ONDE WƐ AKEYAKAU?

Lo nshi yakafundamaka Bible, kitshimudi yakɔna yaki la tshelo y’onto mbatshatsha ahɔndɔ wɔlɔtshinde?

AVƐSA efula tɛkɛtaka di’anto wakatshatsha ahɔndɔ awɔ. Anto wa nshi nyɛ mbeyaka mbɔsa tshelo shɔ oko dui diaheyama ɔtɛ l’ekolo, koko ase Juda wakasalaka ngasɔ dia mɛnya dia waya bu l’elongamelo, wekɔ la lɔkɔnyɔ, wamboshama nsɔnyi, wekɔ la nkɛlɛ kana wekɔ l’otanda.

Ɛnyɛlɔ, Rubɛna “akatshatsha ahondo andi” etena kakandɛnyotana dia wambosondja Yɔsɛfu y’ɔnangɔ etena kele nde akalangaka mbohandja. Jakɔbɔ ya shɛwɔ “akatshatsha ahondo andi” etena kakawawotɛ ɔnɛ Yɔsɛfu akadiakema oma le nyama ka mpango. (Etat. 37:18-35) Jɔbɔ “akatshatsha ahondo andi,” etena kakandalongola losango ɔnɛ anande tshɛ wambovɔ. (Jobo 1:18-20) Dikɛndji dimɔtshi akatshu le ɔlɔmbɛdi wa laadiko Eli ele “[l]ahondo betshi tu” ko akatowotɛ ɔnɛ wakalɛndjisha ase Isariyɛlɛ lo ta, wakadiaki anande w’apami ahende ndo wakahɔtɔdi ase Isariyɛlɛ ɔshɛtɛ wa sheke. (1 Sam. 4:12-17) Etena kakoke Jɔsiya wadielo wa dibuku di’ɛlɛmbɛ ndo kakandoke munga yakasale ase Isariyɛlɛ, nde “akatshatsha ahondo andi.”—2 Khum. 22:8-13.

Etena kakawalomboshaka Yeso, ɔlɔmbɛdi wa laadiko Kayifasi “akatshatsha ahɔndɔ ande” lo mfɔnya ɔnɛ Yeso ambɔtɛnga Nzambi. (Mat. 26:59-66) Lo ndjela mbekelo y’embetsha w’ɛlɛmbɛ, naka onto ambooka watɛnga Nzambi, nde pombaka mbatshatsha ahɔndɔ ande. Koko ombetsha ɔmɔtshi w’ɛlɛmbɛ akayofundaka l’ɔkɔngɔ wa Jɛrusalɛma nanyema ɔnɛ: “Nshi nyɛ naka onto ambooka watɛnga Nzambi, aya bu ohomba nde mbatshatsha ahɔndɔ nɛ dia onto layosala dikambo sɔ wayotondola ahɔndɔ ande tisho tisho.”

Aha la taamu, dia Nzambi mbɔsa tshelo ya mbatshatsha ahɔndɔ la nɛmɔ, paka onto ndjatshumoya l’otema ɔtɔi. Diakɔ diakatɛ Jehowa ase Isariyɛlɛ dia vɔ ‘mbatshatsha etema awɔ koko aha ahɔndɔ awɔ ndo nkalola le nde.’—Joe. 2:13.