Takashola ‘didi diele la nɛmɔ efula’

Winston, ototɛ woho wakayayange Nzambi.

Lakodiama lo nkumbo kele bu atɛmɔdi lo shamba mɔtshi ya Queensland, Australie. Lam’ele taki lo shamba, dimi kondeka mbekesanɛ l’anto akina paka l’ase nkumbo kami ato. Ntatɛ oma l’ɛnɔnyi oko 12, mbakamatatɛ nyanga Nzambi. Lakɔlɔmbɛ dia dimi mbeya akambo wa mɛtɛ wendana la nde. L’ekomelo, lakayomɔ oma lo shamba ndo lakayokondja olimu la Adélaïde, Australie-Méridionale. Lam’akimi l’ɛnɔnyi 21, lakɛnana la Pam etena kakimi lo vakashi la Sydney, nde akasawola la mi lo kɛnɛ kendana l’ase ɔtɛmwɛlɔ wa israélo-britannique, wanɛ wakataka ɔnɛ ase Grande-Bretagne wekɔ tokanula ta waoho dikumi wakashishɔ w’Isariyɛlɛ. Ase ɔtɛmwɛlɔ ɔsɔ mbutaka dia waoho dikumi asɔ ekɔ waoho wa lo diolelo dia lo nɔrdɛ wakatshu lo lɔhɔmbɔ lo ntambe k’enanɛi N.T.D. Diakɔ diele etena kakamakalola la Adélaïde, lakasawola la osekami la l’olimu lakekaka Bible l’Ɛmɛnyi wa Jehowa dikambo sɔ. L’ɔkɔngɔ wa nsawola la nde wenya engana, sawo diaso diakaleke mendana la dietawɔ di’Ɛmɛnyi wa Jehowa, ko lakashihodia ɔnɛ dɔmbɛlɔ diami di’oma ko dikɛnda diakatatɛ kadimɔma. Lakatatɛ mbeka akambo wa mɛtɛ wendana la Otungi ami ndo la Diolelo diande! Lakashola ‘didi diele la nɛmɔ efula.’​—Mat. 13:45, 46.

Pam, wɛ lawɔ akatatɛ nyanga didi di’oshinga wolo sɔ oma ko nshi yayɛ ya dikɛnda. Ngande wakayadishola?

Dimi lakodiama lo nkumbo k’atɛmɔdi l’osomba wa Coffs Harbour, Nouvelle-Galles du Sud. Ambutshi ami ndo watshɛmi waketawɔka wetshelo w’ase israélo-britannique. Wakatetsha dimi, kosɛmi ka pami, enondo ami la womoto kaamɛ l’anto akina wakelanɛka la so ana l’ana, dia Nzambi akalekaka mbɔsa la nɛmɔ anto wele watshɛwɔ waki ase Grande-Bretagne. Koko dimi kombetawɔ ndo lakatetemala monga la ndjala ka lo nyuma. Etena kakimi l’ɛnɔnyi 14, lakatshu lo ɛtɛmwɛlɔ wotshikitanyi, ɛnyɛlɔ ɔtɛmwɛlɔ wa anglican, wa Batistɛ ndo wa adventistes du septième jour. Koko lakatetemala monga la ndjala ka lo nyuma.

L’ɔkɔngɔ diko, nkumbo kaso kakayonɔ la Sydney, lɛnɛ akamatɛnana la Winston, lakatshu lo vakashi lɛkɔ. Oko wakandatshi, ɔkɛtshanyelo aso wendana l’ɔtɛmwɛlɔ wakayookonya dia ntatɛ mbeka l’Ɛmɛnyi wa Jehowa. Oma laasɔ, mikanda wakandatomɛka waki la avɛsa tɔɔ lɔkɔ! Lo mɛtɛ, l’etatelo awui akɔ wakakiyanyaka ndo wakambishaka kɛlɛ. Koko yema yema lakayoshihodia dia kɛnɛ kakandafundɛka kaki akambo wa mɛtɛ wendana la Nzambi.

Lo 1962, lakonɔ la Adélaïde dia tonga suke la Winston. Nde akalɔngɔsɔla dia dimi todjasɛ la Thomas la Janice Sloman, wadi l’omi w’Ɛmɛnyi wa Jehowa, waki waa misiɔnɛrɛ la Papouasie-Nouvelle-Guinée. Vɔ wakasalɛ ɔlɔlɔ w’efula; dimi laki paka l’ɛnɔnyi 18, ndo vɔ wakakimanyiya efula lo nyuma. Diakɔ diele dimi lawɔ lakatatɛ mbeka Ɔtɛkɛta wa Nzambi ndo aha la ntshimbatshimba, laketawɔ dia lakashola akambo wa mɛtɛ. L’ɔkɔngɔ wa dimi la Winston tshukana, aha la ntshimbatshimba takatatɛ nkamba olimu woleki mbisha ɔngɛnɔngɛnɔ lo lɔsɛnɔ, mbuta ate olimu wakatokimanyiya dia ndeka mbɔsa didi dia dimɛna sɔ la nɛmɔ kaanga mbakiso l’ehemba.

Winston, otɔkɔndɔlɛ yema etatelo ka lɔsɛnɔ layɛ l’olimu wa Jehowa.

Kombeta edja oma laasɔ, dimi la Pam takatshukana, Jehowa akatatɛ todiholɛ lokuke la ntondo l’atei wa ‘nkuke efula ya weke’ dia mpamia olimu. (1 Kɔr. 16:9) Lokuke la ntondo lakatodihwamɛ l’ekimanyielo k’ɔnangɛso Jack Porter, lakakambaka oko omendji w’otshimbedi l’etshumanelo kaso ka tshitshɛ. (Nde ekɔ nshi nyɛ osekami la lo kɔmite ka filialɛ ka Australasie.) Jack la wadɛnde Roslyn, wakatokeketsha dia nkamba oko ambatshi mboka wa pondjo, olimu wakatakambe l’ɔngɛnɔngɛnɔ l’edja k’ɛnɔnyi etanu. Etena kakimi l’ɛnɔnyi 29, wakatɔlɔmbɛ dimi la Pam dia tokamba olimu w’otshimbedi l’asɛnga wa lo Pacifique Sud, wakayendama oma le filialɛ ka Fidji. Asɛnga akɔ vɔanɛ: Samoa américaines, Samoa, Kiribati, Nauru, Niue, Tokelau, Tonga, Tuvalu, ndo Vanuatu.

Lo nshi shɔ, anto wa lo asɛnga amɔtshi wokakitɔnyi etale wakakanɛka Ɛmɛnyi wa Jehowa kɔlɔ, diakɔ diele takahombe monga la yewo ndo la kɛsɔ. (Mat. 10:16) Tshumanelo diaki totshitshɛ ndo dimɔtshi komonga l’akoka wa tohangiya. Ɔnkɔnɛ, takalɔmbɛ ase ngelo dia tohangiya ndo vɔ wakatosalɛka mbala tshɛ akambo w’ɛlɔlɔ.

Winston, wɛ akalange olimu w’okadimwelo efula. Kakɔna kakakotshutshuya dia nanga olimu ɔsɔ?

L’etena kɛsɔ, anangɛso wa lo disɛnga dia Tonga waki paka la traktɛ ndo tobukubuku yema tshitshɛ lo tongien, ɔtɛkɛta ɔmɔtshi wa la Polynésie. L’olimu w’esambishelo, vɔ wakekaka l’anto l’ekimanyielo ka dibuku La vérité qui conduit à la vie éternelle dia l’Angɛlɛ. Ɔnkɔnɛ, lo kalasa ka dikumanyi kakasalema mingu nyɛi, dikumanyi sato dia lo ngelo kɛsɔ diaki kombeyaka Angɛlɛ kambe diaketawɔ dia nkadimola dibuku La vérité lo tongien. Pam mbakatafundaka awui wakawatakadimolaka ndo takaditome lo filialɛ ka l’États-Unis dia vɔ toditondja. Olimu ɔsɔ wakasalema l’edja ka mingu enanɛi. Kaanga mbele okadimwelo komonga wa dimɛna efula, dibuku sɔ diakakimanyiya anto efula watɛkɛta tongien dia mbeka akambo wa mɛtɛ. Dimi la Pam bu akadimodi, koko dui sɔ diakatotshutshuya dia ndjasha efula l’olimu ɔsɔ.

Pam, ngande waki lɔsɛnɔ la l’asɛnga lo mbɛdika la lɔsɛnɔ la l’Australie?

Aki otshikitanu w’efula! Nemanɛka la dihole diakiso, l’ahole amɔtshi aki mɛmbɛlɛ, yanyi, tshitshi, bidi, hemɔ ndo lo tena dimɔtshi sho komongaka la diangɔ dia ndɛ efula. Lo wedi okina l’ekomelo ka lushi tshɛ, taki l’ɔngɛnɔngɛnɔ dia mendaka woho wakangayimaka ndjale oma lɛnɛ akiso lo fale, mbuta ate lokombo la lo Samoa la luudu la sɔdu lele oko l’ase Polynésie lele bu la mpele. L’otsho takɛnaka alɛdi wa kɔkɔtshi lo wɛdi ndo osase wa ngɔndɔ wakakɔmamaka lo ndjale. Tena di’amɛna efula sɔ diakatotshutshuyaka dia nkana yimba ndo nsala dɔmbɛlɔ, takanya tokanyi ta kɔlɔ ko tihɛnya la tokanyi t’amɛna.

Takayolangaka ana, wakasalaka tɔsɛkɛsɛkɛ efula ndo wakalangaka mbeya akambo efula, etena kakawatɛnyi sho asungu oma lo wodja okina. Etena kakatembolaka Niue, dikɛnda dia pami dimɔtshi aketshetshaka lonya lande l’anya wa Winston waki la wɛɔsa ndo nde akate ate: “Dimi nangaka sala yayɛ nyɛ.” Mɛnamaka dia nde atɛnaka anya wele la wɛɔsa wa ngasɔ ndo nde kombeyaka woho wakandakoke mbelɛ wɛɔsa akɔ!

Taki la paa l’asolo dia mɛna woho waki anto efula weola ndo wakiwɔ l’ekakatanu. Vɔ waki la dihole dia dimɛna, koko vɔ komongaka la yoonge ya dimɛna ndo ashi wa nnɔ waki yema tshitshɛ. Koko, anangɛso kɔmɛnamaka dia wakayakiyanyaka. Le wɔ ɔsɔ aki yoho ya lɔsɛnɔ ya dimɛna. Vɔ waki l’ɔngɛnɔngɛnɔ nɛ dia vɔ waki kaamɛ la nkumbo kawɔ, waki la dihole dia ntɛmɔla ndo waki la diɛsɛ dia ntombola Jehowa. Ɛnyɛlɔ kawɔ kakatokimanyiya dia ntetemala ndjasha lo awui woleki ohomba ndo monga la lɔsɛnɔ l’ɔsɛlɛngɛ.

Pam, lo tena dimɔtshi diakatshikitana akambo, wɛ akahombaka nyanga ashi wɛmɛ ndo akakatɛka wɛmɛ. Ngande wakayakoke nsala dui sɔ?

Lekɔ la lowando efula le papa. Nde akambetsha awui w’ohomba efula, ɛnyɛlɔ woho wa mpɛtsha dja ya nkunyi ndo wa nkatɛ layɔ diangɔ ndo woho wa nsala naka diangɔ bu efula. Lo wembwelo ɔmɔtshi wakiso la Kiribati, takadjasɛ lo luudu la sɔdu la tshitshɛ, laki la odihe wa kɔrai ndo mpele di’asɛmbɛ. Dia katɛka, lakatshime difuku l’odihe dia pɛtshaka dja ndo lakadjaka mposo ya kɔkɔtshi dia mpɛtsha dja. Lo dikambo di’ashi, lakatshɔka kaamɛ la wamato wa lo ngelo l’ɛtɛkɔ. Dia ntahola ashi, vɔ wakakambaka la lɔsɔlɔ la mɛtrɛ hiende la ɔkɔdi wa tshitshɛ wakakelekamaka la koma yalɔ oko oshinga wa yɔdi. Koko lo dihole dia mbidja yɔdi la koma kina y’oshinga, vɔ kelekaka bomba lɔkɔ. Etena kakawakomaka lo mbala kande, womoto tshɛ akokɛka ɔkɔdi ko oma laasɔ nde nkotola la lonya l’etena kahombama. Bomba kakadindaka ndo kakalolaka l’ashi. Lakafɔnyaka di’aki dui dia wɔdu, polo lam’akakoke mbala kami. Lakokɛ ɔkɔdi mbala efula, koko bomba kakakɔmamaka l’ashi ndo kakatehaka! L’ɔkɔngɔ diko, onto tshɛ akatatɛ mbɔla, womoto ɔmɔtshi aketawɔ kimanyiyami. Vɔ wokongaka nshi tshɛ anto w’ɛlɔlɔ ndo wakimanyiyana.

Nyakayolanga olimu anyu lo asɛnga asɔ. Onde nyu koka totɛ awui amɔtshi wa laande wohɔnyu?

Winston: Kɔnɔmbamaka etena k’efula dia mbekesanɛ la mbekelo mɔtshi. Ɛnyɛlɔ, etena kakatoshaka anangɛso mbo ya ndɛ, vɔ wakatodjɛka diangɔ tshɛ. L’etatelo sho kombeyaka dia takahombaka mbatshikɛ yema. Diakɔ diele takalɛka ɛngɔ tshɛ kakawatoshaka! Etena kakatayeya dui sɔ, takawatshikɛka mbo ya ndɛ. Kaanga mbakatasalaka wandja wa ngasɔ, anangɛso wakɛnaka akambo la sso di’ɔlɔlɔ. Ndo vɔ wakangɛnangɛna efula dia tɛnaka l’ɔkɔngɔ wa ngɔndɔ shamalo tshɛ kana etena kakatawaembolaka l’olimu w’otshimbedi. Minya anangɛso waki lo ngelo kɛsɔ, sho ato mbaki Ɛmɛnyi wa Jehowa wakatshɔka dia towaembola l’etena kɛsɔ.

Wembwelo aso nto waki tshondo y’esambishelo le anto wa l’atshunda asɔ. Ase ngelo efula wakafɔnyaka dia ɔtɛmwɛlɔ w’anangɛso asɔ aki dui dimɔtshi diakawatatɛ la diɔ vɔamɛ. Ɔnkɔnɛ, etena kakembola omendji w’otshimbedi la wadɛnde w’oma lo wodja okina anangɛso asɔ, ase ngelo kɛsɔ kondjihɔ tsho washo, koko wakambe efula.

Pam: Dui dimɔtshi diangɛnangɛnami efula diahamohɛki diakasalema la Kiribati, lɛkɔ aki etshumanelo kaki l’anangɛso la akadiyɛso yema tshitshɛ tsho. Itinikai Matera laki tshɔi y’ekumanyi, akasalaka la wolo dia tokotshɛ ehomba aso. Nde akɛnya dui sɔ lushi lɔmɔtshi lakandatela kisaka kaki la okele ɔtɔi. Nde akate ate: “Nyɔshi.” Ekele wa kɔkɔ kondekaka mɛnama le so l’etena kɛsɔ. Dui dia tshitshɛ, koko diɛnya lokaho sɔ diakananda etema aso.

Pam, ambeta ɛnɔnyi ɛmɔtshi wɛ akavusha ɔna lakatombe osondjo. Kakɔna kakakokimanyiya dia mbikikɛ?

Lakatshu diemi lo 1973 etena kakiso dimi la Winston lo Pacifique Sud. Takɔshi yɛdikɔ ya nkalola l’Australie, lɛnɛ akatashisha ɔnaso l’ɔkɔngɔ wa ngɔndɔ nyɛi. Winston nde lawɔ aki la lonyangu l’efula. Kandji kaki lami l’asolo kakatakitakitaka l’edja ka nshi, koko tɔ koshila tshɛ lo tshɛ polo lam’akatayokondja numɛlɔ ka Tshoto y’Etangelo ya Ngɔndɔ ka nɛi 15, 2009. Lo “Ambola w’oma le ambadi” dimbola mbokamaka ɔnɛ: “Naka ɔna ambovɔ la ntondo ka nde mbotɔ, onde elongamelo ka nde ndjolɔ kekɔ?” Sawo diakɔ diakatokeketsha dia ntshika dikambo sɔ l’anya wa Jehowa Nzambi, latosalaka nshi tshɛ kɛnɛ kele ɔlɔlɔ. Nde ayɔkɔnɔla wanɛ tshɛ wakahomɔ mpota lo nsɛnɔ yawɔ lo dikongɛ di’akambo nɛ dia kɔlɔ oko wakandɛnya ngandji kande otsha le Ɔnande lakaye “dia ndanya etsha wa Diabolo.” (1 Jni. 3:8) Sawo sɔ diakatokimanyiya nto dia ndeka mbɔsa “didi” di’oshinga wolo diele laso oko ekambi wa Jehowa la nɛmɔ! Ngande wototoyala otondonga sho bu l’elongamelo ka Diolelo?

L’ɔkɔngɔ wa sho mvusha ɔnaso, takanyomokamba olimu wa lo tena tshɛ. Takakambe ngɔndɔ mɔtshi lo Bɛtɛlɛ ka l’Australie ndo oma laasɔ takayokalola l’olimu wa l’otshimbedi. Lo 1981, l’ɔkɔngɔ wa sho nkamba ɛnɔnyi ɛnɛi lo Nouvelle-Galles du Sud ndo Sydney, wakatelɛ dia tokamba lo Bɛtɛlɛ ka l’Australie, ndo lɛkɔ mbakambaso oma ko l’etena kɛsɔ.

Winston, onde awui wakahomana layɛ lo asɛnga wa Pacifique Sud wambokokimanyiya l’olimu ayɛ oko weyɛ ose kɔmite ka filialɛ ka l’Australie?

Eelo, lo toho efula. Ntondotondo, wakalɔmbɛ Australie dia mendaka Samoa américain ndo Samoa. Oma laasɔ, filialɛ ka Nouvelle-Zélande kakasanganyema la ka Australie. Nshi nyɛ, filialɛ ka Australasie kekɔ la bɛtshi dia nkɛtɛ diayela nɛ: Australie, Samoa américain ndo Samoa, îles Cook, Nouvelle-Zélande, Niue, Timor oriental, Tokelau, ndo Tonga, lakembola efula l’atei adiɔ oko onyimpala wa Bɛtɛlɛ. Diewo diakamakondja lo nkamba kaamɛ la anangɛso l’akadiyɛso wa kɔlamelo wa lo asɛnga asɔ diakakimanyiya efula oko waakambɛmi l’etena kɛnɛ lo biro ka filialɛ.

Dia nkomiya, dimi la Pam tamboshihodia dia aha tsho epalanga mbayanga Nzambi, tambeya dui sɔ oma lo kɛnɛ kakatokomɛ lo lɔsɛnɔ. Akɛnda vɔ lawɔ nangaka ‘didi diele la nɛmɔ efula’ sɔ, oyadi ase nkumbo hawoyasha. (2 Ku. 5:2, 3; 2 Ɛk. 34:1-3) Lo mɛtɛ, Jehowa ekɔ Nzambi ka ngandji kalanga di’anto tshɛ, epalanga kana akɛnda nkondja lɔsɛnɔ!

Etena kakatatatɛ dimi la Pam nyanga Nzambi ambeta ɛnɔnyi ndekana 50, sho kondekaka mbeya lɛnɛ akakoke dikambo sɔ tokonya. Aha la taamu, akambo wa mɛtɛ wa Diolelo wekɔ didi di’oshinga wolo efula! Tamboyashikikɛ dia nkukutɛ didi di’oshinga wolo sɔ la wolo tshɛ!