Lakeke woho wa mbɔsa lɔsɛnɔ la nɛmɔ

Aki la pindju ka Ngɔndɔ ka nɛi 16, 2007. Etena kakamakotama lo tshuku dia biro waki lo etajɛ wa sato wa lo Norris Hall lele luudu l’etajɛ ɛnɛi la lo kalasa y’adidi yelɛwɔ campus de Virginia Tech, l’Université polytechnique de l’État de Virginie (États-Unis) yele ndo kalasa y’adidi ya lɛɛta, dimi lakohɔ polo lo yɛdikɔ yakɔna yahombaso monga la lowando l’ɔtɛ weso la lɔsɛnɔ lushi tshɛ.

Laki lo biro ami layalɔngɔsɔla dia polɔ l’etajɛ wa hende dia tɔsa mikanda wakawatomɛ. Ombetsha ɔmɔtshi akaye dia ndjombutɛ dia dimi ntshɔ la nde lo biro ande dia tɔ̂lɔngɔsɔlɛ ɔrdinatɛrɛ. Etena kakatɔtɔ lo biro ande, takoke ekoma watondɔtondɔ lo etajɛ wa hende. Lam’ele sho kombeyaka kɛnɛ kaketaka, takalawɔ otsha lo biro ande, takadihe lokuke la kɔkɔmɔ ndo takakongɛka la lonyangu tshɛ dia mbeya kɛnɛ kakahombe komɛ nsɛnɔ yaso lo minitɛ y’otsha la ntondo. Lakatoyashɛ lo tshuku dimɔtshi ndo lakadiholɛ Jehowa Nzambi otema lo dɔmbɛlɔ, lo mbɔlɔmba dia nde nɔmbɔlami dia dimi tokomɛ kɛnɛ tshɛ kaki la ntondo kami.

Etena kakatakongɛka, lakohɔ dikambo dimɔtshi diakasalema ambeta ɛnɔnyi 15. Dimi lakakambaka oko mekanisiɛ lo dihole dimɔtshi diakawalɔngɔsɔlaka mituka. Yema y’esasɛ yaki l’anya w’osekami la l’olimu yakatondɔ lombe la dja. Lam’ele nde akandama la sase dia wɔma, aha la mbeya nde akoke esasɛ wakatondɔ dja ɛsɔ l’elungi kami! Dimi lakamɛnɛ dinga dia dja sɔ ndo lakalongola wolo efula. Wakamɛmbɛ esadi eto l’aviyɔ otsha lo lopitadi lasakɛwɔ anto wambolongola dja ndo lakasakemɛ lɛkɔ l’edja ka ngɔndɔ shato l’etenyi lele l’asa eko la nyɔi. L’ɔkɔngɔ wa vɔ sakɛmi l’edja ka ngɔndɔ tshanu ndo wa dimi kɔlɔngana, lakayongaka l’akoka wa kalola la ngelo lele l’ɔngɛnɔngɛnɔ lo woho wakamake. Dui sɔ diakambetsha dia dimi mbɔsaka lushi tshɛ lemi la lɔsɛnɔ la nɛmɔ. Diɔ diakakeketsha nto woho wakamayâshikikɛ dia kambɛ Jehowa Nzambi ɔnɛ lakambisha lɔsɛnɔ oko Ɔmɛnyi ande ɔmɔtshi.​—Osambu 90:12; Isaya 43:10.

Oko wakimi komonga l’akoka wa kamba oko mekanisiɛ l’ɔtɛ wa dja yakamalongola, lakayekaka woho wa nɔngɔsɔlaka waa ɔrdinatɛrɛ ko wakambɔsɛ l’olimu lo kalasa y’adidi ya la Virginie. Diakɔ diakimi la Norris hall la pindju ka lushi lɔsɔ.

Oko wakatatetemalaka ekoma tondɔtondɔ sho kombeya dia lɔnyɔi lakaleke tshɛ la l’ekoma lo États-Unis mbakasalemaka l’etajɛ wakikɔ l’ɛse. Lɔnyɔi lɔsɔ lakakomɛ etena kakayadiake ɔnɛ lakakandaka l’ɔkɔngɔ wa nde ndjaka anto 32. Suke la minitɛ 20 l’ɔkɔngɔ wa dui sɔ tatɛ, takoke apulushi wayeteta l’ɛsɛsɛ wele lam’asa pele l’etajɛ. Takawaete ko vɔ wakayotɔsa dia tonya lo wâle.

Dikambo dia lonyangu efula sɔ diakambetsha dia lɔsɛnɔ la nshi nyɛ lekɔ anyanya. (Jakoba 4:14) Ekɔ mɛtɛ ohomba dia sho kitsha wɛkamu aso le Jehowa Nzambi ɔnɛ lashana lɔsɛnɔ ndo mbɔsa lushi tshɛ leso la lɔsɛnɔ oko woshasha w’oma le nde!​—Osambu 23:4; 91:2.

[Efundelo wɛnya kanga osato wa lo lɛkɛ 26]

AP Photo/The Roanoke Times, Alan Kim