Yasukanya la Nzambi
Nde mbeyaka pâ yele laso
“NDJADJA lo dihole di’onto kɛdikɛdi mboka pâ kande l’otema aso.” Ngasɔ mbakalembetshiya misiɔnɛrɛ ɔmɔtshi w’osombe wa Ɔmɛnyi wa Jehowa dionga dia dimɛna efula sɔ. Jehowa Nzambi ekɔ ɛnyɛlɔ koleki woke k’onto layadja lo dihole di’anto akina. Nde mbokaka pâ koka ekambi ande. Ngande wakokaso shikikɛ dikambo sɔ? Ɛtɛkɛta ndo etsha waki Yeso etena kakinde la nkɛtɛ wakakɛnɛmɔla lo yoho ya kokele woho wayadja Jehowa lo dihole di’anto akina la ngandji tshɛ. (Joani 5:19) Ɛnyɛlɔ, tɔsɛdingole dui dimɔtshi diɔkɔndwami lo Joani 11:33-35.
Etena kakavu Lazaro l’ɔngɛnyi waki Yeso, Yeso akatshu lo ngelo kaki Lazaro. Aha la tâmu, Mariya la Mata akadiyɛ waki Lazaro waki la lɔkɔnyɔ efula. Yeso akokaka nkumbo kɛsɔ ngandji k’efula. (Joani 11:5) Ko kakɔna kakandahombe sala? Ɔkɔndɔ mbutaka ɔnɛ: “Yeeso laamaakandɛɛnyi Mariya alela, ko ndo ase Yuda anɛ wakaye lande walela, nde akakɛtɛ solo ndo akacucumala efula. Nde akambola ate: ‘Lende akanyookundɛ?’ Vɔ wakookadimola vwaate: ‘Owanji, yaka yeende!’ Ko Yeeso akalele.” (Joani 11:33-35, Dyookaneelo Dy’Oyooyo) Lande na kakalele Yeso? Lo mɛtɛ, Lazaro lakandokaka ngandji efula akavu, koko Yeso aki suke la mbolola. (Joani 11:41-44) Onde akikɔ dui dimɔtshi diakasha Yeso kandji l’otema?
Tonyomenda ɛtɛkɛta w’omaso la shila la diko. Tolembete dia etena kakɛnyi Yeso Mariya ndo wanɛ waki kâmɛ la nde walela, nde “akakɛtɛ solo” ndo “akacucumala efula.” Lo ɔtɛkɛta wakafundama Bible ntondo, tɔtɛkɛta tokambi lawɔ lanɛ nembetshiyaka kandji k’efula.a Yeso aki la kandji k’efula l’ɔtɛ wa kɛnɛ kakandɛnyi. Kandji k’efula kaki la nde kakɛnama lo woho wakandalele. Mbokɛmaka hwe dia pâ k’anto akina kakasha Yeso pâ. Onde wɛ atalelaka etena kɛnayɛ onto ɔmɔtshi alela?—Romo 12:15.
Woho wakayadje Yeso lo dihole di’anto akina tokimanyiyaka dia sho mbeya dimɛna dimɛna waonga ndo mboka yaki Jehowa She. Tohɔ dia Yeso akakɛnɛmɔla lo yoho ya kokele waonga wele la She, diakɔ diakandakoke mbuta ɔnɛ: “One lakamenyi, akenyi Papa.” (Joani 14:9) Ɔnkɔnɛ, etena kadiaso dia “Yeeso akalele,” sho kokaka monga l’eshikikelo dia Jehowa mbokaka pâ kele la atɛmɔdi ande. Mɛtɛ, afundji akina wa Bible shikikɛka dikambo sɔ. (Isaya 63:9; Zekariya 2:8) Jehowa ekɔ mɛtɛ Nzambi ka ngandji!
Sho kotɔmaka oma le anto wayadja lo dihole diaso. Etena kakɔmɔso, sho kotwamaka otsha le asekaso anto wakoka mboka awui ndo pâ kele laso. Sho ndekaka mɛtɛ ndjasukanya la Jehowa, Nzambi ka kɛtshi koka pâ kele laso ndo keya lande na kalelaso!—Osambu 56:8.
[Nɔte ka l’ɛse ka dikatshi]
a Tshɛkɛta ya lo Grɛkɛ yokadimɔmi ɔnɛ “ndela” nembetshiyaka tena efula “sekuma la delo,” koko tshɛkɛta yokambi lawɔ dia mɛnya woho wakalelaka Mariya ndo anto akina mbeyaka nembetshiya “mbida ekoko.”