Nyɔi kekɔ ɛngɔ ka kɔlɔ

OHƆSA dia wɛ ekɔ lo menda filmɛ k’onto ɔmɔtshi la lokumu, mbala mɔtshi opomi wa mishiki weyama efula walangayɛ. Tɔ kambotatɛ mɛnya awui wakandasale oma lo dikɛnda, etena kakandekaka woho wa mpoma mishiki mbala la mbala. Oma laasɔ, wɛ enda kɔsɛrɛ yande, woho wakandeteta lo wedja efula ndo wakandayala onto la lokumu leyama l’andja w’otondo. Aha la ntshimbatshimba, ɛnyiyɛ ko nde ambotshunda osombe ndo oma laasɔ, nde ambovɔ ko filmɛ kambokomɛ.

Filmɛ kɛsɔ kekɔ ɔkɔndɔ wa mɛtɛ w’onto la mɛtɛ mɛtɛ lambovɔka. Kaanga naka onto ɔsɔ aki opomi wa mishiki, ombeyi wa siansɛ, osaki wa lowango kana onto okina leyama efula, ɔkɔndɔ ɔsɔ wayonga paka woho waamɛ. Mbeyaka monga ko onto ɔsɔ akasale awui efula w’amɛna. Ko ohokanyiya awui akina efula wotondosala otondonga nde kotshunda osombe ndo komvɔ!

Dui dia lonyangu ko, dui sɔ diayotokomɛ sho tshɛ. (Ondaki 9:5) Oyadi welo akɔna wadjaso, weho akɔ tshɛ tayotshunda esombe ndo tayovɔ. Laadiko dia laasɔ, sho kokaka mvɔ la shashimoya l’ɔtɛ wa aksida kana wa hemɔ kɛmɔtshi ka wolo. Oko wotamidiɔ lo Bible, sho tekɔ oko “loonge latɛnamaka lo tshanda mɔtshi, ko latoshishɔka.”​—Jakɔba 4:14.

Le anto amɔtshi lɔsɛnɔ lekɔ anyanya, diakɔ diatawɔ ɔnɛ: “Nyɛsɔ tole ndo tɔnɔ, nɛ dia tayovɔ loyi.” (1 Kɔrɛtɔ 15:32) Koko anto asɔ mbutaka ngasɔ l’ɔtɛ weyawɔ ɔnɛ vɔ kokaka mvɔ wonya tshɛ ndo l’ɔtɛ wewɔ bu l’elongamelo lo dikambo dia nshi yayaye. Lo tena dimɔtshi, djekoleko etena konga onto l’ekakatanu, nde koka ndjambola ɔnɛ: ‘Onde lɔsɛnɔ lɔnɛ layokomɛ paka nganɛ oto’? Lende akokayɛ nkondja ekadimwelo?

Ɛlɔ kɛnɛ anto efula nongamɛka dia ambeyi wa siansɛ koka mbisha okadimwelo. Ehamelo wambosalema lo awui wa siansɛ ndo lo awui w’aseka enganga taloyaka lɔsɛnɔ laso yema. Ndo ambeyi wa siansɛ amɔtshi wekɔ lo nsala la wolo dia ndeka ntaloya lɔsɛnɔ. Oyadi welo akɔna wadja ambeyi wa siansɛ, anto tetemalaka ndjaoka ambola anɛ: Lande na katshundaso ndo kavɔso? Onde elongamelo kɛmɔtshi kekɔ dia nyɔi lele otunyi aso ayodjama otshumba? Asawo wayela wayosha ekadimwelo lo ambola asɔ ndo lo dimbola diata ɔnɛ: Onde lɔsɛnɔ lɔnɛ layokomɛ paka nganɛ oto?