Tofudia olimu aso w’esambishelo

Amendji wa filmɛ ka dimɛna kele anto wɛnyawɔ lɔkɔ hawɔtɛkɛta kele l’ɔtɛ a dui ɔnɛ Lɔkɛndɔ l’otsha lo shinga ya lobingu wakangɛnangɛna kienda dikambo tɔ kakɛnyaka woho wakasɛnaka anto la San Francisco l’etatelo ka ntambe 20. Wanɛ wakasale filmɛ kɛsɔ wakakitsha kamɛra la ntondo ka vɔatirɛ yadɛ l’akona yaki l’atei atei wa mboka. Lo filmɛ kɛsɔ, wakɛnyaka mponda yatakotola pusupusu, weho wa mituka wa ntondotondo, asombi wa diangɔ ndo akɛnda wateteta lushi la lushi dia nsondja tojurnalɛ.

Kɛnɛ kaleka mbisha lɔkɔnyɔ efula lo filmɛ kɛsɔ ele ondo woho wakatondɔ didimu dia nkɛtɛ diakatowɔ dja lo Ngɔndɔ ka nɛi 1906 ko ndjaka nyemba nyemba y’anto ndo ndanya etenyi k’osomba kɛsɔ lo Ngɔndɔ ka nɛi 18. Ondo anto amɔtshi wɛnyawɔ lo filmɛ kɛsɔ wakavu nshi ngana tsho l’ɔkɔngɔ wa mpokoso kɛsɔ. Scott Miles lele kanula ya ɔmɔtshi l’atei wa wanɛ wakasale filmɛ kɛsɔ mbutaka ate: “Anto wɛnami lo filmɛ kɛsɔ haweye kɛnɛ kayanga mbakomɛ. Lekɔ lo ndjadja lo dihole diawɔ kaanga mbele ndooko kakokami nsala.”

Ɔkɔndɔ ɔsɔ koka mbɔtɔnɛ la kɛnɛ keta nshi yaso nyɛ. Sho lawɔ hatokoke nshidiya ekakatanu wakomɛ anto nshi nyɛ, koko sho ndjadjaka lo dihole diawɔ. Vɔ salaka akambo awɔ wa lushi la lushi aha la mbeya ɔnɛ elanyelo ka dikongɛ nɛ di’akambo kaya k’emembe. Otshikitanyi la didimu dia nkɛtɛ diakomɛ onto la shashimuya, sho teke la etena ka tshitshɛ ka mbewola anto dia lushi la kilombo la Jehowa. Kaanga mbele wɛ tshungolaka etena dia nsambisha lomingu tshɛ, shi wɛ koka ndjadjɛ oyango wa mfudia olimu ayɛ w’esambishelo?

YESO AKI NSHI TSHƐ SUKE DIA NSAMBISHA

Ɛnyɛlɔ ka Yeso kekɔ ohomba efula lo woho wakinde kotshika sambishaka nshi tshɛ. Nde akasambishaka onto tshɛ lakahomanaka la nde, akonge oko ofutshanyi w’elambo lo teteta lo toshinga, ɛnyɛlɔ kaanga etena kakandomuyaka, nde akasambisha womoto ɔmɔtshi. (Luka 19:1-5; Jni. 4:5-10, 21-24) Mbala mɔtshi anto wakongaka l’ohomba ande etena kakandomuyaka, koko Yeso akatshikaka momuya dia mbaetsha. Kɛtshi kakandokaka anto kakootshutshuya dia nde mbasambisha. (Makɔ 6:30-34) Ngande wakokaso mbokoya woho wakasambishaka Yeso la shamanya?

VƆ KAMBAKA LA DIAASO TSHƐ DIAKONDJAWƆ

Melika mbidjasɛ lo luudu lɔmɔtshi lakakama dimɛna efula. Asekande afutedi wekɔ ambeki wa lo kalasa y’adidi w’oma lo wedja ekina ndo nkombo yawɔ la numɛlɔ yawɔ ya telefɔnɛ bu lo dibuku diele la nkombo y’afutedi wa lo luudu lɔsɔ. Nde ngɛnangɛnaka diaaso dia laande diele la nde dia kɛtshanyaka akambo wa lo nyuma l’afutedi asɔ. Nde mbutaka ate: “Dimi mbɔsaka luudu lɔsɔ oko ɛtshi kami ka nkɛtɛ.” Melika mbetetaka la ekanda aso l’ɛtɛkɛta efula ndo nde mbishaka anto efula traktɛ la periodikɛ. Nde mbatɛka nto dia vɔ mbɔtɔ lo sitɛ kaso ka jw.org. Nde ekɔ lo mbeka Bible l’anto efula.

Sonia nde lawɔ kambaka la diaaso tshɛ diakondjande dia nsambisha. Nde kambaka lo lopitadi l’onganga ɔmɔtshi ndo nde akayadjɛ oyango wa nsambisha asekande tshɛ wa l’olimu. Ntondotondo, nde akɔshi etena ka mbeya ehomba ndo awui walanga onto l’onto. Oma laasɔ, nde sawolaka la wɔ awui wa lo nyuma l’onto ndo l’onto wonya wa diomuyelo dia l’ɔkɔngɔ w’olelo wa la midi. Etombelo wambonga la dui sɔ ele, nde ambotatɛ mbeka l’anto ahende Bible. Nde ekɔ lo nkongɛ dia temalaka la soko dia lopitadi wonya wa diomuyelo ko nsawola la wanɛ wakonga dia mbɔsama l’olimu.

KAMBA LA WAASO TSHƐ WELE LA YƐ DIA NSAMBISHA

Onto ɔmɔtshi lakake lo didimu dia nkɛtɛ diaki lo 1906 akate dia “ɔsɔ mbele didimu dia nkɛtɛ diakaleke woke l’osomba ɔsɔ.” Koko, mpokoso tshɛ yambosalema yayonga anyanya w’anyanya lo mbɛdika la lushi l’ɛsɔmbwɛlɔ layanga ndja keema edja le “wanɛ waheye Nzambi.” (2 Tɛs. 1:8) Jehowa kombolaka di’anto ntshikitanya timba ndo etema awɔ dia vɔ mpokamɛ ɔhɛmwɛlɔ w’oma le ekambi ande.​—2 Pet. 3:9; Ɛny. 14:6, 7.

Wɛ ekɔ la diɛsɛ dia nkimanyiya anto dia vɔ nshihodia akambo weta nshi nyɛ ndo dia vɔ ntshika ndjasha l’akambo wa kɔlɔ ko nyanga Jehowa. (Zef. 2:2, 3) Shi wɛ koka nkamba la diaaso tshɛ diele la yɛ dia nsambisha asekayɛ wa l’olimu, asukanyi ayɛ ndo anto tshɛ wɛnana la yɛ etena kasalayɛ awui ayɛ wa lushi la lushi? Shi wɛ koka mfudia olimu ayɛ w’esambishelo?