Ambola w’oma le ambadi

Wetshelo akɔna wakondjaso oma lo Tukedi 24:27?

Lo ndaka ɔlɔngɔ a pami ɔmɔtshi, ofundji wa Tukedi akate ate: “Olongosole ulimu aye wa l’andja, utshi ulimu w’ekambo kaye. Ku l’okongo diku, kuyuhiki luudu laye.” Dikambo diakɔna di’ohomba diele lo yokedi yakasambiyama nyɛ? Ɔlɔngɔ a pami ɔsɔ pombaka tayalɔngɔsɔdi dimɛna la ntondo ka nde ndjotshuka ndo ndjokenga nkumbo kande hita, êya ɛkɛndɛ wokakatanyi la dikambo sɔ.

Lo nshi yakete, divɛsa nɛ diakalembetshiyamaka mbala mɔtshi ɔnɛ omi kana papa ka nkumbo hahombe tsho mbidja yimba l’olimu ande wa l’emunyi, koko nde pombaka ndo keketsha nkumbo kande, ɛnyɛlɔ l’ekimanyielo ka wetshelo wa lo nyuma. Kânga mbele kanyi shɔ yekɔ mɛtɛ ndo tomba oma l’Afundelo, mɛnamaka diaha yɔ mbele dikambo dioleki ohomba lo divɛsa nɛ. Lande na kataso ngasɔ? Tɔsɛdingole ɛkɔkɔ ehende ɛnɛ.

Ɔkɔkɔ wa ntondo, divɛsa nɛ hatɛkɛta dikambo dia mpika la kanyi ya keketsha nkumbo kamboshilaka la kengama. Koko kanyi yele lanɛ ele ya mpika luudu lo yoho ya mɛtɛ mɛtɛ. Tshɛkɛta yokadimɔmi ɔnɛ “mpika” kokaka kambema olimu ndo lo yoho ya didjidji yalembetshiya kenga nkumbo, mbuta ate tshuka ndo mbota ana.

Ɔkɔkɔ wa hende, divɛsa nɛ mbikaka epole ɔsɛkɛ lo woho wahomba akambo salema l’ɔnɔngɔ ndo ekɔ oko diɔ mbutaka ɔnɛ: “Tasadi dikambo nɛ ntondo, kele koyosale dikambo kapanda l’ɔkɔngɔ.” Ko lâsɔ, onde yokedi nyɛ totɛka dia sho pombaka mbetsha ɛkɛndɛ wa l’emunyi la ntondo k’ɛkɛndɛ wa lo nyuma? Kema!

Lo nshi yakafundamaka Bible, naka onto ambolanga ‘mpika luudu lande’ kana kenga nkumbo, nde akahombaka ndjambola ɔnɛ: ‘Onde laya suke dia kotsha ehomba wa wadɛmi ndo mbosukɛ nde l’ana wakokaso ndjota?’ La ntondo ka kenga nkumbo, nde aki l’olimu wa kamba, mbuta ate olimu wa dikambɔ. Diakɔ diele ekadimwelo kɛmɔtshi ka Bible (Today’s English Version) kadimolaka divɛsa nɛ ɔnɛ: “Tokake luudu layɛ ndo tokengake nkumbo kayɛ naka ekambɔ kayɛ katɛlɛ, ko wɛ ayoyashikikɛ dia wɛ ayokoka kondja kɛnɛ ka ndjasɛnya.” Onde sho kokaka kamba la tɔndɔ diakɔ diâmɛ nɛ ndo nshi nyɛ?

Eelo. Pami kakombola tshuka pombaka ndjalɔngɔsɔla dimɛna lo kɛnɛ kendana l’ɔkɛndɛ ɔsɔ. Naka nde ekɔ la wolo wa demba, kete nde ayonga l’olimu wa kamba. Lo mɛtɛ, olimu wa l’etete wakamba pami hahombe mendana tsho l’okotshelo w’ehomba wa l’emunyi. Ɔtɛkɛta waki Nzambi mɛnyaka dia pami kahakotsha ehomba wa l’emunyi, wa longandji ndo wa lo nyuma wa nkumbo kande, amboleka opanganu kɔlɔ. (1 Tim. 5:8) Ɔnkɔnɛ, etena kayalɔngɔsɔlande dia ndjotshuka ndo ndjokenga nkumbo, ɔlɔngɔ a pami pombaka ndjaoka ambola wele oko: ‘Onde lamboyalɔngɔsɔla dimɛna dia ndjokotshaka ehomba wa l’emunyi wa nkumbo kami? Onde lekɔ suke dia ndjɔlɔmbɔlaka nkumbo kami l’awui wa lo nyuma? Onde layokotshaka ɔkɛndɛ wa nɔmbɔlaka wekelo wa Bible wa mbala la mbala kâmɛ la wadɛmi ndo l’anami? Ɔtɛkɛta waki Nzambi mbikaka epole ɔsɛkɛ l’ɛkɛndɛ w’ohomba ɛsɔ.​—Euh. 6:6-8; Ef. 6:4.

Ɔnkɔnɛ, ɔlɔngɔ a pami wayanga wadi pombaka kana yimba dimɛna lo kɛnɛ kendana la tɔndɔ dia lo Tukedi 24:27. Woho akɔ wâmɛ mbele, osekaseka walanga tshukama pombaka ndjambola dia kana nde amboyalɔngɔsɔla dia ndjɛmba ɛkɛndɛ wa wadi ndo wa mama ka nkumbo. Elonganyi weke katshukana kokaka ndjambola ambola wa woho akɔ wâmɛ etena kakanawɔ yimba dikambo dia ɔkɛndɛ wa mbodia ana. (Luka 14:28) Nsɛna lo yoho yɔtɔnɛ l’ɛlɔmbwɛlɔ kakasambiyama kɛsɔ kokaka kimanyiya ekambi waki Nzambi dia mbewɔ ekakatanu efula ndo monga la lɔsɛnɔ la nkumbo l’ɔngɛnɔngɛnɔ.

[Efundelo wa l’etei w’odingɔ wa lo lɛkɛ 12]

Ambola akɔna wendana la diwala wahomba ɔlɔngɔ a pami ndjaoka?