Lande na kele anto l’ohokosanu lo dikambo dia nyuma k’ekila?
ELƐWƆ nyuma k’ekila? Mɛnamaka dia dimbola sɔ diekɔ wɔdu efula, koko mbeyaka monga tshondo y’okakatanu dia nkadimola. Papa l’Ɔrɔma Benoît XVI akatɛ olui w’anto wakatshumana lo wodja w’Australie ate: “Mɛnamaka dia hatokoke nshihodia dimɛna dimɛna kɛnɛ kalembetshiya nyuma.”
Lo mɛtɛ, anto wekɔ la tokanyi efula ndo haweye nkadimola dimbola nɛ: Nyuma k’ekila kɛdikɛdi na? Ekadimwelo ɛmɔtshi washawɔ vɔɛnɛ:
• Onto la mɛtɛ lasɛna l’etei k’etema w’ambeki waki Kristo.
• Siansɛ kaki Nzambi, mbuta ate ɔlɛmbɛ waki Nzambi wakamba olimu.
• Wôngelo waki Nzambi wakamba olimu l’andja ɔnɛ.
• Onto la sato la lo Losato l’osanto.
Lande na kewɔ l’ohokosanu wa ngasɔ? Anto wakatatɛ monga l’okakatanu wa ngasɔ oma ko ntambe ka nɛi T.D. etena kakasɛmɛ ambewi wa teoloji dia nyuma k’ekila kekɔ onto lɛdimi la Nzambi lo woho ɔmɔtshi. Koko Afundelo kana ambeki wa Kristo wa ntondo kombetsha tokanyi ta ngasɔ. Dibuku dimɔtshi (The New Catholic Encyclopedia) mbutaka ɔnɛ: “Daka di’Edjedja hadiote dia nyuma kaki Nzambi kekɔ onto . . . Nyuma kaki Nzambi kekɔ tsho wolo waki Nzambi.” Dibuku diakɔ diâmɛ kotshaka ɔnɛ: “Abuku efula wa lo Daka di’Oyoyo mɛnyaka dia nyuma kaki Nzambi kekɔ ɛngɔ kɛmɔtshi, koko aha onto ɔmɔtshi; dui sɔ mɛnamaka djekoleko lo diɔtɔnganelo diele lam’asa nyuma la wolo waki Nzambi.”
Mbokɛmaka hwe, dia anto wekɔ l’okakatanu dia mbɔsa wolo oko onto. Ɔnkɔnɛ, eyangelo ɛmɔtshi weke kasalema lo wodja wa États-Unis wakɛnya dia anto efula tonaka lokanyi lɔnɛ nyuma k’ekila kekɔ onto kana ɛngɔ kɛmɔtshi kasɛna. Onde mɛtɛ mbatawɔ? Ko kana onde sho pombaka mbetawɔ wetshelo w’ambewi wa teoloji watɛtɛ ɔnɛ: “Edimu k’Ekila kekɔ Onto lotshikitanyi la Papa ndo la Ɔna?”
Dia nkondja okadimwelo wa shikaa, sho pombaka mbɛlɛ otsha lo Bible, Ɔtɛkɛta wa Nzambi washa elembetshiyelo efula dikambo dia nyuma k’ekila. Ɔpɔstɔlɔ Paulo akate ate: “Afundelo tshɛ wakasambiyama oma le Nzambi ndo wekɔ ohomba dia mbetsha akambo wa mɛtɛ ndo dia mingola oma lo munga.”—2 Timote 3:16, Today’s English Version.
Lande na kahombayɛ nyanga dia mbeya mɛtɛ lo kɛnɛ kendana la nyuma k’ekila? Ele nɛ dia mbeya mɛtɛ kɛsɔ kokaka kodiholɛ mboka dia wɛ nkondja ekimanyielo k’oma le Nzambi. Onde tena dimɔtshi wɛ toyaokaka dia wɛ kema l’akoka wa mbikikɛ pâ la wolo ayɛ hita? Yeso akalake ambeki ande ate: “Nyolombe, ku wayunyusha . . . Naka nyu . . . mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba nyuma k’[ekila]?”—Luka 11:9, 13.
L’asawo wayela, tayotshikɛ Afundelo diaaso dia vɔ tɛnya elɛwɔ nyuma k’ekila. Ndo tayɛna woho wakokatɔ monga la shɛngiya y’ɔlɔlɔ lo nsɛnɔ yaso.
[Efundelo wa l’etei w’odingɔ wa lo lɛkɛ 3]
Afundelo tɛnyaka elɛwɔ nyuma k’ekila