Wakayakimɔ la lolango dia tokimanyiya la Brésil
AMBETA ɛnɔnyi ɛmɔtshi wele kadiyɛso Rúbia 1) lele l’ɛnɔnyi 30 akatshu dia tenda Sandra 2) kadiyɛso kele ombatshi mboka l’etshumanelo kɛmɔtshi ka tshitshɛ ka lo sidɛ ka Brésil. Etena kakinde lɛkɔ, dui dimɔtshi diakatombe diakâmbiya Rúbia ndo diakatshikitanya lɔsɛnɔ lande. Na dui diakɔ? Nyɛsɔ tohokame kɛnɛ katotɛ Rúbia ndamɛ.
“DUI SƆ DIAKAMAMBIYA EFULA”
“Lushi lɔmɔtshi, takatshu dimi la Sandra dia teka Bible l’ombeki ande ɔmɔtshi wa womoto. Etena kakatawetshaka, womoto akɔ akate mbala kakɔ ɔtɔi ate: ‘Sandra, esekaseka esato wele lo dihole diakambami olimu lɛnɛ wekɔ lo nkombola dia mbeka Bible, koko lakawatɛ dia vɔ nkonga mbala kawɔ. Dimi mbeyaka dia wɛ ekɔ l’akambo efula wa nsala ɔnɔnyi ɔnɛ.’ Dui sɔ diakamambiya efula. Anto efula wakalangaka mbeya Jehowa wakatatɛ kongami dia dimi mbeka la wɔ. Lo etshumanelo kakimi ntondo, laki l’okakatanu dia nkondja kânga ombeki ɔtɔi wa Bible. Ntatɛ oma ko lushi lakatekaka la womoto ɔsɔ Bible, lakonge la nsaki k’efula ka nkimanyiya anto waki l’osomba wa tshitshɛ ɔsɔ. Kombeta edja, lakɔshi yɛdikɔ ya mimɔ oma l’osomba wa woke wakamadjasɛka ko ntshɔ l’osomba wa tshitshɛ wakakambaka Sandra oko ombatshi mboka.”
Ngande wakatongaka akambo lɛnɛ akonɔ Rúbia? Nde mbutaka ate: “Ngɔndɔ hiende tsho l’ɔkɔngɔ wa dimi monɔ lanɛ, lakatatɛ nɔmbɔla ambeki wa Bible 15. L’ɛnyɛlɔ ka Sandra, dimi lawɔ lakonge l’ambeki wakatatɛ kongami dia mbeka Bible.”
NDE AKƆSHI YƐDIKƆ YA NYOMOLEKA NDJASHA L’ESAMBISHELO
Ɔnangɛso Diego 3) leke kodikotshaka ɛnɔnyi 20 l’ɛmɔtshi akatshu dia tenda atshukanyi amɔtshi wele ambatshi mboka wakamba la Prudentópolis, osomba wa tshitshɛ wele lo sidɛ ka Brésil. Etena kakinde lɛkɔ, nde akambiyama polo ndo lo ndjɔsa yɛdikɔ ya nyomoleka ndjasha l’esambishelo. Nde mbutaka ate: “Aya edja efula kemi l’etshumanelo kaso, koko dimi sambishaka paka wenya engana eto lo ngɔndɔ. Koko etena kakamatshu dia tembola atshukanyi waki ambatshi mboka asɔ ndo kakawambutɛ ɛtshɔkɔ wambowokondja l’olimu awɔ, kɛnɛ kakamakoke nsala ele mbɛdika ɔngɛnɔngɛnɔ waki la wɔ la woho wakimi komongaka l’ɔngɛnɔngɛnɔ l’olimu w’esambishelo. Etena kakamɛnyi woho wakiwɔ l’ɔngɛnɔngɛnɔ, lakakombola dia monga la lɔsɛnɔ lele l’oyango oko vɔ.” Kam’akakalola Diego oma la tenda atshukanyi asɔ, nde akatatɛ nkamba olimu w’ombatshi mboka.
L’ɛnyɛlɔ ka Diego, onde wɛ ekɔ Ɔmɛnyi wa Jehowa wasambisha dimɛna ndo wɔtɔ nsanganya y’Akristo, koko wɔsa di’olimu w’esambishelo wekɔ ɔkɛndɛ wa wotsho wahakosha ɔngɛnɔngɛnɔ? Naka ngasɔ, onde wɛ hakoke nsala etshikitanu wayokokimanyiya dia wɛ monga l’ɔngɛnɔngɛnɔ wa ntshɔ dia tokamba lɛnɛ ewɔ l’ohomba efula w’apandjudi wa Diolelo? Ondo wɛ mbeyaka monga l’okakatanu dia mbetɛ lɔsɛnɔ layɛ ɔsɛlɛngɛ. Koko ɛlɔngɔlɔngɔ l’esekaseka efula wakasale dui sɔ. Vɔ wakatshikitanya eyango awɔ ndo wakonge la nsaki ka kambɛ Jehowa lo yɛdikɔ y’efula. Tɔshi ɛnyɛlɔ kekina kaki Bruno.
OMPOMI WA MISHIKI KANA OSAMBISHA?
Ambeta ɛnɔnyi ɛmɔtshi wele Bruno 4) lele kakianɛ l’ɛnɔnyi 28, akɔtɔ lo kalasa kekawɔ dia monga ompomi wa mishiki wa manamana ndo nde aki l’oyango wa ndjonga ɔnɔmbɔdi w’akambo wa mishiki. Nde akatâhamaka efula ndo wakawelɛka mbala efula dia tohoma mishiki lo waaso amɔtshi wa lânde. Mɛnamaka dia nde otoyokoma ompomi wa mishiki wa lokumu efula. Nde mbutaka ate: “Kânga mbakidiɔ ngasɔ, lakayaokaka dia laki l’ohomba w’ɛngɔ kɛmɔtshi. Kânga mbakamayakimɔ le Jehowa, lakeyaka dia dimi kondjashaka tshɛ le nde ndo dui sɔ diakakiyanyaka. Ɔnkɔnɛ, lakatɛ Jehowa dui sɔ lo dɔmbɛlɔ ndo lakasawola l’anangɛso wambohokɔ akambo wa l’etshumanelo kaso. L’ɔkɔngɔ wa dimi nkana yimba la dui sɔ, lakɔshi yɛdikɔ ya mbetsha olimu w’esambishelo lo dihole dia ntondo, ntomba oma lo kalasa shɔ ndo ntshɔ dia tokimanyiya lɛnɛ ewɔ l’ohomba efula w’apandjudi wa Diolelo.” Ngande wakandatondoya yɛdikɔ yande shɔ?
Bruno akonɔ l’osomba wa Guapiara (wele l’anto oko 7000) ndo wanganyi l’osomba wa São Paulo kilɔmɛtrɛ oko 260. Ɔsɔ aki otshikitanu wa woke. Nde mbutaka ate: “Lakonɔ lo luudu la tshitshɛ laki komonga la frigo, televiziɔ kana Ɛtɛrnɛtɛ. Koko lokombo lakɔ laki la diangɔ dimɔtshi diakimi komonga la diɔ ntondo, diele oko jardɛ yaki la afuki, djɛsɛ ndo elowa.” Mbala kɛmɔtshi, Bruno akɔshi tapa diande ndo akadje mbo ya ndɛ, ashi wa nnɔ ndo ekanda walembetshiya Bible, akakeleka lo mututu ande ko akatshu dia tosambisha lo tongelongelo taki suke. Anto efula wa lo lɛkɛ lɔsɔ watasambishamaka ndoko lushi. Nde mbutaka ate: “Lakekaka Bible l’anto 18. Etshikitanu wakatasalaka ambeki akɔ akambisha ɔngɛnɔngɛnɔ w’efula. Paka l’etena kɛsɔ mbakamayosholaka ɛngɔ kakamahombaka lo lɔsɛnɔ, mbuta ate ɔngɛnɔngɛnɔ waya lo mbetsha wahɔ wa Diolelo lo dihole dia ntondo. Hafɔnya dia lotonga l’ɔngɛnɔngɛnɔ wele la mi kakianɛ otomowesa eyango wa lo demba.” Ko kakɔna kakasalaka Bruno dia ntana dikuta dia ndjakotshɛ ehomba ande etena kakinde la Guapiara? La yema y’ɔmɔnɔmɔnɔ, nde mbutaka ate: “Lo mbetsha anto woho wa mpoma ngidalɛ.” Lo yoho mɔtshi, nde aki paka ompomi wa mishiki.
“LAKAHOMBE PAKA NTSHIKALA”
Mariana 5) lele kakianɛ suke la nkotsha ɛnɔnyi 20 l’ɛmɔtshi akatanema la ntondo ka dikambo diele oko diaki Bruno. Nde aki avɔka, koko kânga mbakandakondjaka falanga efula l’olimu ande, nde komongaka l’ɔngɛnɔngɛnɔ wa mɛtɛ. Nde mbutaka ate: “Lakayaokaka oko ‘untu latatshanya lopepe.’” (Ond. 1:17) Anangɛso ndo akadiyɛso efula wakôkeketsha dia nde nkamba olimu w’ombatshi mboka. L’ɔkɔngɔ wa nde nkana yimba lo dikambo sɔ, Mariana kâmɛ l’angɛnyi ande Bianca 6), Caroline 7) ndo Juliana 8) wakɔshi yɛdikɔ ya ntshɔ dia tokimanyiya etshumanelo ka la Barra do Bugres kele suke la Bolivie, mangana la ngelo kawɔ nunu dia kilɔmɛtrɛ. Kakɔna kakatombe oma lâsɔ?
Mariana mbutaka ate: “Laki l’oyango wa ntshikala lɛkɔ l’edja ka ngɔndɔ shato tsho. Koko l’ekomelo k’etena kɛsɔ, laki l’ambeki wa Bible 15. Lam’ele ambeki efula waki l’ohomba w’ekimanyielo dia vɔ mpama lo nyuma, takimi la dihonga dia mbatɛ ɔnɛ lotakalola. Lakahombe paka ntshikala.” Kɛsɔ mbakasale akadiyɛso akɔ anɛi. Onde olimu w’ombatshi mboka wakatatɛ Mariana nkamba wakayôkonya dia nde ndeka monga la lɔsɛnɔ lele l’oyango? Nde mbutaka ate: “Jehowa mbakakambe la mi dia dimi nkimanyiya anto efula dia vɔ nsala etshikitanu lo nsɛnɔ yawɔ ndo dui sɔ diambombisha ɔngɛnɔngɛnɔ w’efula. Ekɔ tshondo y’ɔtshɔkɔ le mi dia mbeya ɔnɛ lôkamba nshi nyɛ la wenya ndo la wolo ami dia nsala dikambo dimɔtshi dioleki ohomba.” Caroline ekɔ lo nkɔndɔla lo tshena pe nsaki y’akadiyɛso anɛi asɔ ate: “Etena kakamalalaka, laki l’ɔngɛnɔngɛnɔ w’efula dia mbeya ɔnɛ wenya ami waketshi lo wahɔ wa Diolelo. Dimi lolekaka ndjasha kakianɛ dia nkimanyiya ambeki ami wa Bible. Ekɔ dui di’ɔngɛnɔngɛnɔ dia mɛna woho watawahame. Lamboshihodia mɛtɛ k’ɛtɛkɛta wayela ɛnɛ: ‘Nyunganeli, nyeyi nyati: [Jehowa] eli ololo.’”—Osa. 34:8.
Ande ɔngɛnɔngɛnɔ wahomba Jehowa monga la wɔ etena kɛnande woho watadɛ lofulo l’ɛlɔngɔlɔngɔ l’esekaseka wa l’andja w’otondo ‘wayakimɔ la lolango’ dia nsambisha lokumu l’ɔlɔlɔ la Diolelo lo wedja ekina lee! (Osa. 110:3; Tok. 27:11) Vɔ lawɔ kondjaka ɛtshɔkɔ wa Jehowa.—Tok. 10:22.
[Kiombo/Osato wa lo lɛkɛ 5]
“Sho kopomba ndoko ɛngɔ”
Etena kakɛnya João Paulo nde la Noemi ka wadɛnde nsaki ka tokimanyiya lɛnɛ ewɔ l’ohomba efula w’apandjudi, anto efula wakâkɔmɔla diaha vɔ ntshɔ. Anto amɔtshi wa l’etshumanelo kawɔ wakawatɛ ɔnɛ: “Naka nyu nsombɔ ko monɔ l’osomba wa tshitshɛ ɔsɔ, kete nyayotohomba kânga dikuta dia nsɛna. Lande na kalanganyu monɔ? Tekekɔ l’akambo efula wa nsala l’etshumanelo kaso.” João Paulo mbutaka ate: “Aki tshondo y’okakatanu le so dia mendjola alako asɔ nɛ dia takakɔmɔ.” Koko ɛlɔ kɛnɛ, l’ɔkɔngɔ wa vɔ ntshɔ dia tokamba lɛnɛ ewɔ l’ohomba efula w’apandjudi, João Paulo nde la Noemi wekɔ l’ɔngɛnɔngɛnɔ w’efula lo woho wakiwɔ kotshikitanya yɛdikɔ yawɔ ya ntshɔ dia tohamia olimu w’esambishelo. João Paulo mbutaka ate: “L’edja tshɛ kakimi dimi la wadɛmi lɛkɔ, sho kompomba ndoko ɛngɔ. Ndo etena kakiso mɛtɛ l’ohomba wa diangɔ, takadikondjaka efula oleki kânga woho wakiso la diɔ ntondo.” Noemi kotshaka ate: “Takahombe mbidja welo w’efula dia sho monɔ.”
Ekɔ tshondo y’okakatanu dia mbidjasɛ l’esomba wa totshitshɛ. Ko ngande wasala wanɛ wonɔ l’esomba ekina dia nkondja dikuta dia ndjasɛnya? Lo nsala dia nkondja djimulimu mɔtshi ya kambaka. Amɔtshi l’atei awɔ mbetshaka Angɛlɛ kana ɔtɛkɛta okina, talakanyaka ana la ngelo yawɔ, tatɛlanɛka ahɔndɔ kana takitanɛka mukubu lo mvudu kana weho ekina w’elimu. Ko kakɔna kata wanɛ watshɔ dia tokimanyiya l’ahole wewɔ l’ohomba w’apandjudi wa Diolelo? Vɔ mbetawɔka di’ɛtshɔkɔ wakondjawɔ ndekaka ndo ekakatanu wahomana la wɔ la fwa.
[Kiombo/Osato wa lo lɛkɛ 6]
Olengolengo waya lo mimɔ oma lo wodja wa lôtɔ
Tiago mbutaka ate: “Yema tshitshɛ l’ɔkɔngɔ wa dimi nkoma l’etshumanelo k’oyoyo, lakatatɛ monga l’olengolengo. Lɛkɔ, aki paka apandjudi yema tshitshɛ tsho ndo aki tshondo y’okakatanu dia ntana awui wa tɔkɛnyɔ. Lakatatɛ mpetsha wodja akɔ. Lakeyaka dia lakahombe nsala dikambo dimɔtshi diakakoke kimanyiyami dia ntana ɔngɛnɔngɛnɔ. Ɔnkɔnɛ, lakatatɛ nsala la wolo dia mbɔtɔnɛ l’anangɛso ndo akadiyɛso wa l’etshumanelo kakɔ ndo dui sɔ diakonge l’etombelo w’ɛlɔlɔ le mi. Lakonge l’angɛnyi akina ndo otshikitanyi la woho wakimi l’etatelo, lakayotatɛ monga l’ɔngɛnɔngɛnɔ wate kana lakaso mbemi.”
[Osato wa lo lɛkɛ 3]
Noemi nde la João Paulo la Ascurra, Santa Catarina
[Osato wa lo lɛkɛ 4]
[Osato wa lo lɛkɛ 4]
[Osato wa lo lɛkɛ 4]
[Osato wa lo lɛkɛ 5]
[Osato wa lo lɛkɛ 6]
[Osato wa lo lɛkɛ 6]
[Osato wa lo lɛkɛ 6]