Wekelo 7
Yasukanya le Nzambi lo Dɔmbɛlɔ
Lande na kahombaso nɔmbaka nshi tshɛ? (1)
Le na ahombaso nɔmbaka ndo woho akɔna? (2, 3)
Akambo akɔna wasungana nɔmbaka? (4)
Etena kakɔna kahombayɛ nɔmba? (5, 6)
Onde Nzambi nongaka alɔmbɛlɔ tshɛ? (7)
1. Dɔmbɛlɔ kɛdikɛdi sawo dia l’okitshakitsha lam’asayɛ la Nzambi. Wɛ pombaka nɔmbaka Nzambi nshi tshɛ. Ɔnkɔsɔ mbayoyoka dia wɛ amboyasukanya la nde oko onto lamboyasukanya l’ɔngɛnyi ande wa mamba. Kânga mbende onto la woke efula ndo kanga kudu ka mamba, Jehowa mbokaka alɔmbɛlɔ aso! Onde wɛ nɔmbaka Nzambi esangɔ tshɛ?—Osambu 65:2; 1 Tesalonika 5:17.
2. Dɔmbɛlɔ diekɔ etenyi kɛmɔtshi k’ɔtɛmwɛlɔ aso. Ɔnkɔnɛ, sho pombaka nɔmbaka paka Jehowa Nzambi ndamɛ oto. Lam’aki Yeso la nkɛtɛ, nde akalɔmbaka She nshi tshɛ, koko aha onto okina. Sho pombaka tshaka ngasɔ. (Mateu 4:10; 6:9) Koko alɔmbɛlɔ aso tshɛ pombaka salemaka lo lokombo la Yeso. Ɔsɔku mbayotɛnyaka ɔnɛ sho nɛnyaka dihole dia Yeso ndo ɔnɛ tekɔ la mbetawɔ lo olambo ande w’etshungwelo.—Joani 14:6; 1 Joani 2:1, 2.
3. Lam’alɔmbaso, sho pombaka mbutɛ Nzambi awui w’oma ka tshina di’otema aso. Tatotake alɔmbɛlɔ wakatakimɛ tsho l’ɛtɛ aso kana mbala alɔmbɛlɔ akɔ lâla oma lo dibuku dimɔtshi di’alɔmbɛlɔ. (Mateu 6:7, 8) Sho kokaka nɔmba lo tokongamu tshɛ ta dilɛmiɛlɔ, wenya tshɛ, ndo l’ahole tshɛ. Nzambi kokaka nonga kânga alɔmbɛlɔ wataso l’otema. (1 Samuele 1:12, 13) Ekɔ ɔlɔlɔ nyanga hiole y’anganyi l’anto akina dia sho sala alɔmbɛlɔ aso shamɛ.—Mako 1:35.
4. Akambo akɔna wakokayɛ nɔmba? Dikambo tshɛ di’endana la diokanelo diasayɛ la nde. (Filipi 4:6, 7) Dɔmbɛlɔ di’ɛnyɛlɔ mɛnyaka ɔnɛ sho pombaka nɔmbaka lo dikambo dia lokombo la Jehowa la dia sangwelo diande. Sho kokaka nɔmba nto woho wa kondjaka ehomba aso wa l’emunyi, dia pɛkato yaso nyimanyiyama ndo dia kondja ekimanyielo ka shika ekolo la ntondo k’ohemba. (Mateu 6:9-13) Sho pombaka nɔmbaka ndo lo dikambo di’anto akina. Sho pombaka nɔmbaka diangɔ diɔtɔnganɛ la lolango la Nzambi.—1 Joani 5:14.
5. Wɛ kokaka nɔmba etena tshɛ kakosokoya otema ayɛ dia mboka Jehowa losaka kana dia mbotombola. (1 Ekondo 29:10-13) Wɛ pombaka nɔmba etena keyɛ l’ekakatanu ndo lam’akoma mbetawɔ kayɛ l’ohemba. (Osambu 55:22; 120:1) Sunganaka wɛ nɔmba la ntondo ka ndɛ. (Mateu 14:19) Jehowa tɔlɔmbaka dia sho nɔmbaka lo “tena tshe.”—Efeso 6:18.
6. Sho pombaka nɔmba djekoleko lam’asalaso pɛkato ka woke. L’etena kɛsɔ, sho pombaka nɔmba Jehowa dia nde tôka kɛtshi ndo todimanyiya. Naka sho mbosholɛ kana mbotɛ pɛkato yaso, ndo sala la weolo tshɛ di’aha ndjisala nto, kete Nzambi ‘ayetawɔ todimanyiya.’—Osambu 86:5; Tukedi 28:13.
7. Jehowa nongaka paka alɔmbɛlɔ w’akanga a losembwe. Dia Nzambi nonga alɔmbɛlɔ ayɛ tshɛ, wɛ pombaka sala la weolo ayɛ tshɛ dia ndjelaka ɛlɛmbɛ ande lo lɔsɛnɔ layɛ. (Tukedi 15:29; 28:9) Wɛ pombaka monga l’okitshakitsha lam’alɔmbayɛ. (Luka 18:9-14) Wɛ pombaka sala la wolo tshɛ dia ndjaɔtɔnganyiya la kɛnɛ kalɔmbayɛ. Ɔnkɔsɔ, wɛ ayɛnya ɔnɛ wɛ ekɔ la mbetawɔ ndo wɛ mpotɔka kɛnɛ kalɔmbayɛ. Lâsɔ mbayokadimola Jehowa lo alɔmbɛlɔ ayɛ.—Heberu 11:6.