sɔ wakataka ɔnɛ: “Sho bu l’ohomba wa mɛtɛ kele tshɛ mɛtɛ keto. Ndoko onto lele l’ohomba atɔ. Ndoko dihole diatanema mɛtɛ kele tshɛ mɛtɛ keto.” Ɔna womoto ɔmɔtshi lelɛwɔ Agata lele l’ɛnɔnyi 15, lele ombeki lo kalasa ka lâdiko ndo Ɔmɛnyi wa Jehowa akɔshi yɛdikɔ ya kamba la diaaso sɔ dia mbewoya anto akina dietawɔ diande.
Dia nɔngɔsɔla devɔara sɔ, ntondotondo Agata akalɔmbɛ ɛlɔmbwɛlɔ ka Jehowa, oma lâsɔ nde akatatɛ sɔtɔla akambo wendana la ɔtɛ a dui akɔ. Nde akatane awui wɔtɔnɛ la dimbola sɔ lo Tshoto y’Etangelo ya Ngɔndɔ k’esambele 1, 1995. Nde akashile dimbola diakoke Pɔnsɔ Pilato Yeso ɔnɛ: “Mete eli na?” (Joani 18:38) Nde akafunde dia dimbola sɔ diakɛnyaka lônyu laki l’otema w’onto ɔsɔ, aki oko onto lata ɔnɛ: ‘Mɛtɛ? Dikambo diakɔna sɔ? Mɛtɛ kema mɛ!’ Agata akafunde nto ate: “Dimbola diaki Pilato mboholakami ɛlɛmbɛ wakawatosha lo kɛnɛ kendana la devɔara sɔ.”
L’ɔkɔngɔ diko, nde akayolembetshiyaka kanyi y’ɔnɛ kɛnɛ kele mɛtɛ le onto ɔmɔtshi, mbeyaka monga kashi le onto okina ndo kanyi y’ɔnɛ vɔ tshɛ mbeyaka monga la shadiya. Nde akambola dimbola nɛ ate: “Onto akɔna otosombɔ mbɔtɔ lo aviyɔ otondongaka nde hetawɔ dia ɛlɛmbɛ wa woho wahomba diangɔ kɛndakɛnda lo loowa wekɔ mɛtɛ tshɛ lo tshɛ?” Oma lâsɔ, nde akatɛkɛta dikambo dia Bible ate: “Tolembetelo t’eshika tekɔ tɛnya dia sho kokaka ndjaɛkɛ lo Ɔtɛkɛta wa Nzambi.” Nde akɛnya elongamelo kande lo mbuta ɔnɛ wanɛ wayanga mɛtɛ kele tshɛ mɛtɛ l’otema ɔtɔi pombaka monga la solo dia lotutsha dia tana mɛtɛ kakɔ.
Agata akalongola dipɔlɔmɛ dia lânde ndo nde aki la diɛsɛ dia mbisha sawo la ntondo k’ase kalasa kawɔ k’otondo. Asekande amɔtshi wa la kalasa waketawɔ mbeka la nde Bible. Agata ekɔ la ɔngɛnɔngɛnɔ w’efula lo woho wakandakambe la diaaso sɔ dia mbewoya anto akina dietawɔ diande. Eelo, kamba la diaaso tshɛ diakondjaso dia tɛkɛta dikambo dia mbetawɔ kaso kokaka monga l’etombelo w’ɛlɔlɔ. Waaso akɔna wakokɛ kondja dia tɛkɛta dikambo dia dietawɔ diayɛ?