Jehowa mbɔsaka “aamɛɛ” kayɛ la nɛmɔ

“ANTO TSHƐ WAYOTA VATE: ‘AAMƐƐ!’”

Tshɛkɛta ya l’Angɛlɛ “aamɛɛ” nembetshiyaka ɔnɛ “ayale ɔsɔku,” kana “lo mɛtɛ.” Yɔ ndja oma lo tshɛkɛta ya lo Hɛbɛru, yalembetshiya “monga la kɔlamelo,” “onto la mbɛkɛ otema.” Lo tena dimɔtshi wakakambaka la yɔ l’awui wa dombo. L’ɔkɔngɔ w’onto ntshiba, nde akahombaka mbuta “aamɛɛ” dia nshikikɛ dia kɛnɛ kotshinde kekɔ mɛtɛ ndo ɔnɛ nde mbetawɔka etombelo wayonga la kɛnɛ kotshinde. (Wal. 5:22) Etena kata onto “aamɛɛ,” nde mongaka l’ɔkɔkɔ w’oshika wa nkotsha daka diande.​—Nɛh. 5:13.

Ɛnyɛlɔ ka dimɛna efula kokambiwɔ la “aamɛɛ” tanemaka lo Eohwelo k’Ɛlɛmbɛ tshapita 27. L’ɔkɔngɔ w’ase Isariyɛlɛ mbɔtɔ lo Nkɛtɛ ya Daka, vɔ wakahombe ntshumana lam’asa Dikona dia Ebala la Dikona dia Ngɛrizimɛ dia mpokamɛ Ɛlɛmbɛ wakawadiaka. Vɔ kotshɔ lɛkɔ tsho dia tohokamɛ, koko ndo dia tota ɔnɛ vɔ waketawɔka Ɛlɛmbɛ. Vɔ wakasale dui sɔ lo mbuta ɔnɛ “aamɛɛ!” l’ɔkɔngɔ wa vɔ mbadia etombelo wayonga naka onto hakitanyiyisha. (Eoh. 27:15-26) Ohokanyiya londjo lakonge etena kakate nunu dia apami, wamato ndo ana efula ɔnɛ aamɛɛ la dui dia wolo! (Jas. 8:30-35) Vɔ mɛtɛ kombohɛ pondjo ɛtɛkɛta wakawate lushi lɔsɔ. Ndo ase Isariyɛlɛ asɔ wakakotsha ɛtɛkɛta awɔ, diakɔ diata ɔkɔndɔ akɔ ɔnɛ: “Ase Isariyɛlɛ wakatetemala kambɛ Jehowa lo nshi tshɛ ya Jashua ndo nshi tshɛ ya dikumanyi diakatetemala nsɛna l’ɔkɔngɔ wa Jashua ndo diakeye kɛnɛ tshɛ kakasale Jehowa lo wahɔ w’ase Isariyɛlɛ.”​—Jas. 24:31.

Yeso nde lawɔ akakambe la “aamɛɛ” dia nshikikɛ mɛtɛ ka kɛnɛ kakatama, koko nde akasale dui sɔ lo yoho ya laande. Lo dihole dia nkamba la aamɛɛ l’ɔkɔngɔ w’awui amɔtshi mbutama, nde akakambe la “aamɛɛ” (kokadimɔmi l’Angɛlɛ ɔnɛ “lo mɛtɛ”) ntondo ka nde mbuta dui dimɔtshi dia nshikikɛ ɔnɛ diɔ diekɔ mɛtɛ. Tena efula, nde akakalolɛka tshɛkɛta shɔ lo mbuta ɔnɛ “aamɛɛ aamɛɛ.” (Mat. 5:18; Jni. 1:51) Oma laasɔ nde akashikikɛka ampokami ande ɔnɛ ɛtɛkɛta ande waki tshɛ mɛtɛ. Yeso akakoke ntɛkɛta l’eshikikelo ka ngasɔ nɛ dia wakawosha lotshungɔ la nsala dia alaka wa Nzambi tshɛ kotshama.​—2 Kɔr. 1:20; Ɛny. 3:14.

“ANTO TSHƐ WAKATE VATE: ‘AAMƐƐ!’ NDO WAKATOMBOLA JEHOWA!”

Ase Isariyɛlɛ vɔ lawɔ wakakambe la “aamɛɛ” etena kakawatombolaka ndo kakawalɔmbaka Jehowa. (Nɛh. 8:6; Os. 41:13) Lo mbuta dui dimɔtshi l’ɔkɔngɔ wa dɔmbɛlɔ, wanɛ wakahokamɛka asɔ wakɛnya dia vɔ waketawɔ kɛnɛ kakatama lo dɔmbɛlɔ. Lo nsala ngasɔ, anto tshɛ waki laawɔ wakongaka oko vɔ tshɛ mbosadi dɔmbɛlɔ ndo wakangɛnangɛnaka diaaso dia lo nyuma sɔ. Kɛsɔ mbakasalema etena kakatɔlɛ nkumekanga Davidɛ ɔshɛtɛ wa sheke wa Jehowa la Jɛrusalɛma. Lo fɛtɛ kakayelana, nde akasale dɔmbɛlɔ dia l’otema ɔtɔi diaki oko osambo diele lo 1 Ɛkɔndɔ 16:8-36. Anto waki laawɔ wakanandema la ɛtɛkɛta ande, diakɔ diele “anto tshɛ wakate vate: ‘Aamɛɛ!’ ndo wakatombola Jehowa.” Lo mɛtɛ, vɔ waki l’ɔngɛnɔngɛnɔ dia ntɛmɔla Jehowa kaamɛ.

Woho akɔ waamɛ mbele Akristo wa lo ntambe ka ntondo wakakambe la “aamɛɛ” etena kakawatombolaka Jehowa. Mbala efula, afundji wa Bible wakakambaka la tshɛkɛta shɔ lo mikanda awɔ. (Rɔmɔ 1:25; 16:27; 1 Pe. 4:11) Dibuku dia Ɛnyɛlɔ tɛkɛtaka dikambo dia ditongami dia lo nyuma dia l’olongo diatombola Jehowa lo mbuta ɔnɛ: “Aamɛɛ! Nyotombole Jah!” (Ɛny. 19:1, 4) Akristo wa lo ntambe ka ntondo waki la mbekelo ka mbutaka “aamɛɛ” l’ɔkɔngɔ wa vɔ nsala alɔmbɛlɔ lo nsanganya yawɔ. (1 Kɔr. 14:16) Koko, ɔsɔ komonga tshɛkɛta yakawataka aha la nkanyiya.

LANDE NA KELE “AAMƐ” KAYƐ KEKƆ OHOMBA EFULA?

L’ɔkɔngɔ wa mbeya woho wakakambaka ekambi wa Jehowa la tshɛkɛta “aamɛɛ,” sho koka mɛna lande na kele “aamɛɛ” ekɔ yoho ya dimɛna ya nkomiya dɔmbɛlɔ. Etena kataso tshɛkɛta shɔ l’ekomelo ka dɔmbɛlɔ diaso shoamɛ, sho mɛnyaka dia tambetawɔ mɛtɛ kɛnɛ kotshiso. Ndo etena kasɛngiyamaso dia mbuta “aamɛɛ,” oyadi ɔkɔkɛ, etena kasalema dɔmbɛlɔ dia lo sɛkɛ, sho mɛnyaka dia sho sukɛka ɛtɛkɛta wotami. Tɔsɛdingole nto lande na kele “aamɛɛ” aso wekɔ ohomba.

Sho ndjashaka ndo mbidjaka yimba l’ɔtɛmwɛlɔ aso. Sho tɛmɔlaka Jehowa etena kasalema dɔmbɛlɔ, aha tsho lo kɛnɛ katama koko ndo lɔkɛwɔ lele la so. Nsaki kaso ka mbuta “aamɛɛ” oma k’ɛse otema koka tokimanyiya dia monga la dionga dia dimɛna ndo mbidja yimba lo dɔmbɛlɔ.

Sho mongaka kaamɛ oko weso atɛmɔdi. Dɔmbɛlɔ dia lo sɛkɛ kotolaka yambalo yaso lo kɛnɛ kahokamɛ ase etshumanelo akina. (Ets. 1:14; 12:5) Etena kasɛngiyamaso dia mbuta “aamɛɛ” kaamɛ l’anangɛso l’akadiyɛso, sho ndekaka monga kaamɛ. Oyadi sho mbuta “aamɛɛ” la dui dia wolo kana l’otema, dɔmbɛlɔ diaso koka nsala dia Jehowa nkotsha kɛnɛ kɔlɔmbaso kaamɛ.

Sho tombolaka Jehowa. Jehowa mɛnaka kaanga awui wa totshitshɛ wasalaso dia mbɔtɛmɔla. (Luka 21:2, 3) Nde mɛnaka eyango aso ndo kɛnɛ kele l’otema aso. Kaanga sho pombaka ndjela losanganya lo telefɔnɛ, sho koka ndjashikikɛ dia Jehowa mɛnaka “aamɛɛ” wataso l’okitshakitsha. Dui sɔ kimanyiyaka dia mbotombola kaamɛ.

“Aamɛɛ” aso koka mɛnama oko bu la nɛmɔ di’efula, koko vɔ wekɔ ohomba efula. Dibuku dimɔtshi diendana l’awui wa Bible mbutaka ɔnɛ “lo nkamba la tshɛkɛta tshɔi shɔ,” ekambi wa Nzambi koka mɛnya “eshikikelo, nsaki k’efula ka mbetawɔma ndo elongamelo k’efula kele l’etema awɔ.” Nyɛsɔ tosale dia ngɛnyangɛnya Jehowa lo mbutaka “aamɛɛ” tshɛ l’otema ɔtɔi.​—Os. 19:14.