‘Mbo Ya Ndɛ Yami Ele Nsala Lolango La Nzambi’

Kakɔna katolekaka kosha ɔngɛnɔngɛnɔ? Onde diɔtɔnganelo diasayɛ l’anto amɔtshi, diwala, diɔtɔnganelo dia lo nkumbo ko kana lɔngɛnyi? Ondo wɛ tokombolaka ndɛ diangɔ di’amɛna l’anto wokayɛ ngandji. Oko weyɛ okambi wa Jehowa, shi ekɔ diɛsɛ le yɛ dia nsala lolango laki Nzambi, mbeka Ɔtɛkɛta ande ndo nsambisha lokumu l’ɔlɔlɔ?

Nkumekanga Davidɛ akatombola Otungi lo memba ɔnɛ: “Dimi latongenangenaka dia ntsha lulangu laye, we [Nzambi k]ami. Ee, olembe aye ambufundama l’utema ami.” (Osam. 40:8) Kaanga mbakandahomana l’akambo wa wolo, Davidɛ akangɛnangɛnaka nsala lolango laki Nzambi l’otema ɔtɔi. Koko aha Davidɛ ndaamɛ mbaki okambi waki Jehowa wakangɛnangɛnaka nsala lolango lande.

Lo nkamba l’ɛtɛkɛta wofundami l’Osambu 40:8 wendana la Mɛsiya kana Kristo, ɔpɔstɔlɔ Pɔɔlɔ akafunde ate: “Lam’akaye Kristo l’andja, nde akatɛ Nzambi ate: ‘Wɛ konanga elambo la weshasha, koko wɛ akanɔngɔsɔlɛ demba. Wɛ kɔngɛnangɛna elambo wa lotshumba ndo elambo wa pɛkato.’ Ko dimi lakate nte: ‘Nzambi le, enda dimi lamboya (oko wofundamidiɔ lo wɔɔmbɔ w’Afundelo lo dikambo diami) dia ndjosala lolango layɛ.’”—Hɛb. 10:5-7.

Etena kakinde lanɛ la nkɛtɛ, Yeso akangɛnangɛnaka menda etongelo, monga l’angɛnyi ndo nsanga la wɔ lonya. (Mat. 6:26-29; Jni. 2:1, 2; 12:1, 2) Koko nde akalekaka nsala lolango la She lele l’olongo. Diakɔ diakandate ate: “Mbo ya ndɛ yami ele nsala lolango la Ɔnɛ lakatome ndo nshidiya olimu ande.” (Jni. 4:34; 6:38) Yeso aketsha ambeki ande woho wa monga l’ɔngɛnɔngɛnɔ wa mɛtɛ. Vɔ wakangɛnangɛnaka ndo wakalomɔlomɔka nsambisha losango la Diolelo.—Luka 10:1, 8, 9, 17.

‘NYOTSHU NDO NYETƐ ANTO AMBEKI’

Yeso akadjangɛ ambeki ande ate: “Nyotshu . . . nyetɛ anto wa lo wedja tshɛ ambeki, nyaabatize lo lokombo la Papa ndo la Ɔna ndo la nyuma k’ekila, nyowaetshake dia nkitanyiya akambo tshɛ wambomonyodjangɛ. Nyolonge, dimi lekɔ la nyu nshi tshɛ polo l’etena k’ekomelo k’andja.” (Mat. 28:19, 20) Dia nkotsha didjango sɔ, sho pombaka ntshɔ dia toyanga anto lo dihole tshɛ diakokawɔ tanema, nsala waendelo w’eyoyo le wanɛ wɛnya nsaki ndo mbekaka la wɔ Bible. Nkamba olimu ɔsɔ toshaka ɔngɛnɔngɛnɔ wa mɛtɛ.

Ngandji totshutshuyaka dia sho ntetemala nsambisha kaanga la ntondo ka wendjudi

Mama kɛmɔtshi alengɛ oma lo didishi diande etena kakɔkɔla Ɛmɛnyi wa Jehowa lo soko diande

Oyadi anto mɛnya nsaki lo losango la so kana bu, kɛnɛ kayotosala mbayotokimanyiya dia monga l’ɔngɛnɔngɛnɔ l’esambishelo. Lande na katetemalaso nsambisha lokumu l’ɔlɔlɔ kaanga etena kahomanaso la wendjudi? Nɛ dia etena kasambishaso ndo ketɛso anto ambeki, mbɛnyaso dia sho mbokaka Nzambi ndo wanyaso anto ngandji. Ndo nto, sho mbeyaka dia nsɛnɔ yaso ndo ya wanyaso anto yekɔ lo waale. (Ezek. 3:17-21; 1 Tim. 4:16) Ɛsɔ tɔsɛdingole akambo amɔtshi wakakimanyiya Akristo efula dia nsambisha l’ohetoheto lo bɛtshi dia nkɛtɛ diele anto wekɔ la wendjudi.

KAMBA LA DIAASO TSHƐ DIAKONDJAYƐ

Mbala efula, nkamba la ambola wemola nsaki l’esambishelo mbelaka etombelo w’ɛlɔlɔ. Lushi lɔmɔtshi, Amalia akɛnyi pami kɛmɔtshi adia jurnalɛ lo parkɛ. Nde akasukana lalende ndo akawombola kana nde ambadia dui dimɔtshi dia dikayi. Etena kakandookadimola ate keema, Amalia akawotɛ ate “Lambokela lokumu l’ɔlɔlɔ la Diolelo dia Nzambi.” Ɛtɛkɛta ɛsɔ wakemula nsaki ka pami kɛsɔ ko nde aketawɔ ntatɛ mbeka Bible. Amalia akeke Bible l’anto asato lo parkɛ kɛsɔ.

Janice akasambishaka lo dihole diande di’olimu. Etena kakangɛnangɛna onami ɔmɔtshi nde l’osekande sawo dimɔtshi dia lo Tshoto y’Etangelo, Janice akɔshi yɛdikɔ ya mbaelaka periodikɛ mbala la mbala. Nde akasale woho akɔ waamɛ la osekande l’olimu lakangɛnangɛna asawo wa lo Tshoto y’Etangelo ndo lo Réveillez-vous ! Kɛsɔ kakayokonyaka dia osekande okina la l’olimu mbɔlɔmba periodikɛ. Janice mbutaka ate: “Jehowa akantshɔkɔla efula.” Nde mbutaka ngasɔ nɛ dia nde aya l’anto 11 wakahɛnde periodikɛ mbala la mbala lɛnɛ akambande.

ƐNA AKAMBO LA SSO DI’ƆLƆLƆ

Omendji weteta ɔmɔtshi akate dia etena keso l’esambishelo ka lo luudu la luudu, apandjudi hawohombe nkumiya sawo lo mbuta tsho ɔnɛ layoya lushi lokina. Vɔ koka mimbola onto ɔnɛ: “Onde wɛ kombolaka dimi ndjokɛnya woho w’ekaso l’anto Bible?” Kana ɔnɛ: “Lushi lakɔna ndo wonya akɔna walangayɛ dia dimi nkalola dia sho ndjotetemala la sawo diaso?” Omendji weteta ɔsɔ mbutaka dia lo nkamba la mbɔtɛwɛlɔ kɛsɔ, anangɛso l’akadiyɛso wa l’etshumanelo kɛmɔtshi wakakondja ambeki wa Bible 44 lo lomingu ɔtɔi loto.

Ɛmɛnyi wa Jehowa wasambisha pami kɛmɔtshi kaata abaya

Nkalola esadi dia tenda onto lakatasawola la nde mbala ka ntondo mongaka l’etombelo w’amɛna. Lande na? Nɛ dia lo nsala ngasɔ, tayɛnya dia sho nangaka nkimanyiya anto w’etema ɛlɔlɔ dia vɔ nshihodia Bible. Etena kakawambola womoto ɔmɔtshi lande na kakandayetawɔ mbeka Bible l’Ɛmɛnyi wa Jehowa, nde akate ate: “Lakayetawɔka nɛ dia vɔ wakayashaka efula le mi ndo wakambokaka ngandji.”

Wɛ mbeyaka mimbola ompokami ayɛ ɔnɛ: “Onde wɛ kombolaka dimi ndjokɛnya woho wekaso l’anto Bible?”

Yema tshitshɛ l’ɔkɔngɔ wa Madaí mbɔtɔ lo Kalasa k’ambatshi mboka, nde akatatɛ mbeka Bible l’anto 15 ndo akakahe ambeki ndekana 5. Ambeki ande efula wakatatɛ mbɔtɔ lo nsanganya mbala la mbala. Kakɔna kakakimanyinya Madaí dia mbeka l’anto efula Bible? Kalasa kɛsɔ kakookimanyiya dia nde kalolɛka anto wɛnya nsaki edja ndo nde ambaatana. Kadiyɛso kekina kambokimanyiya anto efula dia vɔ mbeya akambo wa mɛtɛ mbutaka ate: “Lamboshihodia dia kalolɛka wanɛ wakɛnya nsaki mboleki ohomba naka sho nangaka nkimanyiya anto wakombola dia mbeya Jehowa.”

Nkalola esadi dia tenda onto lakatasawola la nde mbala ka ntondo, mɛnyaka dia sho ndjashaka le wanɛ wakombola mbeka Bible

Nɔmbamaka welo w’efula dia salaka waendelo w’eyoyo ndo mbekaka l’anto Bible. Koko ɛtshɔkɔ waya lo nsala dui sɔ ndeka welo wadjaso la fwa. Lo ndjasha efula l’esambishelo, sho kimanyiyaka anto akina dia vɔ “nkondja ewo k’oshika k’akambo wa mɛtɛ” ndo vɔ koka ndjokondja mpanda. (1 Tim. 2:3, 4) Dui sɔ koka tosha ɔngɛnɔngɛnɔ waheyama mbɛdika.