Woho wa nsala dia wekelo ayɛ wa Bible ndeka monga la wahɔ ndo kɔngɛnyangɛnya

Jashua adia Ɛlɛmbɛ lo tala; mpele dia Jeriko diambonyukɔ ndo nkumbo ka Rahaba wamboka; Jashua ambedia anya l’olongo etena kalɔmbande

JASHUA mbakahombe nɔmbɔla ase Isariyɛlɛ otsha lo Nkɛtɛ ya Daka. Dui sɔ diaki wolo efula. Koko, Jehowa akokeketsha lo mbotɛ ate: “Onga . . . la dihonga ndo keketala efula.” Nde akatɛ Jashua dia naka nde mbadia ndo nkitanyiya Ɛlɛmbɛ, kete nde akakoke mbɔsa tɛdikɔ t’amɛna ndo ntondoya.—Jas. 1:7, 8.

Tekɔ lo nsɛna lo “tena dia paa dia wolo mbikikɛ,” diakɔ diele ndo lɔsɛnɔ laso koka monga wolo efula. (2 Tim. 3:1) Naka sho nangaka ntondoya oko Jashua, kete sho pombaka ndjela alako wakawosha Jehowa. Sho pombaka mbadiaka Bible mbala la mbala ndo kambaka la kɛnɛ kekaso dia mbɔsa tɛdikɔ t’amɛna.

Mbeyaka monga ko anto amɔtshi l’atei aso haweye woho wa mbeka kana ondo hatɔngɛnangɛna mbeka. Koko, wekelo wa Bible w’onto ndamɛ wekɔ ohomba efula. Etena kayoyɔsɛdingola kiombo yele l’ɔtɛ a dui ɔnɛ: “Hemba nkamba l’alako anɛ,” wɛ ayɛna alako wayokokimanyiya dia nkondja wahɔ oma lo wekelo ayɛ ndo ndeka mbɔngɛnangɛna.

Omembi w’esambo akembe ate: “Ɔnɔmbɔlɛ lo ɛsɛsɛ wa ɛlɛmbɛ ayɛ, nɛ dia lɔkɔ mbangɛnangɛnami.” (Os. 119:35) Ndo wɛ lawɔ koka ngɛnangɛna mbeka Ɔtɛkɛta wa Nzambi. Wɛ ayoshola tokanyi t’amɛna efula naka wɛ ntetemala mbeka Bible.

Kaanga mbele wɛ halɔmbama dia nɔmbɔla wodja oko wakasale Jashua, wɛ ekɔ l’ekakatanu ayɛ hita. Ɔnkɔnɛ, l’ɛnyɛlɔ ka Jashua eka ndo nkitanyiya Ɔtɛkɛta wa Nzambi. Naka wɛ nsala dui sɔ, kete wɛ ayɔsa tɛdikɔ t’amɛna ndo wɛ ayotondoya.

HEMBA NKAMBA L’ALAKO ANƐ

Lɔmba ntondo ka mbeka. Bible kekɔ la tokanyi ta Jehowa ndo tɔ takafundama dia wahɔ ayɛ. Diakɔ diele, etena kadiayɛ Bible lɔmba Jehowa dia kokimanyiya dia wɛ nshihodia kɛnɛ kadiayɛ, kiohɔ ndo nkamba la tɔ dia mbɔsa tɛdikɔ t’amɛna lo lɔsɛnɔ layɛ.—Ɛzr. 7:10.
Yaoka ambola anɛ etena kadiayɛ Bible kana ekanda walembetshiya Bible. Ɛnyɛlɔ: ‘Kakɔna kambetsha etenyi kɛnɛ lo dikambo dia Jehowa? Ngande wɔtɔnɛ dui nɛ la ɔtɛ a dui wa Bible? Ngande wakokami nkamba la tokanyi tɔnɛ dia nkimanyiya anto akina?’
Kana yimba la kɛnɛ kekayɛ. Emala lo tshanda mɔtshi ndo kana yimba la kɛnɛ kakiyɛ oma la mbadia. Yambola ɔnɛ: ‘Ngande wayaokami l’ɔtɛ wa dui nɛ? Lande na kakonyadiɔ dia ndjaoka ngasɔ? Ngande wɔtɔnɛdiɔ la kɛnɛ kakakomɛ lo nshi y’edjedja, kɛnɛ kambokomɛ nshi nyɛ kana kɛnɛ kakoka komɛmi lo nshi yayaye? Ngande wakokami nkamba l’atɔndɔ wa lo Bible anɛ kana dako nɛ lo lɔsɛnɔ lami?’ (Jɔbɔ 23:5; Os. 49:3) Etena kakanayɛ yimba, enda kana wɛ koka nembetshiya lande na katɛ Jehowa ekambi ande dia mbewɔ ditshelo dimɔtshi. Kana kanyiya etombelo wakoka monga otondonga onto ladiayɛ awui wendana la nde akasale akambo lo yoho yotshikitanyi.—Eoh. 32:28, 29.
Kamba la ekanelo kayɛ ka yimba etena kadiayɛ. Ɛnyɛlɔ, shi wɛ koka nkanyiya woho wakasondjama Yɔsɛfu le ase Ishimaɛlɛ oma le anango? (Eta. 37:18-28) Kakɔna kɛnayɛ, kokayɛ ndo nsolo kakɔna kokayɛ? Yadja lo dihole di’anto watayadia awui wendana la wɔ. Kakɔna kakawakanyiyaka ndo ngande wakawayaokaka? Naka wɛ nkamba l’ekanelo kayɛ ka yimba, kete wekelo ayɛ wayoleka monga ohomba.
Kamba la dihomɔ dia wekelo diakatondja okongamelo. Dihomɔ sɔ koka kokimanyiya lo eyangelo ayɛ. Eka woho wa nkamba la dihomɔ diele l’ɔtɛkɛta ayɛ diele l’Ɛtɛrnɛtɛ ndo diakatondjama. Tengengake dia nɔmba anto akina dia kokimanyiya dia mbeka woho wa nkamba la dihomɔ diakɔ dimɛna. Ɛnyɛlɔ, Index des publications des Témoins de Jéhovah kana Dibuku di’eyangelo di’Ɛmɛnyi wa Jehowa wayokokimanyiya dia ntana awui wakafundama wendana l’ɛtɛ w’awui ɛmɔtshi ndo wayolembetshiya avɛsa efula wa lo Bible. Kamba la apandisɛ wa lo Bible—Ekadimwelo k’andja w’oyoyo naka wekɔ l’ɔtɛkɛta wakokayɛ mbadia. Vɔ wekɔ l’awui w’ohomba wendana la ngelo mɔtshi, wahɔnelo w’akambo, wetsho, tɛdikɔ ndo awui akina.
Funda awui woleki ohomba lo tshena pe. Dui sɔ diayokokimanyiya dia mbohɔ kɛnɛ kamboyeka. Dui dikina di’ohomba ele, tɛ anto akina kɛnɛ kamboyeka. Onde ekɔ dui dimɔtshi diakokayɛ nkamba la diɔ l’esambishelo? Lo nsala awui asɔ, wɛ ayohɔ awui woleki ohomba ndo anto akina wayokondja wahɔ oma lo wekelo ayɛ.