Laya l’oyango wa dimɛna lo lɔsɛnɔ
Kɔndwama oma le Gaspar Martínez
Lo yoho mɔtshi, ɔkɔndɔ ami ekɔ ɔkɔndɔ w’ɔna pami ɔmɔtshi la wola l’oma lo shamba mɔtshi lakatokoma ɔngɔnyi l’osomba wa woke. Koko, nyayɛna dia ɔngɔnyi wakamatokondjaka kema mɛtɛ woho w’ɔngɔnyi wakamalongamɛka.
DIMI lakole lo shamba mɔtshi l’ɛnɔnyi 1930 l’ɛtshi ka nkɛtɛ ka Rioja lo nɔrdɛ ka wodja wa Espagne. Lakamɔ lo kalasa lam’akimi l’ɛnɔnyi dikumi, koko l’etena kɛsɔ ko lamboshilaka mbeya mbadia la funda. Dimi la analengo la akadiyɛmi asamalo taketshaka wenya aso dia namaka ɛkɔkɔ kana dia kambaka dikambɔ.
Wola akatokonya dia sho kanyiyaka paka dia woho wa monga l’ɔngɔnyi ndo takakɔmiyaka anto waki la diangɔ efula toleka. Evɛkɛ akate mbala kɛmɔtshi dia “ngelo kaso mbele ngelo kaleka ndjasha l’awui w’ɔtɛmwɛlɔ.” Nde kombeyaka dia l’edjedja ka wonya anto efula wayoyomɔ lo ɔtɛmwɛlɔ w’aseka Mupɛ.
Oyangelo wa ɛngɔ koleki dimɛna
Lakatshuke Mercedes, ɔna womoto ɔmɔtshi la lo ngelo kaso. Yema tshitshɛ l’ɔkɔngɔ wa sho tshukana, takote ɔna pami. Lo 1957, takonɔ la Logroño, osomba waki suke la so ndo l’ekomelo nkumbo kami k’otondo kakayonɔka lɛkɔ. Kem’edja, lakayɛnaka dia oko wakimi komonga la diewo efula, takimi l’elongamelo ka kondja olimu wa falanga efula. Lakayambolaka dihole diakamakoke kondja ɛlɔmbwɛlɔ, ɔnkɔnɛ lakatatɛ sala eyangelo lo bibliɔtɛkɛ wa lo ngelo kaso kânga mbakimi kombeyaka mɛtɛ kɛnɛ kakamayangaka.
L’ɔkɔngɔ diko, lakayohokamɛka emisiɔ ɔmɔtshi wa lo aradiyo wakawekaka la anto Bible lo fundanɛka mikanda. Yema tshitshɛ l’ɔkɔngɔ wa dimi shidiya wekelo ɔsɔ, pastɛrɛ mɔtshi y’ase Asɔnyi yakaye ndjomenda. L’ɔkɔngɔ wa dimi ntshɔ mbala ngana lo dihole diawɔ di’ɔtɛmwɛlɔ, lakɛnyi ewanu waki lam’asa ewandji awɔ. Dimi kokalola nto lo dihole sɔ ndo lakɔshi dia ɛtɛmwɛlɔ tshɛ wekɔ woho wâmɛ.
Washo ami wambodihɔ
Lo 1964, ɔlɔngɔlɔngɔ ɔmɔtshi wakawelɛka Eugenio akaye ndjomenda. Nde aki Ɔmɛnyi wa Jehowa, ɔtɛmwɛlɔ wakimi taloke dikambo diawɔ ndoko lushi. Koko, lakalangaka efula dia sawola awui wendana la Bible. Lakafɔnyaka dia laki la ewo k’oshika k’Afundelo. Lakokadimola lo kamba la avɛsa angana wakameke etena kakamekaka Bible lo tshimbo ya ofundanelo wa mikanda. Kânga mbakamalangaka mamɛ wetshelo ɛmɔtshi w’ase Asɔnyi, lakeyaka dia dimi kombetawɔka wetshelo ɛsɔ.
L’ɔkɔngɔ wa sho monga la asawo w’etale mbala hiende, laketawɔ dia Eugenio aki manyi lo kamba la Ɔtɛkɛta wa Nzambi. Lakambe efula dia mɛna woho wakandatanaka avɛsa esadi ndo woho wakandɛnyaka woho wa kamba la wɔ kânga mbele dimi lakoleke mbɔtɔ kalasa. Eugenio akamɛnya oma lo Bible dia tekɔ lo nsɛna lo nshi y’ekomelo ndo ɔnɛ Diolelo diaki Nzambi diayanga kadimola nkɛtɛ paradiso. Lakambe efula lam’akamoke awui asɔ.—Osam. 37:11, 29; Is. 9:6, 7; Mat. 6:9, 10.
Laketawɔ mbeka Bible esadi eto. Lo mɛtɛ, awui tshɛ wakamekaka waki eyoyo le mi ndo wakananda otema ami. Laki la elongamelo k’oyoyo ndo elongamelo kakɔ kakambisha diaaso dia nsɛna lɔsɛnɔ la dimɛna. Eyangelo ami wakakome l’ekomelo. L’etena kɛsɔ, welo wakamadjaka dia ndowanya lɔsɛnɔ lami komonga nto ohomba kâmɛ ndo welo wakamadjaka dia tana olimu wa dimɛna. Hemɔ ndo nyɔi ayonyɛma.—Is. 33:24; 35:5, 6; Eny. 21:4.
Lakatatɛ mbutɛ ewotɔ ami kɛnɛ kakamekaka ndo la waasaso tshɛ lakâlembetshiyaka dia Nzambi akalake dia kadimola nkɛtɛ paradiso, lɛnɛ ayɔsɛnaka akanga wa kɔlamelo pondjo pondjo.
Ase nkumbo kami wambetawɔ akambo wa mɛtɛ wa lo Bible
Kombeta edja, anto oko dikumi l’ahende wakatatɛ sangana Lushi la lomingu tshɛ l’ɔkɔngɔ a midi lo luudu laki kosɛ papa dia kɛtshanya alaka wa lo Bible. Taketshaka wenya ehende kana esato lomingu tshɛ dia sala ɔkɛtshanyelo ɔsɔ. Etena kakɛnyi Eugenio dia efula k’ase nkumbo kami wambɛnya nsaki l’akambo wa mɛtɛ wa lo Bible, nde akatatɛ mbeka l’onto l’onto.
Laki l’ewotɔ ekina la Durango, osomba wa tshitshɛ wakangana la waso kilɔmɛtɛlɛ 120 ndo ndoko Ɔmɛnyi wa Jehowa waki l’osomba ɔsɔ. Ɔnkɔnɛ, ngɔndɔ shato l’ɔkɔngɔ, lakɔshi yema ya vakashi dia tembola ase nkumbo kami dia mbalembetshiya dikambo dia mbetawɔ kami k’oyoyo. Lo diaaso sɔ, takasanganaka anto oko dikumi la dikɔlɔ tshɛ ndo lakawaetshaka polo ndo wonya suke la mpotɔ. Vɔ wakangɛnangɛnaka dia mpokamɛ awui asɔ. Lam’akakoke etena ka dimi kalola, lakâtshikɛ Bible ndo ekanda walembetshiya Bible. Tatɛ oma l’etena kɛsɔ, takatetemala fundanɛ mikanda.
Etena kakakome Ɛmɛnyi wa Jehowa la Durango lɛnɛ aki ndoko onto lakasambisha ntondo, vɔ wakatane anto 18 walomɔlomɔ dia mbeka Bible. Ɛmɛnyi wa Jehowa ɛsɔ waki l’ɔngɛnɔngɛnɔ dia mbeka l’ose nkumbo kami tshɛ.
Polo l’etena kɛsɔ, Mercedes konangaka mbeka akambo wa mɛtɛ wa lo Bible l’ɔtɛ wa wɔma w’anto ndo woho wakinde komonga suke dia mbetawɔ wetshelo wa lo Bible. L’etena kɛsɔ olimu w’Ɛmɛnyi wa Jehowa wakashimbama lo wodja wa Espagne, ɔnkɔnɛ nde akafɔnyaka dia ewandji wa lɛɛta wayotshanya ana aso ahende lo kalasa ndo wayotonola la wolo. Koko lam’akandɛnyi dia nkumbo k’otondo wambetawɔ akambo wa mɛtɛ wa lo Bible, nde lawɔ aketawɔ mbeka Bible.
Lo ɛnɔnyi ehende, ase nkumbo kami 40 wakakome Ɛmɛnyi wa Jehowa ndo wakabatizama dia mɛnya ndjakimɔ kawɔ le Nzambi. Eelo, ase nkumbo kami waki l’oyango wâmɛ la mi. Lakayaoke dia lambokondja ɛngɔ ka dimɛna efula. Takakondja ɛtshɔkɔ efula wa lo nyuma.
Lɔsɛnɔ lami lamboleka monga dimɛna etena kayami opalanga
L’ɛnɔnyi 20 wetshi ɛnɛ, lakayasha tshɛ dia mbodia ana aso ahende ndo dia kimanyiya etshumanelo. Etena kakatonɔ dimi la Mercedes la Logroño, akikɔ paka Ɛmɛnyi wa Jehowa oko 20 ato l’osomba waki l’anto 100 000 ɔsɔ. Kombeta edja, lakalongola ɛkɛndɛ efula l’etshumanelo.
Oma lâsɔ, etena kakimi l’ɛnɔnyi 56, kɔpanyi kakamakambaka kakadihe la shashimoya ndo lakashisha olimu. Lakongaka nshi tshɛ la nsaki ka kamba olimu wa lo tena tshɛ, ɔnkɔnɛ lakakambe la diaaso sɔ dia kamba oko ombatshi mboka. Yema ya dikuta yakatakondjaka yaki tshitshɛ efula, ɔnkɔnɛ lɔsɛnɔ laki pâ efula. Koko Mercedes akakimanyiya efula nɛ dia nde akakambaka olimu wa tasolanɛka diangɔ. Taki la akoka wa kotsha ehomba wa nkumbo kaso ndo ndoko lushi lakatahombe kɛnɛ kaki la so ohomba. Polo ndo ɛlɔ, lekɔ lo kamba oko ombatshi mboka ndo tena la tena Mercedes kambaka olimu w’ombatshi mboka wa tshanda ndo nde ngɛnangɛnaka olimu wa sambisha.
Ambeta ɛnɔnyi ɛmɔtshi wele Mercedes akashaka osekaseka ɔmɔtshi wakawelɛka Merche lakeke Bible etena kakinde dikɛnda periodikɛ mbala la mbala. Merche akadiaka ekanda aso la yambalo ndo Mercedes akɛnyi dia Merche âkatetemala ngɛnangɛna akambo wa mɛtɛ wa lo Bible. L’ekomelo, Merche akayetawɔka mbeka Bible ndo akatatɛ pama dimɛna. Koko, Vicente w’omɛnde akanɔka wanu efula ndo kokoka tshikala edja l’olimu. Etombelo waki la dui sɔ ele, takinde la akoka wa kotsha ehomba wa nkumbo kande ndo diwala diawɔ diaki suke la mvɔ.
Wadɛmi akatɛ Merche dia nde mbutɛ Vicente dia nde sawola la mi ko nde akayosala dikambo sɔ. L’ɔkɔngɔ wa dimi sawola la nde mbala efula, nde aketawɔ dia mbeka Bible. Vicente akatatɛ sala etshikitanu, akatshike nnɔ wanu l’edja ka nshi ngana ndo l’ɔkɔngɔ diko akayotshikaka l’edja ka lomingu l’otondo kana ndekana. L’ekomelo nde akayotshikaka nnɔ wanu lo pondjo. Etshikitanu wakandasale wakatatɛ mɛnama ndo nkumbo kande kakakome kâmɛ. Nkumbo kande k’otondo, mbidja ndo wadɛnde l’ɔnande la womoto wekɔ lo sukɛ etshumanelo ka tshitshɛ kele lo asɛnga wa Canaries, lɛnɛ adjasɛwɔ nshi nyɛ.
Lekɔ lo kana yimba lo lɔsɛnɔ la dimɛna lele la mi
Kânga mbele ewotɔ ami ɛmɔtshi wakeke Bible aya ɛnɔnyi efula wambovɔ, ewotɔ ami ekina wekɔ lo tatetemala pama ndo Nzambi ekɔ lo tɔtshɔkɔla efula. (Tuk. 10:22) Ekɔ dui dia dimɛna efula dia mɛna wanɛ tshɛ wakeke Bible aya ɛnɔnyi akumi anɛi kâmɛ l’anawɔ ndo la ekana awɔ watetemala kambɛ Jehowa la kɔlamelo!
Ɛlɔ kɛnɛ, ewotɔ ami efula wekɔ Ɛmɛnyi wa Jehowa, amɔtshi wekɔ dikumanyi, ekambi wakimanyiya ndo ambatshi mboka. Ɔnami l’enondo nde la wadɛnde wekɔ lo kamba lo Bɛtɛlɛ k’Ɛmɛnyi wa Jehowa ka la Madrid, lo wodja wa Espagne. Lam’akamakome Ɔmɛnyi wa Jehowa akikɔ Ɛmɛnyi wa Jehowa oko 3 000 lo wodja wa Espagne. Ɛlɔ kɛnɛ tambolekana 100 000. Lekɔ lo tetemala kamba olimu wa lo tena tshɛ ndo lekɔ la lowando l’efula le Nzambi l’ɔtɛ wa lɔsɛnɔ la dimɛna lele la mi l’olimu ande. Kânga mbakimi kɔmbɔtɔ kalasa efula, lekɔ la akoka wa kambaka mbala la mbala oko ɔhɛna w’omendji w’otshimbedi.
Ambeta ɛnɔnyi ɛmɔtshi, lakashola dia ngielongelo yakamole yakatshikala tɔngɔ to. Wola wakayotshutshuyaka anto tshɛ dia vɔ tshika dikambɔ ndo mvudu yawɔ dia toyanga lɔsɛnɔ loleki dimɛna. Diɛsɛ ko, efula k’anto wakonɔ asɔ, mbidja ndo dimi, takayosholaka ɔngɔnyi wa lo nyuma. Takeke dia lɔsɛnɔ lekɔ l’oyango ndo ɔnɛ kambɛ Jehowa mbishaka onto ɔngɛnɔngɛnɔ waheyama mbuta.
[Osato wa lo lɛkɛ 32]
Suke l’ase nkumbo kaki ɔnangɛso Martínez tshɛ wele lo akambo wa mɛtɛ