Awui wa kɔlɔ wayokomɛ

NZAMBI akatosha Ɔtɛkɛta ande wakasambiyama watɛnya bonde kasala anto awui wa kɔlɔ. Ndo nto, nde akatosha lotshungɔ la nsɔna ndo dionga dia ndjakimɛ dia sho ntona dia nsala awui wa kɔlɔ. (Euhwelu k’Elembe 30:15, 16, 19) Dihomɔ diakandatosha sɔ tokimanyiyaka dia sho mbishola mbekelo ya kɔlɔ tshɛ yakoka monga la so ndo nsala kɛnɛ kahombama dia ndjinya. Dia sho nkomiya, naka sho ntona dia nsala awui wa kɔlɔ, kete shoamɛ tayɔngɛnangɛna ndo tayɔngɛnyangɛnya anto akina.​—Osambu 1:1.

Koko, oyadi welo akɔna wakoka ɔmɔmɔ la l’atei aso mbidja diaha nsala awui wa kɔlɔ, anto wa l’andja ɔnɛ wekɔ lo ntetemala mbasala. Bible tɔhɛmɔlaka ɔnɛ: “Eyi wati: Lu nshi y’ekumelu, tena dia wulu diayuyala.” Dia mɛnya kɛnɛ kakonya tena diasɛnaso nɛ “tena dia wulu,” tɔ kotshaka ɔnɛ: “Antu wayuyalanga, wayulanga ukundji, wayosema, wayutakula, wayotengana, wayutuna aui w’ambutshi, hawukana lusaka, waha ololo. Vo wayuyala waha la ngandji ka mete, akanga w’ududu, amamanyishi, wahayakimela, akanga w’usihi, atunyi w’akambu w’ololo. Vo wayuyala afungi, akanga a puki, akanga a ndjambiya, anangi wa engenongeno, wuleki wa [Nzambi]. Vo wayuyala l’efanelu ka ololo a [Nzambi], keli wayutuna wulu andi. Umo l’atei w’antu aso.”​—2 Timote 3:1-5.

Ondo wɛ akɛnyi etelo k’ɔnɛ “nshi y’ekumelu” kofundami lo prɔfɛsiya kele la diko kengo. Etelo kɛsɔ alembetshiyatɔ le yɛ? Oko wadita anto efula, etelo k’ɔnɛ “nshi y’ekumelu” mɛnyaka dia dikambo dimɔtshi diayanga komɛ. Naa dikambo diakɔ? Ɛsɔ tende kɛnɛ kakalake Nzambi l’Ɔtɛkɛta ande.

Anto wa kɔlɔ tshɛ wayonyɛma.

“Etenyi ka tshitshe ketu, k’untu a kolo hatanema ntu. Kuyanga ayushishima lu dihuli diandi, ndi henama ntu. Keli akanga a memakana wayukita kete, ndu wayongenangena la etshoko efula wa ki.”​—OSAMBU 37:10, 11.

“[Jehowa] atulamaka wane tshe watuwukaka ngandji, keli ndi ayulanya antu wa kolo tshe.”​—OSAMBU 145:20.

Wɛngiya hawotonga nto.

“Ndi kameli uhumbi lam’awulelelandi, ndu usi wula laha la ukimanyidi pupu. Ndi katshunguli nyumu yawo uma le akang’a lukesu la wa ngala. Dikila diawo diayuyala ushinga a wulu lu ashu andi.”​—OSAMBU 72:12, 14.

“Ditungatunga diayutshungwama uma lu lohombo la ehondelo, dia mboto lu ndjadjasela ka lutumbu la ana a [Nzambi].”​—ROMO 8:21.

Ehomba w’anto wa l’emunyi wayokotshama.

“Keli vo wayudjase, untu l’untu la tshina di’okodi andi wa vinyo, ndu la tshina dia utamba andi wa fingu. Ku nduku untu ayuwautsha woma.”​—MIKA 4:4.

“Vo wayuhika mvudu, wayudjaseka loko; wayune dikambo di’elua, wayolekaka elua w’uma loko. Vo hawuhika mvudu, ku akina ndjudjase loko. Vo hawukamba dikambo di’elua, ku akina ndjole elua uma loko. Nshi y’antu ami yayuyala uku nshi y’etamba. Esonami ami wayongenangena ne dia elimu w’anya awo.”​—ISAYA 65:21, 22.

Losembwe layonga lo nkɛtɛ k’otondo.

“Ku [Nzambi] hasombweya esonami andi watûlelelaka ndu la yanyi ndu l’utshu, ndi atâkungiyaka edja uka? Dimi lambunyutela nti: Ndi ayâsombweya esadi.”​—LUKA 18:7, 8.

“[Jehowa] atulangaka [losembwe]. Ndi hatosekaka ekilami andi. Antu w’ololo watulamemaka pundju.”​—OSAMBU 37:28.

‘Anto wa la nkɛtɛ wayeka dia monga la losembwe.’​—ISAYA 26:9.

“Keli ne dia daka diandi, mbalungamelasu ulungu w’uyuyu la kete y’uyuyu, lene udjashi [losembwe].”​—2 PETERO 3:13.

Anto wekɔ lo nsala etshikitanu

Aha la tâmu, alaka wele la diko ango ngɛnyangɛnyaka onto tshɛ la l’atei aso. Ko, kakɔna katoshikikɛ dia vɔ wayokotshama? Lo mɛtɛ, tekɔ la djembetelo yɛnya dia alaka waki Nzambi wayokotshama. Naa djembetelo yakɔ? Ele woho wambotondoya miliyɔ y’anto wa l’andja w’otondo ɛlɔ kɛnɛ dia ntshika dia monga la lokaki, ndjasha l’awui wa mindo kana wa ngala ko monga anto w’ɛlɔlɔ, wele la losembwe ndo la wɔladi. Ɛlɔ kɛnɛ, Ɛmɛnyi wa Jehowa ndekana miliyɔ esambele wakenga nkumbo k’anto l’ɔnango ka l’andja w’otondo bu la diatɔnelo diendana la nkoho y’alemba, waoho, ngandji ka wodja, awui wa pɔlitikɛ ndo ekondjelo diambokonya anto efula dia vɔ petshana, ndjasha l’awui wa ngala ndo ndjakana l’ɔkɔndɔ w’ana w’anto.a Woho wasalema etshikitanu ɛsɔ ɛlɔ kɛnɛ toshikikɛka dia alaka waki Nzambi wayokotshama lo yɛdikɔ ya woke.

Ko, kakɔna kakonya anto dia nsala etshikitanu ɛsɔ? Sho tanaka okadimwelo lo daka dikina dia lo Bible diakafunde ɔprɔfɛta Isaya ɔnɛ:

“Laundu ayudjase kame la on’okoko. Koi la ona mbudi wayetama kame. Osongo wa ngombe, tambwe, la elungalunga ka wata wayuyala kame, ku kiendakenda ayuyilombola. . . . Tambwe ayole nengese uku ngombe. Ona laloma ayokenya lasuki la ushu wa tshula. Ona lambukila awele ayudja lunya landi lu difuku dia dikhuha. Vo hawuhumuya kuyanga nanya ukungu ami w’ekila tshe, ne dia kete ayulula la ewu ka [Jehowa], uku atululaka ashi a waki.”​—Isaya 11:6-9.

Onde prɔfɛsiya kɛnɛ kekɔ lo ntɛkɛta tsho di’etena kayɔsɛna nyama lo kâmɛ vɔ l’anto? Ndooko. Lembetɛ dia etenyi k’ekomelo ka divɛsa 9 mɛnyaka kɛnɛ kakonya dia etshikitanu wa ngasɔ salema lo mbuta ɔnɛ: “Kete ayulula la ewu ka [Jehowa].” Onde ewo ka Nzambi tshikitanyaka dionga dia waa nyama? Ndooko. Koko, tɔ tshikitanyaka waonga w’anto. Prɔfɛsiya kɛnɛ mbutaka dia wanɛ wele ondo waki la waonga wafɔna la waonga wa nyama wayowatshika ko monga la lonto lafɔna la lonto la Kristo nɛ dia vɔ wayeka kɛnɛ ketsha Bible ndo wayokamba la tɔ.

Tɔshi ɛnyɛlɔ ka Pedro.b Nde akɔsaka dia woho wakandetawɔ dia nkamba l’okongamelo wa waa terɔristɛ aki dia mamɛ losembwe. L’ɔkɔngɔ wa vɔ mbolowanya, wakɔlɔmbɛ dia nde tokanda bɔmbɛ lo mpango kɛmɔtshi k’apulushi. Wakawonde l’etena kakandayalɔngɔsɔlaka dia tosala dikambo sɔ. Pedro aketsha ngɔndɔ 18 lo lokanu ndo nde akatetemalaka ndjasha l’awui ande wa terɔrismɛ. L’etena kɛsɔ, wadi aki Pedro akatatɛ mbeka Bible kâmɛ l’Ɛmɛnyi wa Jehowa. Lam’akandatombe oma lo lokanu, Pedro nde lawɔ akatatɛ mbeka Bible ndo kɛnɛ kakandeke lo dikambo dia Jehowa Nzambi kakotshutshuya dia nsala etshikitanu wa weke lo lɔkɛwɔ lande ndo lo woho wakandɔsaka lɔsɛnɔ. Pedro akayota ate: “Lambokaloya Jehowa losaka lo woho wakimi kondjaka ndoko onto l’edja k’ɛnɔnyi wakamakambaka oko terɔristɛ. Lôkamba la yɔɔmbɔ ya nyuma ka Nzambi yele Ɔtɛkɛta wa Nzambi dia mbewoya anto losango la wɔladi wa mɛtɛ ndo losembwe, mbuta ate lokumu l’ɔlɔlɔ la Diolelo dia Nzambi.” Pedro akatembola mpango k’apulushi kakandalange tokanda bɔmbɛ dia mbasambisha losango la wɔladi lendana l’andja wele bu l’awui wa ngala.

Shɛngiya ya wolo yakoka monga la Ɔtɛkɛta wa Nzambi lo nsɛnɔ y’anto toshaka ɛkɔkɔ w’eshika wa monga la mbetawɔ lo daka dia Nzambi di’ɔnɛ awui wa kɔlɔ wayokomɛ. Eelo, anto hawotosalaka awui wa kɔlɔ pondjo pondjo, koko wayokoma anto w’ɛlɔlɔ. Kem’edja nto, Jehowa ayanga minya ɔmpɔhɔdi w’awui wa kɔlɔ, mbuta ate Satana Diabolo, ɔnɛ lalɔmbɔla awui wa la nkɛtɛ. Bible mbutaka ɔnɛ: “Wa la kete tshe weko lu wulu wa kanga kolo.” (1 Joani 5:19) Kem’edja, nde ayowolanya. Wanɛ watshininala l’awui wa kɔlɔ vɔ lawɔ wayolanyema. Ayonga mɛtɛ dui di’ɔngɛnɔngɛnɔ efula dia sho nsɛna l’etena kɛsɔ.

Kakɔna kahombaso nsala dia sho ndjɔsɛna lo nshi yayaye shɔ? Tatohɛke dia “ewu ka [Jehowa]” mbasala di’anto nsala etshikitanu ɛlɔ kɛnɛ ndo tɔ mbayosala di’etshikitanu salema l’andja w’otondo lo nshi yayaye yaya ka suke. L’ɛnyɛlɔ ka Pedro, naka wɛ nkondja ewo k’oshika ka lo Bible ndo nkamba la tɔ, kete wɛ lawɔ kokaka nongamɛ dia ndjɔsɛna l’andja ‘wayonga losembwe.’ (2 Petero 3:13) Ɔnkɔnɛ, tambokɔlɔmba dia wɛ nkamba la diaaso diele la yɛ dia mbeka dia mbeya Nzambi ndo Yeso Kristo nɛ dia dui sɔ kokaka kosha diaaso dia nkondja lɔsɛnɔ la pondjo.—Joani 17:3.

[Nɔtɛ ya l’ɛse ka dikatshi]

[Efundelo wa l’etei w’odingɔ wa lo lɛkɛ 9]

Wɛ lawɔ kokaka nongamɛ dia ndjɔsɛna l’andja ‘wayonga losembwe.​—2 PETERO 3:13