EKADIMWELO LO AMBOLA W’OMA LO BIBLE

Onde Nzambi pokamɛka alɔmbɛlɔ tshɛ?

Nzambi pokamɛka anto w’oma lo wedja tshɛ. (Osambu 145:18, 19) Ɔtɛkɛta ande Bible tokeketshaka dia sho mbotɛ ekakatanu aso tshɛ. (Filipɛ 4:6, 7) Koko, alɔmbɛlɔ amɔtshi hawɔngɛnyangɛnya Nzambi. Ɛnyɛlɔ, kalolɛka alɔmbɛlɔ wakatakimɛ l’ɔtɛ hangɛnyangɛnya Nzambi.​—Adia Mateo 6:7.

Ndo nto, Jehowa hahokamɛ alɔmbɛlɔ w’anto wɔnyɔla Ɛlɛmbɛ ande l’okonda tshɛ. (Tukedi 28:9) Ɛnyɛlɔ, lo nshi yakafundamaka Bible, Nzambi kopokamɛka alɔmbɛlɔ w’ase Isariyɛlɛ waki andjakanyi. Mbokɛmaka dia sho pombaka nsala awui amɔtshi dia Nzambi mpokamɛ alɔmbɛlɔ aso.​—Adia Isaya 1:15.

Ahombaso nsala dia Nzambi mpokamɛ alɔmbɛlɔ aso?

Hatokoke ndjasukanya la Nzambi lo dɔmbɛlɔ naka sho bu la mbetawɔ. (Jakɔba 1:5, 6) Sho pombaka mbetawɔ ɔnɛ nde ekɔ ndo ɔnɛ nde ndjakiyanyaka dikambo diaso. Sho koka nkeketsha mbetawɔ kaso lo mbekaka Bible nɛ dia mbetawɔ ka mɛtɛ pikama lo tolembetelo ndo lo eshikikelo kele l’Ɔtɛkɛta wa Nzambi.​—Adia Hɛbɛru 11:1, 6.

Sho pombaka salaka alɔmbɛlɔ wa l’otema ɔtɔi ndo wa l’okitshakitsha. Kaanga Yeso Ɔnaki Nzambi aki l’okitshakitsha etena kakandalɔmbaka. (Luka 22:41, 42) Ɔnkɔnɛ, lo dihole dia sho mbutɛ Nzambi kɛnɛ kahombande nsala, sho pombaka nsala la wolo dia nshihodia kɛnɛ katɔlɔmbande lo mbadiaka Bible. Ngasɔ mbayotokoka nɔmba lo yoho yɔtɔnɛ la lolango laki Nzambi.​—Adia 1 Joani 5:14.