Onde wɛ âkohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
• Lo yoho yakɔna yakoka Nzambi kɔngɔnya?
Lo nshi y’edjedja, Jehowa akatshɔkɔla anto amɔtshi oko Abarahama la Sɔlɔmɔna lo mbasha ɛngɔnyi wa l’emunyi. Koko l’atei w’ɛngɔnyi waleka Akristo monga l’ohomba ndo wakoka Nzambi tokimanyiya dia sho nkondja mbele ndo mbetawɔ, wɔladi, ngɛnangɛna la kɛnɛ kele la so ndo ɔngɛnɔngɛnɔ.—9/1, lɛkɛ 3-7, lo Falase.
• Wetshelo akɔna wakokaso nkondja oma lo woho wakakokɛ Yeso Petero diaha nde ndjita l’ashi? (Mat. 14:28-31)
Naka tambɛna di’oko ɔnangɛso ɔmɔtshi bu la mbetawɔ ka wolo, kete sho kokaka nsembola lonya lo yoho ya didjidji dia mbokimanyiya dia nde nyomonga la mbetawɔ ka wolo.—9/15, lɛkɛ 8.
• Kakɔna kakashisha Jehowa dia totshungola?
Jehowa akakikɛ awui efula etena kakandɛnyi Ɔnande asoyama ndo atɛngama. Ndo woho waketawɔ Abarahama dia nambola ɔnande ekɔ didjidji dia kandji kakakikɛ Jehowa etena kakandɛnyi Ɔnande adiakema oko ondjakanyi.—9/15, lɛkɛ 28-29.
• Lande na kele efundelo wa Bible wa l’anya welɛwɔ ɔnɛ Codex Vaticanus mbɔsamaka oko ɛngɔ ka nɛmɔ?
Ɔsɔ ekɔ efundelo wa l’anya wa lo Grɛkɛ wakafundama ɛnɔnyi oko 300 l’ɔkɔngɔ wa Bible nshila la mfundama. Efundelo akɔ wekɔ la abuku wa lo Afundelo wa lo Hɛbɛru ndo Afundelo w’Akristo wa lo Grɛkɛ suke la tshɛ. Waa nomb’ewo kambaka la ehomɔ kɛsɔ dia nshikikɛ kana awui amɔtshi wofundami lo Bible ya nshi nyɛ tanemaka ndo lo efundelo wa Bible w’etatelo.—10/1, lɛkɛ 18-20, lo Falase.
• Tukedi 24:27 toshaka wetshelo akɔna lo kɛnɛ kendana la ‘wokelo wa luudu’?
Pami kakombola ntshuka pombaka ndjalɔngɔsɔla dimɛna lo kɛnɛ kendana l’ɔkɛndɛ ɔsɔ. Dui sɔ nembetshiyaka monga suke dia kotshaka ehomba wa l’emunyi ndo nɔmbɔlaka nkumbo kande l’awui wa lo nyuma.—10/15, lɛkɛ 12.
• Lande na kele hasungana mbɔsa Ɛmɛnyi wa Jehowa oko yaato y’ɔtɛmwɛlɔ w’aseka Asɔnyi?
Ɔtɛmwɛlɔ w’aseka Asɔnyi wakatatɛ lo Europe lo ntambe 16 etena kakadje anto welo dia ntshikitanya wetshelo wa l’ɔtɛmwɛlɔ w’aseka Mupɛ wa l’Ɔrɔma. Tshɛkɛta aseka Asɔnyi mendanaka la wanɛ wetawɔ wetshelo w’aseka Mupɛ wakayotshikitanyemaka. Ɛmɛnyi wa Jehowa hawetawɔ kanyi y’ɔnɛ Papa ekɔ la lowandji laheme lâdiko di’anto tshɛ ndo vɔ mbɔsaka dia Bible mboleki abuku akina tshɛ. Lâdiko dia lâsɔ, vɔ tonaka wetshelo ndo mbekelo yahɔtɔnɛ l’Afundelo yambokokanɛ l’ɛtɛmwɛlɔ w’aseka Asɔnyi.—11/1, lɛkɛ 19, lo Falase.
• Onde dia nshihodia Bible paka onto mbêki Hɛbɛru la Grɛkɛ?
Kema. Aha paka onto mbêyi ɛtɛkɛta w’edjedja ɛsɔ ko nde nshihodia losango la lo Bible. Onto lakeke ɛtɛkɛta ɛsɔ mongaka nto l’ohomba wa nkamba la diksiɔnɛrɛ ndo l’abuku wa gramatika. Woho wele Jehowa akasale dia ɛtɛkɛta w’Okambi ande woleki woke mombama paka lo efundelo wakakadimɔma mɛnyaka dia onto kokaka nkamba l’akambo wa mɛtɛ ndo mbaeka oma lo dikadimwelo dia Bible diambokadimɔma l’ɛtɛkɛta watɛkɛtama nshi nyɛ.—11/1, lɛkɛ 20-23, lo Falase.
• Ngande wakatosha Jehowa nde la Yeso ɛnyɛlɔ ka dimɛna lo kɛnɛ kendana la mbekelo y’ɛlɔlɔ?
Kânga mbele Jehowa ekɔ lo dihole dia lâdiko, nde salɛka anto akambo la lɔsɛngɔ ndo la dilɛmiɛlɔ di’efula. Etena kakandatɛkɛtaka la Abarahama ndo la Mɔsɛ, Jehowa akakambe la tshɛkɛta ya lo Hɛbɛru yakadimɔma tena efula ɔnɛ ‘lam’alangayɛ.’ (Etat. 13:14; Etum. 4:6) Ndo nto, Nzambi mpokamɛka anto. (Etat. 18:23-32) Yeso nde lawɔ akasale ngasɔ, nde aki suke ndo akalangaka nkimanyiya wanɛ waki suke la nde ndo mbala efula nde akawaelɛka lo nkombo yawɔ.—11/15, lɛkɛ 25.
• Lande na kele Akristo wa mɛtɛ hawosale difɛstɔ dia Bɔnane?
Difɛstɔ dia Bɔnane diekɔ dui di’ohomba efula lo alamanaka w’ase Asiya. Mbala efula, difɛstɔ sɔ diekɔ diaaso dimɔtshi dia nkombolɛ anto lokolo l’ɔlɔlɔ ndo mɛnya dilɛmiɛlɔ diele la wɔ otsha le nyuma ya kɔlɔ. Akristo nɛmiyaka ambutshi awɔ, koko vɔ hawosale afɛstɔ wâkimanyiya dia vɔ monga la diɔtɔnganelo la watshɛwɔ wakavu dia nkondja ekokelo kana nyanga dia mbetawɔma oma le tonzambizambi tawɔ.—12/1, lɛkɛ 20-23, lo Falase.