Ambola w’oma le ambadi aso . . .

Onde nkɛtɛ kayolanyema lo 2012?

▪ “Nyemba ya wanɛ wetawɔ dia elanyelo ka tshɛ kayanga salema wekɔ lo pongomɔ otsha lo ngielongelo mɔtshi ya lo wodja wa France . . . Vɔ mbetawɔka dia nkɛtɛ kayolanyema lo Ngɔndɔ ka dikumi l’ahende 21, 2012 nɛ dia datɛ sɔ mbayonga ekomelo k’ɛnɔnyi 5 125 lo ndjela alamanaka w’edjedja wa waa Maya.”—BBC News.

Kânga mbele ewandji w’ɛtɛmwɛlɔ, ambewi wa siansɛ ndo anto akina wasɛna lo ntambe 21 wata akambo wayosalema lo nshi yayaye mbutɛka anto ɔnɛ nkɛtɛ kayolanyema, teye dia nkɛtɛ kayotshikala pondjo pondjo. Lo mɛtɛ, nkɛtɛ hatolanyema lo 2012. Kɛnɛ kele mɛtɛ ele okama wa nkɛtɛ hawotolanyema l’ɔnɔnyi ɔsɔ kana l’ɛnɔnyi ekina wayela.

Bible totɛka ɔnɛ: “Lolonga lomotshi latetaka, lukina latuyakaka, ku kete yatutshikalaka pundju.” (Undaki 1:4) Tende nto kɛnɛ kata Isaya 45:18: “Okone mbata [Jehowa], lakatungi . . . kete, ndu lakayitshi (ndi kakayishikike; ndi kuyitunga utungatunga, keli akayitungi dia antu mbidjase loko!) kata ati: dimi keli [Jehowa], nduku ukina.”

Onde papa koka ɔnande la pami ngandji kokaka mbetsha wenya efula dia mbosalɛ waato wa dimɛna kana nsalɛ ɔnande la womoto luudu la dimɛna loludi tɔɔ la diangɔ di’ɔngɛnyangɛnya ko nde ndjodilanya paka yema tshitshɛ l’ɔkɔngɔ wa nde mboshadiɔ? Ɔsɔ ayonga dui dia kɔlɔ efula! Woho akɔ wâmɛ mbele, Nzambi akatonge nkɛtɛ ntondotondo di’anto wakandatonge ngɛnangɛnaka lɔkɔ. Nzambi akatɛ atshukanyi wa ntondo, Adama la Eva ate: “Nyuyali la diwutshi, nyufulaneli, nyuludia kete, nyuyûleli.” Ndo l’ɔkɔngɔ diko “[Nzambi] akenyi kene tshe kakandatungi ati: Ukuku kawo.” (Etatelu 1:27, 28, 31) Nzambi atatshikitanya sangwelo diande lo dikambo dia nkɛtɛ; nde hetawɔki dia nkɛtɛ ndanyema. Lo kɛnɛ kendana la dui tshɛ diatomba l’onyɔ ande, Jehowa shikikɛka ɔnɛ: “Dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”—Isaya 55:11.

Koko, lolango laki Jehowa ekɔ “dia nanya wane watulanyaka kete.” (Enyelo 11:18) Nde tolakaka l’Ɔtɛkɛta ande ɔnɛ: “Antu w’uluwanyi wayukita kete, antu w’usimbwi wayutshikala loko. Keli antu wa kolo wayunyema uma la kete, akanga w’ukadi wayukhundwama uma loko.”—Tukedi 2:21, 22.

Etena kakɔna kayosalema dikambo sɔ? Ndoko onto leya. Yeso akate ate: “Nduku untu leya lushi kana ushidi ako, kuyanga andjelo wa l’ulungu, kuyanga Ona, paka Papa ndame.” (Mako 13:32) Ɛmɛnyi wa Jehowa hawewoya etena shikaa kayolanya Nzambi anto wa kɔlɔ. Koko, kânga mbasɛdingolawɔ “djimbitelu” ya nshi y’ekomelo ndo mbetawɔwɔ di’anto wekɔ lo nsɛna l’etena kelɛ Bible ɔnɛ “nshi y’ekumelu,” vɔ haweye etena shikaa kayoya “ekumelu.” (Mako 13:4-8, 33; 2 Timote 3:1) Vɔ shihodiaka dia Shɛwɔ lele l’olongo nde la Ɔnande mbêya etena kayosalema dikambo sɔ.

L’etena kɛnɛ, Ɛmɛnyi wa Jehowa ndjashaka tshɛ dia nsambisha lokumu l’ɔlɔlɔ la Diolelo diaki Nzambi, lowandji la l’olongo lôlɛ ndo layoyokadimola Nkɛtɛ k’otondo Paradiso ka wɔladi, mbuta ate ‘anto w’ɔlɔlɔ wayokita nkɛtɛ ndo wayodjasɛka lɔkɔ pondjo.’—Osambu 37:29.

[Efundelo wɛnya kanga osato wa lo lɛkɛ 12]

Image Science and Analysis Laboratory, NASA-Johnson Space Center