Wekelo 5

Asangoya Nzambi lo Dikambo dia Nkɛtɛ?

Lande na kakatonge Jehowa nkɛtɛ? (1, 2)

Lande na kele nkɛtɛ kema paradiso ɛlɔ kɛnɛ? (3)

Kakɔna kayokomɛ anto wa kɔlɔ? (4)

Lo nshi yayaye, Yeso ayondosalɛ akanga wa hemɔ? esombe? anto wambovɔ? (5, 6)

Kakɔna kahombayɛ sala dia wɛ kondja ɛtshɔkɔ lo nshi yayaye na? (7)

1. Jehowa akatonge nkɛtɛ kɛnɛ di’anto ngɛnangɛna la lɔsɛnɔ lɔkɔ pondjo pondjo. Nde akalange di’anto w’ɛlɔlɔ, ndo wele l’ɔngɛnɔngɛnɔ mbidjasɛka lɔkɔ nshi tshɛ. (Osambu 115:16; Isaya 45:18) Nkɛtɛ halanyemaki pondjo; tɔ kayotshikala pondjo pondjo.​—Osambu 104:5; Undaki 1:4.

2. La ntondo ka Nzambi tonga onto, nde akasɔnɛ lɛtshi lɔmɔtshi la tshitshɛ la nkɛtɛ ko akalietɛ paradiso ka dimɛna efula. Nde akalielɛ ekambɔ k’Ɛdɛna. Lanɛ la nkɛtɛ mbakandakitsha Adama l’Eva, pami la omoto la ntondo. Nzambi akawadjangɛ dia vɔ mbota ana ndo ndodja nkɛtɛ k’otondo. Yema yema, vɔ wotohomba kadimola nkɛtɛ k’otondo paradiso.​—Etatelu 1:28; 2:8, 15.

3. Adama l’Eva wakatshe pɛkato lam’akawahindola ɔlɛmbɛ wa Nzambi l’okonda. Omalɔkɔ, Jehowa akawatshanya oma l’ekambɔ k’Ɛdɛna. Paradiso kakashishɔ. (Etatelu 3:1-6, 23) Koko Jehowa kombohɛ sangwelo diande di’endana la nkɛtɛ kɛnɛ. Nde ekɔ lo ndaka dia kikadimola paradiso, lɛnɛ ayodjasɛ anto pondjo pondjo. Woho akɔna wayondotsha dikambo sɔ na?​—Esambu 37:29.

4. La ntondo ka nkɛtɛ kɛnɛ kadimɔ paradiso, anto wa kɔlɔ pombaka shilama oshiki. (Osambu 37:38) Dui sɔ diayokotshama l’Armagɛdɔ, mbuta ate: ta dia Nzambi dia kumiya akambo wa kɔlɔ. Oma lâsɔ Satana ayoyodjama lo lokanu ɛnɔnyi 1 000. Dikambo sɔ nembetshiyaka ɔnɛ ndoko onto la kɔlɔ layotshikala dia nanyaka nkɛtɛ nto. Paka anto wa Nzambi ato mbayoka.​—Enyelo 16:14, 16; 20:1-3.

5. L’etena kɛsɔ mbayolɛ Yeso Kristo nkɛtɛ kɛnɛ oko Nkumekanga l’edja k’ɛnɔnyi 1 000. (Enyelo 20:⁠6) Nde ayoshidiya pɛkato yema yema oma lo timba taso ndo oma l’alemba aso. Tayokoma anto wa kokele oko waki Adama l’Eva la ntondo ka vɔ ntsha pɛkato. L’etena kɛsɔ, hemɔ hatoyala nto, lotshundu, ndo nyɔi. Ase hemɔ wayɔkɔlɔngana ndo esombe wayokalola ɛlɔngɔlɔngɔ nto.​—⁠Jobo 33:25; Isaya 33:24; Enyelo 21:3, 4.

6. L’edja ka Diolelo diaki Yeso di’Ɛnɔnyi Kinunu, akanga wa kɔlamelo wayokamba kâmɛ dia kadimola nkɛtɛ paradiso. (Luka 23:43) Ndo nto, miliyɔ y’anto yakavu yayolwama dia ndjɔsɛna la nkɛtɛ. (Etsha 24:15) Naka vɔ sala kɛnɛ kâlɔmba Nzambi, kete vɔ wayotetemala la nsɛna pondjo pondjo la nkɛtɛ. Naka aha ɔsɔku, kete vɔ wayodiakema pondjo pondjo.​—Joani 5:28, 29; Enyelo 20:11-15.

7. Ɔsɔku mbayokotshama sangwelo diaki Nzambi di’endana la nkɛtɛ. Onde ndo wɛ lawɔ kombolaka ndjokondja ɛtshɔkɔ wa lo nshi yayaye shɔ oka? Naka ɔsɔku, kete wɛ pombaka tetemala mbeka awui wa Jehowa ndo kitanyiya adjango ande. Wɔ̂twɛlɔ wa lo nsanganya lo Mbalasa ka Diolelo k’Ɛmɛnyi wa Jehowa kele lo ngelo kanyu kana kodjashiyɛ ayokokimanyiya dia wɛ sala ɔsɔku.​—Isaya 11:9; Heberu 10:24, 25.

[Diombwɛlo di’osato wa lo lɛkɛ 10]

Paradiso kakashishɔ

[Diombwɛlo di’osato wa lo lɛkɛ 11]

L’ɔkɔngɔ w’Armagɛdɔ, nkɛtɛ kayokadimɔ paradiso